៥. ទដ្ឋព្ពសុត្តវណ្ណនា

២៥៣. វិបរិណាមនវសេន ទុក្ខតោ ទដ្ឋព្ពាតិ កិញ្ចាបិ សុខា, បរិណាមទុក្ខតា បន សុខវេទនាយ ឯកន្តិកាតិ. វិនិវិជ្ឈនដ្ឋេនាតិ បីឡនវសេន អត្តភាវស្ស វិជ្ឈនដ្ឋេន. ហុត្វាតិ បច្ចយសមាគមេន ឧប្បជ្ជិត្វា. តេន បាកភាវបុព្ពកោ អត្តលាភោ វុត្តោ. អភាវាការេនាតិ ភង្គុបគមនាការេន. តេន វិទ្ធំសភាវោ វុត្តោ. ឧភយេន ឧទយព្ពយបរិច្ឆិន្នតាយ សិខប្បត្តំ អនិច្ចតំ ទស្សេតិ. ស្វាយំ ហុត្វា អភាវាការោ ឥតរាសុបិ វេទនាសុ លព្ភតេវ, អធិកោ ច បន ទ្វិន្នំ ទុក្ខសភាវោ. ទុក្ខតាវសេន បុរិមានំ វេទនានំ ទដ្ឋព្ពតាយ ទស្សិតត្តា បច្ឆិមាយ វេទនាយ ឯវំ ទដ្ឋព្ពតា ទស្សិតា. អទ្ទាតិ ញាណគតិយា សច្ឆិកត្វា អទក្ខិ. ញាណគមនញ្ហេតំ, យទិទំ ទុក្ខតោ ទស្សនំ. សន្តសភាវំ សុខទុក្ខតោ ឧបសន្តរូបត្តា.

ទដ្ឋព្ពសុត្តវណ្ណនា និដ្ឋិតា.