੪. ਉਪਾਦਿਨ੍ਨਤ੍ਤਿਕਵਣ੍ਣਨਾ

੫੧. ਅਧਿਪਤਿਧਮ੍ਮੋਯੇਵ ਲੋਕੁਤ੍ਤਰਧਮ੍ਮੇਸੁ ਨਾਧਿਪਤਿਪਚ੍ਚਯਾ ਉਪ੍ਪਜ੍ਜਤੀਤਿ ਆਹ ‘‘ਨਾਧਿਪਤਿਪਚ੍ਚਯਾਤਿ ਸਯਂ ਅਧਿਪਤਿਭੂਤਤ੍ਤਾ’’ਤਿ. ਨਨੁ ਅਧਿਪਤਿਧਮ੍ਮੋਪਿ ਆਰਮ੍ਮਣਾਧਿਪਤਿਵਸੇਨ ਅਧਿਪਤਿਪਚ੍ਚਯੇਨ ਉਪ੍ਪਜ੍ਜਤੀਤਿ ਚੋਦਨਂ ਸਨ੍ਧਾਯਾਹ ‘‘ਅਵਿਰਹਿਤਾ…ਪੇ… ਦਸ੍ਸੇਤੀ’’ਤਿ. ਅਵਿਰਹਿਤਾਰਮ੍ਮਣਾਧਿਪਤੀਸੂਤਿ ਲੋਕੁਤ੍ਤਰੇ ਸਨ੍ਧਾਯਾਹ. ਤੇ ਹਿ ਨਿਬ੍ਬਾਨਾਰਮ੍ਮਣਤ੍ਤਾ ਏਵਂ ਵੁਚ੍ਚਤਿ. ਪਿ-ਸਦ੍ਦੇਨ ਕੋ ਪਨ ਵਾਦੋ ਵਿਰਹਿਤਾਰਮ੍ਮਣਾਧਿਪਤਿਅਨੇਕਨ੍ਤਾਰਮ੍ਮਣਾਧਿਪਤੀਸੂਤਿ ਦਸ੍ਸੇਤਿ.

੭੨. ਅਨੁਪਾਲਨੁਪਤ੍ਥਮ੍ਭਨਵਸੇਨਾਤਿ ਜੀਵਿਤਿਨ੍ਦ੍ਰਿਯਂ ਵਿਯ ਕਟਤ੍ਤਾਰੂਪਾਨਂ ਅਨੁਪਾਲਨਵਸੇਨ ਓਜਾ ਤਸ੍ਸੇਵ ਕਮ੍ਮਜਕਾਯਸ੍ਸ ਉਪਤ੍ਥਮ੍ਭਨਵਸੇਨ ਪਚ੍ਚਯੋ ਹੋਤਿ, ਨ ਜਨਕਵਸੇਨਾਤਿ ਯੋਜਨਾ. ਏਤਸ੍ਮਿਂ ਪਨ ਅਤ੍ਥੇ ਸਤੀਤਿ ਕਮ੍ਮਜਕਲਾਪੇ ਓਜਾ ਤਸ੍ਸੇਵ ਕਮ੍ਮਜਕਾਯਸ੍ਸ ਉਪਤ੍ਥਮ੍ਭਕਵਸੇਨ ਪਚ੍ਚਯੋ ਹੋਤੀਤਿ ਏਤਸ੍ਮਿਂ ਅਤ੍ਥੇ ਲਬ੍ਭਮਾਨੇ. ਆਹਾਰਨ੍ਤਿਪਿ ਵਤ੍ਤਬ੍ਬਨ੍ਤਿ ਯਥਾ ਜੀਵਿਤਿਨ੍ਦ੍ਰਿਯਵਸੇਨ ‘‘ਉਪਾਦਿਨ੍ਨੁਪਾਦਾਨਿਯੋ ਧਮ੍ਮੋ ਉਪਾਦਿਨ੍ਨੁਪਾਦਾਨਿਯਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ’’ਤਿ ਵੁਤ੍ਤਂ, ਏਵਂ ਯਥਾਵੁਤ੍ਤਆਹਾਰਸ੍ਸਪਿ ਵਸੇਨ ਵਤ੍ਤਬ੍ਬਨ੍ਤਿ ਅਤ੍ਥੋ. ਏਤ੍ਥ ਚ ਯਸ੍ਮਿਂ ਕਲਾਪੇ ਕਮ੍ਮਜਾ ਓਜਾ ਕਦਾਚਿ ਤਸ੍ਸੇਵ ਉਪਤ੍ਥਮ੍ਭਨਪਚ੍ਚਯੋ ਹੋਤੀਤਿ ਅਯਮਤ੍ਥੋ ਅਟ੍ਠਕਥਾਯਂ ਦਸ੍ਸਿਤੋ. ਯਦਿ ਕਮ੍ਮਜਾ ਓਜਾ ਏਕਂਸਤੋ ਸਕਲਾਪਰੂਪੂਪਤ੍ਥਮ੍ਭਨਵਸੇਨੇਵ ਪਵਤ੍ਤਤਿ, ਤਥਾ ਸਤਿ ਇਮਾਯ ਪਾਲ਼ਿਯਾ ਵਿਰੋਧੋ ਸਿਯਾਤਿ ਦਸ੍ਸੇਨ੍ਤੋ ‘‘ਯਦਿ ਚ…ਪੇ… ਹੋਤੀ’’ਤਿ ਅਟ੍ਠਕਥਾਵਚਨਂ ਉਦ੍ਧਰਿਤ੍ਵਾ ਤਤ੍ਥ ਦੋਸਂ ਵਿਭਾਵੇਨ੍ਤੋ ‘‘ਏਵਂ ਸਤੀ’’ਤਿ ਆਹ. ਤਤ੍ਥ ਤਨ੍ਤਿ ਤਂ ਵਚਨਂ. ਅਨਜ੍ਝੋਹਟਾਯ ਅਤ੍ਤਨੋ ਪਚ੍ਚਯਤੋ ਨਿਬ੍ਬਤ੍ਤਾਯ, ਪਚ੍ਚਯੋ ਚੇਤ੍ਥ ਕਮ੍ਮਂਯੇਵ. ਤੇਨਾਹ ‘‘ਸਸਨ੍ਤਾਨਗਤਾਯ ਉਪਾਦਿਨ੍ਨੋਜਾਯਾ’’ਤਿ.

ਅਯਮ੍ਪਿ ਪਞ੍ਹੋ, ਨ ਕੇਵਲਂ ਪੁਬ੍ਬੇ ਵੁਤ੍ਤਆਹਾਰੋਯੇਵਾਤਿ ਅਧਿਪ੍ਪਾਯੋ. ਉਦ੍ਧਰਿਤਬ੍ਬੋ ਸਿਯਾ, ਨ ਚ ਉਦ੍ਧਟੋ. ਤਸ੍ਮਾਤਿ ਏਤਸ੍ਸ ‘‘ਵਾਦੋ ਬਲਵਤਰੋ’’ਤਿ ਏਤੇਨ ਸਮ੍ਬਨ੍ਧੋ. ਕਸ੍ਮਾ ਪਨ ਯਥਾਵੁਤ੍ਤੇਸੁ ਦ੍ਵੀਸੁ ਪਞ੍ਹੇਸੁ ਆਹਾਰੋ ਨ ਉਦ੍ਧਟੋਤਿ ਆਹ ‘‘ਅਜ੍ਝੋਹਟਸ੍ਸਾ’’ਤਿਆਦਿ. ਤਤ੍ਥ ਦੁਤਿਯਪਞ੍ਹੋਤਿ ਦੁਕਮੂਲਕੇ ਦੁਤਿਯਪਞ੍ਹੋਤਿ ਯੋਜਨਾ. ਦੁਤਿਯਪਞ੍ਹੋ ਚ ਨ ਉਦ੍ਧਟੋਤਿ ਏਤ੍ਥਾਪਿ ‘‘ਅਜ੍ਝੋਹਟਸ੍ਸ…ਪੇ… ਅਭਾਵਤੋ’’ਤਿ ਇਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਇਤਰਸ੍ਸਾਤਿ ਅਨਜ੍ਝੋਹਟਸ੍ਸ. ਅਜ੍ਝੋਹਟਮੇਵ ਨ ਅਨਜ੍ਝੋਹਟਂ, ਯਥਾਵੁਤ੍ਤੋਜਨ੍ਤਿ ਅਧਿਪ੍ਪਾਯੋ. ‘‘ਬਲਵਤਰੋ’’ਤਿ ਵਤ੍ਵਾ ਤਸ੍ਸ ਬਲਵਤਰਭਾਵਂ ਦਸ੍ਸੇਨ੍ਤੋ ‘‘ਨ ਹੀ’’ਤਿਆਦਿਮਾਹ. ਕਤਿਪਯਾਲੋਪੇ ਅਜ੍ਝੋਹਰਿਤ੍ਵਾ ਵਸਿਤ੍ਵਾ ਠਿਤਸ੍ਸ ਵਿਯ ਅਜ੍ਝੋਹਟਮਤ੍ਤਾਹਿ ਮਣ੍ਡੂਕਾਦੀਹਿ ਅਜ੍ਝੋਹਾਰਕਸ੍ਸ ਸਰੀਰੇ ਵਿਸੇਸਾਧਾਨਂ ਵੇਦਿਤਬ੍ਬਂ.

