੮. ਚਿਤ੍ਤਯਮਕਂ

ਉਦ੍ਦੇਸਵਾਰਵਣ੍ਣਨਾ

੧-੬੨. ਸਰਾਗਾਦੀਤਿ ਏਤ੍ਥ ਆਦਿ-ਸਦ੍ਦੇਨ ‘‘ਯਸ੍ਸ ਸਰਾਗਂ ਚਿਤ੍ਤਂ ਉਪ੍ਪਜ੍ਜਤਿ, ਨ ਨਿਰੁਜ੍ਝਤੀ’’ਤਿ ਆਰਭਿਤ੍ਵਾ ਯਾਵ ‘‘ਯਸ੍ਸ ਅਵਿਮੁਤ੍ਤਂ ਚਿਤ੍ਤ’’ਨ੍ਤਿ ਵਾਰੋ, ਤਾਵ ਸਙ੍ਗਣ੍ਹਾਤਿ. ਕੁਸਲਾਦੀਤਿ ਪਨ ਆਦਿ-ਸਦ੍ਦੇਨ ‘‘ਯਸ੍ਸ ਕੁਸਲਂ ਚਿਤ੍ਤਂ ਉਪ੍ਪਜ੍ਜਤਿ, ਨ ਨਿਰੁਜ੍ਝਤੀ’’ਤਿ ਆਰਭਿਤ੍ਵਾ ਯਾਵ ‘‘ਯਸ੍ਸ ਸਰਣਂ ਚਿਤ੍ਤਂ ਉਪ੍ਪਜ੍ਜਤਿ, ਨ ਨਿਰੁਜ੍ਝਤੀ’’ਤਿ ਵਾਰੋ, ਤਾਵ ਸਙ੍ਗਣ੍ਹਾਤਿ, ਤਸ੍ਮਾ ਸਰਾਗਾਦਿਕੁਸਲਾਦੀਹੀਤਿ ਸਰਾਗਾਦੀਹਿ ਅਵਿਮੁਤ੍ਤਨ੍ਤੇਹਿ, ਕੁਸਲਾਦੀਹਿ ਅਰਣਨ੍ਤੇਹਿ ਪਦੇਹਿ ਮਿਸ੍ਸਕਾ ਵਾਰਾ. ਸੁਦ੍ਧਿਕਾਤਿ ਕੇਵਲਾ ਯਥਾਵੁਤ੍ਤਸਰਾਗਾਦੀਹਿ ਕੁਸਲਾਦੀਹਿ ਚ ਅਮਿਸ੍ਸਕਾ. ਤਯੋ ਤਯੋਤਿ ਪੁਗ੍ਗਲਧਮ੍ਮਵਸੇਨ ਤਯੋ ਤਯੋ ਮਹਾਵਾਰਾ. ਯਦਿ ਏਵਂ ਕਥਂ ਸੋਲ਼ਸ ਪੁਗ੍ਗਲਵਾਰਾਤਿ ਆਹ ‘‘ਤਤ੍ਥ ਤਤ੍ਥ ਪਨ ਵੁਤ੍ਤੇ ਸਮ੍ਪਿਣ੍ਡੇਤ੍ਵਾ’’ਤਿ. ਤਤ੍ਥ ਤਤ੍ਥ ਸੋਲ਼ਸਵਿਧੇ ਸਰਾਗਾਦਿਮਿਸ੍ਸਕਚਿਤ੍ਤੇ ਵੁਤ੍ਤੇ ਪੁਗ੍ਗਲੇ ਏਵ ਏਕਜ੍ਝਂ ਸਮ੍ਪਿਣ੍ਡੇਤ੍ਵਾ ਸਙ੍ਗਹੇਤ੍ਵਾ ‘‘ਸੋਲ਼ਸ ਪੁਗ੍ਗਲਵਾਰਾ’’ਤਿ ਵੁਤ੍ਤਂ. ‘‘ਧਮ੍ਮਪੁਗ੍ਗਲਧਮ੍ਮਵਾਰਾ’’ਤਿ ਏਤ੍ਥਾਪਿ ਏਸੇਵ ਨਯੋ. ਨ ਨਿਰਨ੍ਤਰਂ ਵੁਤ੍ਤੇਤਿ ਧਮ੍ਮੇ ਪੁਗ੍ਗਲਧਮ੍ਮੇ ਚ ਅਨਾਮਸਿਤ੍ਵਾ ਸੋਲ਼ਸਸੁਪਿ ਠਾਨੇਸੁ ਨਿਰਨ੍ਤਰਂ ਪੁਗ੍ਗਲੇ ਏਵ ਵੁਤ੍ਤੇ ਸਮ੍ਪਿਣ੍ਡੇਤ੍ਵਾ ਸੋਲ਼ਸ ਪੁਗ੍ਗਲਵਾਰਾ ਨ ਵੁਤ੍ਤਾਤਿ ਅਤ੍ਥੋ.

