១. អត្ថិ អរហតោ បុញ្ញូបចយកថាវណ្ណនា

៧៧៦-៧៧៩. ឥទានិ អត្ថិ អរហតោ បុញ្ញូបចយោតិកថា នាម ហោតិ. តត្ថ យេសំ អរហតោ ទានសំវិភាគចេតិយវន្ទនាទីនិ កម្មានិ ទិស្វា អត្ថិ អរហតោ បុញ្ញូបចយោតិ លទ្ធិ, សេយ្យថាបិ អន្ធកានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អថ នំ ‘‘អរហា នាម បហីនបុញ្ញបាបោ, សោ យទិ បុញ្ញំ ករេយ្យ, បាបម្បិ ករេយ្យា’’តិ ចោទេតុំ អបុញ្ញូបចយោតិ អាហ. ឥតរោ បាណាតិបាតាទិកិរិយំ អបស្សន្តោ បដិក្ខិបតិ. បុញ្ញាភិសង្ខារន្តិអាទីសុ ភវគាមិកម្មំ អរហតោ នត្ថីតិ បដិក្ខិបតិ. ទានំ ទទេយ្យាតិអាទីសុ កិរិយចិត្តេន ទានាទិបវត្តិសព្ភាវតោ សកវាទី បដិជានាតិ. ឥតរោ ចិត្តំ អនាទិយិត្វា កិរិយាបវត្តិមត្តទស្សនេនេវ លទ្ធិំ បតិដ្ឋបេតិ. សា បន អយោនិសោ បតិដ្ឋាបិតត្តា អប្បតិដ្ឋាបិតា ហោតីតិ.

អត្ថិ អរហតោ បុញ្ញូបចយោតិកថាវណ្ណនា.