៩. ឆត្តុបាហនវគ្គោ

១. បឋមសិក្ខាបទ-អត្ថយោជនា

១១៨១. ឆត្តវគ្គស្ស បឋមេ កទ្ទមាទីនីតិ ចិក្ខល្លាទីនិ. អាទិសទ្ទេន ឧទកាទីនិ សង្គណ្ហាតិ. គច្ឆាទីនីតិ ខុទ្ទបាទបាទីនិ. អាទិសទ្ទេន អញ្ញានិបិ ឆត្តំ ធារេតុំ អសក្កុណេយ្យានិ សម្ពាធដ្ឋានានិ សង្គណ្ហាតីតិ. បឋមំ.

២. ទុតិយសិក្ខាបទំ

១១៨៤. ទុតិយេ យានេនាតិ យន្តិ ឥច្ឆិតដ្ឋានំ សុខេន គច្ឆន្តិ អនេនាតិ យានន្តិ. ទុតិយំ.

៣. តតិយសិក្ខាបទំ

១១៩១. តតិយេ ‘‘វិប្បកិរិយិំសូ’’តិ កិរិយាបទស្ស កត្តុនា អវិនាភាវតោ កត្តារំ ទស្សេតុំ វុត្តំ ‘‘មណយោ’’តិ. មណយោតិ ច រតនានីតិ. តតិយំ.

៤. ចតុត្ថសិក្ខាបទំ

១១៩៤. ចតុត្ថេ សីសូបគាទីសូតិ អាទិសទ្ទេន គីវូបគាទយោ សង្គណ្ហាតិ. យំ យន្តិ អលង្ការន្តិ. ចតុត្ថំ.

៥. បញ្ចមសិក្ខាបទំ

១១៩៩. បញ្ចមេ គន្ធេន ចាតិ គន្ធេតិ អត្តនោ វត្ថុំ សូចេតិ បកាសេតីតិ គន្ធោ. វណ្ណកេន ចាតិ វិលេបនេន ច. តញ្ហិ វណ្ណយតិ ឆវិសោភំ បកាសេតីតិ វណ្ណកន្តិ វុច្ចតិ. ចសទ្ទេន សមាហារទ្វន្ទវាក្យំ ទីបេតីតិ. បញ្ចមំ.

៦. ឆដ្ឋសិក្ខាបទំ

១២០២. ឆដ្ឋេ អនុត្តានវចនំ នត្ថីតិ. ឆដ្ឋំ.

៧. សត្តមសិក្ខាបទំ

១២០៨. សត្តមេ ឧម្មទ្ទនេតិ ឧប្បីឡិត្វា មទ្ទនេ. សំពាហនេបីតិ បុនប្បុនំ ពាហនេបីតិ. សត្តមំ.

៨-១០. អដ្ឋមាទិសិក្ខាបទំ

១២១០. អដ្ឋមាទីសុ តីសុ អនុត្តានវចនំ នត្ថីតិ. អដ្ឋមនវមទសមានិ.

១១. ឯកាទសមសិក្ខាបទំ

១២១៤. ឯកាទសមេ អភិមុខមេវាតិ អភិមុខេ ឯវ. មុខស្ស ហិ អភិ អភិមុខន្តិ វចនត្ថោ កាតព្ពោ, សត្តមិយា អំការោ. ឥមិនា បុរតោតិ ឯត្ថ តោបច្ចយោ ភុម្មត្ថេ ហោតីតិ ទស្សេតិ. ឧបចារន្តិ ទ្វាទសហត្ថូបចារន្តិ. ឯកាទសមំ.

១២. ទ្វាទសមសិក្ខាបទំ

១២១៩. ទ្វាទសមេ ‘‘អនោកាសកត’’ន្តិបទស្ស អយុត្តសមាសភាវញ្ច វិសេសនបរបទពាហិរសមាសភាវញ្ច ទស្សេតុំ វុត្តំ ‘‘អកតឱកាស’’ន្តិ. ឱកាសោ ន កតោ យេនាតិ អនោកាសកតោ, ភិក្ខុ, តំ. ‘‘អនិយមេត្វា’’តិ ឥមិនា ‘‘អនោទិស្សា’’តិ បទស្ស ត្វាបច្ចយន្តភាវំ ទស្សេតីតិ. ទ្វាទសមំ.

១៣. តេរសមសិក្ខាបទំ

១២២៦. តេរសមេ ឧបចារេបីតិ អបរិក្ខិត្តស្ស គាមស្ស បរិក្ខេបារហដ្ឋានសង្ខាតេ ឧបចារេបិ.

១២២៧. ‘‘អច្ឆិន្នចីវរិកាយា’’តិ សាមញ្ញតោ វុត្តេបិ វិសេសោយេវាធិប្បេតោតិ អាហ ‘‘សង្កច្ចិកចីវរមេវា’’តិ. សមន្តតោ បុរិសានំ ទស្សនំ កន្តីយតិ ឆិន្ទីយតិ ឯត្ថាតិ សង្កច្ចិ, អធក្ខកឧព្ភនាភិដ្ឋានំ, សង្កច្ចេ និវសិតព្ពន្តិ សំកច្ចិកំ, តមេវ ចីវរន្តិ សង្កច្ចិកចីវរន្តិ. តេរសមំ.

ឆត្តុបាហនវគ្គោ នវមោ.

សព្ពានេវ សិក្ខាបទានីតិ សម្ពន្ធោ. តតោតិ តេហិ អដ្ឋាសីតិសតសិក្ខាបទេហិ, អបនេត្វាតិ សម្ពន្ធោ.

តត្រាតិ តេសុ ខុទ្ទកេសុ. ឯត្ថាតិ ទសសុ សិក្ខាបទេសូតិ.

ភិក្ខុនិវិភង្គេ ខុទ្ទកវណ្ណនាយ

យោជនា សមត្តា.

៥. បាដិទេសនីយសិក្ខាបទ-អត្ថយោជនា

ខុទ្ទកានំ អនន្តរា បាដិទេសនីយា នាម អដ្ឋ យេ ធម្មា សង្ខេបេនេវ សង្គហំ អារូឡ្ហា សង្គីតិការេហិ, តេសំ អដ្ឋន្នំ បាដិទេសនីយនាមកានំ ធម្មានំ សង្ខេបេនេវ ឯសា វណ្ណនា បវត្តតេតិ យោជនា.

១២២៨. យានិ សព្ពិតេលាទីនីតិ សម្ពន្ធោ. ហីតិ វិត្ថារោ. ឯត្ថាតិ អដ្ឋសុ បាដិទេសនីយេសុ. បាឡិវិនិមុត្តកេសូតិ បាឡិតោ វិនិមុត្តកេសុ. សព្ពេសូតិ អខិលេសុ សព្ពិតេលាទីសូតិ.

ភិក្ខុនិវិភង្គេ បាដិទេសនីយវណ្ណនាយ យោជនា សមត្តា.

បនាតិ បក្ខន្តរជោតកោ. យេ ធម្មា ឧទ្ទិដ្ឋាតិ សម្ពន្ធោ. តេសន្តិ បាដិទេសនីយានំ. បុន តេសន្តិ សេខិយអធិករណសមថធម្មានំ.

តន្តិ អត្ថវិនិច្ឆយំ, វិទូ វទន្តីតិ សម្ពន្ធោ. យការោ បទសន្ធិករោ. អយំ បនេត្ថ យោជនា – តេសំ បាដិទេសនីយានំ អនន្តរា យេ ច សេខិយា បញ្ចសត្តតិ យេ ច ធម្មា, ចសទ្ទោ លុត្តនិទ្ទិដ្ឋោ, អធិករណវ្ហយា អធិករណសមថនាមកា សត្ត យេ ច ធម្មា ភគវតា ឧទ្ទិដ្ឋា, តេសំ សេខិយអធិករណសមថធម្មានំ យោ អត្ថវិនិច្ឆយោ វិភង្គេ មយា វុត្តោ, តាទិសមេវ តំ អត្ថវិនិច្ឆយំ ភិក្ខុនីនំ វិភង្គេបិ វិទូ វទន្តិ យស្មា, តស្មា តេសំ ធម្មានំ សេខិយអធិករណសមថធម្មានំ យា អត្ថវណ្ណនា តត្ថ មហាវិភង្គេ វិសុំ មយា ន វុត្តា. ឥមា អត្ថវណ្ណនា ឥធាបិ ភិក្ខុនីនំ វិភង្គេបិ, បិសទ្ទោ លុត្តនិទ្ទិដ្ឋោ, មយា ន វុត្តាយេវាតិ. នការោ ទ្វីសុ កិរិយាសុ យោជេតព្ពោ.

‘‘សព្ពាសវបហំ មគ្គំ, បុញ្ញកម្មេន ចិមិនា;

ឧប្បាទេត្វា សសន្តានេ, សត្តា បស្សន្តុ និព្ពុតិ’’ន្តិ.

អយំ គាថា ឯតរហិ បោត្ថកេសុ នត្ថិ, ដីកាសុ បន អត្ថិ. តស្មា ឯវមេត្ថ យោជនា វេទិតព្ពា – ឥមិនា បុញ្ញកម្មេន ច វិភង្គវណ្ណនាយ កតេន ឥមិនា បុញ្ញកម្មេន ច អញ្ញេន បុញ្ញកម្មេន ច. ចសទ្ទោ ហិ អវុត្តសម្បិណ្ឌនត្ថោ. សត្តា សព្ពេ សត្តា សព្ពាសវបហំ សព្ពេសំ អាសវានំ វិឃាតកំ មគ្គំ អរហត្តមគ្គំ សសន្តានេ អត្តនោ និយកជ្ឈត្តេ ឧប្បាទេត្វា ជនេត្វា និព្ពុតិំ ខន្ធបរិនិព្ពានំ ញាណាលោចនេន បស្សន្តូតិ.

ឥតិ សមន្តបាសាទិកាយ វិនយសំវណ្ណនាយ

ភិក្ខុនិវិភង្គវណ្ណនាយ

យោជនា សមត្តា.

ជាទិលញ្ឆិតនាមេន, នេកានំ វាចិតោ មយា;

ភិក្ខុនីនំ វិភង្គស្ស, សមត្តោ យោជនានយោតិ.

នមោ តស្ស ភគវតោ អរហតោ សម្មាសម្ពុទ្ធស្ស