១៣. តេរសមសិក្ខាបទំ

១២២៦. តេរសមេ ឧបចារេបីតិ អបរិក្ខិត្តស្ស គាមស្ស បរិក្ខេបារហដ្ឋានសង្ខាតេ ឧបចារេបិ.

១២២៧. ‘‘អច្ឆិន្នចីវរិកាយា’’តិ សាមញ្ញតោ វុត្តេបិ វិសេសោយេវាធិប្បេតោតិ អាហ ‘‘សង្កច្ចិកចីវរមេវា’’តិ. សមន្តតោ បុរិសានំ ទស្សនំ កន្តីយតិ ឆិន្ទីយតិ ឯត្ថាតិ សង្កច្ចិ, អធក្ខកឧព្ភនាភិដ្ឋានំ, សង្កច្ចេ និវសិតព្ពន្តិ សំកច្ចិកំ, តមេវ ចីវរន្តិ សង្កច្ចិកចីវរន្តិ. តេរសមំ.

ឆត្តុបាហនវគ្គោ នវមោ.

សព្ពានេវ សិក្ខាបទានីតិ សម្ពន្ធោ. តតោតិ តេហិ អដ្ឋាសីតិសតសិក្ខាបទេហិ, អបនេត្វាតិ សម្ពន្ធោ.

តត្រាតិ តេសុ ខុទ្ទកេសុ. ឯត្ថាតិ ទសសុ សិក្ខាបទេសូតិ.

ភិក្ខុនិវិភង្គេ ខុទ្ទកវណ្ណនាយ

យោជនា សមត្តា.