១០. ទុតិយបជ្ជុន្នធីតុសុត្តំ

៤០. ឯវំ មេ សុតំ – ឯកំ សមយំ ភគវា វេសាលិយំ វិហរតិ មហាវនេ កូដាគារសាលាយំ. អថ ខោ ចូឡកោកនទា [ចុល្លកោកនទា (សី. ស្យា. កំ.)] បជ្ជុន្នស្ស ធីតា អភិក្កន្តាយ រត្តិយា អភិក្កន្តវណ្ណា កេវលកប្បំ មហាវនំ ឱភាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ. ឯកមន្តំ ឋិតា ខោ សា ទេវតា ចូឡកោកនទា បជ្ជុន្នស្ស ធីតា ភគវតោ សន្តិកេ ឥមា គាថាយោ អភាសិ –

‘‘ឥធាគមា វិជ្ជុបភាសវណ្ណា, កោកនទា បជ្ជុន្នស្ស ធីតា;

ពុទ្ធញ្ច ធម្មញ្ច នមស្សមានា, គាថាចិមា អត្ថវតី អភាសិ.

‘‘ពហុនាបិ ខោ តំ វិភជេយ្យំ, បរិយាយេន តាទិសោ ធម្មោ;

សំខិត្តមត្ថំ [សំខិត្តមត្តំ (ក.)] លបយិស្សាមិ, យាវតា មេ មនសា បរិយត្តំ.

‘‘បាបំ ន កយិរា វចសា មនសា,

កាយេន វា កិញ្ចន សព្ពលោកេ;

កាមេ បហាយ សតិមា សម្បជានោ,

ទុក្ខំ ន សេវេថ អនត្ថសំហិត’’ន្តិ.

សតុល្លបកាយិកវគ្គោ ចតុត្ថោ.

តស្សុទ្ទានំ –

សព្ភិមច្ឆរិនា សាធុ, ន សន្តុជ្ឈានសញ្ញិនោ;

សទ្ធា សមយោ សកលិកំ, ឧភោ បជ្ជុន្នធីតរោតិ.