៥. បញ្ចមសិក្ខាបទវណ្ណនា

៨១០. បញ្ចមេ – អតិគម្ភីរំ ឧទកសុទ្ធិកំ អាទិយន្តីតិ អតិអន្តោ បវេសេត្វា ឧទកេន ធោវនំ កុរុមានា.

៨១២. កេសគ្គមត្តម្បិ អតិក្កាមេតីតិ វិត្ថារតោ តតិយំ វា ចតុត្ថំ វា អង្គុលំ គម្ភីរតោ ទ្វិន្នំ បព្ពានំ ឧបរិ កេសគ្គមត្តម្បិ បវេសេន្តិយា បាចិត្តិយន្តិ អត្ថោ. វុត្តញ្ហេតំ មហាបច្ចរិយំ – ‘‘ឯកិស្សា អង្គុលិយា តីណិ បព្ពានិ អាទាតុំ ន លភតិ, តិណ្ណំ វា ចតុន្នំ វា ឯកេកម្បិ បព្ពំ អាទាតុំ ន លភតី’’តិ. សេសំ ឧត្តានមេវ. សមុដ្ឋានាទីនិបិ តលឃាតកេ វុត្តសទិសានេវាតិ.

បញ្ចមសិក្ខាបទំ.