១១. អភិជានន្តសតិបញ្ហោ

១១. រាជា អាហ ‘‘ភន្តេ នាគសេន, សព្ពា សតិ អភិជានន្តី ឧប្បជ្ជតិ, ឧទាហុ កដុមិកាវ សតី’’តិ? ‘‘អភិជានន្តីបិ, មហារាជ, កដុមិកាបិ សតី’’តិ. ‘‘ឯវញ្ហិ ខោ, ភន្តេ នាគសេន, សព្ពា សតិ អភិជានន្តី, នត្ថិ កដុមិកា សតី’’តិ? ‘‘យទិ នត្ថិ, មហារាជ, កដុមិកា សតិ, នត្ថិ កិញ្ចិ សិប្បិកានំ កម្មាយតនេហិ វា សិប្បាយតនេហិ វា វិជ្ជាដ្ឋានេហិ វា ករណីយំ, និរត្ថកា អាចរិយា, យស្មា ច ខោ, មហារាជ, អត្ថិ កដុមិកា សតិ, តស្មា អត្ថិ កម្មាយតនេហិ វា សិប្បាយតនេហិ វា វិជ្ជាដ្ឋានេហិ វា ករណីយំ, អត្ថោ ច អាចរិយេហី’’តិ.

‘‘កល្លោសិ, ភន្តេ នាគសេនា’’តិ.

អភិជានន្តសតិបញ្ហោ ឯកាទសមោ.

សតិវគ្គោ ឆដ្ឋោ.

ឥមស្មិំ វគ្គេ ឯកាទស បញ្ហា.