នមោ តស្ស ភគវតោ អរហតោ សម្មាសម្ពុទ្ធស្ស

អភិធម្មបិដកេ

វិភង្គបាឡិ

១. ខន្ធវិភង្គោ

១. សុត្តន្តភាជនីយំ

១. បញ្ចក្ខន្ធា – រូបក្ខន្ធោ, វេទនាក្ខន្ធោ, សញ្ញាក្ខន្ធោ, សង្ខារក្ខន្ធោ, វិញ្ញាណក្ខន្ធោ.

១. រូបក្ខន្ធោ

២. តត្ថ កតមោ រូបក្ខន្ធោ? យំ កិញ្ចិ រូបំ អតីតានាគតបច្ចុប្បន្នំ អជ្ឈត្តំ វា ពហិទ្ធា វា ឱឡារិកំ វា សុខុមំ វា ហីនំ វា បណីតំ វា យំ ទូរេ សន្តិកេ វា, តទេកជ្ឈំ អភិសញ្ញូហិត្វា អភិសង្ខិបិត្វា – អយំ វុច្ចតិ រូបក្ខន្ធោ.

៣. តត្ថ កតមំ រូបំ អតីតំ? យំ រូបំ អតីតំ និរុទ្ធំ វិគតំ វិបរិណតំ អត្ថង្គតំ អព្ភត្ថង្គតំ ឧប្បជ្ជិត្វា វិគតំ អតីតំ អតីតំសេន សង្គហិតំ, ចត្តារោ ច មហាភូតា ចតុន្នញ្ច មហាភូតានំ ឧបាទាយរូបំ – ឥទំ វុច្ចតិ រូបំ អតីតំ.

តត្ថ កតមំ រូបំ អនាគតំ? យំ រូបំ អជាតំ អភូតំ អសញ្ជាតំ អនិព្ពត្តំ អនភិនិព្ពត្តំ អបាតុភូតំ អនុប្បន្នំ អសមុប្បន្នំ អនុដ្ឋិតំ អសមុដ្ឋិតំ អនាគតំ អនាគតំសេន សង្គហិតំ, ចត្តារោ ច មហាភូតា ចតុន្នញ្ច មហាភូតានំ ឧបាទាយរូបំ – ឥទំ វុច្ចតិ រូបំ អនាគតំ.

តត្ថ កតមំ រូបំ បច្ចុប្បន្នំ? យំ រូបំ ជាតំ ភូតំ សញ្ជាតំ និព្ពត្តំ អភិនិព្ពត្តំ បាតុភូតំ ឧប្បន្នំ សមុប្បន្នំ ឧដ្ឋិតំ សមុដ្ឋិតំ បច្ចុប្បន្នំ បច្ចុប្បន្នំសេន សង្គហិតំ, ចត្តារោ ច មហាភូតា ចតុន្នញ្ច មហាភូតានំ ឧបាទាយរូបំ – ឥទំ វុច្ចតិ រូបំ បច្ចុប្បន្នំ.

៤. តត្ថ កតមំ រូបំ អជ្ឈត្តំ? យំ រូបំ តេសំ តេសំ សត្តានំ អជ្ឈត្តំ បច្ចត្តំ និយកំ បាដិបុគ្គលិកំ ឧបាទិន្នំ, ចត្តារោ ច មហាភូតា ចតុន្នញ្ច មហាភូតានំ ឧបាទាយរូបំ – ឥទំ វុច្ចតិ រូបំ អជ្ឈត្តំ.

តត្ថ កតមំ រូបំ ពហិទ្ធា? យំ រូបំ តេសំ តេសំ បរសត្តានំ បរបុគ្គលានំ អជ្ឈត្តំ បច្ចត្តំ និយកំ បាដិបុគ្គលិកំ ឧបាទិន្នំ, ចត្តារោ ច មហាភូតា ចតុន្នញ្ច មហាភូតានំ ឧបាទាយរូបំ – ឥទំ វុច្ចតិ រូបំ ពហិទ្ធា.

៥. តត្ថ កតមំ រូបំ ឱឡារិកំ? ចក្ខាយតនំ…បេ… ផោដ្ឋព្ពាយតនំ – ឥទំ វុច្ចតិ រូបំ ឱឡារិកំ.

តត្ថ កតមំ រូបំ សុខុមំ? ឥត្ថិន្ទ្រិយំ…បេ… កពឡីការោ [កពឡិំការោ (សី. ស្យា.)] អាហារោ – ឥទំ វុច្ចតិ រូបំ សុខុមំ.

៦. តត្ថ កតមំ រូបំ ហីនំ? យំ រូបំ តេសំ តេសំ សត្តានំ ឧញ្ញាតំ អវញ្ញាតំ ហីឡិតំ បរិភូតំ អចិត្តីកតំ ហីនំ ហីនមតំ ហីនសម្មតំ អនិដ្ឋំ អកន្តំ អមនាបំ, រូបា សទ្ទា គន្ធា រសា ផោដ្ឋព្ពា – ឥទំ វុច្ចតិ រូបំ ហីនំ.

តត្ថ កតមំ រូបំ បណីតំ? យំ រូបំ តេសំ តេសំ សត្តានំ អនុញ្ញាតំ អនវញ្ញាតំ អហីឡិតំ អបរិភូតំ ចិត្តីកតំ បណីតំ បណីតមតំ បណីតសម្មតំ ឥដ្ឋំ កន្តំ មនាបំ, រូបា សទ្ទា គន្ធា រសា ផោដ្ឋព្ពា – ឥទំ វុច្ចតិ រូបំ បណីតំ. តំ តំ វា បន រូបំ ឧបាទាយុបាទាយ រូបំ ហីនំ បណីតំ ទដ្ឋព្ពំ.

៧. តត្ថ កតមំ រូបំ ទូរេ? ឥត្ថិន្ទ្រិយំ…បេ… កពឡីការោ អាហារោ, យំ វា បនញ្ញម្បិ អត្ថិ រូបំ អនាសន្នេ អនុបកដ្ឋេ ទូរេ អសន្តិកេ – ឥទំ វុច្ចតិ រូបំ ទូរេ.

តត្ថ កតមំ រូបំ សន្តិកេ? ចក្ខាយតនំ…បេ… ផោដ្ឋព្ពាយតនំ, យំ វា បនញ្ញម្បិ អត្ថិ រូបំ អាសន្នេ ឧបកដ្ឋេ អវិទូរេ សន្តិកេ – ឥទំ វុច្ចតិ រូបំ សន្តិកេ. តំ តំ វា បន រូបំ ឧបាទាយុបាទាយ រូបំ ទូរេ សន្តិកេ ទដ្ឋព្ពំ.

២. វេទនាក្ខន្ធោ

៨. តត្ថ កតមោ វេទនាក្ខន្ធោ? យា កាចិ វេទនា អតីតានាគតបច្ចុប្បន្នា អជ្ឈត្តា វា ពហិទ្ធា វា ឱឡារិកា វា សុខុមា វា ហីនា វា បណីតា វា យា ទូរេ សន្តិកេ វា, តទេកជ្ឈំ អភិសញ្ញូហិត្វា អភិសង្ខិបិត្វា – អយំ វុច្ចតិ វេទនាក្ខន្ធោ.

៩. តត្ថ កតមា វេទនា អតីតា? យា វេទនា អតីតា និរុទ្ធា វិគតា វិបរិណតា អត្ថង្គតា អព្ភត្ថង្គតា ឧប្បជ្ជិត្វា វិគតា អតីតា អតីតំសេន សង្គហិតា, សុខា វេទនា ទុក្ខា វេទនា អទុក្ខមសុខា វេទនា – អយំ វុច្ចតិ វេទនា អតីតា.

តត្ថ កតមា វេទនា អនាគតា? យា វេទនា អជាតា អភូតា អសញ្ជាតា អនិព្ពត្តា អនភិនិព្ពត្តា អបាតុភូតា អនុប្បន្នា អសមុប្បន្នា អនុដ្ឋិតា អសមុដ្ឋិតា អនាគតា អនាគតំសេន សង្គហិតា, សុខា វេទនា ទុក្ខា វេទនា អទុក្ខមសុខា វេទនា – អយំ វុច្ចតិ វេទនា អនាគតា.

តត្ថ កតមា វេទនា បច្ចុប្បន្នា? យា វេទនា ជាតា ភូតា សញ្ជាតា និព្ពត្តា អភិនិព្ពត្តា បាតុភូតា ឧប្បន្នា សមុប្បន្នា ឧដ្ឋិតា សមុដ្ឋិតា បច្ចុប្បន្នា បច្ចុប្បន្នំសេន សង្គហិតា, សុខា វេទនា ទុក្ខា វេទនា អទុក្ខមសុខា វេទនា – អយំ វុច្ចតិ វេទនា បច្ចុប្បន្នា.

១០. តត្ថ កតមា វេទនា អជ្ឈត្តា? យា វេទនា តេសំ តេសំ សត្តានំ អជ្ឈត្តំ បច្ចត្តំ និយកា បាដិបុគ្គលិកា ឧបាទិន្នា, សុខា វេទនា ទុក្ខា វេទនា អទុក្ខមសុខា វេទនា – អយំ វុច្ចតិ វេទនា អជ្ឈត្តា.

តត្ថ កតមា វេទនា ពហិទ្ធា? យា វេទនា តេសំ តេសំ បរសត្តានំ បរបុគ្គលានំ អជ្ឈត្តំ បច្ចត្តំ និយកា បាដិបុគ្គលិកា ឧបាទិន្នា, សុខា វេទនា ទុក្ខា វេទនា អទុក្ខមសុខា វេទនា – អយំ វុច្ចតិ វេទនា ពហិទ្ធា.

