១៩. សម្បយុត្តបច្ចយនិទ្ទេសវណ្ណនា

១៩. សម្បយុត្តបច្ចយនិទ្ទេសេ បាឡិ ឧត្តានត្ថា ឯវ. អយំ បន សម្បយុត្តបច្ចយោ នាម សង្ខេបតោ សព្ពេបិ អរូបិនោ ខន្ធា. បភេទតោ បនេស ជាតិតោ កុសលាទីនំ, ភូមិតោ ច កាមាវចរាទីនំ វសេន អនេកធា ភិជ្ជតីតិ ឯវមេត្ថ នានប្បការភេទតោ វិញ្ញាតព្ពោ វិនិច្ឆយោ. ឯវំ ភិន្នេ បនេត្ថ ចតុភូមកេសុបិ កុសលក្ខន្ធេសុ ឯកោ ខន្ធោ តិណ្ណំ ខន្ធានំ, តយោ ឯកស្ស, ទ្វេ ទ្វិន្នន្តិ ឯវំ សព្ពេបិ អញ្ញមញ្ញំ សម្បយុត្តបច្ចយេន បច្ចយោ. អកុសលវិបាកកិរិយក្ខន្ធេសុបិ ឯសេវ នយោតិ ឯវមេត្ថ បច្ចយុប្បន្នតោបិ វិញ្ញាតព្ពោ វិនិច្ឆយោតិ.

សម្បយុត្តបច្ចយនិទ្ទេសវណ្ណនា.