៦-៧. តណ្ហក្ខយសុត្តាទិវណ្ណនា

២០៧-២០៨. ‘‘សោ មំ បុច្ឆិស្សតី’’តិ អធិប្បាយេន ភគវតា ឱសាបិតទេសនំ. បត្ថដត្តា ភាវនាបារិបូរិយា វិត្ថារិតំ គតត្តា. មហន្តភាវន្តិ ភាវនាវសេនេវ មហត្តំ គតត្តា. តតោ ឯវ វឌ្ឍិប្បមាណា. នីវរណវិគមេ សម្ភវតោ បច្ចយតោ ព្យាបាទោ វិគតោ ហោតីតិ អាហ – ‘‘នីវរណានំ ទូរីភាវេន ព្យាបាទវិរហិតត្តា’’តិ. តណ្ហាមូលកន្តិ តណ្ហាបច្ចយំ. យញ្ហិ តណ្ហាសហគតំ អសហគតម្បិ តណ្ហំ ឧបនិស្សាយ និប្ផន្នំ, សព្ពំ តំ តណ្ហាមូលកំ. បហីយតិ អនុប្បាទប្បហានេន. តណ្ហាទីនំយេវ ខយា, ន តេសំ សង្ខារានំ ខយា. ឯតេហិ តណ្ហក្ខយាទិបទេហិ.