ਇਧ ਵੁਤ੍ਤੇਹੀਤਿ ਇਮਸ੍ਮਿਂ ਉਪਾਦਿਨ੍ਨਤ੍ਤਿਕੇ ਵੁਤ੍ਤੇਹਿ. ਏਕਮੂਲਕਦੁਕਤਿਕਾਵਸਾਨਪਞ੍ਹਵਿਸ੍ਸਜ੍ਜਨੇਹੀਤਿ ਏਕਪਦਮੂਲਕੇਹਿ ਦੁਕਾਵਸਾਨੇਹਿ ਤਿਕਾਵਸਾਨੇਹਿ ਚ ਪਞ੍ਹਵਿਸ੍ਸਜ੍ਜਨੇਹਿ. ਤੇ ਪਨ ‘‘ਅਨੁਪਾਦਿਨ੍ਨੁਪਾਦਾਨਿਯੋ ਧਮ੍ਮੋ ਉਪਾਦਿਨ੍ਨੁਪਾਦਾਨਿਯਸ੍ਸ ਅਨੁਪਾਦਿਨ੍ਨੁਪਾਦਾਨਿਯਸ੍ਸ ਚ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ, ਅਨੁਪਾਦਿਨ੍ਨਅਨੁਪਾਦਾਨਿਯੋ ਧਮ੍ਮੋ ਉਪਾਦਿਨ੍ਨੁਪਾਦਾਨਿਯਸ੍ਸ ਅਨੁਪਾਦਿਨ੍ਨੁਪਾਦਾਨਿਯਸ੍ਸ ਅਨੁਪਾਦਿਨ੍ਨਅਨੁਪਾਦਾਨਿਯਸ੍ਸ ਚ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਵੇਦਿਤਬ੍ਬੋ. ਇਧਾਤਿ ਇਮਸ੍ਮਿਂ ਉਪਾਦਿਨ੍ਨਤ੍ਤਿਕੇ. ਦੁਤਿਯਦੁਕਾਵਸਾਨੇ ਵਿਯਾਤਿ ਦੁਤਿਯਦੁਕਾਵਸਾਨੇ ਪਞ੍ਹਵਿਸ੍ਸਜ੍ਜਨੇ ਵਿਯ, ‘‘ਅਨੁਪਾਦਿਨ੍ਨੁਪਾਦਾਨਿਯੋ ਧਮ੍ਮੋ ਉਪਾਦਿਨ੍ਨੁਪਾਦਾਨਿਯਸ੍ਸ ਅਨੁਪਾਦਿਨ੍ਨੁਪਾਦਾਨਿਯਸ੍ਸ ਚ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ, ਸਹਜਾਤਂ ਪਚ੍ਛਾਜਾਤ’’ਨ੍ਤਿ ਏਤਸ੍ਸ ਵਿਸ੍ਸਜ੍ਜਨੇ ਵਿਯਾਤਿ ਅਤ੍ਥੋ. ਅਯਞ੍ਚ ਅਤ੍ਥੋ ਤਤਿਯਪਦਮੂਲਕੇਸੁ ਦੁਕਤਿਕਾਵਸਾਨਪਞ੍ਹੇਸੁਪਿ ਲਬ੍ਭਤੇਵ. ਯਦਿ ਪਨ ਤੇ ਪਞ੍ਹਾ ਕੁਸਲਤ੍ਤਿਕੇਪਿ ਲਬ੍ਭਨ੍ਤਿ, ਅਥ ਕਸ੍ਮਾ ਤਤ੍ਥ ਨ ਉਦ੍ਧਟਾਤਿ ਆਹ ‘‘ਸੁਖਾਵਬੋਧਨਤ੍ਥਂ ਪਨ ਤਤ੍ਥ ਸਹਜਾਤਵਸੇਨੇਵ ਵਿਸ੍ਸਜ੍ਜਨਂ ਕਤ’’ਨ੍ਤਿ. ਸਹਜਾਤਵਸੇਨੇਵਾਤਿ ਸਹਜਾਤਅਤ੍ਥਿਪਚ੍ਚਯਵਸੇਨੇਵ. ਏਕਮੂਲਕਦੁਕਾਵਸਾਨਾਤਿ ‘‘ਕੁਸਲੋ ਧਮ੍ਮੋ ਕੁਸਲਸ੍ਸ ਚ ਅਬ੍ਯਾਕਤਸ੍ਸ ਚਾ’’ਤਿ ਏਵਂਪਕਾਰਾ ਪਞ੍ਹਾ. ਤਤ੍ਥ ਕੁਸਲਤ੍ਤਿਕੇ ਉਦ੍ਧਟਾ. ਇਧ ਪਨ ਇਮਸ੍ਮਿਂ ਉਪਾਦਿਨ੍ਨਤ੍ਤਿਕੇ. ਏਤੇਹਿ ਯਥਾਵੁਤ੍ਤੇਹਿ ਵਿਸ੍ਸਜ੍ਜਨੇਹਿ. ਏਕੋ ਧਮ੍ਮੋਤਿ ਏਕੋ ਵੇਦਨਾਦਿਕੋ ਪਚ੍ਚਯਧਮ੍ਮੋ. ਅਨੇਕੇਹੀਤਿ ਸਹਜਾਤਪਚ੍ਛਾਜਾਤਾਦੀਹਿ ਅਨੇਕੇਹਿ ਅਤ੍ਥਿਪਚ੍ਚਯਵਿਸੇਸੇਹਿ. ਅਨੇਕੇਸਂ ਧਮ੍ਮਾਨਨ੍ਤਿ ਅਨੇਕੇਸਂ ਪਚ੍ਚਯੁਪ੍ਪਨ੍ਨਧਮ੍ਮਾਨਂ. ਏਕੋ ਅਤ੍ਥਿਪਚ੍ਚਯੋਤਿ ਇਦਂ ਅਤ੍ਥਿਪਚ੍ਚਯਤਾਸਾਮਞ੍ਞਤੋ ਵੁਤ੍ਤਂ.

ਇਦਾਨਿ ਯਥਾਵੁਤ੍ਤਂ ਅਵੁਤ੍ਤਞ੍ਚ ਅਤ੍ਥਿਪਚ੍ਚਯੇ ਲਬ੍ਭਮਾਨਂ ਵਿਸੇਸਂ ਵਿਤ੍ਥਾਰਤੋ ਦਸ੍ਸੇਨ੍ਤੋ ‘‘ਏਕੋ ਹੀ’’ਤਿਆਦਿਮਾਹ. ਤਤ੍ਥ ਏਕੋਤਿ ਅਤ੍ਥਿਪਚ੍ਚਯਵਿਸੇਸੇਸੁ ਏਕੋ. ਏਕਸ੍ਸਾਤਿ ਤਾਦਿਸਸ੍ਸੇਵ ਏਕਸ੍ਸ. ਅਞ੍ਞਥਾ ਹਿ ਏਕੋ ਧਮ੍ਮੋ ਏਕਸ੍ਸ ਧਮ੍ਮਸ੍ਸ ਪਚ੍ਚਯੋ ਨਾਮ ਨਤ੍ਥਿ. ਏਕੇਨੇਵਾਤਿ ਸਹਜਾਤਅਤ੍ਥਿਪਚ੍ਚਯੇਨੇਵ ਯਥਾ ਓਕ੍ਕਨ੍ਤਿਕ੍ਖਣੇ ਵਤ੍ਥੁ. ਤਞ੍ਹਿ ਅਤ੍ਤਨਾ ਸਹਜਾਤਸ੍ਸ ਨਾਮਸ੍ਸ ਸਹਜਾਤਅਤ੍ਥਿਪਚ੍ਚਯੇਨੇਵ ਪਚ੍ਚਯੋ ਹੋਤਿ, ਨ ਪੁਰੇਜਾਤਾਦਿਨਾ. ਏਕੋ ਸਹਜਾਤਅਰੂਪਕ੍ਖਨ੍ਧੋ ਅਨੇਕੇਸਂ ਅਤ੍ਤਨਾ ਸਹਜਾਤਾਨਂ ਅਰੂਪਕ੍ਖਨ੍ਧਾਨਂ ਏਕੇਨ ਸਹਜਾਤਅਤ੍ਥਿਪਚ੍ਚਯੇਨ, ਅਨੇਕੇਹਿ ਸਹਜਾਤਪਚ੍ਛਾਜਾਤਅਤ੍ਥਿਪਚ੍ਚਯੇਹਿ ਯਥਾਕ੍ਕਮਂ ਅਤ੍ਤਨਾ ਸਹਜਾਤਾਨਂ ਚਿਤ੍ਤਸਮੁਟ੍ਠਾਨਰੂਪਾਨਂ ਪੁਰੇਜਾਤਾਨਂ ਤੇਸਮੁਟ੍ਠਾਨਿਕਰੂਪਾਨਂ. ਅਨੇਕੋ ਪੁਰੇਜਾਤਵਤ੍ਥੁਰੂਪਞ੍ਚੇਵ ਸਹਜਾਤਅਰੂਪਕ੍ਖਨ੍ਧਾ ਚ ਏਕਸ੍ਸ ਅਰੂਪਕ੍ਖਨ੍ਧਸ੍ਸ ਯਥਾਕ੍ਕਮਂ ਪੁਰੇਜਾਤਸਹਜਾਤਅਤ੍ਥਿਪਚ੍ਚਯੇਹਿ. ਅਨੇਕੋ ਅਰੂਪਧਮ੍ਮੋ ਅਨੇਕੇਸਂ ਸਹਜਾਤਅਰੂਪਧਮ੍ਮਾਨਂ ਪੁਰੇਜਾਤਰੂਪਧਮ੍ਮਾਨਞ੍ਚ ਸਹਜਾਤਪਚ੍ਛਾਜਾਤਅਤ੍ਥਿਪਚ੍ਚਯੇਹਿ. ਅਨੇਕੋ ਵਾ ਆਹਾਰਿਨ੍ਦ੍ਰਿਯਪ੍ਪਕਾਰੋ ਅਨੇਕੇਸਂ ਰੂਪਧਮ੍ਮਾਨਂ ਯਥਾਰਹਂ ਸਹਜਾਤਪੁਰੇਜਾਤਪਚ੍ਛਾਜਾਤਾਹਾਰਿਨ੍ਦ੍ਰਿਯਵਸੇਨ ਅਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ. ਏਵਂ ਪਚ੍ਚਯੁਪ੍ਪਨ੍ਨਾਨਂ ਅਸਮਾਨਤ੍ਤੇਪਿ ਅਯਮਤ੍ਥੋ ਸਮ੍ਭਵਤਿ, ਸਮਾਨਤ੍ਤੇ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਤੇਨਾਹ ‘‘ਸਮਾਨਤ੍ਤੇ ਪਚ੍ਚਯੁਪ੍ਪਨ੍ਨਧਮ੍ਮਾਨ’’ਨ੍ਤਿ. ਸਹਜਾਤਂ ਪੁਰੇਜਾਤੇਨੇਵ ਸਹ ਅਤ੍ਥਿਪਚ੍ਚਯੋ ਹੋਤੀਤਿ ਸਹਜਾਤਅਤ੍ਥਿਪਚ੍ਚਯਧਮ੍ਮੋ ਪੁਰੇਜਾਤਅਤ੍ਥਿਪਚ੍ਚਯਧਮ੍ਮੇਨ ਸਹੇਵ ਅਤ੍ਥਿਪਚ੍ਚਯੋ ਹੋਤਿ. ਯਥਾ ਵਤ੍ਥੁਨਾ ਪੁਰੇਜਾਤਅਤ੍ਥਿਪਚ੍ਚਯਂ ਲਭਨ੍ਤਾ ਏਵ ਕੁਸਲਾਦਿਧਮ੍ਮਾ ਸਹਜਾਤਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਸਹਜਾਤਅਤ੍ਥਿਪਚ੍ਚਯੋ ਹੋਨ੍ਤਿ, ਤਥਾ ਤੇ ਪੁਰੇਜਾਤਸ੍ਸ ਕਾਯਸ੍ਸ ਪਚ੍ਛਾਜਾਤਪਚ੍ਚਯੋਪਿ ਹੋਨ੍ਤਿਯੇਵ. ਤੇਨਾਹ ‘‘ਪਚ੍ਛਾਜਾਤੇਨ ਚਾ’’ਤਿ. ਅਤ੍ਥਿਪਚ੍ਚਯੋ ਹੋਤੀਤਿ ਸਮ੍ਬਨ੍ਧੋ. ਅਯਂ ਸਹਜਾਤਪਚ੍ਛਾਜਾਤਾਨਂ ਅਤ੍ਥਿਪਚ੍ਚਯਭਾਵੋ ਪਚ੍ਚਯਧਮ੍ਮਾਨਂ ਅਭੇਦੇ ਏਵ ਇਚ੍ਛਿਤੋ, ਨ ਭੇਦੇ. ਤੇਨਾਹ ‘‘ਅਨਞ੍ਞਧਮ੍ਮਤ੍ਤੇਨ…ਪੇ… ਨਾਨਾਧਮ੍ਮਤ੍ਤੇ’’ਤਿ.

