੫. ਪਹੀਨਵਾਰਵਣ੍ਣਨਾ

੨੬੪-੨੭੪. ਫਲਟ੍ਠਵਸੇਨੇਵ ਦੇਸਨਾ ਆਰਦ੍ਧਾ, ਨ ਮਗ੍ਗਟ੍ਠਵਸੇਨ, ਕੁਤੋ ਪੁਥੁਜ੍ਜਨਵਸੇਨ. ਕਸ੍ਮਾ? ਫਲਕ੍ਖਣੇ ਹਿ ਅਨੁਸਯਾ ਪਹੀਨਾਤਿ ਵੁਚ੍ਚਨ੍ਤਿ, ਮਗ੍ਗਕ੍ਖਣੇ ਪਨ ਪਹੀਯਨ੍ਤੀਤਿ. ਤੇਨੇਵਾਹ ‘‘ਮਗ੍ਗਸਮਙ੍ਗੀਨਂ ਅਗ੍ਗਹਿਤਤਂ ਦੀਪੇਤੀ’’ਤਿ. ਪਟਿਲੋਮੇ ਹਿ ਪੁਥੁਜ੍ਜਨਵਸੇਨਪਿ ਦੇਸਨਾ ਗਹਿਤਾ ‘‘ਯਸ੍ਸ ਦਿਟ੍ਠਾਨੁਸਯੋ ਅਪ੍ਪਹੀਨੋ, ਤਸ੍ਸ ਵਿਚਿਕਿਚ੍ਛਾਨੁਸਯੋ ਅਪ੍ਪਹੀਨੋਤਿ? ਆਮਨ੍ਤਾ’’ਤਿਆਦਿਨਾ. ਅਨੁਸਯਚ੍ਚਨ੍ਤਪਟਿਪਕ੍ਖੇਕਚਿਤ੍ਤਕ੍ਖਣਿਕਾਨਨ੍ਤਿ ਅਨੁਸਯਾਨਂ ਅਚ੍ਚਨ੍ਤਂ ਪਟਿਪਕ੍ਖਭੂਤਏਕਚਿਤ੍ਤਕ੍ਖਣਿਕਾਨਂ. ਮਗ੍ਗਸਮਙ੍ਗੀਨਨ੍ਤਿ ਮਗ੍ਗਟ੍ਠਾਨਂ. ਏਤ੍ਥ ਚ ਅਨੁਸਯਾਨਂ ਅਚ੍ਚਨ੍ਤਪਟਿਪਕ੍ਖਤਾਗ੍ਗਹਣੇਨ ਉਪ੍ਪਤ੍ਤਿਰਹਤਂ ਪਟਿਕ੍ਖਿਪਤਿ. ਨ ਹਿ ਤੇ ਅਚ੍ਚਨ੍ਤਪਟਿਪਕ੍ਖਸਮੁਪ੍ਪਤ੍ਤਿਤੋ ਪਰਤੋ ਉਪ੍ਪਤ੍ਤਿਰਹਾ ਹੋਨ੍ਤਿ. ਮਗ੍ਗਸਮਙ੍ਗਿਤਾਗ੍ਗਹਣੇਨ ਅਨੁਪ੍ਪਤ੍ਤਿਰਹਤਾਪਾਦਿਤਤਂ ਪਟਿਕ੍ਖਿਪਤਿ. ਨ ਹਿ ਮਗ੍ਗਕ੍ਖਣੇ ਤੇ ਅਨੁਪ੍ਪਤ੍ਤਿਰਹਤਂ ਆਪਾਦਿਤਾ ਨਾਮ ਹੋਨ੍ਤਿ, ਅਥ ਖੋ ਆਪਾਦੀਯਨ੍ਤੀਤਿ. ਏਕਚਿਤ੍ਤਕ੍ਖਣਿਕਤਾਗ੍ਗਹਣੇਨ ਸਨ੍ਤਾਨਬ੍ਯਾਪਾਰਂ. ਤੇਨਾਹ ‘‘ਨ ਕੋਚੀ’’ਤਿਆਦਿ. ਤਤ੍ਥ ਤੇਤਿ ਮਗ੍ਗਸਮਙ੍ਗਿਨੋ. ਨ ਕੇਵਲਂ ਪਹੀਨਵਾਰੇਯੇਵ, ਅਥ ਖੋ ਅਞ੍ਞੇਸੁਪੀਤਿ ਦਸ੍ਸੇਨ੍ਤੋ ‘‘ਅਨੁਸਯ…ਪੇ… ਗਹਿਤਾ’’ਤਿ ਆਹ.

