៥. បញ្ចមសិក្ខាបទំ

៩០៣. បញ្ចមេ ‘‘ចីវរសង្កមនីយ’’ន្តិឯត្ថ សង្កមេតព្ពំ បដិទាតព្ពន្តិ សង្កមនីយន្តិ កមុធាតុស្ស បដិទានត្ថញ្ច អនីយសទ្ទស្ស កម្មត្ថញ្ច, ‘ចីវរញ្ច តំ សង្កមនីយញ្ចេ’តិ ចីវរសង្កមនីយន្តិ វិសេសនបរបទភាវញ្ច ទស្សេន្តោ អាហ ‘‘សង្កមេតព្ពំ ចីវរ’’ន្តិ. តត្ថ ‘‘សង្កមេតព្ពំ ចីវរ’’ន្តិ ឥមិនា កម្មត្ថញ្ច វិសេសនបរបទភាវញ្ច ទស្សេតិ. ‘‘បដិទាតព្ពចីវរ’’ន្តិ ឥមិនា កមុធាតុយា អត្ថំ ទស្សេតិ អធិប្បាយវសេនាតិ. បញ្ចមំ.