៥. រូបំ ហេតូតិកថាវណ្ណនា

៧៥៤-៧៥៦. ឥទានិ រូបំ ហេតូតិ កថានាម ហោតិ. តត្ថ ហេតូតិ កុសលមូលាទិនោ ហេតុហេតុស្សាបិ នាមំ, យស្ស កស្សចិ បច្ចយស្សាបិ. ឥមំ បន វិភាគំ អកត្វា ‘‘ចត្តារោ មហាភូតា ហេតូ’’តិ វចនមត្តំ និស្សាយ អវិសេសេនេវ រូបំ ហេតូតិ យេសំ លទ្ធិ, សេយ្យថាបិ ឧត្តរាបថកានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អលោភោ ហេតូតិ កិំ តេ រូបំ អលោភសង្ខាតោ ហេតូតិ បុច្ឆតិ, ឥតរោ បដិក្ខិបតិ. សេសេសុបិ ឯសេវ នយោ. មហាភូតា ឧបាទាយរូបានំ ឧបាទាយហេតូតិ ឯត្ថ បច្ចយដ្ឋេន ហេតុភាវោ វុត្តោ, ន មូលដ្ឋេន, តស្មា អសាធកន្តិ.

រូបំ ហេតូតិកថាវណ្ណនា.

៧៥៧-៧៥៩. សហេតុកកថាយម្បិ ឥមិនាវ នយេន អត្ថោ វេទិតព្ពោតិ.

រូបំ សហេតុកន្តិកថាវណ្ណនា.