១១. តត្ថ កតមា វេទនា ឱឡារិកា សុខុមា? អកុសលា វេទនា ឱឡារិកា, កុសលាព្យាកតា វេទនា សុខុមា. កុសលាកុសលា វេទនា ឱឡារិកា, អព្យាកតា វេទនា សុខុមា. ទុក្ខា វេទនា ឱឡារិកា, សុខា ច អទុក្ខមសុខា ច វេទនា សុខុមា. សុខទុក្ខា វេទនា ឱឡារិកា, អទុក្ខមសុខា វេទនា សុខុមា. អសមាបន្នស្ស វេទនា ឱឡារិកា, សមាបន្នស្ស វេទនា សុខុមា. សាសវា វេទនា ឱឡារិកា, អនាសវា វេទនា សុខុមា. តំ តំ វា បន វេទនំ ឧបាទាយុបាទាយ វេទនា ឱឡារិកា សុខុមា ទដ្ឋព្ពា.

១២. តត្ថ កតមា វេទនា ហីនា បណីតា? អកុសលា វេទនា ហីនា, កុសលាព្យាកតា វេទនា បណីតា. កុសលាកុសលា វេទនា ហីនា, អព្យាកតា វេទនា បណីតា. ទុក្ខា វេទនា ហីនា, សុខា ច អទុក្ខមសុខា ច វេទនា បណីតា. សុខទុក្ខា វេទនា ហីនា, អទុក្ខមសុខា វេទនា បណីតា. អសមាបន្នស្ស វេទនា ហីនា, សមាបន្នស្ស វេទនា បណីតា. សាសវា វេទនា ហីនា, អនាសវា វេទនា បណីតា. តំ តំ វា បន វេទនំ ឧបាទាយុបាទាយ វេទនា ហីនា បណីតា ទដ្ឋព្ពា.

១៣. តត្ថ កតមា វេទនា ទូរេ? អកុសលា វេទនា កុសលាព្យាកតាហិ វេទនាហិ ទូរេ; កុសលាព្យាកតា វេទនា អកុសលាយ វេទនាយ ទូរេ; កុសលា វេទនា អកុសលាព្យាកតាហិ វេទនាហិ ទូរេ; អកុសលាព្យាកតា វេទនា កុសលាយ វេទនាយ ទូរេ; អព្យាកតា វេទនា កុសលាកុសលាហិ វេទនាហិ ទូរេ; កុសលាកុសលា វេទនា អព្យាកតាយ វេទនាយ ទូរេ. ទុក្ខា វេទនា សុខាយ ច អទុក្ខមសុខាយ ច វេទនាហិ ទូរេ; សុខា ច អទុក្ខមសុខា ច វេទនា ទុក្ខាយ វេទនាយ ទូរេ; សុខា វេទនា ទុក្ខាយ ច អទុក្ខមសុខាយ ច វេទនាហិ ទូរេ; ទុក្ខា ច អទុក្ខមសុខា ច វេទនា សុខាយ វេទនាយ ទូរេ; អទុក្ខមសុខា វេទនា សុខទុក្ខាហិ វេទនាហិ ទូរេ; សុខទុក្ខា វេទនា អទុក្ខមសុខាយ វេទនាយ ទូរេ. អសមាបន្នស្ស វេទនា សមាបន្នស្ស វេទនាយ ទូរេ; សមាបន្នស្ស វេទនា អសមាបន្នស្ស វេទនាយ ទូរេ. សាសវា វេទនា អនាសវាយ វេទនាយ ទូរេ; អនាសវា វេទនា សាសវាយ វេទនាយ ទូរេ – អយំ វុច្ចតិ វេទនា ទូរេ.

តត្ថ កតមា វេទនា សន្តិកេ? អកុសលា វេទនា អកុសលាយ វេទនាយ សន្តិកេ; កុសលា វេទនា កុសលាយ វេទនាយ សន្តិកេ; អព្យាកតា វេទនា អព្យាកតាយ វេទនាយ សន្តិកេ. ទុក្ខា វេទនា ទុក្ខាយ វេទនាយ សន្តិកេ; សុខា វេទនា សុខាយ វេទនាយ សន្តិកេ; អទុក្ខមសុខា វេទនា អទុក្ខមសុខាយ វេទនាយ សន្តិកេ. អសមាបន្នស្ស វេទនា អសមាបន្នស្ស វេទនាយ សន្តិកេ; សមាបន្នស្ស វេទនា សមាបន្នស្ស វេទនាយ សន្តិកេ. សាសវា វេទនា សាសវាយ វេទនាយ សន្តិកេ; អនាសវា វេទនា អនាសវាយ វេទនាយ សន្តិកេ. អយំ វុច្ចតិ វេទនា សន្តិកេ. តំ តំ វា បន វេទនំ ឧបាទាយុបាទាយ វេទនា ទូរេ សន្តិកេ ទដ្ឋព្ពា.

៣. សញ្ញាក្ខន្ធោ

១៤. តត្ថ កតមោ សញ្ញាក្ខន្ធោ? យា កាចិ សញ្ញា អតីតានាគតបច្ចុប្បន្នា អជ្ឈត្តា វា ពហិទ្ធា វា ឱឡារិកា វា សុខុមា វា ហីនា វា បណីតា វា យា ទូរេ សន្តិកេ វា តទេកជ្ឈំ អភិសញ្ញូហិត្វា អភិសង្ខិបិត្វា – អយំ វុច្ចតិ សញ្ញាក្ខន្ធោ.

១៥. តត្ថ កតមា សញ្ញា អតីតា? យា សញ្ញា អតីតា និរុទ្ធា វិគតា វិបរិណតា អត្ថង្គតា អព្ភត្ថង្គតា ឧប្បជ្ជិត្វា វិគតា អតីតា អតីតំសេន សង្គហិតា, ចក្ខុសម្ផស្សជា សញ្ញា សោតសម្ផស្សជា សញ្ញា ឃានសម្ផស្សជា សញ្ញា ជិវ្ហាសម្ផស្សជា សញ្ញា កាយសម្ផស្សជា សញ្ញា មនោសម្ផស្សជា សញ្ញា – អយំ វុច្ចតិ សញ្ញា អតីតា.

តត្ថ កតមា សញ្ញា អនាគតា? យា សញ្ញា អជាតា អភូតា អសញ្ជាតា អនិព្ពត្តា អនភិនិព្ពត្តា អបាតុភូតា អនុប្បន្នា អសមុប្បន្នា អនុដ្ឋិតា អសមុដ្ឋិតា អនាគតា អនាគតំសេន សង្គហិតា, ចក្ខុសម្ផស្សជា សញ្ញា សោតសម្ផស្សជា សញ្ញា ឃានសម្ផស្សជា សញ្ញា ជិវ្ហាសម្ផស្សជា សញ្ញា កាយសម្ផស្សជា សញ្ញា មនោសម្ផស្សជា សញ្ញា – អយំ វុច្ចតិ សញ្ញា អនាគតា.

តត្ថ កតមា សញ្ញា បច្ចុប្បន្នា? យា សញ្ញា ជាតា ភូតា សញ្ជាតា និព្ពត្តា អភិនិព្ពត្តា បាតុភូតា ឧប្បន្នា សមុប្បន្នា ឧដ្ឋិតា សមុដ្ឋិតា បច្ចុប្បន្នា បច្ចុប្បន្នំសេន សង្គហិតា, ចក្ខុសម្ផស្សជា សញ្ញា សោតសម្ផស្សជា សញ្ញា ឃានសម្ផស្សជា សញ្ញា ជិវ្ហាសម្ផស្សជា សញ្ញា កាយសម្ផស្សជា សញ្ញា មនោសម្ផស្សជា សញ្ញា – អយំ វុច្ចតិ សញ្ញា បច្ចុប្បន្នា.

១៦. តត្ថ កតមា សញ្ញា អជ្ឈត្តា? យា សញ្ញា តេសំ តេសំ សត្តានំ អជ្ឈត្តំ បច្ចត្តំ និយកា បាដិបុគ្គលិកា ឧបាទិន្នា, ចក្ខុសម្ផស្សជា សញ្ញា សោតសម្ផស្សជា សញ្ញា ឃានសម្ផស្សជា សញ្ញា ជិវ្ហាសម្ផស្សជា សញ្ញា កាយសម្ផស្សជា សញ្ញា មនោសម្ផស្សជា សញ្ញា – អយំ វុច្ចតិ សញ្ញា អជ្ឈត្តា.

តត្ថ កតមា សញ្ញា ពហិទ្ធា? យា សញ្ញា តេសំ តេសំ បរសត្តានំ បរបុគ្គលានំ អជ្ឈត្តំ បច្ចត្តំ និយកា បាដិបុគ្គលិកា ឧបាទិន្នា, ចក្ខុសម្ផស្សជា សញ្ញា សោតសម្ផស្សជា សញ្ញា ឃានសម្ផស្សជា សញ្ញា ជិវ្ហាសម្ផស្សជា សញ្ញា កាយសម្ផស្សជា សញ្ញា មនោសម្ផស្សជា សញ្ញា – អយំ វុច្ចតិ សញ្ញា ពហិទ្ធា.

១៧. តត្ថ កតមា សញ្ញា ឱឡារិកា សុខុមា? បដិឃសម្ផស្សជា សញ្ញា ឱឡារិកា, អធិវចនសម្ផស្សជា សញ្ញា សុខុមា. អកុសលា សញ្ញា ឱឡារិកា, កុសលាព្យាកតា សញ្ញា សុខុមា. កុសលាកុសលា សញ្ញា ឱឡារិកា, អព្យាកតា សញ្ញា សុខុមា. ទុក្ខាយ វេទនាយ សម្បយុត្តា សញ្ញា ឱឡារិកា, សុខាយ ច អទុក្ខមសុខាយ ច វេទនាហិ សម្បយុត្តា សញ្ញា សុខុមា. សុខទុក្ខាហិ វេទនាហិ សម្បយុត្តា សញ្ញា ឱឡារិកា, អទុក្ខមសុខាយ វេទនាយ សម្បយុត្តា សញ្ញា សុខុមា. អសមាបន្នស្ស សញ្ញា ឱឡារិកា, សមាបន្នស្ស សញ្ញា សុខុមា. សាសវា សញ្ញា ឱឡារិកា, អនាសវា សញ្ញា សុខុមា. តំ តំ វា បន សញ្ញំ ឧបាទាយុបាទាយ សញ្ញា ឱឡារិកា សុខុមា ទដ្ឋព្ពា.

