៥. បញ្ចមសិក្ខាបទំ

៨១០. បញ្ចមេ ‘‘អតិគម្ភីរ’’ន្តិបទំ កិរិយាវិសេសនន្តិ អាហ ‘‘អតិអន្តោ បវេសេត្វា’’តិ. ‘‘ឧទកេន ធោវនំ កុរុមានា’’តិ ឥមិនា ‘‘ឧទកសុទ្ធិក’’ន្តិបទស្ស ឧទកេន សុទ្ធិយា ករណន្តិ អត្ថំ ទស្សេតិ.

៨១២. ទ្វង្គុលបព្ពបរមន្តិ ឯត្ថ ទ្វេ អង្គុលានិ ច ទ្វេ បព្ពានិ ច ទ្វង្គុលបព្ពំ, ឧត្តរបទេ បុព្ពបទលោបោ. ទ្វង្គុលបព្ពំ បរមំ បមាណំ ឯតស្ស ឧទកសុទ្ធិកស្សាតិ ទ្វង្គុលបព្ពបរមំ. វិត្ថារតោ ទ្វង្គុលបរមំ, គម្ភីរតោ ទ្វិបព្ពបរមន្តិ វុត្តំ ហោតិ. តេនាហ ‘‘វិត្ថារតោ’’តិអាទិ. អង្គុលំ បវេសេន្តិយាតិ សម្ពន្ធោ. ហីតិ សច្ចំ. ‘‘ចតុន្នំ វា’’តិ ឥទំ ឧក្កដ្ឋវសេន វុត្តំ, តិណ្ណម្បិ បព្ពំ ន វដ្ដតិ, ចតុន្នំ បន បគេវាតិ អត្ថោតិ. បញ្ចមំ.