៣. អានេញ្ជកថាវណ្ណនា

៨៩៦. ឥទានិ អានេញ្ជកថា នាម ហោតិ. តត្ថ ភគវា ចតុត្ថជ្ឈានេ ឋិតោ បរិនិព្ពាយីតិ សល្លក្ខេត្វា ‘‘អរហា អានេញ្ជេ ឋិតោ បរិនិព្ពាយតី’’តិ យេសំ លទ្ធិ, សេយ្យថាបិ ឯកច្ចានំ ឧត្តរាបថកានំ, តេ សន្ធាយ បុច្ឆា សកវាទិស្ស, បដិញ្ញា ឥតរស្ស. បកតិចិត្តេតិ ភវង្គចិត្តេ. សព្ពេ ហិ សញ្ញិនោ សត្តា ភវង្គចិត្តេ ឋត្វា ភវង្គបរិយោសានេន ចុតិចិត្តេន កាលំ ករោន្តិ. ឥតិ នំ ឥមិនា អត្ថេន ចោទេតុំ ឯវមាហ. តត្ថ កិញ្ចាបិ ចតុវោការភវេ អរហតោ បកតិចិត្តម្បិ អានេញ្ជំ ហោតិ, អយំ បន បញ្ហោ បញ្ចវោការភវវសេន ឧទ្ធដោ. តស្មា នោ ច វត រេ វត្តព្ពេតិ អាហ. សេសមេត្ថ ឧត្តានត្ថមេវាតិ.

អានេញ្ជកថាវណ្ណនា.