੨. ਸਾਨੁਸਯਵਾਰਵਣ੍ਣਨਾ

੬੬-੧੩੧. ‘‘ਸਾਨੁਸਯੋ, ਪਜਹਤਿ, ਪਰਿਜਾਨਾਤੀ’’ਤਿ ਪੁਗ੍ਗਲੋ ਵੁਤ੍ਤੋਤਿ ‘‘ਕਾਮਰਾਗੇਨ ਸਾਨੁਸਯੋ, ਕਾਮਰਾਗਂ ਪਜਹਤਿ, ਕਾਮਰਾਗਂ ਪਰਿਜਾਨਾਤੀ’’ਤਿਆਦੀਸੁ ਅਨੁਸਯਸਮਙ੍ਗਿਭਾਵੇਨ ਪਹਾਨਪਰਿਞ੍ਞਾਕਿਰਿਯਾਯ ਕਤ੍ਤੁਭਾਵੇਨ ਚ ਪੁਗ੍ਗਲੋ ਵੁਤ੍ਤੋ, ਨ ਧਮ੍ਮੋ. ਭਵਵਿਸੇਸੇਨ ਵਾਤਿ ਕੇਵਲੇਨ ਭਵਵਿਸੇਸੇਨ ਵਾ. ਇਤਰੇਸੂਤਿ ਪਟਿਘਾਨੁਸਯਾਦੀਸੁ. ਭਵਾਨੁਸਯਵਿਸੇਸੇਨ ਵਾਤਿ ਕਾਮਭਵਾਦਿਭਵਵਿਸਿਟ੍ਠਾਨੁਸਯਵਿਸੇਸੇਨ ਵਾ. ਸਾਨੁਸਯਤਾਨਿਰਨੁਸਯਤਾਦਿਕਾਤਿ ਏਤ੍ਥ ਆਦਿ-ਸਦ੍ਦੇਨ ਪਹਾਨਾਪਹਾਨਪਰਿਞ੍ਞਾਪਰਿਞ੍ਞਾ ਸਙ੍ਗਯ੍ਹਨ੍ਤਿ. ਨਨੁ ਚ ਭਵਵਿਸੇਸੇ ਕੇਸਞ੍ਚਿ ਅਨੁਸਯਾਨਂ ਅਪ੍ਪਹਾਨਨ੍ਤਿ? ਨ ਤਂ ਅਨੁਸਯਕਤਂ, ਅਥ ਖੋ ਪਚ੍ਚਯਵੇਕਲ੍ਲਤੋ ਅਨੋਕਾਸਤਾਯ ਚਾਤਿ ਨਾਯਂ ਵਿਰੋਧੋ. ਦ੍ਵੀਸੁ ਵੇਦਨਾਸੂਤਿ ਸੁਖਉਪੇਕ੍ਖਾਸੁ ਵੇਦਨਾਸੁ ਦੁਕ੍ਖਾਯ ਵੇਦਨਾਯ ਕਾਮਰਾਗਾਨੁਸਯੇਨ ਨਿਰਨੁਸਯੋਤਿ ਯੋਜੇਤਬ੍ਬਂ. ਇਦਮ੍ਪਿ ਨਤ੍ਥਿ ਪੁਗ੍ਗਲਵਸੇਨ ਵੁਚ੍ਚਮਾਨਤ੍ਤਾ. ਤੇਨਾਹ ‘‘ਨ ਹਿ ਪੁਗ੍ਗਲਸ੍ਸ…ਪੇ… ਅਨੁਸਯਾਨ’’ਨ੍ਤਿ. ਯਦਿਪਿ ਪੁਗ੍ਗਲਸ੍ਸ ਅਨੁਸਯਨੋਕਾਸੋ ਅਨੋਕਾਸੋ, ਤਸ੍ਸ ਪਨ ਸਾਨੁਸਯਤਾਦਿਹੇਤੁ ਹੋਤੀਤਿ ਦਸ੍ਸੇਨ੍ਤੋ ‘‘ਅਨੁਸਯਸ੍ਸ ਪਨਾ’’ਤਿਆਦਿਮਾਹ. ਨਿਰਨੁਸਯਤਾਦੀਨਨ੍ਤਿ ਆਦਿ-ਸਦ੍ਦੇਨ ਅਪ੍ਪਹਾਨਾਪਰਿਞ੍ਞਾ ਸਙ੍ਗਣ੍ਹਾਤਿ. ਪਰਿਜਾਨਨਂ ਸਮਤਿਕ੍ਕਮਨਨ੍ਤਿ ਪਰਿਞ੍ਞਾਵਾਰੇਪਿ ‘‘ਅਪਾਦਾਨੇ ਨਿਸ੍ਸਕ੍ਕਵਚਨ’’ਨ੍ਤਿ ਵੁਤ੍ਤਂ.

