៣. សទ្ទោ វិបាកោតិកថាវណ្ណនា

៦៣៦-៦៣៧. ឥទានិ សទ្ទោ វិបាកោតិកថា នាម ហោតិ. តត្ថ ‘‘សោ តស្ស កម្មស្ស កតត្តា ឧបចិតត្តា ឧស្សន្នត្តា វិបុលត្តា ព្រហ្មស្សរោ ហោតី’’តិអាទីនិ (ទី. និ. ៣.២៣៦) អយោនិសោ គហេត្វា ‘‘សទ្ទោ វិបាកោ’’តិ យេសំ លទ្ធិ, សេយ្យថាបិ មហាសំឃិកានំ; តេសំ ‘‘កម្មសមុដ្ឋានា អរូបធម្មាវ វិបាកាតិ នាមំ លភន្តិ. រូបធម្មេសុ បនាយំ វោហារោ នត្ថី’’តិ ទស្សេតុំ បុច្ឆា សកវាទិស្ស, បដិញ្ញា ឥតរស្ស. សុខវេទនីយោតិអាទិ ‘‘វិបាកោ នាម ឯវរូបោ ហោតី’’តិ ទស្សនត្ថំ វុត្តំ. ‘‘សោ តស្ស កម្មស្សា’’តិ សុត្តំ លក្ខណបដិលាភទស្សនត្ថំ វុត្តំ. មហាបុរិសោ ហិ កម្មស្ស កតត្តា សុចិបរិវារោបិ ហោតិ, ន ច បរិវារោ វិបាកោ, តស្មា អសាធកមេតន្តិ.

សទ្ទោ វិបាកោតិកថាវណ្ណនា.