ਸਂਸਗ੍ਗਵਸੇਨਾਤਿ ਸਂਸਜ੍ਜਨਵਸੇਨ ਦੇਸਨਾਯ ਵਿਮਿਸ੍ਸਨਵਸੇਨ. ਅਞ੍ਞਥਾ ਹਿ ਉਪ੍ਪਾਦਨਿਰੋਧਾ ਪਚ੍ਚੁਪ੍ਪਨ੍ਨਾਨਾਗਤਕਾਲਾ ਚ ਕਥਂ ਸਂਸਜ੍ਜੀਯਨ੍ਤਿ. ਸੇਸਾਨਮ੍ਪਿ ਵਾਰਾਨਨ੍ਤਿ ਉਪ੍ਪਾਦੁਪ੍ਪਨ੍ਨਵਾਰਾਦੀਨਂ. ਤਂਤਂਨਾਮਤਾਤਿ ਯਥਾ ‘‘ਯਸ੍ਸ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਚਿਤ੍ਤਂ ਉਪ੍ਪਨ੍ਨ’’ਨ੍ਤਿਆਦਿਨਾ ਉਪ੍ਪਾਦਉਪ੍ਪਨ੍ਨਭਾਵਾਮਸਨਤੋ ਉਪ੍ਪਾਦਉਪ੍ਪਨ੍ਨਵਾਰੋਤਿ ਨਾਮਂ ਪਾਲ਼ਿਤੋ ਏਵ ਵਿਞ੍ਞਾਯਤਿ, ਏਵਂ ਸੇਸਵਾਰਾਨਮ੍ਪੀਤਿ ਆਹ ‘‘ਤਂਤਂਨਾਮਤਾ ਪਾਲ਼ਿਅਨੁਸਾਰੇਨ ਵੇਦਿਤਬ੍ਬਾ’’ਤਿ.

ਉਦ੍ਦੇਸਵਾਰਵਣ੍ਣਨਾ ਨਿਟ੍ਠਿਤਾ.

ਨਿਦ੍ਦੇਸਵਾਰਵਣ੍ਣਨਾ

੬੩. ਤਥਾਰੂਪਸ੍ਸੇਵਾਤਿ ਪਚ੍ਛਿਮਚਿਤ੍ਤਸਮਙ੍ਗਿਨੋ ਏਵ. ਤਞ੍ਚ ਚਿਤ੍ਤਨ੍ਤਿ ਤਞ੍ਚ ਯਥਾਵੁਤ੍ਤਕ੍ਖਣਂ ਪਚ੍ਛਿਮਚਿਤ੍ਤਂ. ‘‘ਏਵਂਪਕਾਰ’’ਨ੍ਤਿ ਇਮਸ੍ਸ ਅਤ੍ਥਂ ਦਸ੍ਸੇਤੁਂ ‘‘ਭਙ੍ਗਕ੍ਖਣਸਮਙ੍ਗਿਮੇਵਾ’’ਤਿ ਵੁਤ੍ਤਂ ਨਿਰੁਜ੍ਝਮਾਨਾਕਾਰਸ੍ਸ ‘‘ਏਵਂਪਕਾਰ’’ਨ੍ਤਿ ਵੁਤ੍ਤਤ੍ਤਾ.