ਅਨੁਸਯਨਟ੍ਠਾਨਤੋਤਿ ਅਨੁਸਯਨਟ੍ਠਾਨਹੇਤੁ. ‘‘ਅਨਨੁਸਯਨਟ੍ਠਾਨਤੋ’’ਤਿ ਏਤ੍ਥਾਪਿ ਏਸੇਵ ਨਯੋ. ਨਿਮਿਤ੍ਤਾਪਾਦਾਨਭਾਵਦਸ੍ਸਨਤ੍ਥਨ੍ਤਿ ਸਾਨੁਸਯਵਾਰੇ ਨਿਮਿਤ੍ਤਭਾਵਦਸ੍ਸਨਤ੍ਥਂ, ਪਜਹਨਪਰਿਞ੍ਞਾਵਾਰੇਸੁ ਅਪਾਦਾਨਭਾਵਦਸ੍ਸਨਤ੍ਥਞ੍ਚਾਤਿ ਯੋਜੇਤਬ੍ਬਂ. ਪਜਹਤੀਤਿ ਏਤ੍ਥ ‘‘ਰੂਪਧਾਤੁਯਾ ਅਰੂਪਧਾਤੁਯਾ ਤਤੋ ਮਾਨਾਨੁਸਯਂ ਪਜਹਤੀ’’ਤਿ ਪਾਲ਼ਿਪਦਂ ਆਹਰਿਤ੍ਵਾ ਯੋਜੇਤਬ੍ਬਂ, ਨ ਪਜਹਤੀਤਿ ਏਤ੍ਥ ਪਨ ‘‘ਦੁਕ੍ਖਾਯ ਵੇਦਨਾਯ ਤਤੋ ਕਾਮਰਾਗਾਨੁਸਯਂ ਨਪ੍ਪਜਹਤੀ’’ਤਿ. ਏਵਮਾਦੀਸੂਤਿ ਆਦਿ-ਸਦ੍ਦੇਨ ਪਰਿਞ੍ਞਾਵਾਰਮ੍ਪਿ ਸਙ੍ਗਣ੍ਹਾਤਿ. ਭੁਮ੍ਮਨਿਦ੍ਦੇਸੇਨੇਵ ਹੇਤੁਅਤ੍ਥੇਨੇਵ ਨਿਦ੍ਦਿਟ੍ਠਾਤਿ ਅਤ੍ਥੋ.

ਚਤੁਤ੍ਥਪਞ੍ਹਵਿਸ੍ਸਜ੍ਜਨੇਨਾਤਿ ‘‘ਯਤੋ ਵਾ ਪਨ ਮਾਨਾਨੁਸਯੇਨ ਸਾਨੁਸਯੋ, ਤਤੋ ਕਾਮਰਾਗਾਨੁਸਯੇਨ ਸਾਨੁਸਯੋ’’ਤਿ ਏਤਸ੍ਸ ਪਞ੍ਹਸ੍ਸ ਵਿਸ੍ਸਜ੍ਜਨੇਨ. ਤਤ੍ਥ ਹਿ ‘‘ਰੂਪਧਾਤੁਯਾ ਅਰੂਪਧਾਤੁਯਾ’’ਤਿਆਦਿਨਾ ਸਰੂਪਤੋ ਅਨੁਸਯਨਟ੍ਠਾਨਾਨਿ ਦਸ੍ਸਿਤਾਨਿ. ਤਦਤ੍ਥੇਤਿ ਤਂ ਅਨੁਸਯਨਟ੍ਠਾਨਦਸ੍ਸਨਂ ਅਤ੍ਥੋ ਏਤਸ੍ਸਾਤਿ ਤਦਤ੍ਥੋ, ਤਸ੍ਮਿਂ ਤਦਤ੍ਥੇ. ‘‘ਅਨੁਸਯਸ੍ਸ ਉਪ੍ਪਤ੍ਤਿਟ੍ਠਾਨਦਸ੍ਸਨਤ੍ਥਂ ਅਯਂ ਵਾਰੋ ਆਰਦ੍ਧੋ’’ਤਿਆਦਿਨਾ ‘‘ਯਤੋ’’ਤਿ ਏਤੇਨ ਅਨੁਸਯਨਟ੍ਠਾਨਂ ਵੁਤ੍ਤਨ੍ਤਿ ਇਮਮਤ੍ਥਂ ਵਿਭਾਵੇਤ੍ਵਾ. ਪਮਾਦਲਿਖਿਤਂ ਵਿਯ ਦਿਸ੍ਸਤਿ ਉਪ੍ਪਨ੍ਨ-ਸਦ੍ਦੇਨ ਵਤ੍ਤਮਾਨੁਪ੍ਪਨ੍ਨੇ ਵੁਚ੍ਚਮਾਨੇ. ਯਥਾ ਪਨ ਉਪ੍ਪਜ੍ਜਨਵਾਰੇ ਉਪ੍ਪਜ੍ਜਤਿ-ਸਦ੍ਦੇਨ ਉਪ੍ਪਤ੍ਤਿਯੋਗਦੀਪਕਤ੍ਤਾ ਉਪ੍ਪਤ੍ਤਿਰਹਾ ਵੁਚ੍ਚਨ੍ਤਿ, ਏਵਮਿਧਾਪਿ ਉਪ੍ਪਤ੍ਤਿਅਰਹੇ ਵੁਚ੍ਚਮਾਨੇ ਨ ਕੋਚਿ ਵਿਰੋਧੋ. ਯਂ ਪਨ ਵਕ੍ਖਤਿ ‘‘ਨ ਹਿ ਅਪਰਿਯਾਪਨ੍ਨਾਨਂ ਅਨੁਸਯੁਪ੍ਪਤ੍ਤਿਰਹਟ੍ਠਾਨਤਾ’’ਤਿ, ਸੋਪਿ ਨ ਦੋਸੋ. ਯਤ੍ਥ ਯਤ੍ਥ ਹਿ ਅਨੁਸਯਾ ਉਪ੍ਪਤ੍ਤਿਰਹਾ, ਤਦੇਵ ਏਕਜ੍ਝਂ ਗਹੇਤ੍ਵਾ ‘‘ਸਬ੍ਬਤ੍ਥਾ’’ਤਿ ਵੁਤ੍ਤਨ੍ਤਿ. ਤਥੇਵ ਦਿਸ੍ਸਤੀਤਿ ਤਂ ਪਮਾਦਲਿਖਿਤਂ ਵਿਯ ਦਿਸ੍ਸਤੀਤਿ ਅਤ੍ਥੋ.

