៤. ចតុត្ថសិក្ខាបទំ

៨០៦. ចតុត្ថេ រញ្ញោ ឱរោធា រាជោរោធា, បុរាណេ រាជោរោធា បុរាណរាជោរោធាតិ វចនត្ថំ ទស្សេន្តោ អាហ ‘‘បុរាណេ’’តិអាទិ. ‘‘គិហិភាវេ’’តិ ឥមិនា បុរាណេតិ ឯត្ថ ណបច្ចយស្ស សរូបំ ទស្សេតិ. ចិរាចិរន្តិ និបាតបដិរូបកំ. តេន វុត្តំ ‘‘ចិរេន ចិរេនា’’តិ. ‘‘សក្កោថា’’តិ ឥមិនា កថំ តុម្ហេ រាគចិត្តំ បដិហនិត្វា អត្តានំ ធារេថ ធារេតុំ សក្កោថាតិ អត្ថំ ទស្សេតិ. អនារោចិតេបីតិ ភូតតោ អនារោចិតេបិ.

៨០៧. ជតុនាតិ លាខាយ. បដ្ឋទណ្ឌកេតិ បដុភាវេន ឋាតិ បវត្តតីតិ បដ្ឋោ, សោយេវ ទណ្ឌោ បដ្ឋទណ្ឌោ, តស្ស បវេសនំ បដ្ឋទណ្ឌកំ, តស្មិំ និមិត្តភូតេ. ឯតន្តិ ‘‘ជតុមដ្ឋកេ’’តិ ឯតំ វចនន្តិ. ចតុត្ថំ.