៩. ឧត្តរកុរុកាទិគមនបញ្ហោ

៩. រាជា អាហ ‘‘ភន្តេ នាគសេន, អត្ថិ កោចិ, យោ ឥមិនា សរីរេន ឧត្តរកុរុំ វា គច្ឆេយ្យ, ព្រហ្មលោកំ វា, អញ្ញំ វា បន ទីប’’ន្តិ? ‘‘អត្ថិ, មហារាជ, យោ ឥមិនា ចាតុម្មហាភូតិកេន កាយេន ឧត្តរកុរុំ វា គច្ឆេយ្យ, ព្រហ្មលោកំ វា, អញ្ញំ វា បន ទីប’’ន្តិ.

‘‘កថំ, ភន្តេ នាគសេន, ឥមិនា ចាតុម្មហាភូតិកេន កាយេន ឧត្តរកុរុំ វា គច្ឆេយ្យ, ព្រហ្មលោកំ វា, អញ្ញំ វា បន ទីប’’ន្តិ? ‘‘អភិជានាសិ នុ, ត្វំ មហារាជ, ឥមិស្សា បថវិយា វិទត្ថិំ វា រតនំ វា លង្ឃិតា’’តិ? ‘‘អាម, ភន្តេ, អភិជានាមិ ‘អហំ, ភន្តេ នាគសេន, អដ្ឋបិ រតនិយោ លង្ឃេមី’’’តិ. ‘‘កថំ, ត្វំ មហារាជ, អដ្ឋបិ រតនិយោ លង្ឃេសី’’តិ? ‘‘អហញ្ហិ, ភន្តេ, ចិត្តំ ឧប្បាទេមិ ‘ឯត្ថ និបតិស្សាមី’តិ សហ ចិត្តុប្បាទេន កាយោ មេ លហុកោ ហោតី’’តិ. ‘‘ឯវមេវ ខោ, មហារាជ, ឥទ្ធិមា ភិក្ខុ ចេតោវសិប្បត្តោ កាយំ ចិត្តេ សមារោបេត្វា ចិត្តវសេន វេហាសំ គច្ឆតី’’តិ.

‘‘កល្លោសិ, ភន្តេ នាគសេនា’’តិ.

ឧត្តរកុរុកាទិគមនបញ្ហោ នវមោ.