២. អាវាសិកវត្តកថា

៣៥៩. អាវាសិកវត្តេ ឯវំ វិនិច្ឆយោ វេទិតព្ពោតិ យោជនា. សព្ពំ កាតព្ពន្តិ សម្ពន្ធោ. តស្សាតិ វុឌ្ឍតរស្ស អាគន្តុកស្ស. ‘‘បណ្ឌិតោ’’តិអាទិនា សចេ ពាលោ ‘‘សម្មជ្ជាហិ តាវ ចេតិយង្គណ’’ន្តិ ន វទតិ, សម្មជ្ជនិំ និក្ខិបិត្វា តស្ស វត្តមេវ កាតព្ពន្តិ ទស្សេតិ. ភេសជ្ជមេវ កាតព្ពន្តិ សហាវធារណេន វុត្តត្តា ពាលោ ‘‘ករោហិ តាវ ភេសជ្ជ’’ន្តិ អវទន្តោបិ ភេសជ្ជមេវ កាតព្ពំ. ‘‘បណ្ឌិតោ ហី’’តិអាទិនា បន អាគន្តុកស្ស វត្តព្ពភាវមត្តមេវ ទស្សេតិ. បាឡិមុត្តកវត្តំ ទស្សេន្តោ អាហ ‘‘អបិចា’’តិអាទិ. ពីជនេនាតិ ពីជនិយា. ‘‘ពីជន’’ន្តិ ហិ នបុំសកលិង្គោ, ‘‘ពីជនី’’តិ ឥត្ថិលិង្គោ. ‘‘ពីជិតព្ពោ’’តិ ច ‘‘ពីជិតព្ព’’ន្តិ ច ឥមិនា អដ្ឋកថាវចនេន ពីជិយតិ អនេនាតិ ពីជនំ, ពីជិយតិ ឯតាយាតិ ពីជនីតិ វចនត្ថោ កាតព្ពោ. អស្សាតិ វុឌ្ឍតរអាគន្តុកស្ស. មក្ខេតព្ពាតិ អញ្ជេតព្ពា. ហីតិ សច្ចំ. ឯត្ថាតិ ឧបាហនបុញ្ឆនេ. កត្ថាតិ កស្មិំ វិហារេ. បុច្ឆិតេន អាវាសិកេនាតិ សម្ពន្ធោ.

‘‘អត្តនោ សន្តិកំ…បេ… ន លភតី’’តិ ឥមិនា អត្តានំ សន្ធាយ អនាគច្ឆន្តោបិ អត្តនោ សន្តិកំ សម្បត្តស្ស អាគន្តុកស្ស វត្តំ អកាតុំ ន លភតីតិ ទស្សេតិ.