១១៥. វជាទីសុ វស្សូបគមនកថា

២០៣. ‘‘គោបាលកានំ និវាសដ្ឋាន’’ន្តិ ឥមិនា គោបាលកា គាវោ វិយ វជេ និវសន្តីតិ ទស្សេតិ.

ឧបកដ្ឋសទ្ទោ អាសន្នបរិយាយោតិ អាហ ‘‘អាសន្នាយា’’តិ. តត្ថាតិ កុដិកាយំ. ឥធាតិ ឥមិស្សំ កុដិកាយំ. អវិហារត្តា ‘‘ឥធាតិ’’សាមញ្ញវសេន វុត្តំ. តិក្ខត្តុន្តិ ឥទំ ឧក្កដ្ឋវសេន វុត្តំ. ហេដ្ឋា ហិ ‘‘សកិំ វា ទ្វិក្ខត្តុំ វា តិក្ខត្តុំ វា’’តិ (មហាវ. អដ្ឋ. ១៨៤) វុត្តត្តា សកិម្បិ វដ្ដតីតិ ទដ្ឋព្ពំ. តម្បីតិ សាលាសង្ខេបេន ឋិតសកដម្បិ. ‘‘អាលយោ’’តិ ឥមិនា ‘‘ឥធ វស្សំ ឧបេមី’’តិ វចីភេទោ ន កាតព្ពោតិ ទស្សេតិ. អាលយោតិ ច សត្ថេ ‘‘ឥធ វស្សំ វសិស្សាមី’’តិ ចិត្តស្ស អល្លីយនំ. មគ្គបដិបន្នេយេវ សត្ថេតិ អនាទរេ ភុម្មវចនំ. តត្ថេវាតិ សត្ថេយេវ. សត្ថោ អតិក្កមតីតិ សម្ពន្ធោ. តត្ថាតិ បត្ថិតដ្ឋានេ. វិប្បកិរតីតិ វិសុំ វិសុំ គច្ឆតិ. សចេ អគាមកេ ឋានេ វិប្បកិរតិ, បុរិមំ គាមំ សន្និវត្តិតព្ពំ. ន អញ្ញគាមំ គន្តព្ពំ. តតោតិ គាមតោ.

ឧបគន្តព្ពន្តិ ‘‘ឥធ វស្សំ ឧបេមី’’តិ តិក្ខត្តុំ វត្វា ឧបគន្តព្ពំ. តត្ថេវាតិ សមុទ្ទេយេវ. កូលន្តិ តីរំ. តញ្ហិ កុលតិ ឧទកំ អាវរតីតិ កូលន្តិ វុច្ចតិ. អយញ្ចាតិ នាវាយំ វស្សូបគមនភិក្ខុ. អនុតីរមេវាតិ អនុក្កមេន, អនុសារេន វា តីរមេវ. អញ្ញត្ថាតិ បឋមលទ្ធគាមតោ អញ្ញស្មិំ ឋានេ. តត្ថេវាតិ បឋមលទ្ធគាមេយេវ.

ឥតីតិអាទិ និគមនំ. បវារេតុញ្ច លភតីតិ ឯត្ថ ចសទ្ទោ វាក្យសម្បិណ្ឌនត្ថោ. បុរិមេសុ ច បនាតិ ឯត្ថ ចសទ្ទោ ព្យតិរេកត្ថោ, បនសទ្ទោ វិសេសត្ថជោតកោ. អនាបត្តិ ហោតីតិ អនាបត្តិមត្តមេវ ហោតិ.