១៨. តត្ថ កតមា សញ្ញា ហីនា បណីតា? អកុសលា សញ្ញា ហីនា, កុសលាព្យាកតា សញ្ញា បណីតា. កុសលាកុសលា សញ្ញា ហីនា, អព្យាកតា សញ្ញា បណីតា. ទុក្ខាយ វេទនាយ សម្បយុត្តា សញ្ញា ហីនា, សុខាយ ច អទុក្ខមសុខាយ ច វេទនាហិ សម្បយុត្តា សញ្ញា បណីតា. សុខទុក្ខាហិ វេទនាហិ សម្បយុត្តា សញ្ញា ហីនា, អទុក្ខមសុខាយ វេទនាយ សម្បយុត្តា សញ្ញា បណីតា. អសមាបន្នស្ស សញ្ញា ហីនា, សមាបន្នស្ស សញ្ញា បណីតា. សាសវា សញ្ញា ហីនា, អនាសវា សញ្ញា បណីតា. តំ តំ វា បន សញ្ញំ ឧបាទាយុបាទាយ សញ្ញា ហីនា បណីតា ទដ្ឋព្ពា.

១៩. តត្ថ កតមា សញ្ញា ទូរេ? អកុសលា សញ្ញា កុសលាព្យាកតាហិ សញ្ញាហិ ទូរេ; កុសលាព្យាកតា សញ្ញា អកុសលាយ សញ្ញាយ ទូរេ; កុសលា សញ្ញា អកុសលាព្យាកតាហិ សញ្ញាហិ ទូរេ; អកុសលាព្យាកតា សញ្ញា កុសលាយ សញ្ញាយ ទូរេ. អព្យាកតា សញ្ញា កុសលាកុសលាហិ សញ្ញាហិ ទូរេ; កុសលាកុសលា សញ្ញា អព្យាកតាយ សញ្ញាយ ទូរេ. ទុក្ខាយ វេទនាយ សម្បយុត្តា សញ្ញា សុខាយ ច អទុក្ខមសុខាយ ច វេទនាហិ សម្បយុត្តាហិ សញ្ញាហិ ទូរេ; សុខាយ ច អទុក្ខមសុខាយ ច វេទនាហិ សម្បយុត្តា សញ្ញា ទុក្ខាយ វេទនាយ សម្បយុត្តាយ សញ្ញាយ ទូរេ; សុខាយ វេទនាយ សម្បយុត្តា សញ្ញា ទុក្ខាយ ច អទុក្ខមសុខាយ ច វេទនាហិ សម្បយុត្តាហិ សញ្ញាហិ ទូរេ; ទុក្ខាយ ច អទុក្ខមសុខាយ ច វេទនាហិ សម្បយុត្តា សញ្ញា សុខាយ វេទនាយ សម្បយុត្តាយ សញ្ញាយ ទូរេ; អទុក្ខមសុខាយ វេទនាយ សម្បយុត្តា សញ្ញា សុខទុក្ខាហិ វេទនាហិ សម្បយុត្តាហិ សញ្ញាហិ ទូរេ; សុខទុក្ខាហិ វេទនាហិ សម្បយុត្តា សញ្ញា អទុក្ខមសុខាយ វេទនាយ សម្បយុត្តាយ សញ្ញាយ ទូរេ. អសមាបន្នស្ស សញ្ញា សមាបន្នស្ស សញ្ញាយ ទូរេ; សមាបន្នស្ស សញ្ញា អសមាបន្នស្ស សញ្ញាយ ទូរេ. សាសវា សញ្ញា អនាសវាយ សញ្ញាយ ទូរេ; អនាសវា សញ្ញា សាសវាយ សញ្ញាយ ទូរេ – អយំ វុច្ចតិ សញ្ញា ទូរេ.

តត្ថ កតមា សញ្ញា សន្តិកេ? អកុសលា សញ្ញា អកុសលាយ សញ្ញាយ សន្តិកេ; កុសលា សញ្ញា កុសលាយ សញ្ញាយ សន្តិកេ; អព្យាកតា សញ្ញា អព្យាកតាយ សញ្ញាយ សន្តិកេ. ទុក្ខាយ វេទនាយ សម្បយុត្តា សញ្ញា ទុក្ខាយ វេទនាយ សម្បយុត្តាយ សញ្ញាយ សន្តិកេ; សុខាយ វេទនាយ សម្បយុត្តា សញ្ញា សុខាយ វេទនាយ សម្បយុត្តាយ សញ្ញាយ សន្តិកេ; អទុក្ខមសុខាយ វេទនាយ សម្បយុត្តា សញ្ញា អទុក្ខមសុខាយ វេទនាយ សម្បយុត្តាយ សញ្ញាយ សន្តិកេ. អសមាបន្នស្ស សញ្ញា អសមាបន្នស្ស សញ្ញាយ សន្តិកេ; សមាបន្នស្ស សញ្ញា សមាបន្នស្ស សញ្ញាយ សន្តិកេ. សាសវា សញ្ញា សាសវាយ សញ្ញាយ សន្តិកេ; អនាសវា សញ្ញា អនាសវាយ សញ្ញាយ សន្តិកេ. អយំ វុច្ចតិ សញ្ញា សន្តិកេ. តំ តំ វា បន សញ្ញំ ឧបាទាយុបាទាយ សញ្ញា ទូរេ សន្តិកេ ទដ្ឋព្ពា.

៤. សង្ខារក្ខន្ធោ

២០. តត្ថ កតមោ សង្ខារក្ខន្ធោ? យេ កេចិ សង្ខារា អតីតានាគតបច្ចុប្បន្នា អជ្ឈត្តា វា ពហិទ្ធា វា ឱឡារិកា វា សុខុមា វា ហីនា វា បណីតា វា យេ ទូរេ សន្តិកេ វា, តទេកជ្ឈំ អភិសញ្ញូហិត្វា អភិសង្ខិបិត្វា – អយំ វុច្ចតិ សង្ខារក្ខន្ធោ.

២១. តត្ថ កតមេ សង្ខារា អតីតា? យេ សង្ខារា អតីតា និរុទ្ធា វិគតា វិបរិណតា អត្ថង្គតា អព្ភត្ថង្គតា ឧប្បជ្ជិត្វា វិគតា អតីតា អតីតំសេន សង្គហិតា, ចក្ខុសម្ផស្សជា ចេតនា សោតសម្ផស្សជា ចេតនា ឃានសម្ផស្សជា ចេតនា ជិវ្ហាសម្ផស្សជា ចេតនា កាយសម្ផស្សជា ចេតនា មនោសម្ផស្សជា ចេតនា – ឥមេ វុច្ចន្តិ សង្ខារា អតីតា.

តត្ថ កតមេ សង្ខារា អនាគតា? យេ សង្ខារា អជាតា អភូតា អសញ្ជាតា អនិព្ពត្តា អនភិនិព្ពត្តា អបាតុភូតា អនុប្បន្នា អសមុប្បន្នា អនុដ្ឋិតា អសមុដ្ឋិតា អនាគតា អនាគតំសេន សង្គហិតា, ចក្ខុសម្ផស្សជា ចេតនា សោតសម្ផស្សជា ចេតនា ឃានសម្ផស្សជា ចេតនា ជិវ្ហាសម្ផស្សជា ចេតនា កាយសម្ផស្សជា ចេតនា មនោសម្ផស្សជា ចេតនា – ឥមេ វុច្ចន្តិ សង្ខារា អនាគតា.

តត្ថ កតមេ សង្ខារា បច្ចុប្បន្នា? យេ សង្ខារា ជាតា ភូតា សញ្ជាតា និព្ពត្តា អភិនិព្ពត្តា បាតុភូតា ឧប្បន្នា សមុប្បន្នា ឧដ្ឋិតា សមុដ្ឋិតា បច្ចុប្បន្នា បច្ចុប្បន្នំសេន សង្គហិតា, ចក្ខុសម្ផស្សជា ចេតនា សោតសម្ផស្សជា ចេតនា ឃានសម្ផស្សជា ចេតនា ជិវ្ហាសម្ផស្សជា ចេតនា កាយសម្ផស្សជា ចេតនា មនោសម្ផស្សជា ចេតនា – ឥមេ វុច្ចន្តិ សង្ខារា បច្ចុប្បន្នា.

២២. តត្ថ កតមេ សង្ខារា អជ្ឈត្តា? យេ សង្ខារា តេសំ តេសំ សត្តានំ អជ្ឈត្តំ បច្ចត្តំ និយកា បាដិបុគ្គលិកា ឧបាទិន្នា, ចក្ខុសម្ផស្សជា ចេតនា សោតសម្ផស្សជា ចេតនា ឃានសម្ផស្សជា ចេតនា ជិវ្ហាសម្ផស្សជា ចេតនា កាយសម្ផស្សជា ចេតនា មនោសម្ផស្សជា ចេតនា – ឥមេ វុច្ចន្តិ សង្ខារា អជ្ឈត្តា.

តត្ថ កតមេ សង្ខារា ពហិទ្ធា? យេ សង្ខារា តេសំ តេសំ បរសត្តានំ បរបុគ្គលានំ អជ្ឈត្តំ បច្ចត្តំ និយកា បាដិបុគ្គលិកា ឧបាទិន្នា, ចក្ខុសម្ផស្សជា ចេតនា សោតសម្ផស្សជា ចេតនា ឃានសម្ផស្សជា ចេតនា ជិវ្ហាសម្ផស្សជា ចេតនា កាយសម្ផស្សជា ចេតនា មនោសម្ផស្សជា ចេតនា – ឥមេ វុច្ចន្តិ សង្ខារា ពហិទ្ធា.

