੬. ਵਿਤਕ੍ਕਤ੍ਤਿਕਵਣ੍ਣਨਾ

੨੨. ਵਿਤਕ੍ਕਤ੍ਤਿਕੇ ਸਤ੍ਤਸੁ ਮੂਲਕੇਸੂਤਿ ‘‘ਸਵਿਤਕ੍ਕਸਵਿਚਾਰਂ ਧਮ੍ਮਂ ਪਟਿਚ੍ਚਾ’’ਤਿਆਦਿਨਾ ਆਗਤਾਨਿ ਤੀਣਿ ਏਕਕਾਨਿ, ਤੀਣਿ ਦੁਕਾਨਿ, ਏਕਂ ਤਿਕਨ੍ਤਿ ਏਵਂ ਏਕਮੂਲਕਾਨਿ ਯਾਨਿ ਸਤ੍ਤਮੂਲਕਾਨਿ, ਤੇਸੁ. ਯਥਾਕ੍ਕਮਨ੍ਤਿ ਪਾਲ਼ਿਯਂ ਆਗਤਾਨੁਕ੍ਕਮੇਨ. ਸਤ੍ਤਾਤਿ ਪਠਮੇ ਏਕਕੇ ਸਤ੍ਤ. ਪਞ੍ਚਾਤਿ ਦੁਤਿਯੇ ਪਞ੍ਚ. ਤਾਨਿਮਾਨਿ ਹੇਤੁਪਚ੍ਚਯੇ ਵੁਤ੍ਤਨਯੇਨ ਵੇਦਿਤਬ੍ਬਾਨਿ. ਇਧ ਪਨ ਪਵਤ੍ਤਿਵਸੇਨੇਵ ਯੋਜੇਤਬ੍ਬਂ. ਤੀਣੀਤਿਆਦੀਸੁ ਤਤਿਯੇ ਤੀਣਿ, ਚਤੁਤ੍ਥੇ ਏਕਂ, ਪਞ੍ਚਮੇ ਤੀਣਿ, ਛਟ੍ਠੇਪਿ ਤੀਣਿ, ਸਤ੍ਤਮੇ ਏਕਂ. ਤਾਨਿ ਪਨ ਯਥਾਕ੍ਕਮਂ ਤਤਿਯਪਦਂ ਪਟਿਚ੍ਚ ਤਤਿਯਪਦਦੁਤਿਯਪਦਤਦੁਭਯਵਸੇਨ, ਪਠਮਪਦਤਤਿਯਪਦਾਨਿ ਪਟਿਚ੍ਚ ਤਤਿਯਪਦਵਸੇਨ, ਪਠਮਪਦਦੁਤਿਯਪਦਾਨਿ ਪਟਿਚ੍ਚ ਪਠਮਪਦਤਤਿਯਪਦਤਦੁਭਯਵਸੇਨ, ਦੁਤਿਯਪਦਤਤਿਯਪਦਾਨਿ ਪਟਿਚ੍ਚ ਪਠਮਪਦਤਤਿਯਪਦਤਦੁਭਯਵਸੇਨ, ਪਠਮਦੁਤਿਯਤਤਿਯਪਦਾਨਿ ਪਟਿਚ੍ਚ ਤਤਿਯਪਦਵਸੇਨੇਵ ਵੇਦਿਤਬ੍ਬਾਨਿ. ਅਞ੍ਞਮਞ੍ਞੇ ਅਟ੍ਠਵੀਸਾਤਿਆਦੀਸੁਪਿ ਇਮਿਨਾਵ ਨਯੇਨ ਗਣਨਾ ਵੇਦਿਤਬ੍ਬਾ. ਏਵਨ੍ਤਿ ਯਥਾਵੁਤ੍ਤਂ ਗਣਨਂ ਪਚ੍ਚਾਮਸਤਿ. ਦੁਤਿਯਤਤਿਯਮੂਲਕੇਸੁ ਏਕਂ ਏਕਨ੍ਤਿ ਦੁਤਿਯਮੂਲਕੇ ਏਕਂ, ਤਤਿਯਮੂਲਕੇ ਏਕਨ੍ਤਿ ਯੋਜੇਤਬ੍ਬਂ. ਤਥਾ ਆਸੇਵਨੇਤਿ ਯਥਾ ਪੁਰੇਜਾਤੇ ਏਕਾਦਸ, ਤਥਾ ਆਸੇਵਨੇਤਿ ਅਤ੍ਥੋ. ਅਞ੍ਞਾਨੀਤਿ ਅਧਿਪਤਿਅਞ੍ਞਮਞ੍ਞਪੁਰੇਜਾਤਾਸੇਵਨਤੋ ਅਞ੍ਞੇਸੁ ਪਚ੍ਚਯੇਸੁ ਗਣਨਾਨਿ. ਹੇਤੁਆਰਮ੍ਮਣਸਦਿਸਾਨੀਤਿ ਹੇਤੁਆਰਮ੍ਮਣਪਚ੍ਚਯੇਸੁ ਗਣਨਾਸਦਿਸਾਨਿ.

