੨. ਪਵਤ੍ਤਿਵਾਰਵਣ੍ਣਨਾ

੧੯. ਸਙ੍ਖਾਰਾਨਂ ਪੁਗ੍ਗਲਾਨਞ੍ਚ ਓਕਾਸਤ੍ਤਾਤਿ ਸਮ੍ਪਯੁਤ੍ਤਾਨਂ ਨਿਸ੍ਸਯਪਚ੍ਚਯਤਾਯ, ਸਙ੍ਖਾਰਾਨਂ ਸਮਾਪਜ੍ਜਿਤਬ੍ਬਤਾਯ ਪੁਗ੍ਗਲਾਨਂ ਝਾਨਸ੍ਸ ਓਕਾਸਤਾ ਵੇਦਿਤਬ੍ਬਾ, ਭੂਮਿ ਪਨ ਯਦਗ੍ਗੇਨ ਪੁਗ੍ਗਲਾਨਂ ਓਕਾਸੋ, ਤਦਗ੍ਗੇਨ ਸਙ੍ਖਾਰਾਨਮ੍ਪਿ ਓਕਾਸੋ. ‘‘ਦੁਤਿਯੇ ਝਾਨੇ ਤਤਿਯੇ ਝਾਨੇ’’ਤਿਆਦਿਨਾ ਝਾਨਂ, ‘‘ਕਾਮਾਵਚਰੇ ਰੂਪਾਵਚਰੇ’’ਤਿਆਦਿਨਾ ਭੂਮਿ ਚ ਵਿਸੁਂ ਓਕਾਸਭਾਵੇਨ ਗਹਿਤਾ. ਇਤੀਤਿ ਹੇਤੁਅਤ੍ਥੋ, ਯਸ੍ਮਾ ਝਾਨਮ੍ਪਿ ਓਕਾਸਭਾਵੇਨ ਗਹਿਤਂ, ਤਸ੍ਮਾਤਿ ਅਤ੍ਥੋ. ਪੁਗ੍ਗਲਵਾਰੇ ਚ ਓਕਾਸਵਸੇਨ ਪੁਗ੍ਗਲਗ੍ਗਹਣੇਤਿ ਪੁਗ੍ਗਲਵਾਰੇ ਚ ਯਦਾ ਪੁਗ੍ਗਲੋਕਾਸਸਙ੍ਖਾਰਾਦੀਨਂ ਓਕਾਸਭਾਵੇਨ ਗਯ੍ਹਤਿ, ਤਦਾ ਤੇਸਂ ਦ੍ਵਿਨ੍ਨਂ ਓਕਾਸਾਨਂ ਵਸੇਨ ਗਯ੍ਹਨਂ ਹੋਤੀਤਿ ਯਤ੍ਥ ਸੋ ਪੁਗ੍ਗਲੋ, ਯਞ੍ਚ ਤਸ੍ਮਿਂ ਪੁਗ੍ਗਲੇ ਝਾਨਂ ਉਪਲਬ੍ਭਤਿ, ਤੇਸਂ ਦ੍ਵਿਨ੍ਨਂ ਭੂਮਿਝਾਨਸਙ੍ਖਾਤਾਨਂ ਓਕਾਸਾਨਂ ਵਸੇਨ ਯਥਾਰਹਂ ਕਾਯਸਙ੍ਖਾਰਾਦੀਨਂ ਗਹਣਂ ਕਥਨਂ ਹੋਤੀਤਿ. ਤਸ੍ਮਾਤਿ ਯਸ੍ਮਾ ਏਤਦੇਵ, ਤਸ੍ਮਾ. ਦੁਤਿਯਤਤਿਯਜ੍ਝਾਨੋਕਾਸਵਸੇਨਾਤਿ ਦੁਤਿਯਤਤਿਯਜ੍ਝਾਨਸਙ੍ਖਾਤਓਕਾਸਵਸੇਨ ਗਹਿਤਾ. ਕਥਂ? ‘‘ਵਿਨਾ ਵਿਤਕ੍ਕਵਿਚਾਰੇਹਿ ਅਸ੍ਸਾਸਪਸ੍ਸਾਸਾਨਂ ਉਪ੍ਪਾਦਕ੍ਖਣੇ’’ਤਿ ਏਵਂ ਗਹਿਤਾ ਪੁਗ੍ਗਲਾ ਵਿਸੇਸੇਤ੍ਵਾ ਦਸ੍ਸਿਤਾ. ਕੇਨ? ਤੇਨੇਵ ਵਿਤਕ੍ਕਵਿਚਾਰਰਹਿਤਅਸ੍ਸਾਸਪਸ੍ਸਾਸੁਪ੍ਪਾਦਕ੍ਖਣੇਨਾਤਿ ਯੋਜੇਤਬ੍ਬਂ.

