១១៤. សង្ឃភេទេ អនាបត្តិវស្សច្ឆេទកថា

២០២. ភិន្នោតិ ឯត្ថ តបច្ចយស្ស អតីតត្ថេ អយុត្តភាវំ ទស្សេន្តោ អាហ ‘‘ភិន្នេ សង្ឃេ ករណីយំ នត្ថី’’តិ. យោ បនាតិ សង្ឃោ បន. ឥទំ ‘‘ភិជ្ជិស្សតី’’តិបទេ កត្តា, ‘‘អាសង្កិតោ’’តិបទេ កម្មំ. ‘‘ភិជ្ជិស្សតី’’តិ ឥមិនា ភិន្នោតិ ឯត្ថ តបច្ចយស្ស អនាគតត្ថេ បវត្តភាវំ ទស្សេតិ. ភិក្ខុនីហិ សង្ឃោ ភិន្នោតិ ឯត្ថ កិំ ភិក្ខុនីហិ សង្ឃោ ភិន្នោតិ ទដ្ឋព្ពោតិ អាហ ‘‘ន ភិក្ខុនីហិ សង្ឃោ ភិន្នោតិ ទដ្ឋព្ពោ’’តិ. ឯតន្តិ ភិក្ខុនីហិ អភិន្នភាវំ. ឯតា បនាតិ ភិក្ខុនិយោ បន. តន្តិ សង្ឃំ. ឯតន្តិ ‘‘សម្ពហុលាហិ ភិក្ខុនីហិ សង្ឃោ ភិន្នោ’’តិ វចនំ.