੩੧. ਅਵਿਸੇਸੇਨਾਤਿ ‘‘ਵਿਪਾਕ’’ਨ੍ਤਿ ਵਿਸੇਸਨਂ ਅਕਤ੍ਵਾ ਨ ਪਨ ਵਿਸ੍ਸਜ੍ਜਨਂ ਕਤਨ੍ਤਿ ਯੋਜਨਾ. ਤਤ੍ਥ ਕਾਰਣਂ ਵਤ੍ਤੁਂ ‘‘ਕਸ੍ਮਾ’’ਤਿਆਦਿਮਾਹ. ਇਤਰੇਸਨ੍ਤਿ ਲੋਕਿਯਵਿਪਾਕਾਨਂ. ਤੇ ਵਿਸੁਂ ਨਿਦ੍ਧਾਰੇਤ੍ਵਾ ਵੁਤ੍ਤਾਤਿ ਤੇ ਯਥਾਵੁਤ੍ਤਲੋਕਿਯਵਿਪਾਕਾ ਅਵਿਤਕ੍ਕਵਿਚਾਰਮਤ੍ਤਸਾਮਞ੍ਞਤੋ ਵਿਸੁਂ ਨੀਹਰਿਤ੍ਵਾ ਵੁਤ੍ਤਾ. ‘‘ਅਵਿਤਕ੍ਕਵਿਚਾਰਮਤ੍ਤੇ ਖਨ੍ਧੇ ਪਟਿਚ੍ਚ ਅਵਿਤਕ੍ਕਵਿਚਾਰਮਤ੍ਤਾ ਅਧਿਪਤੀ’’ਤਿ ਵੁਤ੍ਤਰਾਸਿ ਪੁਰਿਮਕੋਟ੍ਠਾਸੋ.

੩੮. ਏਤਨ੍ਤਿ ‘‘ਅਵਿਤਕ੍ਕਵਿਚਾਰਮਤ੍ਤਂ ਅਵਿਤਕ੍ਕ…ਪੇ… ਸਹ ਗਚ੍ਛਨ੍ਤੇਨਾ’’ਤਿ ਆਗਤਪਾਲ਼ਿਪਦਂ. ਤਸ੍ਸ ਅਤ੍ਥਂ ਦਸ੍ਸੇਤੁਂ ‘‘ਮੂਲਂ…ਪੇ… ਵੁਤ੍ਤਂ ਹੋਤੀ’’ਤਿ ਆਹ. ਤਤ੍ਥ ਅਵਿਤਕ੍ਕ…ਪੇ… ਯੋਜੇਨ੍ਤੇਨਾਤਿ ਅਵਿਤਕ੍ਕੇਹਿ ਅਵਿਤਕ੍ਕਪਰਿਯਾਯੇਨ ਵੁਤ੍ਤੇਹਿ ਅਵਿਤਕ੍ਕਵਿਚਾਰਮਤ੍ਤਅਵਿਤਕ੍ਕਅਵਿਚਾਰਪਦੇਹਿ ਸਹ ਮੂਲਪਦਂ, ਆਸੇਵਨਮੂਲਕਮੇਵ ਵਾ ਗਚ੍ਛਨ੍ਤੇਨ ਯੋਜੇਨ੍ਤੇਨ ਨਪੁਰੇਜਾਤਸਦਿਸਂ ਨਾਸੇਵਨੇ ਪਾਲ਼ਿਗਮਨਂ ਕਾਤਬ੍ਬਂ, ਪਠਿਤਬ੍ਬਨ੍ਤਿ ਅਤ੍ਥੋ. ਪੋਤ੍ਥਕੇਸੁ ਪਨ ‘‘ਅਵਿਤਕ੍ਕਵਿਚਾਰਮਤ੍ਤਂ ਵਿਪਾਕੇਨ ਸਹ ਗਚ੍ਛਨ੍ਤੇਨਾ’’ਤਿ ਦਿਸ੍ਸਤਿ, ਵਿਪਾਕੇਨ ਵਿਸੇਸਨਭੂਤੇਨ ਸਹ ਯੋਜੇਨ੍ਤੇਨਾਤਿ ਅਤ੍ਥੋ. ਤੇਨੇਵਾਹ ‘‘ਵਿਪਾਕਂ ਅਵਿਤਕ੍ਕਵਿਚਾਰਮਤ੍ਤਨ੍ਤਿਆਦਿ ਯੋਜੇਤਬ੍ਬ’’ਨ੍ਤਿ.

