៤. តុវដ្ដវគ្គោ

១. បឋមសិក្ខាបទ-អត្ថយោជនា

៩៣៣. តុវដ្ដវគ្គស្ស បឋមេ ‘‘តុវដ្ដ និបជ្ជាយ’’ន្តិ ធាតុបាឋេសុ (សទ្ទនីតិធាតុមាលាយំ ១៨ ដការន្តធាតុ) វុត្តត្តា ‘‘តុវដ្ដេយ្យុន្តិ និបជ្ជេយ្យុ’’ន្តិ វុត្តន្តិ. បឋមំ.

២. ទុតិយសិក្ខាបទំ

៩៣៧. ទុតិយេ ឯកត្ថរណបាវុរណន្តិឯត្ថ ឧត្តរបទានំ ទ្វន្ទភាវំ, បុព្ពបទេន ច ពាហិរត្ថសមាសភាវំ ទស្សេតុំ វុត្តំ ‘‘ឯក’’ន្តិអាទិ. តត្ថ ចេវ, ចសទ្ទេហិ ទ្វន្ទភាវំ ទីបេតិ, ‘‘ឯតាស’’ន្តិឥមិនា ពាហិរត្ថសមាសភាវំ. ឯតន្តិ ‘‘ឯកត្ថរណបាវុរណា’’តិ ឯតំ នាមន្តិ. ទុតិយំ.

៣. តតិយសិក្ខាបទំ

៩៤១. តតិយេ ឧឡារកុលាតិ ជាតិសេដ្ឋកុលា, ឥស្សរិយភោគាទីហិ វា វិបុលកុលា. គុណេហីតិ សីលាទិគុណេហិ. ‘‘ឧឡារាតិ សម្ភាវិតា’’តិ ឥមិនា ឥតិលោបតុល្យាធិករណសមាសំ ទស្សេតិ.

‘‘អភិភូតា’’តិ ឥមិនា ‘‘អបកតា’’តិ ឯត្ថ ករធាតុ សព្ពធាត្វត្ថវាចីបិ ឥធ អបបុព្ពត្តា វិសេសតោ អភិភវនត្ថេ វត្តតីតិ ទស្សេតិ. ឯតាសន្តិ ភិក្ខុនីនំ. ‘‘សញ្ញាបយមានា’’តិ ឥមិនា សញ្ញាបនំ សញ្ញត្តីតិ វចនត្ថំ ទស្សេតិ. ហេតូទាហរណាទីហីតិ ឯត្ថ អាទិសទ្ទេន ឧបមាទយោ សង្គណ្ហាតិ. ‘‘វិវិធេហិ នយេហិ ញាបនា’’តិ ឥមិនា វិវិធេហិ ញាបនំ វិញ្ញត្តីតិ វចនត្ថំ ទស្សេតិ.

៩៤៣. ចង្កមនេ បទវារគណនាយ អាបត្តិយា ន ការេតព្ពោតិ អាហ ‘‘និវត្តនគណនាយា’’តិ. បទាទិគណនាយាតិ បទអនុបទាទិគណនាយាតិ. តតិយំ.

៤. ចតុត្ថសិក្ខាបទំ

៩៤៩. ចតុត្ថេ អនុត្តានដ្ឋានំ នត្ថីតិ. ចតុត្ថំ.

៥. បញ្ចមសិក្ខាបទំ

៩៥២. បញ្ចមេ អាណត្តា ភិក្ខុនីតិ យោជនា. ឥទញ្ច បច្ចាសន្នវសេន វុត្តំ យំកិញ្ចិបិ អាណាបេតុំ សក្កុណេយ្យត្តាតិ. បញ្ចមំ.

៦-៩. ឆដ្ឋាទិសិក្ខាបទំ

៩៥៥. ឆដ្ឋ-សត្តម-អដ្ឋម-នវមេសុ អនុត្តានវចនំ នត្ថីតិ. ឆដ្ឋ សត្តម អដ្ឋម នវមានិ.

១០. ទសមសិក្ខាបទំ

៩៧៣. ទសមេ អហុន្ទរិកាតិ តស្មិំ កាលេ, ទេសេ វា សម្ពាធស្ស នាមមេតន្តិ អាហ ‘‘អហុន្ទរិកាតិ សម្ពាធា’’តិ.

៩៧៥. យថា ‘‘ឧត្តរិឆប្បញ្ចវាចាហី’’តិ (បាចិ. ៦២-៦៥) ឯត្ថ បញ្ចសទ្ទោ ន កោចិ អត្ថោ, វាចាសិលិដ្ឋត្ថំ លោកវោហារវសេន វុត្តោ, ន ឯវមិធ, ឥធ បន អត្ថោ អត្ថិ, បញ្ច យោជនានិ គច្ឆន្តិយាបិ អនាបត្តិយេវាតិ អាហ ‘‘បវារេត្វា…បេ… អនាបត្តី’’តិ. បច្ចាគច្ឆតីតិ បដិនិវត្តេត្វា អាគច្ឆតីតិ. ទសមំ.

តុវដ្ដវគ្គោ ចតុត្ថោ.