២. អញ្ញមញ្ញបច្ចយកថាវណ្ណនា

៧១៨-៧១៩. ឥទានិ អញ្ញមញ្ញបច្ចយកថា នាម ហោតិ. តត្ថ យេសំ សមយេ ‘‘អវិជ្ជាបច្ចយា សង្ខារា’’តិ អយមេវ តន្តិ, ‘‘សង្ខារបច្ចយាបិ អវិជ្ជា’’តិ អយំ នត្ថិ, តស្មា អវិជ្ជាវ សង្ខារានំ បច្ចយោ, ន បន សង្ខារា អវិជ្ជាយាតិ លទ្ធិ, សេយ្យថាបិ មហាសង្ឃិកានំ; តេ សន្ធាយ អវិជ្ជាសង្ខារាទីនំ អញ្ញមញ្ញបច្ចយតាបិ អត្ថីតិ ទស្សេតុំ បុច្ឆា សកវាទិស្ស, បដិញ្ញា ឥតរស្ស. អវិជ្ជា សង្ខារេនាតិ ឯត្ថ អបុញ្ញាភិសង្ខារោវ គហិតោ. តស្មា សង្ខារបច្ចយាបិ អវិជ្ជាតិ ឯត្ថ សហជាតអញ្ញមញ្ញអត្ថិអវិគតសម្បយុត្តវសេន បច្ចយតា វេទិតព្ពា. ឧបាទានបច្ចយាបិ តណ្ហាតិ ឯត្ថ ឋបេត្វា កាមុបាទានំ សេសានិ តីណិ ឧបាទានានិ អវិជ្ជាយ សង្ខារា វិយ តណ្ហាយ បច្ចយា ហោន្តីតិ វេទិតព្ពានិ. សេសំ យថាបាឡិមេវ និយ្យាតិ. ជរាមរណបច្ចយាតិ បុច្ឆា បរវាទិស្ស, នាមរូបំ វិញ្ញាណបច្ចយាតិ សកវាទិស្សាតិ.

អញ្ញមញ្ញបច្ចយកថាវណ្ណនា.