២. ពុទ្ធគុណសតិបដិលាភបញ្ហោ

២. រាជា អាហ ‘‘ភន្តេ នាគសេន, តុម្ហេ ឯតំ ភណថ ‘យោ វស្សសតំ អកុសលំ ករេយ្យ, មរណកាលេ ច ឯកំ ពុទ្ធគុណំ សតិំ បដិលភេយ្យ, សោ ទេវេសុ ឧប្បជ្ជេយ្យា’តិ ឯតំ ន សទ្ទហាមិ, ឯវញ្ច បន វទេថ ‘ឯតេន បាណាតិបាតេន និរយេ ឧប្បជ្ជេយ្យា’តិ ឯតម្បិ ន សទ្ទហាមី’’តិ.

‘‘តំ កិំ មញ្ញសិ, មហារាជ, ខុទ្ទកោបិ បាសាណោ វិនា នាវាយ ឧទកេ ឧប្បិលវេយ្យា’’តិ. ‘‘ន ហិ, ភន្តេ’’តិ. ‘‘កិំ នុ ខោ, មហារាជ, វាហសតម្បិ បាសាណានំ នាវាយ អារោបិតំ ឧទកេ ឧប្បិលវេយ្យា’’តិ? ‘‘អាម, ភន្តេ’’តិ. ‘‘យថា, មហារាជ, នាវា, ឯវំ កុសលានិ កម្មានិ ទដ្ឋព្ពានី’’តិ.

‘‘កល្លោសិ, ភន្តេ នាគសេនា’’តិ.

ពុទ្ធគុណសតិបដិលាភបញ្ហោ ទុតិយោ.