៥. ចិត្តាគារវគ្គោ

១. បឋមសិក្ខាបទ-អត្ថយោជនា

៩៧៨. ចិត្តាគារវគ្គស្ស បឋមេ រញ្ញោ កីឡនដ្ឋានំ អគារំ រាជាគារន្តិ វចនត្ថំ ទស្សេន្តោ អាហ ‘‘រញ្ញោ កីឡនឃរ’’ន្តិ. ចិត្តំ អគារំ ចិត្តាគារំ. អារាមន្តិ នគរតោ នាតិទូរអារាមោតិ អាហ ‘‘ឧបវន’’ន្តិ. ឧយ្យានន្តិ សម្បន្នបុប្ផផលតាយ ឧទ្ធំ ឧល្លោកេត្វា មនុស្សា យន្តិ គច្ឆន្តិ ឯត្ថាតិ ឧយ្យានំ. បោក្ខរណិន្តិ បោក្ខរំ បទុមំ នេតីតិ បោក្ខរណី. បញ្ចបីតិ រាជាគារាទីនិ បញ្ចបិ. សព្ពត្ថាតិ ទស្សនត្ថាយ គមនេ ច គន្ត្វា បស្សនេ ចាតិ សព្ពេសុ.

៩៨១. ‘‘អជ្ឈារាមេ’’តិអាទិនា អារាមេ ឋិតាយ អារាមតោ ពហិ កតេ រាជាគារាទិកេ បស្សន្តិយាបិ អនាបត្តីតិ ទស្សេតិ. តានីតិ រាជាគារាទីនីតិ. បឋមំ.

២. ទុតិយសិក្ខាបទំ

៩៨២. ទុតិយេ អនុត្តានដ្ឋានំ នត្ថីតិ. ទុតិយំ.

៣. តតិយសិក្ខាបទំ

៩៨៨. តតិយេ យត្តកន្តិ យត្តកំ សុត្តន្តិ សម្ពន្ធោ. អញ្ឆិតន្តិ កឌ្ឍិតំ. តស្មិន្តិ តត្តកេ សុត្តេតិ សម្ពន្ធោ. តក្កម្ហីតិ ឯត្ថ តក្កោតិ ឯកោ អយោមយោ សុត្តកន្តនស្ស ឧបករណវិសេសោ. សោ ហិ តកីយតិ សុត្តំ ពន្ធីយតិ ឯត្ថ, ឯតេនាតិ វា តក្កោតិ វុច្ចតិ, តស្មិំ. កន្តនតោតិ កន្តីយតេ កប្បាសាទិភាវស្ស ឆិន្ទីយតេ កន្តនំ, តតោ.

៩៨៩. ទសិកសុត្តាទិន្តិ ឯត្ថ ទសាតិ វត្ថស្សាវយវោ. សោ ហិ ទិយ្យតិ អវខណ្ឌីយតីតិ ទសាតិ វុច្ចតិ, តស្សំ ទសាយំ បវត្តំ ទសិកំ, តមេវ សុត្តំ ទសិកសុត្តំ. អាទិសទ្ទេន វក្ខមានំ ទុក្កន្តិតសុត្តាទិំ សង្គណ្ហាតីតិ. តតិយំ.

៤. ចតុត្ថសិក្ខាបទំ

៩៩២. ចតុត្ថេ អាទិំ កត្វាតិ ធោវនាទីនិ អាទិំ កត្វា. ខាទនីយាទីសូតិ បូវខាទនីយាទីសុ. រូបគណនាយាតិ បូវាទីនំ សណ្ឋានគណនាយ.

៩៩៣. យាគុបានេត្ត យាគុសង្ខាតេ បានេ. តេសន្តិ មនុស្សានំ. វេយ្យាវច្ចករដ្ឋានេ ឋបេត្វាតិ មាតាបិតរោ អត្តនោ វេយ្យាវច្ចករដ្ឋានេ ឋបេត្វាតិ. ចតុត្ថំ.