ਪਠਮਕੋਟ੍ਠਾਸੇ ਝਾਨੋਕਾਸਵਸੇਨ ਪੁਗ੍ਗਲਦਸ੍ਸਨਂ ਕਤਨ੍ਤਿ ਵੁਤ੍ਤਂ ‘‘ਪੁਨ…ਪੇ… ਦਸ੍ਸੇਤੀ’’ਤਿ. ਭੂਮਿਓਕਾਸਵਸੇਨ ਪੁਗ੍ਗਲਂ ਦਸ੍ਸੇਤੀਤਿ ਸਮ੍ਬਨ੍ਧੋ. ਦ੍ਵਿਪ੍ਪਕਾਰਾਨਨ੍ਤਿ ਝਾਨਭੂਮਿਓਕਾਸਭੇਦੇਨ ਦੁਵਿਧਾਨਂ. ਤੇਸਨ੍ਤਿ ਪੁਗ੍ਗਲਾਨਂ. ‘‘ਪਠਮਂ ਝਾਨਂ ਸਮਾਪਨ੍ਨਾਨਂ ਕਾਮਾਵਚਰਾਨ’’ਨ੍ਤਿ ਚ ਇਦਂ ਨਿਵਤ੍ਤੇਤਬ੍ਬਗਹੇਤਬ੍ਬਸਾਧਾਰਣਵਚਨਂ, ਤਸ੍ਸ ਚ ਅਵਚ੍ਛੇਦਕਂ ‘‘ਅਸ੍ਸਾਸਪਸ੍ਸਾਸਾਨਂ ਉਪ੍ਪਾਦਕ੍ਖਣੇ’’ਤਿ ਇਦਨ੍ਤਿ ਵੁਤ੍ਤਂ ‘‘ਵਿਸੇਸ…ਪੇ… ਖਣੇ’’ਤਿ. ਤੇਨ ਵਿਸੇਸਨੇਨ. ਕਾਮਾਵਚਰਾਨਮ੍ਪੀਤਿ ਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਨ ਕੇਵਲਂ ਰੂਪਾਰੂਪਾਵਚਰੇਸੁ ਪਠਮਜ੍ਝਾਨਂ ਸਮਾਪਨ੍ਨਾਨਂ, ਅਥ ਖੋ ਕਾਮਾਵਚਰਾਨਮ੍ਪੀਤਿ ਵੁਤ੍ਤਮੇਵਤ੍ਥਂ ਸਮ੍ਪਿਣ੍ਡੇਤਿ. ਕੀਦਿਸਾਨਂ ਕਾਮਾਵਚਰਾਨਨ੍ਤਿ ਆਹ ‘‘ਗਬ੍ਭਗਤਾਦੀਨ’’ਨ੍ਤਿ. ਆਦਿ-ਸਦ੍ਦੇਨ ਉਦਕਨਿਮੁਗ੍ਗਵਿਸਞ੍ਞਿਭੂਤਾ ਸਙ੍ਗਹਿਤਾ, ਨ ਮਤਚਤੁਤ੍ਥਜ੍ਝਾਨਸਮਾਪਨ੍ਨਨਿਰੋਧਸਮਾਪਨ੍ਨਾ. ਤੇ ਹਿ ਅਕਾਮਾਵਚਰਤਾਯ ਵਿਯ ਰੂਪਾਰੂਪਭਵਸਮਙ੍ਗਿਨੋ ਵਿਤਕ੍ਕਵਿਚਾਰੁਪ੍ਪਤ੍ਤਿਯਾਵ ਨਿਵਤ੍ਤਿਤਾ. ਏਕਨ੍ਤਿਕਤ੍ਤਾਤਿ ਅਸ੍ਸਾਸਪਸ੍ਸਾਸਾਭਾਵਸ੍ਸ ਏਕਨ੍ਤਿਕਤ੍ਤਾ. ਨਿਦਸ੍ਸਿਤਾਤਿ ਰੂਪਾਰੂਪਾਵਚਰਾ ਨਿਦਸ੍ਸਨਭਾਵੇਨ ਵੁਤ੍ਤਾ, ਨ ਤਬ੍ਬਿਰਹਿਤਾਨਂ ਅਞ੍ਞੇਸਂ ਅਭਾਵਤੋਤਿ ਅਧਿਪ੍ਪਾਯੋ. ਪਠਮਜ੍ਝਾਨੋਕਾਸਾ ਅਸ੍ਸਾਸਪਸ੍ਸਾਸਵਿਰਹਵਿਸਿਟ੍ਠਾਤਿ ਯੋਜਨਾ. ਪਠਮਞ੍ਚੇਤ੍ਥ ਪਠਮਜ੍ਝਾਨਸਮਙ੍ਗੀਨਂ ਰੂਪਾਰੂਪਾਵਚਰਾਨਂ ਗਹਣਂ, ਦੁਤਿਯਂ ਯਥਾਵੁਤ੍ਤਗਬ੍ਭਗਤਾਦੀਨਂ. ਇਮਿਨਾ ਨਯੇਨਾਤਿ ਯ੍ਵਾਯਂ ‘‘ਸਙ੍ਖਾਰਾਨਂ ਪੁਗ੍ਗਲਾਨਞ੍ਚਾ’’ਤਿਆਦਿਨਾ ਝਾਨੋਕਾਸਭੂਮਿਓਕਾਸਵਸੇਨ ਪੁਗ੍ਗਲਵਿਭਾਗਨਯੋ ਵੁਤ੍ਤੋ, ਇਮਿਨਾ ਨਯੇਨ ਉਪਾਯੇਨ. ਸਬ੍ਬਤ੍ਥ ਸਬ੍ਬਪੁਚ੍ਛਾਸੁ.

੨੧. ਏਤਸ੍ਮਿਂ ਪਨ ਅਤ੍ਥੇ ਸਤੀਤਿ ਯ੍ਵਾਯਂ ਉਪ੍ਪਤ੍ਤਿਭੂਮਿਯਾ ਝਾਨਂ ਵਿਸੇਸੇਤ੍ਵਾ ਅਤ੍ਥੋ ਵੁਤ੍ਤੋ, ਏਤਸ੍ਮਿਂ ਅਤ੍ਥੇ ਗਯ੍ਹਮਾਨੇ ਅਞ੍ਞਤ੍ਥਪਿ ਉਪ੍ਪਤ੍ਤਿਭੂਮਿਯਾ ਝਾਨਂ ਵਿਸੇਸਿਤਬ੍ਬਂ ਭਵੇਯ੍ਯ, ਤਥਾ ਚ ਅਨਿਟ੍ਠਂ ਆਪਜ੍ਜਤੀਤਿ ਦਸ੍ਸੇਨ੍ਤੋ ‘‘ਚਤੁਤ੍ਥਜ੍ਝਾਨੇ’’ਤਿਆਦਿਮਾਹ. ਕਿਂ ਪਨ ਤਂ ਅਨਿਟ੍ਠਨ੍ਤਿ ਆਹ ‘‘ਭੂਮੀਨਂ ਓਕਾਸਭਾਵਸ੍ਸੇਵ ਅਗ੍ਗਹਿਤਤਾਪਤ੍ਤਿਤੋ’’ਤਿ. ਯਤ੍ਥ ਯਤ੍ਥ ਹਿ ਝਾਨਂ ਗਯ੍ਹਤਿ, ਤਤ੍ਥ ਤਤ੍ਥ ਤਂ ਉਪ੍ਪਤ੍ਤਿਭੂਮਿਯਾ ਵਿਸੇਸਿਤਬ੍ਬਂ ਹੋਤਿ. ਤਥਾ ਸਤਿ ਝਾਨੋਕਾਸੋਵ ਗਹਿਤੋ ਸਿਯਾ, ਨ ਭੂਮਿਓਕਾਸੋ ਗੁਣਭੂਤਤ੍ਤਾ. ਕਿਞ੍ਚ ‘‘ਚਤੁਤ੍ਥਜ੍ਝਾਨੇ ਰੂਪਾਵਚਰੇ ਅਰੂਪਾਵਚਰੇ’’ਤਿ ਏਤ੍ਥ ਰੂਪਾਰੂਪਭੂਮਿਯਾ ਚਤੁਤ੍ਥਜ੍ਝਾਨੇ ਵਿਸੇਸਿਯਮਾਨੇ ਤਦੇਕਦੇਸੋਵ ਓਕਾਸਵਸੇਨ ਗਹਿਤੋ ਸਿਯਾ, ਨ ਸਬ੍ਬਂ ਚਤੁਤ੍ਥਜ੍ਝਾਨਂ. ਤੇਨਾਹ ‘‘ਸਬ੍ਬਚਤੁਤ੍ਥਜ੍ਝਾਨਸ੍ਸ ਓਕਾਸਵਸੇਨ ਅਗ੍ਗਹਿਤਤਾਪਤ੍ਤਿਤੋ ਚਾ’’ਤਿ. ਝਾਨਭੂਮੋਕਾਸਾਨਨ੍ਤਿ ਝਾਨੋਕਾਸਭੂਮਿਓਕਾਸਾਨਂ.

