២. កម្មកថាវណ្ណនា

៦៣៣-៦៣៥. ឥទានិ កម្មកថា នាម ហោតិ. តត្ថ ‘‘នាហំ, ភិក្ខវេ, សញ្ចេតនិកានំ កម្មាន’’ន្តិ (អ. និ. ១០.២១៧) សុត្តបទំ និស្សាយ ‘‘សព្ពំ កម្មំ សវិបាក’’ន្តិ យេសំ លទ្ធិ, សេយ្យថាបិ មហាសំឃិកានំ; តេសំ ‘‘ចេតនាហំ, ភិក្ខវេ, កម្មំ វទាមី’’តិ (អ. និ. ៦.៦៣) សត្ថារា អវិសេសេន ចេតនា ‘‘កម្ម’’ន្តិ វុត្តា; សា ច កុសលាកុសលាវ សវិបាកា, អព្យាកតា អវិបាកាតិ ឥមំ វិភាគំ ទស្សេតុំ សព្ពំ កម្មន្តិ បុច្ឆា សកវាទិស្ស, បដិញ្ញា ឥតរស្ស. បុន សព្ពា ចេតនាតិ បញ្ហេសុ អព្យាកតំ សន្ធាយ បដិក្ខេបោ, កុសលាកុសលេ សន្ធាយ បដិញ្ញា វេទិតព្ពា. វិបាកាព្យាកតាតិអាទិ សវិបាកាវិបាកចេតនំ សរូបេន ទស្សេតុំ វុត្តំ. សេសមេត្ថ ឧត្តានត្ថមេវ. ‘‘នាហំ, ភិក្ខវេ’’តិ សុត្តំ សតិ បច្ចយេ ទិដ្ឋធម្មាទីសុ វិបាកបដិសំវេទនំ សន្ធាយ វុត្តំ, តស្មា អសាធកន្តិ.

កម្មកថាវណ្ណនា.