៤. បាតាលសុត្តវណ្ណនា

២៥២. យត្ថ បតិដ្ឋា នត្ថិ ឯកន្តិកាតិ ឯកន្តិកស្ស មហតោ បាតស្ស អលន្តិ អយមេត្ថ អត្ថោ អធិប្បេតោតិ អាហ ‘‘នត្ថិ ឯត្ថ បតិដ្ឋា’’តិ. អសម្ភូតត្ថន្តិ ន សម្ភូតត្ថំ, មុសាតិ អត្ថោ. សោតិ អស្សុតវា បុថុជ្ជនោ. យំ តំ ឧទកំ បតតីតិ យោជនា. យស្មា សមុទ្ទបិដ្ឋេ អន្តរន្តរា វេរម្ភវាតសទិសោ មហាវាតោ ឧដ្ឋហិត្វា មហាសមុទ្ទេ ឧទកំ ឧគ្គច្ឆាបេតិ, តំ កទាចិ ចក្កវាឡាភិមុខំ, កទាចិ សិនេរុបាទាភិមុខំ គន្ត្វា តំ បតិហនតិ, តស្មា វុត្តំ ‘‘ពលវាមុខំ មហាសមុទ្ទស្សា’’តិអាទិ. វេគេន បក្ខន្ទិត្វាតិ មហតា វាតវេគេន សមុទ្ធតំ តេនេវ វេគេន បក្ខន្ទន្តញ្ច ហុត្វា. មហានរកបបាតោ វិយាតិ យោជនាយាមវិត្ថារគម្ភីរសោព្ភបបាតោ វិយ ហោតិ. តថារូបានន្តិ តត្ថ វសិតុំ សមត្ថានំ. អសន្តន្តិ អភូតំ. អត្ថវសេន ហិ វាចា អភូតំ នាម.

ន បតិដ្ឋាសីតិ បតិដ្ឋំ ន លភិ. អនិពទ្ធន្តិ អនិពន្ធនត្ថំ យំកិញ្ចិ. ទុព្ពលញាណោតិ ញាណពលរហិតោ. ‘‘អស្សុតវា បុថុជ្ជនោ’’តិ វត្វា ‘‘សុតវា អរិយសាវកោ’’តិ វុត្តត្តា ‘‘សោតាបន្នោ ធុរ’’ន្តិ វុត្តំ. ឥតរេសុ អរិយសាវកេសុ វត្តព្ពមេវ នត្ថិ. តេសញ្ហិ វេទនា សុបរិញ្ញាតា. ពលវវិបស្សកោ…បេ… យោគាវចរោបិ វដ្ដតិ មត្តសោ វេទនានំ បរិញ្ញាតត្តា.

បាតាលសុត្តវណ្ណនា និដ្ឋិតា.