៣. នគ្គវគ្គោ

១. បឋមសិក្ខាបទ-អត្ថយោជនា

៨៨៣. នគ្គវគ្គស្ស បឋមេ ព្រហ្មចរិយេន ចិណ្ណេនាតិ ចិណ្ណេន ព្រហ្មចរិយេន កិំ នុ ខោ នាមាតិ អត្ថោ. ‘‘ព្រហ្មចរិយស្ស ចរណេនា’’តិ ឥមិនា ចិណ្ណសទ្ទស្ស ចរណំ ចិណ្ណន្តិ វចនត្ថំ ទស្សេតិ. ‘‘ន អញ្ញំ ចីវរ’’ន្តិ ឥមិនា ឯវត្ថំ ទស្សេតិ, អញ្ញត្ថាបោហនំ វាតិ. បឋមំ.

២. ទុតិយសិក្ខាបទំ

៨៨៧. ទុតិយេ អនុត្តានដ្ឋានំ នត្ថីតិ. ទុតិយំ.

៣. តតិយសិក្ខាបទំ

៨៩៣. តតិយេ អនន្តរាយិកិនីតិ ឯត្ថ នត្ថិ អន្តរាយោ ឯតិស្សាតិ អនន្តរាយា, សា ឯវ អនន្តរាយិកិនីតិ វចនត្ថំ ទស្សេន្តោ អាហ ‘‘អនន្តរាយា’’តិ. តតិយំ.

៤. ចតុត្ថសិក្ខាបទំ

៨៩៨. ចតុត្ថេ បញ្ចាហន្តិ សមាហារទិគុ, ណិកបច្ចយោ ស្វត្ថោ. សង្ឃាដិចារោតិឯត្ថ កេនដ្ឋេន សង្ឃាដិ នាម, ចារសទ្ទោ កិមត្ថោតិ អាហ ‘‘បរិភោគវសេន វា’’តិអាទិ. តត្ថ សង្ឃដិតដ្ឋេនាតិ សំហរិតដ្ឋេន. ឥមិនា ‘‘កេនដ្ឋេន សង្ឃាដិ នាមា’’តិ បុច្ឆំ វិសជ្ជេតិ. ‘‘បរិវត្តន’’ន្តិ ឥមិនា ‘‘ចារសទ្ទោ កិមត្ថោ’’តិ ចោទនំ បរិហរតិ. បញ្ចសូតិ តិចីវរំ ឧទកសាដិកា សំកច្ចិកាតិ បញ្ចសូតិ. ចតុត្ថំ.

៥. បញ្ចមសិក្ខាបទំ

៩០៣. បញ្ចមេ ‘‘ចីវរសង្កមនីយ’’ន្តិឯត្ថ សង្កមេតព្ពំ បដិទាតព្ពន្តិ សង្កមនីយន្តិ កមុធាតុស្ស បដិទានត្ថញ្ច អនីយសទ្ទស្ស កម្មត្ថញ្ច, ‘ចីវរញ្ច តំ សង្កមនីយញ្ចេ’តិ ចីវរសង្កមនីយន្តិ វិសេសនបរបទភាវញ្ច ទស្សេន្តោ អាហ ‘‘សង្កមេតព្ពំ ចីវរ’’ន្តិ. តត្ថ ‘‘សង្កមេតព្ពំ ចីវរ’’ន្តិ ឥមិនា កម្មត្ថញ្ច វិសេសនបរបទភាវញ្ច ទស្សេតិ. ‘‘បដិទាតព្ពចីវរ’’ន្តិ ឥមិនា កមុធាតុយា អត្ថំ ទស្សេតិ អធិប្បាយវសេនាតិ. បញ្ចមំ.

៦. ឆដ្ឋសិក្ខាបទំ

៩០៩. ឆដ្ឋេ ‘‘អញ្ញំ បរិក្ខារ’’ន្តិឯត្ថ បរិក្ខារស្ស សរូបំ ទស្សេន្តោ អាហ ‘‘យំកិញ្ចី’’តិអាទិ. យំកិញ្ចិ អញ្ញតរន្តិ សម្ពន្ធោ. កិត្តកំអគ្ឃនកន្តិ កិំ បមាណេន អគ្ឃេន អរហំ ចីវរំ. ទាតុកាមត្ថាតិ តុម្ហេ ទាតុកាមា ភវថាតិ អត្ថោ. កតិបាហេនាតិ កតិបយានិ អហានិ កតិបាហំ, យការលោបោ. កតិបយសទ្ទោហិ ទ្វិតិវាចកោ រូឡ្ហីសទ្ទោ, តេន កតិបាហេន. សមគ្ឃន្តិ អប្បគ្ឃំ. សំសទ្ទោ ហិ អប្បត្ថវាចកោតិ. ឆដ្ឋំ.