੬੫-੮੨. ਦ੍ਵਯਮੇਤਨ੍ਤਿ ਯਂ ‘‘ਖਣਪਚ੍ਚੁਪ੍ਪਨ੍ਨਮੇਵ ਚਿਤ੍ਤਂ ਉਪ੍ਪਾਦਕ੍ਖਣਾਪਗਮੇਨ ਉਪ੍ਪਜ੍ਜਿਤ੍ਥ ਨਾਮ, ਤਦੇਵ ਉਪ੍ਪਾਦਕ੍ਖਣੇ ਉਪ੍ਪਾਦਂ ਪਤ੍ਤਤ੍ਤਾ ਉਪ੍ਪਜ੍ਜਿਤ੍ਥ, ਅਨਤੀਤਤ੍ਤਾ ਉਪ੍ਪਜ੍ਜਤਿ ਨਾਮਾ’’ਤਿ ਵੁਤ੍ਤਂ, ਏਤਂ ਉਭਯਮ੍ਪਿ. ਏਵਂ ਨ ਸਕ੍ਕਾ ਵਤ੍ਤੁਨ੍ਤਿ ਇਮਿਨਾ ਵੁਤ੍ਤਪ੍ਪਕਾਰੇਨ ਨ ਸਕ੍ਕਾ ਵਤ੍ਤੁਂ, ਪਕਾਰਨ੍ਤਰੇਨ ਪਨ ਸਕ੍ਕਾ ਵਤ੍ਤੁਨ੍ਤਿ ਅਧਿਪ੍ਪਾਯੋ. ਤਤ੍ਥ ‘‘ਨ ਹੀ’’ਤਿਆਦਿਨਾ ਪਠਮਪਕ੍ਖਂ ਵਿਭਾਵੇਤਿ. ਵਿਭਜਿਤਬ੍ਬਂ ਸਿਯਾਤਿ ‘‘ਭਙ੍ਗਕ੍ਖਣੇ ਤਂ ਚਿਤ੍ਤਂ ਉਪ੍ਪਜ੍ਜਿਤ੍ਥ, ਨੋ ਚ ਉਪ੍ਪਜ੍ਜਤਿ, ਉਪ੍ਪਾਦਕ੍ਖਣੇ ਤਂ ਚਿਤ੍ਤਂ ਉਪ੍ਪਜ੍ਜਿਤ੍ਥ ਚੇਵ ਉਪ੍ਪਜ੍ਜਤਿ ਚਾ’’ਤਿ ਵਿਭਜਿਤਬ੍ਬਂ ਸਿਯਾ, ਨ ਚ ਵਿਭਤ੍ਤਂ. ‘‘ਆਮਨ੍ਤਾ’’ਤਿ ਵਤ੍ਤਬ੍ਬਂ ਸਿਯਾ ਖਣਪਚ੍ਚੁਪ੍ਪਨ੍ਨੇ ਚਿਤ੍ਤੇ ਵੁਤ੍ਤਨਯੇਨ ਉਭਯਸ੍ਸਪਿ ਲਬ੍ਭਮਾਨਤ੍ਤਾ, ਨ ਚ ਵੁਤ੍ਤਂ. ਇਦਾਨਿ ਯੇਨ ਪਕਾਰੇਨ ਸਕ੍ਕਾ ਵਤ੍ਤੁਂ, ਤਂ ਦਸ੍ਸੇਤੁਂ ‘‘ਚਿਤ੍ਤਸ੍ਸ ਭਙ੍ਗਕ੍ਖਣੇ’’ਤਿਆਦਿਮਾਹ. ਪੁਗ੍ਗਲੋ ਵੁਤ੍ਤੋ, ਪੁਗ੍ਗਲਵਾਰੋ ਹੇਸੋਤਿ ਅਧਿਪ੍ਪਾਯੋ. ਤਸ੍ਸਾਤਿ ਪੁਗ੍ਗਲਸ੍ਸ. ਨ ਚ ਕਿਞ੍ਚਿ ਚਿਤ੍ਤਂ ਉਪ੍ਪਜ੍ਜਤਿ ਚਿਤ੍ਤਸ੍ਸ ਭਙ੍ਗਕ੍ਖਣਸਮਙ੍ਗਿਭਾਵਤੋ. ਤਂ ਪਨ ਚਿਤ੍ਤਂ ਉਪ੍ਪਜ੍ਜਤਿ, ਯਂ ਚਿਤ੍ਤਸਮਙ੍ਗੀ ਸੋ ਪੁਗ੍ਗਲੋਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਯਦਿ ਅਨੇਕਚਿਤ੍ਤਵਸੇਨਾਯਂ ਯਮਕਦੇਸਨਾ ਪਵਤ੍ਤਾਤਿ ਚੋਦਨਂ ਸਨ੍ਧਾਯਾਹ ‘‘ਚਿਤ੍ਤਨ੍ਤਿ ਹਿ…ਪੇ… ਤਿਟ੍ਠਤੀ’’ਤਿ. ਸਨ੍ਨਿਟ੍ਠਾਨਵਸੇਨ ਨਿਯਮੋ ਵੇਦਿਤਬ੍ਬੋ, ਅਞ੍ਞਥਾ ‘‘ਨੋ ਚ ਤੇਸਂ ਚਿਤ੍ਤਂ ਉਪ੍ਪਜ੍ਜਤੀ’’ਤਿਆਦਿਨਾ ਪਟਿਸੇਧੋ ਨ ਯੁਜ੍ਜੇਯ੍ਯਾਤਿ ਅਧਿਪ੍ਪਾਯੋ. ਤਾਦਿਸਨ੍ਤਿ ਤਥਾਰੂਪਂ, ਯਦਵਤ੍ਥੋ ਉਪ੍ਪਨ੍ਨਉਪ੍ਪਜ੍ਜਮਾਨਤਾਦਿਪਰਿਯਾਯੇਹਿ ਵਤ੍ਤਬ੍ਬੋ ਹੋਤਿ, ਤਦਵਤ੍ਥਨ੍ਤਿ ਅਤ੍ਥੋ.

੮੩-੧੧੩. ਇਮਸ੍ਸ ਪੁਗ੍ਗਲਵਾਰਤ੍ਤਾਤਿ ‘‘ਯਸ੍ਸ ਚਿਤ੍ਤਂ ਉਪ੍ਪਜ੍ਜਮਾਨ’’ਨ੍ਤਿਆਦਿਨਯਪ੍ਪਵਤ੍ਤਸ੍ਸ ਇਮਸ੍ਸ ਅਤਿਕ੍ਕਨ੍ਤਕਾਲਵਾਰਸ੍ਸ ਪੁਗ੍ਗਲਵਾਰਤ੍ਤਾ. ਪੁਗ੍ਗਲੋ ਪੁਚ੍ਛਿਤੋਤਿ ‘‘ਯਸ੍ਸ ਚਿਤ੍ਤਂ ਉਪ੍ਪਜ੍ਜਮਾਨਂ…ਪੇ… ਤਸ੍ਸ ਚਿਤ੍ਤ’’ਨ੍ਤਿ ਚਿਤ੍ਤਸਮਙ੍ਗਿਪੁਗ੍ਗਲੋ ਪੁਚ੍ਛਿਤੋਤਿ ਪੁਗ੍ਗਲਸ੍ਸੇਵ ਵਿਸ੍ਸਜ੍ਜਨੇਨ ਭਵਿਤਬ੍ਬਂ, ਇਤਰਥਾ ਅਞ੍ਞਂ ਪੁਚ੍ਛਿਤਂ ਅਞ੍ਞਂ ਵਿਸ੍ਸਜ੍ਜਿਤਂ ਸਿਯਾ. ਨ ਕੋਚਿ ਪੁਗ੍ਗਲੋ ਨ ਗਹਿਤੋ ਸਬ੍ਬਸਤ੍ਤਾਨਂ ਅਨਿਬ੍ਬਤ੍ਤਚਿਤ੍ਤਤਾਭਾਵਤੋ. ਤੇ ਚ ਪਨ ਸਬ੍ਬੇ ਪੁਗ੍ਗਲਾ. ਨਿਰੁਜ੍ਝਮਾਨਕ੍ਖਣਾਤੀਤਚਿਤ੍ਤਾਤਿ ਨਿਰੁਜ੍ਝਮਾਨਕ੍ਖਣਾ ਹੁਤ੍ਵਾ ਅਤੀਤਚਿਤ੍ਤਾ. ਤਥਾ ਦੁਤਿਯਤਤਿਯਾਤਿ ਯਥਾ ਪਠਮਪਞ੍ਹੋ ਅਨਵਸੇਸਪੁਗ੍ਗਲਵਿਸਯਤ੍ਤਾ ਪਟਿਵਚਨੇਨ ਵਿਸ੍ਸਜ੍ਜੇਤਬ੍ਬੋ ਸਿਯਾ, ਤਥਾ ਤਤੋ ਏਵ ਦੁਤਿਯਤਤਿਯਪਞ੍ਹਾ ‘‘ਆਮਨ੍ਤਾ’’ਇਚ੍ਚੇਵ ਵਿਸ੍ਸਜ੍ਜੇਤਬ੍ਬਾ ਸਿਯੁਨ੍ਤਿ ਅਤ੍ਥੋ. ਚਤੁਤ੍ਥੋ ਪਨ ਪਞ੍ਹੋ ਏਵਂ ਵਿਭਜਿਤ੍ਵਾ ਪੁਗ੍ਗਲਵਸੇਨੇਵ ਵਿਸ੍ਸਜ੍ਜੇਤਬ੍ਬੋਤਿ ਦਸ੍ਸੇਨ੍ਤੋ ‘‘ਪਚ੍ਛਿਮਚਿਤ੍ਤਸ੍ਸਾ’’ਤਿਆਦਿਂ ਵਤ੍ਵਾ ਤਥਾ ਅਵਚਨੇ ਕਾਰਣਂ ਦਸ੍ਸੇਨ੍ਤੋ ‘‘ਚਿਤ੍ਤਵਸੇਨ ਪੁਗ੍ਗਲਵਵਤ੍ਥਾਨਤੋ’’ਤਿਆਦਿਮਾਹ. ‘‘ਭਙ੍ਗਕ੍ਖਣੇ ਚਿਤ੍ਤਂ ਉਪ੍ਪਾਦਕ੍ਖਣਂ ਵੀਤਿਕ੍ਕਨ੍ਤ’’ਨ੍ਤਿ ਇਮਿਨਾ ਵਤ੍ਤਮਾਨਸ੍ਸ ਚਿਤ੍ਤਸ੍ਸ ਵਸੇਨ ਪੁਗ੍ਗਲੋ ਉਪ੍ਪਾਦਕ੍ਖਣਾਤੀਤਚਿਤ੍ਤੋ, ‘‘ਅਤੀਤਂ ਚਿਤ੍ਤਂ ਉਪ੍ਪਾਦਕ੍ਖਣਞ੍ਚ ਵੀਤਿਕ੍ਕਨ੍ਤਨ੍ਤਿ ਭਙ੍ਗਕ੍ਖਣਞ੍ਚ ਵੀਤਿਕ੍ਕਨ੍ਤ’’ਨ੍ਤਿ ਇਮਿਨਾ ਪਨ ਅਤੀਤਸ੍ਸ ਚਿਤ੍ਤਸ੍ਸ ਵਸੇਨ ਪੁਗ੍ਗਲੋ ਉਪ੍ਪਾਦਕ੍ਖਣਾਤੀਤਚਿਤ੍ਤੋ ਵੁਤ੍ਤੋ.

ਤਤ੍ਥਾਤਿ ਤੇਸੁ ਦ੍ਵੀਸੁ ਪੁਗ੍ਗਲੇਸੁ. ਪੁਰਿਮਸ੍ਸਾਤਿ ਪਠਮਂ ਵੁਤ੍ਤਸ੍ਸ ਸਨ੍ਨਿਟ੍ਠਾਨਪਦਸਙ੍ਗਹਿਤਸ੍ਸ ਚਿਤ੍ਤਂ ਨ ਭਙ੍ਗਕ੍ਖਣਂ ਵੀਤਿਕ੍ਕਨ੍ਤਂ. ‘‘ਨੋ ਚ ਭਙ੍ਗਕ੍ਖਣਂ ਵੀਤਿਕ੍ਕਨ੍ਤ’’ਨ੍ਤਿ ਹਿ ਵੁਤ੍ਤਂ. ਪਚ੍ਛਿਮਸ੍ਸ ਵੀਤਿਕ੍ਕਨ੍ਤਂ ਚਿਤ੍ਤਂ ਭਙ੍ਗਕ੍ਖਣਨ੍ਤਿ ਸਮ੍ਬਨ੍ਧੋ. ‘‘ਭਙ੍ਗਕ੍ਖਣਞ੍ਚ ਵੀਤਿਕ੍ਕਨ੍ਤ’’ਨ੍ਤਿ ਹਿ ਵੁਤ੍ਤਂ. ਏਵਮਾਦਿਕੋ ਪੁਗ੍ਗਲਵਿਭਾਗੋਤਿ ਦੁਤਿਯਪਞ੍ਹਾਦੀਸੁ ਵੁਤ੍ਤਂ ਸਨ੍ਧਾਯਾਹ. ਤਸ੍ਸ ਚਿਤ੍ਤਸ੍ਸ ਤਂਤਂਖਣਵੀਤਿਕ੍ਕਮਾਵੀਤਿਕ੍ਕਮਦਸ੍ਸਨਵਸੇਨਾਤਿ ਤਸ੍ਸ ਤਸ੍ਸ ਉਪ੍ਪਾਦਕ੍ਖਣਸ੍ਸ ਭਙ੍ਗਕ੍ਖਣਸ੍ਸ ਚ ਯਥਾਰਹਂ ਵੀਤਿਕ੍ਕਮਸ੍ਸ ਅਵੀਤਿਕ੍ਕਮਸ੍ਸ ਚ ਦਸ੍ਸਨਵਸੇਨ ਦਸ੍ਸਿਤੋ ਹੋਤਿ ਪੁਗ੍ਗਲਵਿਭਾਗੋਤਿ ਯੋਜਨਾ. ਇਧਾਤਿ ਇਮਸ੍ਮਿਂ ਅਤਿਕ੍ਕਨ੍ਤਕਾਲਵਾਰੇ. ਪੁਗ੍ਗਲਵਿਸਿਟ੍ਠਂ ਚਿਤ੍ਤਂ ਪੁਚ੍ਛਿਤਂ ‘‘ਯਸ੍ਸ ਚਿਤ੍ਤਂ ਤਸ੍ਸ ਚਿਤ੍ਤ’’ਨ੍ਤਿ ਵੁਤ੍ਤਤ੍ਤਾ. ਯਦਿਪਿ ਪੁਗ੍ਗਲਪ੍ਪਧਾਨਾ ਪੁਚ੍ਛਾ ਪੁਗ੍ਗਲਵਾਰਤ੍ਤਾ. ਅਥਾਪਿ ਚਿਤ੍ਤਪ੍ਪਧਾਨਾ ਪੁਗ੍ਗਲਂ ਵਿਸੇਸਨਭਾਵੇਨ ਗਹੇਤ੍ਵਾ ਚਿਤ੍ਤਸ੍ਸ ਵਿਸੇਸਿਤਤ੍ਤਾ. ਉਭਯਥਾਪਿ ਦੁਤਿਯਪੁਚ੍ਛਾਯ ‘‘ਆਮਨ੍ਤਾ’’ਤਿ ਵਤ੍ਤਬ੍ਬਂ ਸਿਯਾ ਅਨਵਸੇਸਪੁਗ੍ਗਲਵਿਸਯਤ੍ਤਾ. ਤਥਾ ਪਨ ਅਵਤ੍ਵਾ ‘‘ਅਤੀਤਂ ਚਿਤ੍ਤ’’ਨ੍ਤਿ ਵੁਤ੍ਤਂ, ਕਸ੍ਮਾ ਨਿਰੋਧਕ੍ਖਣ…ਪੇ… ਦਸ੍ਸਨਤ੍ਥਨ੍ਤਿ ਦਟ੍ਠਬ੍ਬਨ੍ਤਿ ਯੋਜਨਾ. ਏਸ ਨਯੋ ‘‘ਨ ਨਿਰੁਜ੍ਝਮਾਨ’’ਨ੍ਤਿ ਏਤ੍ਥਾਪੀਤਿ ਨਿਰੁਜ੍ਝਮਾਨਂ ਖਣਂ ਨਿਰੋਧਕ੍ਖਣਂ ਖਣਂ ਵੀਤਿਕ੍ਕਨ੍ਤਕਾਲਂ ਕਿਂ ਤਸ੍ਸ ਚਿਤ੍ਤਂ ਨ ਹੋਤੀਤਿ ਅਤ੍ਥੋ.

੧੧੪-੧੧੬. ਸਰਾਗਪਚ੍ਛਿਮਚਿਤ੍ਤਸ੍ਸਾਤਿ ਸਰਾਗਚਿਤ੍ਤੇਸੁ ਪਚ੍ਛਿਮਸ੍ਸ ਚਿਤ੍ਤਸ੍ਸ, ਏਕਸ੍ਸ ਪੁਗ੍ਗਲਸ੍ਸ ਰਾਗਸਮ੍ਪਯੁਤ੍ਤਚਿਤ੍ਤੇਸੁ ਯਂ ਸਬ੍ਬਪਚ੍ਛਿਮਂ ਚਿਤ੍ਤਂ, ਤਸ੍ਸ. ਸੋ ਪਨ ਪੁਗ੍ਗਲੋ ਅਨਾਗਾਮੀ ਵੇਦਿਤਬ੍ਬੋ. ਨ ਨਿਰੁਜ੍ਝਤਿ ਨਿਰੋਧਾਸਮਙ੍ਗਿਤਾਯ. ਨਿਰੁਜ੍ਝਿਸ੍ਸਤਿ ਇਦਾਨਿ ਨਿਰੋਧਂ ਪਾਪੁਣਿਸ੍ਸਤਿ. ਅਪ੍ਪਟਿਸਨ੍ਧਿਕਤ੍ਤਾ ਪਨ ਤਤੋ ਅਞ੍ਞਂ ਨੁਪ੍ਪਜ੍ਜਿਸ੍ਸਤਿ. ਇਤਰੇਸਨ੍ਤਿ ਯਥਾਵੁਤ੍ਤਸਰਾਗਪਚ੍ਛਿਮਚਿਤ੍ਤਸਮਙ੍ਗਿਂ ਵੀਤਰਾਗਚਿਤ੍ਤਸਮਙ੍ਗਿਞ੍ਚ ਠਪੇਤ੍ਵਾ ਅਵਸੇਸਾਨਂ ਇਤਰਸੇਕ੍ਖਾਨਞ੍ਚੇਵ ਪੁਥੁਜ੍ਜਨਾਨਞ੍ਚ.

ਨਿਦ੍ਦੇਸਵਾਰਵਣ੍ਣਨਾ ਨਿਟ੍ਠਿਤਾ.

ਚਿਤ੍ਤਯਮਕਵਣ੍ਣਨਾ ਨਿਟ੍ਠਿਤਾ.