៤. ចេលសុត្តំ

១១០៤. ‘‘អាទិត្តេ, ភិក្ខវេ, ចេលេ វា សីសេ វា កិមស្ស ករណីយ’’ន្តិ? ‘‘អាទិត្តេ, ភន្តេ, ចេលេ វា សីសេ វា, តស្សេវ ចេលស្ស វា សីសស្ស វា និព្ពាបនាយ អធិមត្តោ ឆន្ទោ ច វាយាមោ ច ឧស្សាហោ ច ឧស្សោឡ្ហី ច អប្បដិវានី ច សតិ ច សម្បជញ្ញញ្ច ករណីយ’’ន្តិ.

‘‘អាទិត្តំ, ភិក្ខវេ, ចេលំ វា សីសំ វា អជ្ឈុបេក្ខិត្វា អមនសិករិត្វា អនភិសមេតានំ ចតុន្នំ អរិយសច្ចានំ យថាភូតំ អភិសមយាយ អធិមត្តោ ឆន្ទោ ច វាយាមោ ច ឧស្សាហោ ច ឧស្សោឡ្ហី ច អប្បដិវានី ច សតិ ច សម្បជញ្ញញ្ច ករណីយំ. កតមេសំ ចតុន្នំ? ទុក្ខស្ស អរិយសច្ចស្ស…បេ… ទុក្ខនិរោធគាមិនិយា បដិបទាយ អរិយសច្ចស្ស.

‘‘តស្មាតិហ, ភិក្ខវេ, ‘ឥទំ ទុក្ខ’ន្តិ យោគោ ករណីយោ…បេ… ‘អយំ ទុក្ខនិរោធគាមិនី បដិបទា’តិ យោគោ ករណីយោ’’តិ. ចតុត្ថំ.