៣. វិមុត្តិកថាវណ្ណនា

៣៦៣. ឥទានិ វិមុត្តិកថា នាម ហោតិ. តត្ថ យេសំ ‘‘វីតរាគចិត្តានំ វិមុត្តិបយោជនំ នាម នត្ថិ. យថា បន មលីនំ វត្ថំ ធោវិយមានំ មលា វិមុច្ចតិ, ឯវំ សរាគំ ចិត្តំ រាគតោ វិមុច្ចតី’’តិ លទ្ធិ, សេយ្យថាបិ ឯតរហិ អន្ធកានំ; តេ សន្ធាយ សរាគន្តិ បុច្ឆា សកវាទិស្ស, បដិញ្ញា ឥតរស្ស. តតោ រាគសហគតន្តិអាទិនា នយេន បុដ្ឋោ មគ្គក្ខណេ ចិត្តំ វិមុច្ចតិ នាម. តទា ច ឯវរូបំ ចិត្តំ នត្ថីតិ បដិក្ខិបតិ.

សផស្សន្តិអាទិនា នយេន បុដ្ឋោបិ យថា ផស្សោ ច ចិត្តញ្ច ឧភោ រាគតោ វិមុច្ចន្តិ, ឯវំ រាគស្ស វិមុត្តិំ អបស្សមានោ បដិក្ខិបតិ. សទោសាទីសុបិ ឥមិនាវុបាយេន អត្ថោ វេទិតព្ពោ.

វិមុត្តិកថាវណ្ណនា.