៨. អដ្ឋមសិក្ខាបទវណ្ណនា

៨២៤. អដ្ឋមេ – និព្ពិដ្ឋោ រាជភដោ រញ្ញោ ភតិ កេណិ ឯតេនាតិ និព្ពិដ្ឋរាជភដោ, ឯកំ ឋានន្តរំ កេណិយា គហេត្វា តតោ លទ្ធឧទយោតិ អត្ថោ. តញ្ញេវ ភដបថំ យាចិស្សាមីតិ រញ្ញោ កេណិំ ទត្វា បុន តំយេវ ឋានន្តរំ យាចិស្សាមីតិ ចិន្តេន្តោ. បរិភាសីតិ តា ភិក្ខុនិយោ ‘‘មា បុន ឯវំ ករិត្ថា’’តិ សន្តជ្ជេសិ.

៨២៦. សយំ ឆឌ្ឌេតីតិ ចត្តារិបិ វត្ថូនិ ឯកបយោគេន ឆឌ្ឌេន្តិយា ឯកាវ អាបត្តិ, បាដេក្កំ ឆឌ្ឌេន្តិយា វត្ថុគណនាយ អាបត្តិយោ. អាណត្តិយម្បិ ឯសេវ នយោ. ទន្តកដ្ឋឆឌ្ឌនេបិ ភិក្ខុនិយា បាចិត្តិយមេវ. ភិក្ខុស្ស សព្ពត្ថ ទុក្កដំ. សេសំ ឧត្តានមេវ.

ឆសមុដ្ឋានំ – កិរិយាកិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ.

អដ្ឋមសិក្ខាបទំ.