២៣. តត្ថ កតមេ សង្ខារា ឱឡារិកា សុខុមា? អកុសលា សង្ខារា ឱឡារិកា, កុសលាព្យាកតា សង្ខារា សុខុមា. កុសលាកុសលា សង្ខារា ឱឡារិកា, អព្យាកតា សង្ខារា សុខុមា. ទុក្ខាយ វេទនាយ សម្បយុត្តា សង្ខារា ឱឡារិកា, សុខាយ ច អទុក្ខមសុខាយ ច វេទនាហិ សម្បយុត្តា សង្ខារា សុខុមា. សុខទុក្ខាហិ វេទនាហិ សម្បយុត្តា សង្ខារា ឱឡារិកា, អទុក្ខមសុខាយ វេទនាយ សម្បយុត្តា សង្ខារា សុខុមា. អសមាបន្នស្ស សង្ខារា ឱឡារិកា, សមាបន្នស្ស សង្ខារា សុខុមា. សាសវា សង្ខារា ឱឡារិកា, អនាសវា សង្ខារា សុខុមា. តេ តេ វា បន សង្ខារេ ឧបាទាយុបាទាយ សង្ខារា ឱឡារិកា សុខុមា ទដ្ឋព្ពា.

២៤. តត្ថ កតមេ សង្ខារា ហីនា បណីតា? អកុសលា សង្ខារា ហីនា, កុសលាព្យាកតា សង្ខារា បណីតា. កុសលាកុសលា សង្ខារា ហីនា, អព្យាកតា សង្ខារា បណីតា. ទុក្ខាយ វេទនាយ សម្បយុត្តា សង្ខារា ហីនា, សុខាយ ច អទុក្ខមសុខាយ ច វេទនាហិ សម្បយុត្តា សង្ខារា បណីតា. សុខទុក្ខាហិ វេទនាហិ សម្បយុត្តា សង្ខារា ហីនា, អទុក្ខមសុខាយ វេទនាយ សម្បយុត្តា សង្ខារា បណីតា. អសមាបន្នស្ស សង្ខារា ហីនា, សមាបន្នស្ស សង្ខារា បណីតា. សាសវា សង្ខារា ហីនា, អនាសវា សង្ខារា បណីតា. តេ តេ វា បន សង្ខារេ ឧបាទាយុបាទាយ សង្ខារា ហីនា បណីតា ទដ្ឋព្ពា.

២៥. តត្ថ កតមេ សង្ខារា ទូរេ? អកុសលា សង្ខារា កុសលាព្យាកតេហិ សង្ខារេហិ ទូរេ; កុសលាព្យាកតា សង្ខារា អកុសលេហិ សង្ខារេហិ ទូរេ; កុសលា សង្ខារា អកុសលាព្យាកតេហិ សង្ខារេហិ ទូរេ; អកុសលាព្យាកតា សង្ខារា កុសលេហិ សង្ខារេហិ ទូរេ; អព្យាកតា សង្ខារា កុសលាកុសលេហិ សង្ខារេហិ ទូរេ; កុសលាកុសលា សង្ខារា អព្យាកតេហិ សង្ខារេហិ ទូរេ. ទុក្ខាយ វេទនាយ សម្បយុត្តា សង្ខារា សុខាយ ច អទុក្ខមសុខាយ ច វេទនាហិ សម្បយុត្តេហិ សង្ខារេហិ ទូរេ; សុខាយ ច អទុក្ខមសុខាយ ច វេទនាហិ សម្បយុត្តា សង្ខារា ទុក្ខាយ វេទនាយ សម្បយុត្តេហិ សង្ខារេហិ ទូរេ; សុខាយ វេទនាយ សម្បយុត្តា សង្ខារា ទុក្ខាយ ច អទុក្ខមសុខាយ ច វេទនាហិ សម្បយុត្តេហិ សង្ខារេហិ ទូរេ; ទុក្ខាយ ច អទុក្ខមសុខាយ ច វេទនាហិ សម្បយុត្តា សង្ខារា សុខាយ វេទនាយ សម្បយុត្តេហិ សង្ខារេហិ ទូរេ; អទុក្ខមសុខាយ វេទនាយ សម្បយុត្តា សង្ខារា សុខទុក្ខាហិ វេទនាហិ សម្បយុត្តេហិ សង្ខារេហិ ទូរេ; សុខទុក្ខាហិ វេទនាហិ សម្បយុត្តា សង្ខារា អទុក្ខមសុខាយ វេទនាយ សម្បយុត្តេហិ សង្ខារេហិ ទូរេ. អសមាបន្នស្ស សង្ខារា សមាបន្នស្ស សង្ខារេហិ ទូរេ; សមាបន្នស្ស សង្ខារា អសមាបន្នស្ស សង្ខារេហិ ទូរេ. សាសវា សង្ខារា អនាសវេហិ សង្ខារេហិ ទូរេ; អនាសវា សង្ខារា សាសវេហិ សង្ខារេហិ ទូរេ. ឥមេ វុច្ចន្តិ សង្ខារា ទូរេ.

តត្ថ កតមេ សង្ខារា សន្តិកេ? អកុសលា សង្ខារា អកុសលានំ សង្ខារានំ សន្តិកេ; កុសលា សង្ខារា កុសលានំ សង្ខារានំ សន្តិកេ; អព្យាកតា សង្ខារា អព្យាកតានំ សង្ខារានំ សន្តិកេ. ទុក្ខាយ វេទនាយ សម្បយុត្តា សង្ខារា ទុក្ខាយ វេទនាយ សម្បយុត្តានំ សង្ខារានំ សន្តិកេ; សុខាយ វេទនាយ សម្បយុត្តា សង្ខារា សុខាយ វេទនាយ សម្បយុត្តានំ សង្ខារានំ សន្តិកេ; អទុក្ខមសុខាយ វេទនាយ សម្បយុត្តា សង្ខារា អទុក្ខមសុខាយ វេទនាយ សម្បយុត្តានំ សង្ខារានំ សន្តិកេ. អសមាបន្នស្ស សង្ខារា អសមាបន្នស្ស សង្ខារានំ សន្តិកេ; សមាបន្នស្ស សង្ខារា សមាបន្នស្ស សង្ខារានំ សន្តិកេ. សាសវា សង្ខារា សាសវានំ សង្ខារានំ សន្តិកេ; អនាសវា សង្ខារា អនាសវានំ សង្ខារានំ សន្តិកេ. ឥមេ វុច្ចន្តិ សង្ខារា សន្តិកេ. តេ តេ វា បន សង្ខារេ ឧបាទាយុបាទាយ សង្ខារា ទូរេ សន្តិកេ ទដ្ឋព្ពា.

៥. វិញ្ញាណក្ខន្ធោ

២៦. តត្ថ កតមោ វិញ្ញាណក្ខន្ធោ? យំ កិញ្ចិ វិញ្ញាណំ អតីតានាគតបច្ចុប្បន្នំ អជ្ឈត្តំ វា ពហិទ្ធា វា ឱឡារិកំ វា សុខុមំ វា ហីនំ វា បណីតំ វា យំ ទូរេ សន្តិកេ វា, តទេកជ្ឈំ អភិសញ្ញូហិត្វា អភិសង្ខិបិត្វា – អយំ វុច្ចតិ វិញ្ញាណក្ខន្ធោ.

២៧. តត្ថ កតមំ វិញ្ញាណំ អតីតំ? យំ វិញ្ញាណំ អតីតំ និរុទ្ធំ វិគតំ វិបរិណតំ អត្ថង្គតំ អព្ភត្ថង្គតំ ឧប្បជ្ជិត្វា វិគតំ អតីតំ អតីតំសេន សង្គហិតំ, ចក្ខុវិញ្ញាណំ សោតវិញ្ញាណំ ឃានវិញ្ញាណំ ជិវ្ហាវិញ្ញាណំ កាយវិញ្ញាណំ មនោវិញ្ញាណំ – ឥទំ វុច្ចតិ វិញ្ញាណំ អតីតំ.

តត្ថ កតមំ វិញ្ញាណំ អនាគតំ? យំ វិញ្ញាណំ អជាតំ អភូតំ អសញ្ជាតំ អនិព្ពត្តំ អនភិនិព្ពត្តំ អបាតុភូតំ អនុប្បន្នំ អសមុប្បន្នំ អនុដ្ឋិតំ អសមុដ្ឋិតំ អនាគតំ អនាគតំសេន សង្គហិតំ, ចក្ខុវិញ្ញាណំ សោតវិញ្ញាណំ ឃានវិញ្ញាណំ ជិវ្ហាវិញ្ញាណំ កាយវិញ្ញាណំ មនោវិញ្ញាណំ – ឥទំ វុច្ចតិ វិញ្ញាណំ អនាគតំ.

តត្ថ កតមំ វិញ្ញាណំ បច្ចុប្បន្នំ? យំ វិញ្ញាណំ ជាតំ ភូតំ សញ្ជាតំ និព្ពត្តំ អភិនិព្ពត្តំ បាតុភូតំ ឧប្បន្នំ សមុប្បន្នំ ឧដ្ឋិតំ សមុដ្ឋិតំ បច្ចុប្បន្នំ បច្ចុប្បន្នំសេន សង្គហិតំ, ចក្ខុវិញ្ញាណំ សោតវិញ្ញាណំ ឃានវិញ្ញាណំ ជិវ្ហាវិញ្ញាណំ កាយវិញ្ញាណំ មនោវិញ្ញាណំ – ឥទំ វុច្ចតិ វិញ្ញាណំ បច្ចុប្បន្នំ.

២៨. តត្ថ កតមំ វិញ្ញាណំ អជ្ឈត្តំ? យំ វិញ្ញាណំ តេសំ តេសំ សត្តានំ អជ្ឈត្តំ បច្ចត្តំ និយកំ បាដិបុគ្គលិកំ ឧបាទិន្នំ, ចក្ខុវិញ្ញាណំ សោតវិញ្ញាណំ ឃានវិញ្ញាណំ ជិវ្ហាវិញ្ញាណំ កាយវិញ្ញាណំ មនោវិញ្ញាណំ – ឥទំ វុច្ចតិ វិញ្ញាណំ អជ្ឈត្តំ.

