៣. អទ្ធាកថាវណ្ណនា

៧២០-៧២១. ឥទានិ អទ្ធាកថា នាម ហោតិ. តត្ថ ‘‘តីណិមានិ, ភិក្ខវេ, កថាវត្ថូនី’’តិ (អ. និ. ៣.៦៨) សុត្តំ និស្សាយ កាលសង្ខាតោ អទ្ធា នាម បរិនិប្ផន្នោ អត្ថីតិ យេសំ លទ្ធិ; តេសំ ‘‘អទ្ធា នាម កោចិ បរិនិប្ផន្នោ នត្ថិ អញ្ញត្រ កាលបញ្ញត្តិមត្តា. រូបាទយោ បន ខន្ធាវ បរិនិប្ផន្នា’’តិ វិភាគំ ទស្សេតុំ អទ្ធា បរិនិប្ផន្នោតិ បុច្ឆា សកវាទិស្ស, បដិញ្ញា ឥតរស្ស. អថ នំ ‘‘សចេ សោ បរិនិប្ផន្នោ, រូបាទីសុ អនេន អញ្ញតរេន ភវិតព្ព’’ន្តិ ចោទេតុំ រូបន្តិអាទិមាហ. ឥតរោ បដិក្ខិបតិ. សេសំ យថាបាឡិមេវ និយ្យាតីតិ.

អទ្ធាកថាវណ្ណនា.