១០. ឆន្ទំអទត្វាគមនសិក្ខាបទវណ្ណនា

អារោចិតំ វត្ថុ អវិនិច្ឆិតន្តិ អារោចិតវត្ថុ អាបត្តិកភាវេន ន វិនិច្ឆិតំ. ឯត្ថ ច ចោទកេន ច ចុទិតកេន ច អត្តនោ កថា កថិតា, អនុវិជ្ជកោ សម្មតោ, ឯត្តាវតា វត្ថុមេវ អារោចិតំ ហោតីតិ ទដ្ឋព្ពំ. ឆន្ទំ អទត្វា ឧដ្ឋាយាសនា បក្កមេយ្យាតិ ‘‘កថំ ឥទំ កម្មំ កុប្បំ អស្ស, វគ្គំ អស្ស, ន ករេយ្យា’’តិ (បាចិ. ៤៨១) ឥមិនា អធិប្បាយេន ឆន្ទំ អទត្វា និសិន្នាសនតោ ឧដ្ឋាយ គច្ឆេយ្យ. តេនាហ ‘‘យោ ភិក្ខូ’’តិអាទិ. កិរិយាកិរិយន្តិ ឯត្ថ គមនំ កិរិយំ, ឆន្ទស្ស អទានំ អកិរិយំ.

ឆន្ទំអទត្វាគមនសិក្ខាបទវណ្ណនា និដ្ឋិតា.