ਯਤੋ ਉਪ੍ਪਨ੍ਨੇਨ ਭਵਿਤਬ੍ਬਨ੍ਤਿ ਯਤੋ ਅਨੁਸਯਨਟ੍ਠਾਨਤੋ ਕਾਮਗਾਰਾਨੁਸਯੇਨ ਉਪ੍ਪਨ੍ਨੇਨ ਭਵਿਤਬ੍ਬਂ, ਤੇਨ ਕਾਮਰਾਗਾਨੁਸਯੇਨ ਉਪ੍ਪਤ੍ਤਿਰਹਟ੍ਠਾਨੇ ਨਿਸ੍ਸਕ੍ਕਵਚਨਂ ਕਤਂ ‘‘ਯਤੋ’’ਤਿ. ਤਥਾਤਿ ਏਤ੍ਥ ਤਥਾ-ਸਦ੍ਦੋ ਯਥਾ ‘‘ਯਤੋ ਉਪ੍ਪਨ੍ਨੇਨਾ’’ਤਿ ਏਤ੍ਥ ਉਪ੍ਪਤ੍ਤਿਰਹਟ੍ਠਾਨਤੋ ਅਨੁਸਯਸ੍ਸ ਉਪ੍ਪਤ੍ਤਿਰਹਤਾ ਵੁਤ੍ਤਾ, ਤਥਾ ‘‘ਉਪ੍ਪਜ੍ਜਨਕੇਨਾ’’ਤਿ ਏਤ੍ਥਾਪਿ ਸਾ ਏਵ ਵੁਚ੍ਚਤੀਤਿ ਦੀਪੇਤੀਤਿ ਆਹ ‘‘ਸਬ੍ਬਧਮ੍ਮੇਸੁ…ਪੇ… ਆਪਨ੍ਨੇਨਾ’’ਤਿ. ਤਤ੍ਥ ‘‘ਉਪ੍ਪਜ੍ਜਨਕੋ’’ਤਿ ਵੁਤ੍ਤੇ ਅਨੁਪ੍ਪਜ੍ਜਨਕੋ ਨ ਹੋਤੀਤਿ ਅਯਮਤ੍ਥੋ ਵਿਞ੍ਞਾਯਤਿ, ਤਥਾ ਚ ਸਤਿ ਤੇਨ ਅਨੁਪ੍ਪਤ੍ਤਿ ਨਿਚ੍ਛਿਤਾਤਿ ਉਪ੍ਪਨ੍ਨਸਭਾਵਤਾ ਚ ਪਕਾਸਿਤਾ ਹੋਤੀਤਿ. ਤੇਨਾਹ ‘‘ਸਬ੍ਬਧਮ੍ਮੇਸੁ…ਪੇ… ਅਪਨੇਤੀ’’ਤਿ. ‘‘ਯੋ ਯਤੋ ਕਾਮਰਾਗਾਨੁਸਯੇਨ ਨਿਰਨੁਸਯੋ, ਸੋ ਤਤੋ ਮਾਨਾਨੁਸਯੇਨ ਨਿਰਨੁਸਯੋ’’ਤਿ ਪੁਚ੍ਛਾਯ ‘‘ਯਤੋ ਤਤੋ’’ਤਿ ਆਗਤਤ੍ਤਾ ਵਿਸ੍ਸਜ੍ਜਨੇ ‘‘ਸਬ੍ਬਤ੍ਥਾ’’ਤਿ ਪਦਸ੍ਸ ਨਿਸ੍ਸਕ੍ਕਵਸੇਨੇਵ ਸਕ੍ਕਾ ਯੋਜੇਤੁਨ੍ਤਿ ਦਸ੍ਸੇਨ੍ਤੋ ‘‘ਸਬ੍ਬਤ੍ਥਾਤਿ…ਪੇ… ਨ ਨ ਸਮ੍ਭਵਤੀ’’ਤਿ ਆਹ. ਭੁਮ੍ਮਤੋ ਅਞ੍ਞਤ੍ਥਾਪਿ ਸਦ੍ਦਵਿਦੂ ਇਚ੍ਛਨ੍ਤਿ, ਯਤੋ ਸਬ੍ਬੇਸਂ ਪਾਦਕਂ ‘‘ਸਬ੍ਬਤ੍ਥਪਾਦਕ’’ਨ੍ਤਿ ਵੁਚ੍ਚਤਿ, ਇਧ ਪਨ ਨਿਸ੍ਸਕ੍ਕਵਸੇਨ ਵੇਦਿਤਬ੍ਬਂ.

ਸਾਨੁਸਯਵਾਰਵਣ੍ਣਨਾ ਨਿਟ੍ਠਿਤਾ.