(៣៥. ក) អយោនិសោ មនសិការោ

៩៣៦. តត្ថ កតមោ អយោនិសោ មនសិការោ? អនិច្ចេ ‘‘និច្ច’’ន្តិ អយោនិសោ មនសិការោ, ទុក្ខេ ‘‘សុខ’’ន្តិ អយោនិសោ មនសិការោ, អនត្តនិ ‘‘អត្តា’’តិ អយោនិសោ មនសិការោ, អសុភេ ‘‘សុភ’’ន្តិ អយោនិសោ មនសិការោ, សច្ចវិប្បដិកុលេន វា ចិត្តស្ស អាវដ្ដនា អនាវដ្ដនា អាភោគោ សមន្នាហារោ មនសិការោ – អយំ វុច្ចតិ ‘‘អយោនិសោ មនសិការោ’’.

(ខ) កុម្មគ្គសេវនា

តត្ថ កតមា កុម្មគ្គសេវនា? តត្ថ កតមោ កុម្មគ្គោ? មិច្ឆាទិដ្ឋិ, មិច្ឆាសង្កប្បោ, មិច្ឆាវាចា, មិច្ឆាកម្មន្តោ, មិច្ឆាអាជីវោ, មិច្ឆាវាយាមោ, មិច្ឆាសតិ, មិច្ឆាសមាធិ – អយំ វុច្ចតិ ‘‘កុម្មគ្គោ’’. យា ឥមស្ស កុម្មគ្គស្ស សេវនា និសេវនា សំសេវនា ភជនា សម្ភជនា ភត្តិ សម្ភត្តិ តំសម្បវង្កតា – អយំ វុច្ចតិ ‘‘កុម្មគ្គសេវនា’’.

(គ) ចេតសោ ច លីនត្តំ

តត្ថ កតមំ ចេតសោ ច លីនត្តំ? យា ចិត្តស្ស អកល្យតា អកម្មញ្ញតា ឱលីយនា សល្លីយនា លីនំ លីយនា លីយិតត្តំ ថិនំ ថិយនា ថិយិតត្តំ ចិត្តស្ស – ឥទំ វុច្ចតិ ‘‘ចេតសោ ច លីនត្តំ’’.

តិកំ.