តត្ថ កតមំ វិញ្ញាណំ ពហិទ្ធា? យំ វិញ្ញាណំ តេសំ តេសំ បរសត្តានំ បរបុគ្គលានំ អជ្ឈត្តំ បច្ចត្តំ និយកំ បាដិបុគ្គលិកំ ឧបាទិន្នំ, ចក្ខុវិញ្ញាណំ សោតវិញ្ញាណំ ឃានវិញ្ញាណំ ជិវ្ហាវិញ្ញាណំ កាយវិញ្ញាណំ មនោវិញ្ញាណំ – ឥទំ វុច្ចតិ វិញ្ញាណំ ពហិទ្ធា.

២៩. តត្ថ កតមំ វិញ្ញាណំ ឱឡារិកំ សុខុមំ? អកុសលំ វិញ្ញាណំ ឱឡារិកំ, កុសលាព្យាកតា វិញ្ញាណា សុខុមា. កុសលាកុសលា វិញ្ញាណា ឱឡារិកា, អព្យាកតំ វិញ្ញាណំ សុខុមំ. ទុក្ខាយ វេទនាយ សម្បយុត្តំ វិញ្ញាណំ ឱឡារិកំ, សុខាយ ច អទុក្ខមសុខាយ ច វេទនាហិ សម្បយុត្តា វិញ្ញាណា សុខុមា. សុខទុក្ខាហិ វេទនាហិ សម្បយុត្តា វិញ្ញាណា ឱឡារិកា, អទុក្ខមសុខាយ វេទនាយ សម្បយុត្តំ វិញ្ញាណំ សុខុមំ. អសមាបន្នស្ស វិញ្ញាណំ ឱឡារិកំ, សមាបន្នស្ស វិញ្ញាណំ សុខុមំ. សាសវំ វិញ្ញាណំ ឱឡារិកំ, អនាសវំ វិញ្ញាណំ សុខុមំ. តំ តំ វា បន វិញ្ញាណំ ឧបាទាយុបាទាយ វិញ្ញាណំ ឱឡារិកំ សុខុមំ ទដ្ឋព្ពំ.

៣០. តត្ថ កតមំ វិញ្ញាណំ ហីនំ បណីតំ? អកុសលំ វិញ្ញាណំ ហីនំ, កុសលាព្យាកតា វិញ្ញាណា បណីតា. កុសលាកុសលា វិញ្ញាណា ហីនា, អព្យាកតំ វិញ្ញាណំ បណីតំ. ទុក្ខាយ វេទនាយ សម្បយុត្តំ វិញ្ញាណំ ហីនំ, សុខាយ ច អទុក្ខមសុខាយ ច វេទនាហិ សម្បយុត្តា វិញ្ញាណា បណីតា. សុខទុក្ខាហិ វេទនាហិ សម្បយុត្តា វិញ្ញាណា ហីនា, អទុក្ខមសុខាយ វេទនាយ សម្បយុត្តំ វិញ្ញាណំ បណីតំ. អសមាបន្នស្ស វិញ្ញាណំ ហីនំ, សមាបន្នស្ស វិញ្ញាណំ បណីតំ. សាសវំ វិញ្ញាណំ ហីនំ, អនាសវំ វិញ្ញាណំ បណីតំ. តំ តំ វា បន វិញ្ញាណំ ឧបាទាយុបាទាយ វិញ្ញាណំ ហីនំ បណីតំ ទដ្ឋព្ពំ.

៣១. តត្ថ កតមំ វិញ្ញាណំ ទូរេ? អកុសលំ វិញ្ញាណំ កុសលាព្យាកតេហិ វិញ្ញាណេហិ ទូរេ; កុសលាព្យាកតា វិញ្ញាណា អកុសលា វិញ្ញាណា ទូរេ; កុសលំ វិញ្ញាណំ អកុសលាព្យាកតេហិ វិញ្ញាណេហិ ទូរេ; អកុសលាព្យាកតា វិញ្ញាណា កុសលា វិញ្ញាណា ទូរេ; អព្យាកតំ វិញ្ញាណំ កុសលាកុសលេហិ វិញ្ញាណេហិ ទូរេ; កុសលាកុសលា វិញ្ញាណា អព្យាកតា វិញ្ញាណា ទូរេ. ទុក្ខាយ វេទនាយ សម្បយុត្តំ វិញ្ញាណំ សុខាយ ច អទុក្ខមសុខាយ ច វេទនាហិ សម្បយុត្តេហិ វិញ្ញាណេហិ ទូរេ; សុខាយ ច អទុក្ខមសុខាយ ច វេទនាហិ សម្បយុត្តា វិញ្ញាណា ទុក្ខាយ វេទនាយ សម្បយុត្តា វិញ្ញាណា ទូរេ; សុខាយ វេទនាយ សម្បយុត្តំ វិញ្ញាណំ ទុក្ខាយ ច អទុក្ខមសុខាយ ច វេទនាហិ សម្បយុត្តេហិ វិញ្ញាណេហិ ទូរេ; ទុក្ខាយ ច អទុក្ខមសុខាយ ច វេទនាហិ សម្បយុត្តា វិញ្ញាណា សុខាយ វេទនាយ សម្បយុត្តា វិញ្ញាណា ទូរេ; អទុក្ខមសុខាយ វេទនាយ សម្បយុត្តំ វិញ្ញាណំ សុខទុក្ខាហិ វេទនាហិ សម្បយុត្តេហិ វិញ្ញាណេហិ ទូរេ; សុខទុក្ខាហិ វេទនាហិ សម្បយុត្តា វិញ្ញាណា អទុក្ខមសុខាយ វេទនាយ សម្បយុត្តា វិញ្ញាណា ទូរេ. អសមាបន្នស្ស វិញ្ញាណំ សមាបន្នស្ស វិញ្ញាណា ទូរេ; សមាបន្នស្ស វិញ្ញាណំ អសមាបន្នស្ស វិញ្ញាណា ទូរេ. សាសវំ វិញ្ញាណំ អនាសវា វិញ្ញាណា ទូរេ; អនាសវំ វិញ្ញាណំ សាសវា វិញ្ញាណា ទូរេ – ឥទំ វុច្ចតិ វិញ្ញាណំ ទូរេ.

តត្ថ កតមំ វិញ្ញាណំ សន្តិកេ? អកុសលំ វិញ្ញាណំ អកុសលស្ស វិញ្ញាណស្ស សន្តិកេ; កុសលំ វិញ្ញាណំ កុសលស្ស វិញ្ញាណស្ស សន្តិកេ; អព្យាកតំ វិញ្ញាណំ អព្យាកតស្ស វិញ្ញាណស្ស សន្តិកេ. ទុក្ខាយ វេទនាយ សម្បយុត្តំ វិញ្ញាណំ ទុក្ខាយ វេទនាយ សម្បយុត្តស្ស វិញ្ញាណស្ស សន្តិកេ; សុខាយ វេទនាយ សម្បយុត្តំ វិញ្ញាណំ សុខាយ វេទនាយ សម្បយុត្តស្ស វិញ្ញាណស្ស សន្តិកេ; អទុក្ខមសុខាយ វេទនាយ សម្បយុត្តំ វិញ្ញាណំ អទុក្ខមសុខាយ វេទនាយ សម្បយុត្តស្ស វិញ្ញាណស្ស សន្តិកេ. អសមាបន្នស្ស វិញ្ញាណំ អសមាបន្នស្ស វិញ្ញាណស្ស សន្តិកេ; សមាបន្នស្ស វិញ្ញាណំ សមាបន្នស្ស វិញ្ញាណស្ស សន្តិកេ. សាសវំ វិញ្ញាណំ សាសវស្ស វិញ្ញាណស្ស សន្តិកេ; អនាសវំ វិញ្ញាណំ អនាសវស្ស វិញ្ញាណស្ស សន្តិកេ – ឥទំ វុច្ចតិ វិញ្ញាណំ សន្តិកេ. តំ តំ វា បន វិញ្ញាណំ ឧបាទាយុបាទាយ វិញ្ញាណំ ទូរេ សន្តិកេ ទដ្ឋព្ពំ.

សុត្តន្តភាជនីយំ.

២. អភិធម្មភាជនីយំ

៣២. បញ្ចក្ខន្ធា – រូបក្ខន្ធោ, វេទនាក្ខន្ធោ, សញ្ញាក្ខន្ធោ, សង្ខារក្ខន្ធោ, វិញ្ញាណក្ខន្ធោ.

១. រូបក្ខន្ធោ

៣៣. តត្ថ កតមោ រូបក្ខន្ធោ? ឯកវិធេន រូបក្ខន្ធោ – សព្ពំ រូបំ ន ហេតុ, អហេតុកំ, ហេតុវិប្បយុត្តំ, សប្បច្ចយំ, សង្ខតំ, រូបំ, លោកិយំ, សាសវំ, សំយោជនិយំ, គន្ថនិយំ, ឱឃនិយំ, យោគនិយំ, នីវរណិយំ, បរាមដ្ឋំ, ឧបាទានិយំ, សំកិលេសិកំ, អព្យាកតំ, អនារម្មណំ, អចេតសិកំ, ចិត្តវិប្បយុត្តំ, នេវវិបាកនវិបាកធម្មធម្មំ, អសំកិលិដ្ឋសំកិលេសិកំ, ន សវិតក្កសវិចារំ, ន អវិតក្កវិចារមត្តំ, អវិតក្កអវិចារំ, ន បីតិសហគតំ, ន សុខសហគតំ, ន ឧបេក្ខាសហគតំ, នេវ ទស្សនេន ន ភាវនាយ បហាតព្ពំ, នេវ ទស្សនេន ន ភាវនាយ បហាតព្ពហេតុកំ, នេវាចយគាមិនាបចយគាមី, នេវសេក្ខនាសេក្ខំ, បរិត្តំ, កាមាវចរំ, ន រូបាវចរំ, ន អរូបាវចរំ, បរិយាបន្នំ, នោ អបរិយាបន្នំ, អនិយតំ, អនិយ្យានិកំ, ឧប្បន្នំ, ឆហិ វិញ្ញាណេហិ វិញ្ញេយ្យំ, អនិច្ចំ, ជរាភិភូតំ. ឯវំ ឯកវិធេន រូបក្ខន្ធោ.

