៨. សមាបន្នោ សទ្ទំ សុណាតីតិកថាវណ្ណនា

៨២៣-៨២៥. ឥទានិ សមាបន្នោ សទ្ទំ សុណាតីតិកថា នាម ហោតិ. តត្ថ ‘‘យស្មា បឋមស្ស ឈានស្ស សទ្ទោ កណ្ឌកោ វុត្តោ ភគវតា, យទិ ច សមាបន្នោ តំ ន សុណេយ្យ, កថំ កណ្ឌកោ សិយា. តស្មា សមាបន្នោ សទ្ទំ, សុណាតី’’តិ យេសំ លទ្ធិ, សេយ្យថាបិ បុព្ពសេលិយានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. ចក្ខុនា រូបំ បស្សតីតិអាទិ ‘‘សមាបន្នស្ស តាវ បញ្ចទ្វារប្បវត្តំ នត្ថិ, តស្មិំ អសតិ យទិ សោ សទ្ទំ សុណេយ្យ, រូបម្បិ បស្សេយ្យា’’តិ ចោទនត្ថំ វុត្តំ. សទ្ទោ កណ្ឌកោតិ វិក្ខេបករត្តា វុត្តំ. ឱឡារិកេន ហិ សទ្ទេន សោតេ ឃដ្ដិតេ បឋមជ្ឈានតោ វុដ្ឋានំ ហោតិ, តេនេតំ វុត្តំ, តស្មា អសាធកំ. ទុតិយស្ស ឈានស្សាតិអាទិ ‘‘យថា អញ្ញោបិ កណ្ឌកោ អន្តោសមាបត្តិយំ នត្ថិ, ឯវំ សទ្ទស្សវនម្បី’’តិ ពោធនត្ថំ វុត្តំ, តំ សព្ពំ ឧត្តានត្ថមេវាតិ.

សមាបន្នោ សទ្ទំ សុណាតីតិកថាវណ្ណនា.