៥. បញ្ចមសិក្ខាបទំ

៩៩៦. បញ្ចមេ វិនិច្ឆិនន្តីតិ អធិករណំ វិនិច្ឆិនន្តី ភិក្ខុនីតិ យោជនាតិ. បញ្ចមំ.

៦. ឆដ្ឋសិក្ខាបទំ

៩៩៩. ឆដ្ឋេ អនុត្តានវចនំ នត្ថីតិ.

៧. សត្តមសិក្ខាបទំ

១០០៧. សត្តមេ ‘‘បុន បរិយាយេ’’តិ ឯត្ថ បរិយាយសទ្ទោ វារវេវចនោតិ អាហ ‘‘បុន វារេ’’តិ. មហគ្ឃចីវរន្តិ មហគ្ឃំ អាវសថចីវរន្តិ. សត្តមំ.

៨. អដ្ឋមសិក្ខាបទំ

១០០៨. អដ្ឋមេ អនិស្សជ្ជិត្វាតិ ឯត្ថ ព្រហ្មទេយ្យេន ន អនិស្សជ្ជនំ, អថ ខោ តាវកាលិកមេវាតិ ទស្សេន្តោ អាហ ‘‘រក្ខនត្ថាយា’’តិអាទិ.

១០១២. បដិជគ្គិកន្តិ រក្ខណកំ. វចីភេទន្តិ ‘‘បដិជគ្គាហី’’តិ វចីភេទំ. រដ្ឋេតិ វិជិតេ. តញ្ហិ រឋន្តិ គាមនិគមាទយោ តិដ្ឋន្តិ ឯត្ថាតិ រដ្ឋន្តិ វុច្ចតីតិ. អដ្ឋមំ.

៩. នវមសិក្ខាបទំ

១០១៥. នវមេ សិប្បសទ្ទោ បច្ចេកំ យោជេតព្ពោ ‘‘ហត្ថិសិប្បញ្ច អស្សសិប្បញ្ច រថសិប្បញ្ច ធនុសិប្បញ្ច ថរុសិប្បញ្ចា’’តិ. តត្ថ ថរុសិប្បន្តិ អសិកីឡនសិប្បំ. មន្តសទ្ទោបិ បច្ចេកំ យោជេតព្ពោ ‘‘អាថព្ពណមន្តោ ច ខីលនមន្តោ ច វសីករណមន្តោ ច សោសាបនមន្តោ ចា’’តិ. តត្ថ អាថព្ពណមន្តោតិ អាថព្ពណវេទេន វិហិតោ បរូបឃាតករោ មន្តោ. ខីលនមន្តោតិ សារទារុខីលំ មន្តេន ជប្បិត្វា បថវិយំ និខណិត្វា ធារណមន្តោ. វសីករណមន្តោតិ មន្តេន ជប្បិត្វា បរស្ស ឧម្មត្តភាវមាបន្នករណោ មន្តោ. សោសាបនមន្តោតិ បរស្ស មំសលោហិតាទិសោសាបនមន្តោ. អគទបយោគោតិ ភុសវិសស្ស បយោជនំ. អាទិសទ្ទេន អញ្ញេបិ បរូបឃាតករណេ សិប្បេ សង្គណ្ហាតិ. យក្ខបរិត្តន្តិ យក្ខេហិ សមន្តតោ តាណំ. នាគមណ្ឌលន្តិ សប្បានំ បវេសននិវារណត្ថំ មណ្ឌលពន្ធមន្តោ. អាទិសទ្ទេន វិសបដិហននមន្តាទយោ សង្គណ្ហាតីតិ. នវមំ.

១០. ទសមសិក្ខាបទំ

១០១៨. ទសមេ អនុត្តានវចនំ នត្ថីតិ. ទសមំ.

ចិត្តាគារវគ្គោ បញ្ចមោ.