២. កុសលបដិលាភកថាវណ្ណនា

៦៥៨-៦៥៩. ឥទានិ កុសលបដិលាភកថា នាម ហោតិ. តត្ថ កប្បដ្ឋោ សកសមយេ កាមាវចរកុសលមេវ បដិលភតិ. យេន បន តំ ឧបបត្តិំ បដិពាហេយ្យ, តំ មហគ្គតំ លោកុត្តរំ វា ន បដិលភតិ. យេសំ បន ឥមំ វិភាគំ អកត្វា អវិសេសេនេវ ‘‘សោ កុសលចិត្តំ ន បដិលភតី’’តិ លទ្ធិ, សេយ្យថាបិ ឧត្តរាបថកានំ; តេសំ វិភាគទស្សនេន តំ លទ្ធិំ ភិន្ទិតុំ បុច្ឆា សកវាទិស្ស, បដិញ្ញា ឥតរស្ស. សេសមេត្ថ ឧត្តានត្ថមេវាតិ.

កុសលបដិលាភកថាវណ្ណនា.