ਏਕਮੂਲਕੇ ਪਾਲ਼ਿਯਂ ਯੋਜਿਤਮੇਵਾਤਿ ‘‘ਦੁਮੂਲਕੇਸੁ ਪਠਮੇ’’ਤਿ ਵੁਤ੍ਤਂ.

੪੯. ਮੂਲਪਦਮੇਵ ਅਵਸਾਨਭਾਵੇਨਾਤਿ ‘‘ਸਵਿਤਕ੍ਕਸਵਿਚਾਰਂ ਧਮ੍ਮਂ ਪਚ੍ਚਯਾ ਸਵਿਤਕ੍ਕਸਵਿਚਾਰੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ’’ਤਿਆਦਿਨਾ ਮੂਲਪਦਮੇਵ ਅਵਸਾਨਭਾਵੇਨ ਯੋਜਿਤਂ. ਸਤ੍ਤ ਮੋਹਾ ਉਦ੍ਧਰਿਤਬ੍ਬਾਤਿ ਇਦਂ ਨਹੇਤੁਪਚ੍ਚਯਂ ਸਨ੍ਧਾਯ ਵੁਤ੍ਤਂ. ਪਟਿਚ੍ਚਵਾਰੇ ਹਿ ਅਹੇਤੁਕਮੋਹੋ ਤਿਕ੍ਖਤ੍ਤੁਮੇਵ ਆਗਤੋ. ਇਧ ਪਨ ‘‘ਵਤ੍ਥੁਂ ਪਚ੍ਚਯਾ’’ਤਿਆਦਿਨਾ ਚਤੂਸੁਪਿ ਮੂਲਕੇਸੁ ਆਗਤੋ, ਤਸ੍ਮਾ ਸਤ੍ਤਕ੍ਖਤ੍ਤੁਂ ਆਗਮਨਂ ਸਨ੍ਧਾਯ ‘‘ਸਤ੍ਤ ਮੋਹਾ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਉਪਨਿਸ੍ਸਯੇਨ ਸਙ੍ਗਹਿਤਤ੍ਤਾਤਿ ਉਪਨਿਸ੍ਸਯਪਚ੍ਚਯੇਨੇਵ ਕਮ੍ਮਪਚ੍ਚਯਸ੍ਸ ਸਙ੍ਗਹਿਤਤ੍ਤਾ. ਸਬ੍ਬਸ੍ਸਪਿ ਰੂਪਾਰੂਪਾਵਚਰਕਮ੍ਮਸ੍ਸ ਬਲਵਭਾਵਤੋ ਉਪਨਿਸ੍ਸਯਤ੍ਤਾਭਾਵੋ ਨਤ੍ਥਿ, ਯਤੋ ਤਂ ‘‘ਗਰੂ’’ਤਿ ਵੁਚ੍ਚਤਿ, ਕਮ੍ਮਕ੍ਖਯਕਰਸ੍ਸ ਪਨ ਕਮ੍ਮਸ੍ਸ ਬਲਵਭਾਵੇ ਵਤ੍ਤਬ੍ਬਮੇਵ ਨਤ੍ਥੀਤਿ ਇਮਮਤ੍ਥਂ ਪਾਲ਼ਿਯਾ ਏਵ ਵਿਭਾਵੇਤੁਂ ਵੁਤ੍ਤਂ ‘‘ਉਪਾਦਿਨ੍ਨਤ੍ਤਿਕਪਞ੍ਹਾਵਾਰਪਚ੍ਚਨੀਯੇ ਹਿ…ਪੇ… ਵਿਞ੍ਞਾਯਤੀ’’ਤਿ.

ਵਿਤਕ੍ਕਤ੍ਤਿਕਵਣ੍ਣਨਾ ਨਿਟ੍ਠਿਤਾ.