១០. សព្ពសំយោជនប្បហានកថាវណ្ណនា

៤១៣. ឥទានិ សំយោជនប្បហានកថា នាម ហោតិ. តត្ថ យេសំ ‘‘និប្បរិយាយេនេវ សព្ពសំយោជនប្បហានំ អរហត្ត’’ន្តិ លទ្ធិ, សេយ្យថាបិ ឯតរហិ អន្ធកានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស. បុន សព្ពេ សំយោជនាតិ បុដ្ឋោ ហេដ្ឋា វុត្តមគ្គត្តយេន បហីនេ សន្ធាយ បដិក្ខិបតិ. ទុតិយំ បុដ្ឋោ តេន មគ្គេន អប្បហីនស្ស អភាវា បដិជានាតិ. សក្កាយទិដ្ឋិអាទីសុបិ បឋមមគ្គេន បហីនភាវំ សន្ធាយ បដិក្ខិបតិ, ចតុត្ថមគ្គេន អនវសេសប្បហានំ សន្ធាយ បដិជានាតិ. ឯសេវ នយោ សព្ពត្ថាតិ.

សព្ពសំយោជនប្បហានកថាវណ្ណនា.

ចតុត្ថោ វគ្គោ.