ទុវិធេន រូបក្ខន្ធោ – អត្ថិ រូបំ ឧបាទា, អត្ថិ រូបំ នោ ឧបាទា [នុបាទា (សី. ក.)]. អត្ថិ រូបំ ឧបាទិន្នំ, អត្ថិ រូបំ អនុបាទិន្នំ. អត្ថិ រូបំ ឧបាទិន្នុបាទានិយំ, អត្ថិ រូបំ អនុបាទិន្នុបាទានិយំ. អត្ថិ រូបំ សនិទស្សនំ, អត្ថិ រូបំ អនិទស្សនំ. អត្ថិ រូបំ សប្បដិឃំ, អត្ថិ រូបំ អប្បដិឃំ. អត្ថិ រូបំ ឥន្ទ្រិយំ, អត្ថិ រូបំ ន ឥន្ទ្រិយំ. អត្ថិ រូបំ មហាភូតំ, អត្ថិ រូបំ ន មហាភូតំ. អត្ថិ រូបំ វិញ្ញត្តិ, អត្ថិ រូបំ ន វិញ្ញត្តិ. អត្ថិ រូបំ ចិត្តសមុដ្ឋានំ, អត្ថិ រូបំ ន ចិត្តសមុដ្ឋានំ. អត្ថិ រូបំ ចិត្តសហភុ, អត្ថិ រូបំ ន ចិត្តសហភុ. អត្ថិ រូបំ ចិត្តានុបរិវត្តិ, អត្ថិ រូបំ ន ចិត្តានុបរិវត្តិ. អត្ថិ រូបំ អជ្ឈត្តិកំ, អត្ថិ រូបំ ពាហិរំ. អត្ថិ រូបំ ឱឡារិកំ, អត្ថិ រូបំ សុខុមំ. អត្ថិ រូបំ ទូរេ, អត្ថិ រូបំ សន្តិកេ…បេ… អត្ថិ រូបំ កពឡីការោ អាហារោ, អត្ថិ រូបំ ន កពឡីការោ អាហារោ. ឯវំ ទុវិធេន រូបក្ខន្ធោ.

(យថា រូបកណ្ឌេ វិភត្តំ, តថា ឥធ វិភជិតព្ពំ.)

តិវិធេន រូបក្ខន្ធោ – យំ តំ រូបំ អជ្ឈត្តិកំ តំ ឧបាទា, យំ តំ រូបំ ពាហិរំ តំ អត្ថិ ឧបាទា, អត្ថិ នោ ឧបាទា. យំ តំ រូបំ អជ្ឈត្តិកំ តំ ឧបាទិន្នំ, យំ តំ រូបំ ពាហិរំ តំ អត្ថិ ឧបាទិន្នំ, អត្ថិ អនុបាទិន្នំ. យំ តំ រូបំ អជ្ឈត្តិកំ តំ ឧបាទិន្នុបាទានិយំ, យំ តំ រូបំ ពាហិរំ តំ អត្ថិ ឧបាទិន្នុបាទានិយំ, អត្ថិ អនុបាទិន្នុបាទានិយំ…បេ… យំ តំ រូបំ អជ្ឈត្តិកំ តំ ន កពឡីការោ អាហារោ, យំ តំ រូបំ ពាហិរំ តំ អត្ថិ កពឡីការោ អាហារោ, អត្ថិ ន កពឡីការោ អាហារោ. ឯវំ តិវិធេន រូបក្ខន្ធោ.

ចតុព្ពិធេន រូបក្ខន្ធោ – យំ តំ រូបំ ឧបាទា តំ អត្ថិ ឧបាទិន្នំ, អត្ថិ អនុបាទិន្នំ; យំ តំ រូបំ នោ ឧបាទា តំ អត្ថិ ឧបាទិន្នំ, អត្ថិ អនុបាទិន្នំ. យំ តំ រូបំ ឧបាទា តំ អត្ថិ ឧបាទិន្នុបាទានិយំ, អត្ថិ អនុបាទិន្នុបាទានិយំ; យំ តំ រូបំ នោ ឧបាទា តំ អត្ថិ ឧបាទិន្នុបាទានិយំ, អត្ថិ អនុបាទិន្នុបាទានិយំ. យំ តំ រូបំ ឧបាទា តំ អត្ថិ សប្បដិឃំ, អត្ថិ អប្បដិឃំ; យំ តំ រូបំ នោ ឧបាទា តំ អត្ថិ សប្បដិឃំ, អត្ថិ អប្បដិឃំ. យំ តំ រូបំ ឧបាទា តំ អត្ថិ ឱឡារិកំ, អត្ថិ សុខុមំ; យំ តំ រូបំ នោ ឧបាទា តំ អត្ថិ ឱឡារិកំ, អត្ថិ សុខុមំ. យំ តំ រូបំ ឧបាទា តំ អត្ថិ ទូរេ, អត្ថិ សន្តិកេ; យំ តំ រូបំ នោ ឧបាទា តំ អត្ថិ ទូរេ, អត្ថិ សន្តិកេ…បេ… ទិដ្ឋំ, សុតំ, មុតំ, វិញ្ញាតំ រូបំ. ឯវំ ចតុព្ពិធេន រូបក្ខន្ធោ.

បញ្ចវិធេន រូបក្ខន្ធោ – បថវីធាតុ, អាបោធាតុ, តេជោធាតុ, វាយោធាតុ, យញ្ច រូបំ ឧបាទា. ឯវំ បញ្ចវិធេន រូបក្ខន្ធោ.

ឆព្ពិធេន រូបក្ខន្ធោ – ចក្ខុវិញ្ញេយ្យំ រូបំ, សោតវិញ្ញេយ្យំ រូបំ, ឃានវិញ្ញេយ្យំ រូបំ, ជិវ្ហាវិញ្ញេយ្យំ រូបំ, កាយវិញ្ញេយ្យំ រូបំ, មនោវិញ្ញេយ្យំ រូបំ. ឯវំ ឆព្ពិធេន រូបក្ខន្ធោ.

សត្តវិធេន រូបក្ខន្ធោ – ចក្ខុវិញ្ញេយ្យំ រូបំ, សោតវិញ្ញេយ្យំ រូបំ, ឃានវិញ្ញេយ្យំ រូបំ, ជិវ្ហាវិញ្ញេយ្យំ រូបំ, កាយវិញ្ញេយ្យំ រូបំ, មនោធាតុវិញ្ញេយ្យំ រូបំ, មនោវិញ្ញាណធាតុវិញ្ញេយ្យំ រូបំ. ឯវំ សត្តវិធេន រូបក្ខន្ធោ.

អដ្ឋវិធេន រូបក្ខន្ធោ – ចក្ខុវិញ្ញេយ្យំ រូបំ, សោតវិញ្ញេយ្យំ រូបំ, ឃានវិញ្ញេយ្យំ រូបំ, ជិវ្ហាវិញ្ញេយ្យំ រូបំ, កាយវិញ្ញេយ្យំ រូបំ អត្ថិ សុខសម្ផស្សំ, អត្ថិ ទុក្ខសម្ផស្សំ, មនោធាតុវិញ្ញេយ្យំ រូបំ, មនោវិញ្ញាណធាតុវិញ្ញេយ្យំ រូបំ. ឯវំ អដ្ឋវិធេន រូបក្ខន្ធោ.

នវវិធេន រូបក្ខន្ធោ – ចក្ខុន្ទ្រិយំ, សោតិន្ទ្រិយំ, ឃានិន្ទ្រិយំ, ជិវ្ហិន្ទ្រិយំ, កាយិន្ទ្រិយំ, ឥត្ថិន្ទ្រិយំ, បុរិសិន្ទ្រិយំ, ជីវិតិន្ទ្រិយំ, យញ្ច រូបំ ន ឥន្ទ្រិយំ. ឯវំ នវវិធេន រូបក្ខន្ធោ.

ទសវិធេន រូបក្ខន្ធោ – ចក្ខុន្ទ្រិយំ, សោតិន្ទ្រិយំ, ឃានិន្ទ្រិយំ, ជិវ្ហិន្ទ្រិយំ, កាយិន្ទ្រិយំ, ឥត្ថិន្ទ្រិយំ, បុរិសិន្ទ្រិយំ, ជីវិតិន្ទ្រិយំ, ន ឥន្ទ្រិយំ រូបំ អត្ថិ សប្បដិឃំ, អត្ថិ អប្បដិឃំ. ឯវំ ទសវិធេន រូបក្ខន្ធោ.

ឯកាទសវិធេន រូបក្ខន្ធោ – ចក្ខាយតនំ, សោតាយតនំ, ឃានាយតនំ, ជិវ្ហាយតនំ, កាយាយតនំ, រូបាយតនំ, សទ្ទាយតនំ, គន្ធាយតនំ, រសាយតនំ, ផោដ្ឋព្ពាយតនំ, យញ្ច រូបំ អនិទស្សនអប្បដិឃំ ធម្មាយតនបរិយាបន្នំ. ឯវំ ឯកាទសវិធេន រូបក្ខន្ធោ.

អយំ វុច្ចតិ រូបក្ខន្ធោ.

២. វេទនាក្ខន្ធោ

៣៤. តត្ថ កតមោ វេទនាក្ខន្ធោ? ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សហេតុកោ, អត្ថិ អហេតុកោ.

តិវិធេន វេទនាក្ខន្ធោ – អត្ថិ កុសលោ, អត្ថិ អកុសលោ, អត្ថិ អព្យាកតោ.

