៤. ចតុត្ថសិក្ខាបទវណ្ណនា

៨០៦. ចតុត្ថេ – បុរាណរាជោរោធាតិ បុរាណេ គិហិភាវេ រញ្ញោ ឱរោធា. ចិរាចិរំ គច្ឆតីតិ ចិរេន ចិរេន គច្ឆតិ. ធារេថាតិ សក្កោថ. កស្សិទំ កម្មន្តិ វុត្តេ អនារោចិតេបិ ឯតា មយិ អាសង្កំ ករិស្សន្តីតិ មញ្ញមានា ឯវមាហ – ‘‘មយ្ហិទំ កម្ម’’ន្តិ.

៨០៧. ជតុមដ្ឋកេតិ ជតុនា កតេ មដ្ឋទណ្ឌកេ. វត្ថុវសេនេវេតំ វុត្តំ, យំកិញ្ចិ បន ទណ្ឌកំ បវេសេន្តិយា អាបត្តិយេវ. តេនាហ – ‘‘អន្តមសោ ឧប្បលបត្តម្បិ មុត្តករណំ បវេសេតី’’តិ. ឯតម្បិ ច អតិមហន្តំ, កេសរមត្តម្បិ បន បវេសេន្តិយា អាបត្តិ ឯវ. សេសំ ឧត្តានមេវ. សមុដ្ឋានាទីនិ តលឃាតកេ វុត្តសទិសានេវាតិ.

ចតុត្ថសិក្ខាបទំ.