២. កុសលចិត្តកថាវណ្ណនា

៨៩៤-៨៩៥. ឥទានិ កុសលចិត្តកថា នាម ហោតិ. តត្ថ យស្មា អរហា សតិវេបុល្លប្បត្តោ បរិនិព្ពាយន្តោបិ សតោ សម្បជានោវ បរិនិព្ពាតិ, តស្មា កុសលចិត្តោ បរិនិព្ពាយតីតិ យេសំ លទ្ធិ, សេយ្យថាបិ អន្ធកានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អថ នំ យស្មា កុសលចិត្តោ នាម បុញ្ញាភិសង្ខារាភិសង្ខរណាទិវសេន ហោតិ, តស្មា តេនត្ថេន ចោទេតុំ អរហា បុញ្ញាភិសង្ខារន្តិអាទិមាហ. សេសមេត្ថ យថាបាឡិមេវ និយ្យាតិ. សតោ សម្បជានោតិ ឥទំ ជវនក្ខណេ កិរិយសតិសម្បជញ្ញានំ វសេន អសម្មោហមរណទីបនត្ថំ វុត្តំ, ន កុសលចិត្តទីបនត្ថំ. តស្មា អសាធកន្តិ.

កុសលចិត្តកថាវណ្ណនា.