ចតុព្ពិធេន វេទនាក្ខន្ធោ – អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ.

បញ្ចវិធេន វេទនាក្ខន្ធោ – អត្ថិ សុខិន្ទ្រិយំ, អត្ថិ ទុក្ខិន្ទ្រិយំ, អត្ថិ សោមនស្សិន្ទ្រិយំ, អត្ថិ ទោមនស្សិន្ទ្រិយំ, អត្ថិ ឧបេក្ខិន្ទ្រិយំ. ឯវំ បញ្ចវិធេន វេទនាក្ខន្ធោ.

ឆព្ពិធេន វេទនាក្ខន្ធោ – ចក្ខុសម្ផស្សជា វេទនា, សោតសម្ផស្សជា វេទនា, ឃានសម្ផស្សជា វេទនា, ជិវ្ហាសម្ផស្សជា វេទនា, កាយសម្ផស្សជា វេទនា, មនោសម្ផស្សជា វេទនា. ឯវំ ឆព្ពិធេន វេទនាក្ខន្ធោ.

សត្តវិធេន វេទនាក្ខន្ធោ – ចក្ខុសម្ផស្សជា វេទនា, សោតសម្ផស្សជា វេទនា, ឃានសម្ផស្សជា វេទនា, ជិវ្ហាសម្ផស្សជា វេទនា, កាយសម្ផស្សជា វេទនា, មនោធាតុសម្ផស្សជា វេទនា, មនោវិញ្ញាណធាតុសម្ផស្សជា វេទនា. ឯវំ សត្តវិធេន វេទនាក្ខន្ធោ.

អដ្ឋវិធេន វេទនាក្ខន្ធោ – ចក្ខុសម្ផស្សជា វេទនា, សោតសម្ផស្សជា វេទនា, ឃានសម្ផស្សជា វេទនា, ជិវ្ហាសម្ផស្សជា វេទនា, កាយសម្ផស្សជា វេទនា អត្ថិ សុខា, អត្ថិ ទុក្ខា, មនោធាតុសម្ផស្សជា វេទនា, មនោវិញ្ញាណធាតុសម្ផស្សជា វេទនា. ឯវំ អដ្ឋវិធេន វេទនាក្ខន្ធោ.

នវវិធេន វេទនាក្ខន្ធោ – ចក្ខុសម្ផស្សជា វេទនា, សោតសម្ផស្សជា វេទនា, ឃានសម្ផស្សជា វេទនា, ជិវ្ហាសម្ផស្សជា វេទនា, កាយសម្ផស្សជា វេទនា, មនោធាតុសម្ផស្សជា វេទនា, មនោវិញ្ញាណធាតុសម្ផស្សជា វេទនា អត្ថិ កុសលា, អត្ថិ អកុសលា, អត្ថិ អព្យាកតា. ឯវំ នវវិធេន វេទនាក្ខន្ធោ.

ទសវិធេន វេទនាក្ខន្ធោ – ចក្ខុសម្ផស្សជា វេទនា, សោតសម្ផស្សជា វេទនា, ឃានសម្ផស្សជា វេទនា, ជិវ្ហាសម្ផស្សជា វេទនា, កាយសម្ផស្សជា វេទនា អត្ថិ សុខា, អត្ថិ ទុក្ខា, មនោធាតុសម្ផស្សជា វេទនា, មនោវិញ្ញាណធាតុសម្ផស្សជា វេទនា អត្ថិ កុសលា, អត្ថិ អកុសលា, អត្ថិ អព្យាកតា. ឯវំ ទសវិធេន វេទនាក្ខន្ធោ.

៣៥. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សហេតុកោ, អត្ថិ អហេតុកោ.

តិវិធេន វេទនាក្ខន្ធោ – អត្ថិ វិបាកោ, អត្ថិ វិបាកធម្មធម្មោ, អត្ថិ នេវវិបាកនវិបាកធម្មធម្មោ. អត្ថិ ឧបាទិន្នុបាទានិយោ, អត្ថិ អនុបាទិន្នុបាទានិយោ, អត្ថិ អនុបាទិន្នអនុបាទានិយោ. អត្ថិ សំកិលិដ្ឋសំកិលេសិកោ, អត្ថិ អសំកិលិដ្ឋសំកិលេសិកោ, អត្ថិ អសំកិលិដ្ឋអសំកិលេសិកោ. អត្ថិ សវិតក្កសវិចារោ, អត្ថិ អវិតក្កវិចារមត្តោ, អត្ថិ អវិតក្កអវិចារោ. អត្ថិ ទស្សនេន បហាតព្ពោ, អត្ថិ ភាវនាយ បហាតព្ពោ, អត្ថិ នេវ ទស្សនេន ន ភាវនាយ បហាតព្ពោ. អត្ថិ ទស្សនេន បហាតព្ពហេតុកោ, អត្ថិ ភាវនាយ បហាតព្ពហេតុកោ, អត្ថិ នេវ ទស្សនេន ន ភាវនាយ បហាតព្ពហេតុកោ. អត្ថិ អាចយគាមី, អត្ថិ អបចយគាមី, អត្ថិ នេវាចយគាមិនាបចយគាមី. អត្ថិ សេក្ខោ, អត្ថិ អសេក្ខោ, អត្ថិ នេវសេក្ខនាសេក្ខោ. អត្ថិ បរិត្តោ, អត្ថិ មហគ្គតោ, អត្ថិ អប្បមាណោ. អត្ថិ បរិត្តារម្មណោ, អត្ថិ មហគ្គតារម្មណោ, អត្ថិ អប្បមាណារម្មណោ. អត្ថិ ហីនោ, អត្ថិ មជ្ឈិមោ, អត្ថិ បណីតោ. អត្ថិ មិច្ឆត្តនិយតោ, អត្ថិ សម្មត្តនិយតោ, អត្ថិ អនិយតោ. អត្ថិ មគ្គារម្មណោ, អត្ថិ មគ្គហេតុកោ, អត្ថិ មគ្គាធិបតិ. អត្ថិ ឧប្បន្នោ, អត្ថិ អនុប្បន្នោ, អត្ថិ ឧប្បាទី. អត្ថិ អតីតោ, អត្ថិ អនាគតោ, អត្ថិ បច្ចុប្បន្នោ. អត្ថិ អតីតារម្មណោ, អត្ថិ អនាគតារម្មណោ, អត្ថិ បច្ចុប្បន្នារម្មណោ. អត្ថិ អជ្ឈត្តោ, អត្ថិ ពហិទ្ធោ, អត្ថិ អជ្ឈត្តពហិទ្ធោ. អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ…បេ…. ឯវំ ទសវិធេន វេទនាក្ខន្ធោ.

៣៦. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ ហេតុសម្បយុត្តោ, អត្ថិ ហេតុវិប្បយុត្តោ…បេ… អត្ថិ ន ហេតុសហេតុកោ, អត្ថិ ន ហេតុអហេតុកោ. អត្ថិ លោកិយោ, អត្ថិ លោកុត្តរោ. អត្ថិ កេនចិ វិញ្ញេយ្យោ, អត្ថិ កេនចិ ន វិញ្ញេយ្យោ. អត្ថិ សាសវោ, អត្ថិ អនាសវោ. អត្ថិ អាសវសម្បយុត្តោ, អត្ថិ អាសវវិប្បយុត្តោ. អត្ថិ អាសវវិប្បយុត្តសាសវោ, អត្ថិ អាសវវិប្បយុត្តអនាសវោ. អត្ថិ សំយោជនិយោ, អត្ថិ អសំយោជនិយោ. អត្ថិ សំយោជនសម្បយុត្តោ, អត្ថិ សំយោជនវិប្បយុត្តោ. អត្ថិ សំយោជនវិប្បយុត្តសំយោជនិយោ, អត្ថិ សំយោជនវិប្បយុត្តអសំយោជនិយោ. អត្ថិ គន្ថនិយោ, អត្ថិ អគន្ថនិយោ. អត្ថិ គន្ថសម្បយុត្តោ, អត្ថិ គន្ថវិប្បយុត្តោ. អត្ថិ គន្ថវិប្បយុត្តគន្ថនិយោ, អត្ថិ គន្ថវិប្បយុត្តអគន្ថនិយោ. អត្ថិ ឱឃនិយោ, អត្ថិ អនោឃនិយោ. អត្ថិ ឱឃសម្បយុត្តោ, អត្ថិ ឱឃវិប្បយុត្តោ. អត្ថិ ឱឃវិប្បយុត្តឱឃនិយោ, អត្ថិ ឱឃវិប្បយុត្តអនោឃនិយោ. អត្ថិ យោគនិយោ, អត្ថិ អយោគនិយោ. អត្ថិ យោគសម្បយុត្តោ, អត្ថិ យោគវិប្បយុត្តោ. អត្ថិ យោគវិប្បយុត្តយោគនិយោ, អត្ថិ យោគវិប្បយុត្តអយោគនិយោ. អត្ថិ នីវរណិយោ, អត្ថិ អនីវរណិយោ. អត្ថិ នីវរណសម្បយុត្តោ, អត្ថិ នីវរណវិប្បយុត្តោ. អត្ថិ នីវរណវិប្បយុត្តនីវរណិយោ, អត្ថិ នីវរណវិប្បយុត្តអនីវរណិយោ. អត្ថិ បរាមដ្ឋោ, អត្ថិ អបរាមដ្ឋោ. អត្ថិ បរាមាសសម្បយុត្តោ, អត្ថិ បរាមាសវិប្បយុត្តោ. អត្ថិ បរាមាសវិប្បយុត្តបរាមដ្ឋោ, អត្ថិ បរាមាសវិប្បយុត្តអបរាមដ្ឋោ. អត្ថិ ឧបាទិន្នោ, អត្ថិ អនុបាទិន្នោ. អត្ថិ ឧបាទានិយោ, អត្ថិ អនុបាទានិយោ. អត្ថិ ឧបាទានសម្បយុត្តោ, អត្ថិ ឧបាទានវិប្បយុត្តោ. អត្ថិ ឧបាទានវិប្បយុត្តឧបាទានិយោ, អត្ថិ ឧបាទានវិប្បយុត្តអនុបាទានិយោ. អត្ថិ សំកិលេសិកោ, អត្ថិ អសំកិលេសិកោ. អត្ថិ សំកិលិដ្ឋោ, អត្ថិ អសំកិលិដ្ឋោ. អត្ថិ កិលេសសម្បយុត្តោ, អត្ថិ កិលេសវិប្បយុត្តោ. អត្ថិ កិលេសវិប្បយុត្តសំកិលេសិកោ, អត្ថិ កិលេសវិប្បយុត្តអសំកិលេសិកោ. អត្ថិ ទស្សនេន បហាតព្ពោ, អត្ថិ ន ទស្សនេន បហាតព្ពោ. អត្ថិ ភាវនាយ បហាតព្ពោ, អត្ថិ ន ភាវនាយ បហាតព្ពោ. អត្ថិ ទស្សនេន បហាតព្ពហេតុកោ, អត្ថិ ន ទស្សនេន បហាតព្ពហេតុកោ. អត្ថិ ភាវនាយ បហាតព្ពហេតុកោ, អត្ថិ ន ភាវនាយ បហាតព្ពហេតុកោ. អត្ថិ សវិតក្កោ, អត្ថិ អវិតក្កោ. អត្ថិ សវិចារោ, អត្ថិ អវិចារោ. អត្ថិ សប្បីតិកោ, អត្ថិ អប្បីតិកោ. អត្ថិ បីតិសហគតោ, អត្ថិ ន បីតិសហគតោ. អត្ថិ កាមាវចរោ, អត្ថិ ន កាមាវចរោ. អត្ថិ រូបាវចរោ, អត្ថិ ន រូបាវចរោ. អត្ថិ អរូបាវចរោ, អត្ថិ ន អរូបាវចរោ. អត្ថិ បរិយាបន្នោ, អត្ថិ អបរិយាបន្នោ. អត្ថិ និយ្យានិកោ, អត្ថិ អនិយ្យានិកោ. អត្ថិ និយតោ, អត្ថិ អនិយតោ. អត្ថិ សឧត្តរោ, អត្ថិ អនុត្តរោ. អត្ថិ សរណោ, អត្ថិ អរណោ.

