៩. កម្មការង្គបញ្ហោ

៩. ‘‘ភន្តេ នាគសេន, ‘កម្មការស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, កម្មការោ ឯវំ ចិន្តយតិ ‘ភតកោ អហំ ឥមាយ នាវាយ កម្មំ ករោមិ, ឥមាយាហំ នាវាយ វាហសា ភត្តវេតនំ លភាមិ, ន មេ បមាទោ ករណីយោ, អប្បមាទេន មេ អយំ នាវា វាហេតព្ពា’តិ, ឯវមេវ ខោ, មហារាជ, យោគិនា យោគាវចរេន ឯវំ ចិន្តយិតព្ពំ ‘ឥមំ ខោ អហំ ចាតុមហាភូតិកំ កាយំ សម្មសន្តោ សតតំ សមិតំ អប្បមត្តោ ឧបដ្ឋិតស្សតិ សតោ សម្បជានោ សមាហិតោ ឯកគ្គចិត្តោ ជាតិជរាព្យាធិមរណសោកបរិទេវទុក្ខទោមនស្សុបាយាសេហិ បរិមុច្ចិស្សាមីតិ អប្បមាទោ មេ ករណីយោ’តិ, ឥទំ, មហារាជ, កម្មការស្ស ឯកំ អង្គំ គហេតព្ពំ. ភាសិតម្បេតំ, មហារាជ, ថេរេន សារិបុត្តេន ធម្មសេនាបតិនា –

‘‘‘កាយំ ឥមំ សម្មសថ, បរិជានាថ បុនប្បុនំ;

កាយេ សភាវំ ទិស្វាន, ទុក្ខស្សន្តំ ករិស្សថា’តិ.

កម្មការង្គបញ្ហោ នវមោ.