២. រូបំមគ្គោតិកថាវណ្ណនា

៥៧៣-៥៧៥. ឥទានិ រូបំ មគ្គោតិកថា នាម ហោតិ. តត្ថ យេសំ ‘‘សម្មាវាចាកម្មន្តាជីវា រូប’’ន្តិ លទ្ធិ, សេយ្យថាបិ មហិសាសកសម្មិតិយមហាសំឃិកានំ; តេ សន្ធាយ មគ្គសមង្គិស្សាតិ បុច្ឆា សកវាទិស្ស, បដិញ្ញា ឥតរស្ស. អថ នំ ‘‘យទិ តេ សម្មាវាចាទយោ រូបំ, ន វិរតិយោ, យថា សម្មាទិដ្ឋាទិមគ្គោ សារម្មណាទិសភាវោ, ឯវំ តម្បិ រូបំ សិយា’’តិ ចោទេតុំ សារម្មណោតិអាទិមាហ. តត្ថ បដិក្ខេបោ ច បដិញ្ញា ច បរវាទិនោ លទ្ធិអនុរូបេន វេទិតព្ពា. សេសមេត្ថ ឧត្តានត្ថមេវាតិ.

រូបំ មគ្គោតិកថាវណ្ណនា.