੨੭੫-੨੯੬. ਯਤ੍ਥ ਅਨੁਸਯੋ ਉਪ੍ਪਤ੍ਤਿਰਹੋ, ਤਤ੍ਥੇਵਸ੍ਸ ਅਨੁਪ੍ਪਤ੍ਤਿਰਹਤਾਪਾਦਨਨ੍ਤਿ ‘‘ਅਤ੍ਤਨੋ ਅਤ੍ਤਨੋ ਓਕਾਸੇ ਏਵ ਅਨੁਪ੍ਪਤ੍ਤਿਧਮ੍ਮਤਂ ਆਪਾਦਿਤੋ’’ਤਿ ਆਹ. ਤਥਾ ਹਿ ਵੁਤ੍ਤਂ ‘‘ਚਕ੍ਖੁਂ ਲੋਕੇ ਪਿਯਰੂਪਂ ਸਾਤਰੂਪਂ, ਏਤ੍ਥੇਸਾ ਤਣ੍ਹਾ ਉਪ੍ਪਜ੍ਜਮਾਨਾ ਉਪ੍ਪਜ੍ਜਤਿ, ਏਤ੍ਥ ਨਿਵਿਸਮਾਨਾ ਨਿਵਿਸਤੀ’’ਤਿ (ਵਿਭ. ੨੦੩) ਵਤ੍ਵਾ ਪੁਨ ਵੁਤ੍ਤਂ ‘‘ਚਕ੍ਖੁਂ ਲੋਕੇ ਪਿਯਰੂਪਂ ਸਾਤਰੂਪਂ, ਏਤ੍ਥੇਸਾ ਤਣ੍ਹਾ ਪਹੀਯਮਾਨਾ ਪਹੀਯਤਿ, ਏਤ੍ਥ ਨਿਰੁਜ੍ਝਮਾਨਾ ਨਿਰੁਜ੍ਝਤੀ’’ਤਿ (ਵਿਭ. ੨੦੪). ਤਸ੍ਮਾਤਿ ਯਸ੍ਮਾ ਤਦੋਕਾਸਤ੍ਤਮੇਵ ਕਾਮਧਾਤੁਆਦਿਓਕਾਸਤ੍ਤਮੇਵ ਅਨੁਸਯਾਨਂ ਦੀਪੇਨ੍ਤਿ ਪਹੀਨਾਪ੍ਪਹੀਨਵਚਨਾਨਿ, ਤਸ੍ਮਾ. ਅਨੋਕਾਸੇ ਤਦੁਭਯਾਵਤ੍ਤਬ੍ਬਤਾ ਵੁਤ੍ਤਾਤਿ ਯਸ੍ਮਾ ਕਾਮਰਾਗਪਟਿਘਾਨੁਸਯਾਨਂ ਦ੍ਵਿਨ੍ਨਂ ਉਪ੍ਪਤ੍ਤਿਟ੍ਠਾਨਂ, ਸੋ ਏਵ ਪਹਾਨੋਕਾਸੋਤਿ ਸ੍ਵਾਯਂ ਤੇਸਂ ਅਞ੍ਞਮਞ੍ਞਂ ਅਨੋਕਾਸੋ, ਤਸ੍ਮਿਂ ਅਨੋਕਾਸੇ ਤਦੁਭਯਸ੍ਸ ਪਹਾਨਾਪ੍ਪਹਾਨਸ੍ਸ ਨਵਤ੍ਤਬ੍ਬਤਾ ਵੁਤ੍ਤਾ. ਕਾਮਰਾਗਾਨੁਸਯੋਕਾਸੇ ਹਿ ਪਟਿਘਾਨੁਸਯਸ੍ਸ ਅਪ੍ਪਹੀਨਤ੍ਤਾ ਸੋ ‘‘ਤਤ੍ਥ ਪਹੀਨੋ’’ਤਿ ਨ ਵਤ੍ਤਬ੍ਬੋ, ਅਟ੍ਠਿਤਤ੍ਤਾ ਪਨ ‘‘ਤਤ੍ਥ ਅਪ੍ਪਹੀਨੋ’’ਤਿ ਚ, ਤਸ੍ਮਾ ਅਨੋਕਾਸੇ ਤਦੁਭਯਾਵਤ੍ਤਬ੍ਬਤਾ ਵੁਤ੍ਤਾਤਿ. ਤੇਨ ਸਦ੍ਧਿਂ ਸਮਾਨੋਕਾਸੇਤਿ ਤੇਨ ਕਾਮਰਾਗੇਨ ਸਦ੍ਧਿਂ ਸਮਾਨੋਕਾਸੇ. ‘‘ਸਾਧਾਰਣਟ੍ਠਾਨੇ’’ਤਿ ਵੁਤ੍ਤੇ ਕਾਮਧਾਤੁਯਂ ਸੁਖੁਪੇਕ੍ਖਾਸੁ ਪਹੀਨੋ ਨਾਮ ਹੋਤਿ, ਨ ਸਮਾਨਕਾਲੇ ਪਹੀਨੋ ਤਤਿਯਚਤੁਤ੍ਥਮਗ੍ਗਵਜ੍ਝਤ੍ਤਾ ਕਾਮਰਾਗਮਾਨਾਨੁਸਯਾਨਂ.

ਪਹੀਨਵਾਰਵਣ੍ਣਨਾ ਨਿਟ੍ਠਿਤਾ.