តិវិធេន វេទនាក្ខន្ធោ – អត្ថិ កុសលោ, អត្ថិ អកុសលោ, អត្ថិ អព្យាកតោ…បេ…. ឯវំ ទសវិធេន វេទនាក្ខន្ធោ.

៣៧. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សរណោ, អត្ថិ អរណោ.

តិវិធេន វេទនាក្ខន្ធោ – អត្ថិ វិបាកោ, អត្ថិ វិបាកធម្មធម្មោ, អត្ថិ នេវវិបាកនវិបាកធម្មធម្មោ. អត្ថិ ឧបាទិន្នុបាទានិយោ…បេ… អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ…បេ…. ឯវំ ទសវិធេន វេទនាក្ខន្ធោ.

ទុកមូលកំ.

៣៨. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សហេតុកោ, អត្ថិ អហេតុកោ.

៣៩. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ ហេតុសម្បយុត្តោ, អត្ថិ ហេតុវិប្បយុត្តោ.

៤០. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ ន ហេតុសហេតុកោ, អត្ថិ ន ហេតុអហេតុកោ. អត្ថិ លោកិយោ, អត្ថិ លោកុត្តរោ. អត្ថិ កេនចិ វិញ្ញេយ្យោ, អត្ថិ កេនចិ ន វិញ្ញេយ្យោ. អត្ថិ សាសវោ, អត្ថិ អនាសវោ. អត្ថិ អាសវសម្បយុត្តោ, អត្ថិ អាសវវិប្បយុត្តោ. អត្ថិ អាសវវិប្បយុត្តសាសវោ, អត្ថិ អាសវវិប្បយុត្តអនាសវោ…បេ… អត្ថិ សរណោ, អត្ថិ អរណោ.

៤១. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សហេតុកោ, អត្ថិ អហេតុកោ.

៤២. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ ហេតុសម្បយុត្តោ, អត្ថិ ហេតុវិប្បយុត្តោ. អត្ថិ ន ហេតុសហេតុកោ, អត្ថិ ន ហេតុអហេតុកោ. អត្ថិ លោកិយោ, អត្ថិ លោកុត្តរោ. អត្ថិ កេនចិ វិញ្ញេយ្យោ, អត្ថិ កេនចិ ន វិញ្ញេយ្យោ. អត្ថិ សាសវោ, អត្ថិ អនាសវោ. អត្ថិ អាសវសម្បយុត្តោ, អត្ថិ អាសវវិប្បយុត្តោ. អត្ថិ អាសវវិប្បយុត្តសាសវោ, អត្ថិ អាសវវិប្បយុត្តអនាសវោ. អត្ថិ សំយោជនិយោ, អត្ថិ អសំយោជនិយោ…បេ… អត្ថិ សរណោ, អត្ថិ អរណោ.

តិវិធេន វេទនាក្ខន្ធោ – អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ…បេ…. ឯវំ ទសវិធេន វេទនាក្ខន្ធោ.

តិកមូលកំ.

៤៣. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សហេតុកោ, អត្ថិ អហេតុកោ.

៤៤. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ ហេតុសម្បយុត្តោ, អត្ថិ ហេតុវិប្បយុត្តោ.

តិវិធេន វេទនាក្ខន្ធោ – អត្ថិ វិបាកោ, អត្ថិ វិបាកធម្មធម្មោ, អត្ថិ នេវវិបាកនវិបាកធម្មធម្មោ…បេ…. ឯវំ ទសវិធេន វេទនាក្ខន្ធោ.

៤៥. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ ន ហេតុសហេតុកោ, អត្ថិ ន ហេតុអហេតុកោ.

តិវិធេន វេទនាក្ខន្ធោ – អត្ថិ ឧបាទិន្នុបាទានិយោ, អត្ថិ អនុបាទិន្នុបាទានិយោ, អត្ថិ អនុបាទិន្នអនុបាទានិយោ…បេ…. ឯវំ ទសវិធេន វេទនាក្ខន្ធោ.

៤៦. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ លោកិយោ, អត្ថិ លោកុត្តរោ.

តិវិធេន វេទនាក្ខន្ធោ – អត្ថិ សំកិលិដ្ឋសំកិលេសិកោ, អត្ថិ អសំកិលិដ្ឋសំកិលេសិកោ, អត្ថិ អសំកិលិដ្ឋអសំកិលេសិកោ…បេ…. ឯវំ ទសវិធេន វេទនាក្ខន្ធោ.

៤៧. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ កេនចិ វិញ្ញេយ្យោ, អត្ថិ កេនចិ ន វិញ្ញេយ្យោ.

តិវិធេន វេទនាក្ខន្ធោ – អត្ថិ សវិតក្កសវិចារោ, អត្ថិ អវិតក្កវិចារមត្តោ, អត្ថិ អវិតក្កអវិចារោ…បេ…. ឯវំ ទសវិធេន វេទនាក្ខន្ធោ.

៤៨. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សាសវោ, អត្ថិ អនាសវោ.

តិវិធេន វេទនាក្ខន្ធោ – អត្ថិ ទស្សនេន បហាតព្ពោ, អត្ថិ ភាវនាយ បហាតព្ពោ, អត្ថិ នេវ ទស្សនេន ន ភាវនាយ បហាតព្ពោ…បេ…. ឯវំ ទសវិធេន វេទនាក្ខន្ធោ.

៤៩. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ អាសវសម្បយុត្តោ, អត្ថិ អាសវវិប្បយុត្តោ.

តិវិធេន វេទនាក្ខន្ធោ – អត្ថិ ទស្សនេន បហាតព្ពហេតុកោ, អត្ថិ ភាវនាយ បហាតព្ពហេតុកោ, អត្ថិ នេវ ទស្សនេន ន ភាវនាយ បហាតព្ពហេតុកោ…បេ…. ឯវំ ទសវិធេន វេទនាក្ខន្ធោ.

៥០. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ អាសវវិប្បយុត្តសាសវោ, អត្ថិ អាសវវិប្បយុត្តអនាសវោ.

តិវិធេន វេទនាក្ខន្ធោ – អត្ថិ អាចយគាមី, អត្ថិ អបចយគាមី, អត្ថិ នេវាចយគាមិនាបចយគាមី…បេ…. ឯវំ ទសវិធេន វេទនាក្ខន្ធោ.

៥១. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សំយោជនិយោ, អត្ថិ អសំយោជនិយោ.

តិវិធេន វេទនាក្ខន្ធោ – អត្ថិ សេក្ខោ, អត្ថិ អសេក្ខោ, អត្ថិ នេវសេក្ខនាសេក្ខោ…បេ…. ឯវំ ទសវិធេន វេទនាក្ខន្ធោ.

៥២. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សំយោជនសម្បយុត្តោ, អត្ថិ សំយោជនវិប្បយុត្តោ.

តិវិធេន វេទនាក្ខន្ធោ – អត្ថិ បរិត្តោ, អត្ថិ មហគ្គតោ, អត្ថិ អប្បមាណោ…បេ…. ឯវំ ទសវិធេន វេទនាក្ខន្ធោ.

៥៣. ឯកវិធេន វេទនាក្ខន្ធោ – ផស្សសម្បយុត្តោ.

ទុវិធេន វេទនាក្ខន្ធោ – អត្ថិ សំយោជនវិប្បយុត្តសំយោជនិយោ, អត្ថិ សំយោជនវិប្បយុត្តអសំយោជនិយោ.

តិវិធេន វេទនាក្ខន្ធោ – អត្ថិ បរិត្តារម្មណោ, អត្ថិ មហគ្គតារម្មណោ, អត្ថិ អប្បមាណារម្មណោ…បេ…. ឯវំ ទសវិធេន វេទនាក្ខន្ធោ.