ਇਦਾਨਿ ਤਸ੍ਸ ਨਾਨਾਧਮ੍ਮਤ੍ਤੇ ਅਭਾਵਂ ਪਾਲ਼ਿਯਾ ਵਿਭਾਵੇਨ੍ਤੋ ‘‘ਯਦਿ ਸਿਯਾ’’ਤਿਆਦਿਮਾਹ. ਤਤ੍ਥ ਏਕੋ ਅਤ੍ਥਿਪਚ੍ਚਯਭਾਵੋ ਨਤ੍ਥੀਤਿ ਏਕਸ੍ਸੇਵ ਪਚ੍ਚਯਧਮ੍ਮਸ੍ਸ ਵਸੇਨ ਲਬ੍ਭਮਾਨੋ ਏਕੋ ਅਤ੍ਥਿਪਚ੍ਚਯਭਾਵੋ ਨਤ੍ਥਿ. ਕਸ੍ਮਾ? ਵਿਰੋਧਤੋ. ਤੇਨ ਵੁਤ੍ਤਂ ‘‘ਸਹਜਾਤ…ਪੇ… ਨ ਵੁਤ੍ਤ’’ਨ੍ਤਿ. ਏਵਞ੍ਚ ਕਤ੍ਵਾਤਿ ਸਹਜਾਤਪਚ੍ਛਾਜਾਤਾਨਂ ਏਕਧਮ੍ਮਵਸੇਨ ਸਹ ਅਲਾਭਤੋ ਏਵ. ਏਕਧਮ੍ਮਵਸੇਨਾਤਿ ਏਕਸ੍ਸੇਵ ਪਚ੍ਚਯਧਮ੍ਮਸ੍ਸ ਵਸੇਨ. ਤੇਨਾਹ ‘‘ਨਾਨਾਧਮ੍ਮਾਨਂ ਵਿਰੁਦ੍ਧਸਭਾਵਤ੍ਤਾ’’ਤਿ. ਵਿਰੁਦ੍ਧਸਭਾਵਤਾ ਚ ਸਹਜਾਤਪਚ੍ਛਾਜਾਤਵਸੇਨ ਵੇਦਿਤਬ੍ਬਾ, ਇਧ ਪਨ ਲੋਕਿਯਲੋਕੁਤ੍ਤਰਾਦਿਭਾਵਤੋਤਿ. ਅਞ੍ਞਥਾਤਿ ਤੇਸਂ ਸਹਜਾਤਪਚ੍ਛਾਜਾਤਾਨਂ ਏਕਜ੍ਝਂ ਲਾਭੇ. ਇਨ੍ਦ੍ਰਿਯਪਟਿਕ੍ਖੇਪੇਪੀਤਿ ਇਨ੍ਦ੍ਰਿਯਪਚ੍ਚਯੇ ਪਚ੍ਚਨੀਕਤੋ ਠਿਤੇਪਿ. ਤਸ੍ਸ ਪਞ੍ਹਸ੍ਸ ਲਾਭਤੋਤਿ ‘‘ਉਪਾਦਿਨ੍ਨੁਪਾਦਾਨਿਯੋ ਚ ਅਨੁਪਾਦਿਨ੍ਨੁਪਾਦਾਨਿਯੋ ਚ ਧਮ੍ਮਾ ਉਪਾਦਿਨ੍ਨੁਪਾਦਾਨਿਯਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ’’ਤਿ ਏਤਸ੍ਸ ਪਞ੍ਹਸ੍ਸ ਲਾਭਤੋ. ਬਾਵੀਸਾਤਿ ਏਕਮੂਲਕਾਵਸਾਨਾ ਨਵ, ਏਕਮੂਲਕਦੁਕਾਵਸਾਨਾ ਪਞ੍ਚ, ਏਕਮੂਲਕਤਿਕਾਵਸਾਨਮੇਕਂ, ਦੁਕਮੂਲਕੇਕਾਵਸਾਨਾ ਚਤ੍ਤਾਰੋ, ਦੁਕਮੂਲਕਾਵਸਾਨਾ ਦ੍ਵੇ, ਦੁਕਮੂਲਕਤਿਕਾਵਸਾਨਮੇਕਨ੍ਤਿ ਏਵਂ ਬਾਵੀਸਤਿ. ਯਥਾ ਪੁਬ੍ਬੇ ਸਹਜਾਤਂ ਪੁਰੇਜਾਤੇਨ ਸਹੇਵ ਅਤ੍ਥਿਪਚ੍ਚਯੋ ਹੋਤੀਤਿ ਵੁਤ੍ਤਂ, ਏਵਂ ਪੁਰੇਜਾਤਮ੍ਪਿ ਤੇਨਾਤਿ ਦਸ੍ਸੇਨ੍ਤੋ ਆਹ ‘‘ਪੁਰੇਜਾਤਂ ਸਹਜਾਤੇਨੇਵ ਸਹ ਅਤ੍ਥਿਪਚ੍ਚਯੋ ਹੋਤੀ’’ਤਿ. ਤਤ੍ਥ ਸਹਜਾਤੇਨੇਵ ਸਹਾਤਿ ਸਹਜਾਤੇਨ ਸਹੇਵ. ਅਟ੍ਠਾਨਪ੍ਪਯੁਤ੍ਤੋ ਹਿ ਅਯਂ ਏਵ-ਸਦ੍ਦੋ, ਸਹਜਾਤੇਨ ਨ ਵਿਨਾ ਪੁਰੇਜਾਤਅਤ੍ਥਿਪਚ੍ਚਯੋਤਿ ਅਤ੍ਥੋ. ਇਤਰੇਸੁ ਪਨ ਅਤ੍ਥਿਪਚ੍ਚਯਧਮ੍ਮੇਸੁ ਨਿਯਮੋ ਨਤ੍ਥਿ ਤੇਹਿ ਸਹਾਪਿ ਵਿਨਾਪਿ ਭਾਵਤੋ. ਤੇਨਾਹ ‘‘ਨ ਇਤਰੇਹੀ’’ਤਿ. ਤਮ੍ਪਿ ਵਤ੍ਥੁ ਤਂਸਹਿਤਪੁਰੇਜਾਤਮੇਵਾਤਿ ਯਂ ‘‘ਪੁਰੇਜਾਤਂ ਸਹਜਾਤੇਨੇਵ ਸਹ ਅਤ੍ਥਿਪਚ੍ਚਯੋ ਹੋਤੀ’’ਤਿ ਵੁਤ੍ਤਂ, ਤਮ੍ਪਿ ਵਤ੍ਥੁਪੁਰੇਜਾਤਞ੍ਚੇਵ ਤਂਸਹਿਤਾਰਮ੍ਮਣਪੁਰੇਜਾਤਮੇਵ ਚ, ਨ ਕੇਵਲਂ ਆਰਮ੍ਮਣਪੁਰੇਜਾਤਂ. ਤੇਨਾਹ ‘‘ਨ ਇਤਰ’’ਨ੍ਤਿ.

ਇਦਾਨਿ ਯਥਾਵੁਤ੍ਤਮਤ੍ਥਂ ਪਾਠਨ੍ਤਰੇਨ ਵਿਭਾਵੇਤੁਂ ‘‘ਕੁਸਲਤ੍ਤਿਕੇ ਹੀ’’ਤਿਆਦਿ ਵੁਤ੍ਤਂ. ਯਦਿ ਪੁਰੇਜਾਤਂ ਤਂਸਹਜਾਤੇਨ ਵਿਨਾਪਿ ਅਤ੍ਥਿਪਚ੍ਚਯੋ ਸਿਯਾ, ‘‘ਨਵਿਪ੍ਪਯੁਤ੍ਤਪਚ੍ਚਯਾ ਅਤ੍ਥਿਯਾ ਪਞ੍ਚਾ’’ਤਿ ਵਤ੍ਤੁਂ ਨ ਸਕ੍ਕਾ, ਵੁਤ੍ਤਞ੍ਚੇਤਂ, ਤਸ੍ਮਾ ਵਿਞ੍ਞਾਯਤਿ ‘‘ਪੁਰੇਜਾਤਂ ਸਹਜਾਤੇਨ ਸਹੇਵ ਅਤ੍ਥਿਪਚ੍ਚਯੋ ਹੋਤੀ’’ਤਿ. ਨਵਿਪ੍ਪਯੁਤ੍ਤੇ ਬਾਵੀਸਾਤਿ ਏਤ੍ਥਾਪਿ ਏਸੇਵ ਨਯੋ. ਤਤ੍ਥਾਤਿ ਸਨਿਦਸ੍ਸਨਤ੍ਤਿਕੇ. ਅਤ੍ਥਿਵਿਭਙ੍ਗੇਤਿ ਅਤ੍ਥਿਪਚ੍ਚਯਸ੍ਸ ਵਿਭਜਨੇ. ਤਿਕਮੂਲਕੇਕਾਵਸਾਨਨ੍ਤਿ ‘‘ਸਨਿਦਸ੍ਸਨਸਪ੍ਪਟਿਘੋ ਚ ਅਨਿਦਸ੍ਸਨਸਪ੍ਪਟਿਘੋ ਚ ਅਨਿਦਸ੍ਸਨਅਪ੍ਪਟਿਘੋ ਚ ਧਮ੍ਮਾ ਅਨਿਦਸ੍ਸਨਸਪ੍ਪਟਿਘਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ’’ਤਿ ਏਵਂ ਤਿਕਮੂਲਕੋ ਏਕਾਵਸਾਨੋ ਪਞ੍ਹੋ ਉਦ੍ਧਟੋ. ਪਚ੍ਚਯੁਦ੍ਧਾਰੇਤਿ ਚ ਤਤ੍ਥੇਵ ਪਚ੍ਚਯੁਦ੍ਧਾਰੇ. ਤਥਾ ਚ ਸੋ ਪਞ੍ਹੋ ਉਦ੍ਧਟੋ. ਤਯਿਦਂ ਕਥਂ, ਯਦਿ ਪੁਰੇਜਾਤਂ ਸਹਜਾਤੇਨੇਵ ਸਹ ਅਤ੍ਥਿਪਚ੍ਚਯੋ ਹੋਤੀਤਿ ਚੋਦਨਾਯਂ ਆਹ ‘‘ਤਂ ਵਤ੍ਥੁਸਹਿਤਸ੍ਸ…ਪੇ… ਪਚ੍ਚਯਭਾਵਤੋ’’ਤਿ. ਤਸ੍ਸਤ੍ਥੋ – ਯਦਿਪਿ ਤਤ੍ਥ ਸਨਿਦਸ੍ਸਨਸਪ੍ਪਟਿਘਗ੍ਗਹਣੇਨ ਆਰਮ੍ਮਣਪੁਰੇਜਾਤਸ੍ਸ ਅਤ੍ਥਿਪਚ੍ਚਯਭਾਵੋ ਵੁਤ੍ਤੋ, ਤਥਾਪਿ ਅਨਿਦਸ੍ਸਨਅਪ੍ਪਟਿਘਗ੍ਗਹਣਤੋ ਵਤ੍ਥੁਮ੍ਪਿ ਗਹਿਤਨ੍ਤਿ ਵਤ੍ਥੁਸਹਿਤਸ੍ਸ ਆਰਮ੍ਮਣਪੁਰੇਜਾਤਸ੍ਸ ਸਹਜਾਤੇਨ ਸਹੇਵ ਅਤ੍ਥਿਪਚ੍ਚਯਭਾਵੋ ਵੁਤ੍ਤੋਤਿ. ਪਚ੍ਛਾਜਾਤਂ ਆਹਾਰਿਨ੍ਦ੍ਰਿਯੇਹੇਵ ਸਹ ਅਤ੍ਥਿਪਚ੍ਚਯੋ ਹੋਤਿ, ਨ ਪੁਰੇਜਾਤੇਨਾਤਿ ਅਧਿਪ੍ਪਾਯੋ. ਅਨਞ੍ਞਧਮ੍ਮਤ੍ਤੇਤਿ ਪਚ੍ਚਯਧਮ੍ਮਸ੍ਸ ਅਨਞ੍ਞਤ੍ਤੇ. ਸਹਜਾਤੇਨ ਸਹ ਅਤ੍ਥਿਪਚ੍ਚਯੋ ਹੋਤੀਤਿ ਯੋਜਨਾ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਤਤ੍ਥਾਪਿ ਪਟਿਯੋਗਿਪੁਰੇਜਾਤਂਯੇਵ ਦਟ੍ਠਬ੍ਬਂ. ‘‘ਅਤ੍ਥਿਪਚ੍ਚਯਵਿਸੇਸੇਸੁ ਪਨਾ’’ਤਿਆਦਿਨਾ ਅਤ੍ਤਨਾ ਦਸ੍ਸਿਤਂ ਵਿਚਾਰਂ ‘‘ਏਵਮੇਤ’’ਨ੍ਤਿ ਨਿਗਮਨਵਸੇਨ ਪਚ੍ਚਾਮਸਤਿ.

ਉਪਾਦਿਨ੍ਨਤ੍ਤਿਕਵਣ੍ਣਨਾ ਨਿਟ੍ਠਿਤਾ.