៦. ឆដ្ឋសិក្ខាបទវណ្ណនា

៨១៥. ឆដ្ឋេ – ភត្តវិស្សគ្គន្តិ ភត្តកិច្ចំ. បានីយេន ច វិធូបនេន ច ឧបតិដ្ឋិត្វាតិ ឯកេន ហត្ថេន បានីយថាលកំ ឯកេន ពីជនិំ គហេត្វា ពីជមានា សមីបេ ឋត្វាតិ អត្ថោ. អច្ចាវទតីតិ បុព្ពេបិ តុម្ហេ ឯវំ ភុញ្ជថ, អហំ ឯវំ ឧបដ្ឋានំ ករោមី’’តិ បព្ពជិតចារិត្តំ អតិក្កមិត្វា គេហស្សិតកថំ កថេតីតិ អត្ថោ.

៨១៧. យំកិញ្ចិ បានីយន្តិ សុទ្ធឧទកំ វា ហោតុ, តក្កទធិមត្ថុរសខីរាទីនំ វា អញ្ញតរំ. យា កាចិ ពីជនីតិ អន្តមសោ ចីវរកណ្ណោបិ. ហត្ថបាសេ តិដ្ឋតិ អាបត្តិ បាចិត្តិយស្សាតិ ឥធ ឋានបច្ចយាវ បាចិត្តិយំ វុត្តំ. បហារបច្ចយា បន ខន្ធកេ ទុក្កដំ បញ្ញត្តំ.

៨១៩. ទេតិ ទាបេតីតិ បានីយំ វា សូបាទិំ វា ឥមំ បិវថ, ឥមិនា ភុញ្ជថាតិ ទេតិ; តាលវណ្ដំ ឥមិនា ពីជន្តា ភុញ្ជថាតិ ទេតិ; អញ្ញេន វា ឧភយម្បិ ទាបេតិ, អនាបត្តិ. អនុបសម្បន្នំ អាណាបេតីតិ ឧបតិដ្ឋនត្ថំ សាមណេរិំ អាណាបេតិ, អនាបត្តិ. សេសំ ឧត្តានមេវ.

ឯឡកលោមសមុដ្ឋានំ – កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, តិចិត្តំ, តិវេទនន្តិ.

ឆដ្ឋសិក្ខាបទំ.