៦. អារាមវគ្គោ

១. បឋមសិក្ខាបទ-អត្ថយោជនា

១០២៥. អារាមវគ្គស្ស បឋមេ ឧបចារន្តិ អបរិក្ខិត្តស្ស អារាមស្ស បរិក្ខេបារហដ្ឋានំ ឧបចារំ.

១០២៧. ‘‘សីសានុលោកិកា’’តិ សាមញ្ញតោ វុត្តេបិ ភិក្ខុនីនមេវ សីសន្តិ អាហ ‘‘ភិក្ខុនីន’’ន្តិ. យត្ថាតិ យស្មិំ ឋានេតិ. បឋមំ.

២. ទុតិយសិក្ខាបទំ

១០២៨. ទុតិយេ អព្ភន្តរោតិ អព្ភន្តរេ បរិយាបន្នោ, ជាតោ វា. ‘‘សង្កាមេសី’’តិ ឥមិនា សំហរីតិ ឯត្ថ ហរធាតុយា សង្កមនត្ថំ ទស្សេតិ. ន្ហាបិតាតិ កប្បកា. តេ ហិ នហាបេន្តិ សោចាបេន្តីតិ ន្ហាបិតាតិ វុច្ចន្តិ. តន្តិ កាសាវនិវាសនន្តិ. ទុតិយំ.

៣-៤. តតិយ-ចតុត្ថសិក្ខាបទំ

១០៣៦. តតិយចតុត្ថេសុ អនុត្តានដ្ឋានំ នត្ថីតិ. តតិយចតុត្ថានិ.

៥. បញ្ចមសិក្ខាបទំ

១០៤៣. បញ្ចមេ ‘‘កុលេ មច្ឆរោ’’តិ ឯត្ថ មច្ឆរនំ មច្ឆរោតិ វចនត្ថោ កាតព្ពោ. ‘‘តំ កុលំ អស្សទ្ធំ អប្បសន្ន’’ន្តិ កុលស្ស អវណ្ណំ ភាសតីតិ យោជនា. ‘‘ភិក្ខុនិយោ ទុស្សីលា បាបធម្មា’’តិ ភិក្ខុនីនំ អវណ្ណំ ភាសតីតិ យោជនា.

១០៤៥. ‘‘សន្តំយេវ អាទីនវ’’ន្តិ សម្ពន្ធិយា សម្ពន្ធំ ទស្សេតុំ វុត្តំ ‘‘កុលស្ស វា ភិក្ខុនីនំ វា’’តិ ឥមិនា ទ្វីសុ អញ្ញតរមេវ ន សម្ពន្ធោ ហោតិ, អថ ខោ ទ្វយម្បីតិ ទស្សេតីតិ. បញ្ចមំ.

៦. ឆដ្ឋសិក្ខាបទំ

១០៤៨. ឆដ្ឋេ ឱវាទាយាតិ ឯត្ថ ន យោ វា សោ វា ឱវាទោ ហោតិ, អថ ខោ គរុធម្មោយេវាតិ អាហ ‘‘គរុធម្មត្ថាយា’’តិ. សហ វសតិ ឯត្ថ, ឯតេនាតិ វា សំវាសោតិ វចនត្ថេន ឧបោសថបវារណា សំវាសោ នាមាតិ អាហ ‘‘ឧបោសថបវារណាបុច្ឆនត្ថាយា’’តិ. ‘‘បុច្ឆនត្ថាយា’’តិ ឥមិនា ‘‘សំវាសាយា’’តិ ឯត្ថ ឧត្តរបទលោបភាវំ ទស្សេតិ. ឯត្ថាតិ ភិក្ខុនិវិភង្គេ, សិក្ខាបទេ វា បាឡិយំ វាតិ. ឆដ្ឋំ.

៧-៩. សត្តម-អដ្ឋម-នវមសិក្ខាបទំ

១០៥៣. សត្តមដ្ឋមនវមេសុ អនុត្តានវចនំ នត្ថិ. កេវលំ បន ‘‘ឥមិស្សាបី’’តិ បទំ វិសេសោ, ឥមិស្សាបិ បាឡិយាតិ អត្ថោតិ. សត្តមដ្ឋមនវមានិ.

១០. ទសមសិក្ខាបទំ

១០៦២. ទសមេ ទ្វេ កាយា ឧបរិមកាយោ ហេដ្ឋិមកាយោតិ. តត្ថ កដិតោ ឧទ្ធំ ឧបរិមកាយោ, ហេដ្ឋា ហេដ្ឋិមកាយោ. តត្ថ ‘‘បសាខេ’’តិ ឥទំ ហេដ្ឋិមកាយស្ស នាមន្តិ អាហ ‘‘អធោកាយេ’’តិ. ហីតិ សច្ចំ. តតោតិ អធោកាយតោ. ឥមិនា បញ្ចមីពាហិរត្ថសមាសំ ទស្សេតិ. រុក្ខស្ស សាខា បភិជ្ជិត្វា គតា វិយ ឧភោ ឩរូ បភិជ្ជិត្វា គតាតិ យោជនា.

១០៦៥. ផាលេហីតិ ឯត្ថ ឥតិសទ្ទោ អាទ្យត្ថោ. តេន ‘‘ធោវា’’តិអាទីនិ ចត្តារិ បទានិ សង្គណ្ហាតិ. អាណត្តិទុក្កដានីតិ ហេដ្ឋា វុត្តេសុ អដ្ឋសុ ទុក្កដេសុ វិនយទុក្កដមេវ. សេសេសូតិ ភិន្ទនតោ សេសេសុ ផាលនាទីសូតិ. ទសមំ.

អារាមវគ្គោ ឆដ្ឋោ.