៧. សត្តមសិក្ខាបទំ

៩១១. សត្តមេ ‘‘វិបក្កមិំសូ’’តិ ឯត្ថ វិវិធំ ឋានំ បក្កមិំសូតិ ទស្សេន្តោ អាហ ‘‘តត្ថ តត្ថ អគមំសូ’’តិ. អម្ហាកម្បិ អាគមនន្តិ សម្ពន្ធោ.

៩១៥. កតិបាហេន ឧប្បជ្ជិស្សតីតិ កតិបាហេន ចីវរំ ឧប្បជ្ជិស្សតិ. តតោតិ តស្មិំ ចីវរុប្បជ្ជនកាលេតិ. សត្តមំ.

៨. អដ្ឋមសិក្ខាបទំ

៩១៦. អដ្ឋមេ យេ នាដកំ នាដេន្តិ, តេ នដា នាមាតិ យោជនា. ឥមិនា នដកំ នាដេន្តីតិ នដាតិ វចនត្ថំ ទស្សេតិ. យេ នច្ចន្តិ, តេ នាដកា នាមាតិ យោជនា. ឥមិនា សយំ នដន្តីតិ នាដកាតិ វចនត្ថំ ទីបេតិ. វំសវរត្តាទីសូតិ ឯត្ថ វំសោ នាម វេណុ. វរត្តា នាម នទ្ធិកា. អាទិសទ្ទេន រជ្ជុអាទយោ សង្គណ្ហាតិ. យេ លង្ឃនកម្មំ ករោន្តិ, តេ លង្ឃកា នាមាតិ យោជនា. មាយាការាតិ ឯត្ថ មាយា នាម មយនាមកេន អសុរេន សុរេ ចលយិតុំ កតត្តា មយស្ស ឯសាតិ មាយា, តំ ករោតីតិ មាយាការោ, មយនាមកោ អសុរោយេវ. អញ្ញេ បន រូឡ្ហីវសេន ‘‘មាយាការា’’តិ វុច្ចន្តិ. សោកេន ឈាយនំ ឌយ្ហនំ សោកជ្ឈាយំ, សុរានំ សោកជ្ឈាយំ ករោតីតិ សោកជ្ឈាយិកោ, មយនាមកោ អសុរោយេវ. អញ្ញេ បន រូឡ្ហីវសេន ‘‘សោកជ្ឈាយិកា’’តិ វុច្ចន្តិ. ឥតិ ឥមមត្ថំ ទស្សេតុំ វុត្តំ ‘‘សោកជ្ឈាយិកា នាម មាយាការា’’តិ. កុម្ភថុណិកា នាមាតិ ឯត្ថ វិស្សដ្ឋត្តា ថវីយតីតិ ថុណោ, សទ្ទោ. កុម្ភស្ស ថុណោ កុម្ភថុណោ. តេន កីឡន្តីតិ កុម្ភថុណិកា, ឥតិ ឥមមត្ថំ ទស្សេតិ ‘‘ឃដកេន កីឡនកា’’តិ ឥមិនា. ពិម្ពិសកន្តិ ចតុរស្សអម្ពណតាឡនំ, តំ វាទេន្តីតិ ពិម្ពិសកវាទកាតិ. អដ្ឋមំ.

៩. នវមសិក្ខាបទំ

៩២១. នវមេ តេសន្តិ យេ ‘‘ន មយំ អយ្យេ សក្កោមា’’តិ វទន្តិ, តេសំ. ទស្សតីតិ អច្ឆាទេស្សតីតិ. នវមំ.

១០. ទសមសិក្ខាបទំ

៩២៧. ទសមេ យស្សាតិ កថិនស្ស. ឧព្ភារមូលកោតិ ឧទ្ធារមូលកោ. សទ្ធាបរិបាលនត្ថន្តិ កថិនុទ្ធារំ យាចន្តស្ស សទ្ធាយ បរិបាលនត្ថន្តិ. ទសមំ.

នគ្គវគ្គោ តតិយោ.