ਨਨੁ ਚ ਝਾਨਭੂਮਿਓਕਾਸੇ ਅਸਙ੍ਕਰਤੋ ਯੋਜਿਯਮਾਨੇ ਨ ਸਬ੍ਬਸ੍ਮਿਂ ਪਠਮਜ੍ਝਾਨੋਕਾਸੇ ਕਾਯਸਙ੍ਖਾਰੋ ਵਚੀਸਙ੍ਖਾਰੋ ਚ ਅਤ੍ਥਿ, ਤਥਾ ਸਬ੍ਬਸ੍ਮਿਂ ਕਾਮਾਵਚਰੋਕਾਸੇਤਿ ਚੋਦਨੁਪ੍ਪਤ੍ਤਿਂ ਸਨ੍ਧਾਯ ਤਸ੍ਸ ਪਰਿਹਾਰਂ ਵਤ੍ਤੁਂ ‘‘ਯਦਿਪੀ’’ਤਿਆਦਿਮਾਹ. ਤਤ੍ਥਾਤਿ ਪਠਮਜ੍ਝਾਨੋਕਾਸੇ ਕਾਮਾਵਚਰੋਕਾਸੇ ਚ. ਤਂਦ੍ਵਯੁਪ੍ਪਤ੍ਤੀਤਿ ਤਸ੍ਸ ਕਾਯਵਚੀਸਙ੍ਖਾਰਦ੍ਵਯਸ੍ਸ ਉਪ੍ਪਤ੍ਤਿ. ਓਕਾਸਦ੍ਵਯਸ੍ਸ ਅਸਙ੍ਕਰਤੋ ਗਹਣੇ ਅਯਞ੍ਚ ਗੁਣੋ ਲਦ੍ਧੋ ਹੋਤੀਤਿ ਆਹ ‘‘ਵਿਸੁਂ…ਪੇ… ਨ ਵਤ੍ਤਬ੍ਬਂ ਹੋਤੀ’’ਤਿ. ਤਤ੍ਥ ਅਙ੍ਗਮਤ੍ਤਵਸੇਨਾਤਿ ਵਿਤਕ੍ਕਾਦਿਝਾਨਙ੍ਗਮਤ੍ਤਵਸੇਨ. ਤਤ੍ਥ ਵਤ੍ਤਬ੍ਬਂ ਅਟ੍ਠਕਥਾਯਂ ਵੁਤ੍ਤਮੇਵ. ਵਿਤਕ੍ਕਰਹਿਤੋਪਿ ਵਿਚਾਰੋ ਵਚੀਸਙ੍ਖਾਰੋਯੇਵਾਤਿ ਆਹ ‘‘ਅਵਿਤਕ੍ਕ…ਪੇ… ਗਚ੍ਛਤੀ’’ਤਿ. ਮੁਦ੍ਧਭੂਤਂ ਦੁਤਿਯਜ੍ਝਾਨਨ੍ਤਿ ਚਤੁਕ੍ਕਨਯੇ ਦੁਤਿਯਜ੍ਝਾਨਮਾਹ. ਤਞ੍ਹਿ ਸਕਲਕ੍ਖੋਭਕਰਧਮ੍ਮਵਿਗਮੇਨ ਵਿਤਕ੍ਕੇਕਙ੍ਗਪ੍ਪਹਾਯਿਕਤੋ ਸਾਤਿਸਯਤ੍ਤਾ ‘‘ਮੁਦ੍ਧਭੂਤ’’ਨ੍ਤਿ ਵਤ੍ਤਬ੍ਬਤਂ ਲਭਤਿ. ਅਸਞ੍ਞਸਤ੍ਤਾ ਵਿਯਾਤਿ ਇਦਂ ਵਿਸਦਿਸੁਦਾਹਰਣਂ ਦਟ੍ਠਬ੍ਬਂ.

੩੭. ਆਵਜ੍ਜਨਤੋ ਪੁਬ੍ਬੇ ਪਵਤ੍ਤਂ ਸਬ੍ਬਂ ਚਿਤ੍ਤਂ ਪਟਿਸਨ੍ਧਿਚਿਤ੍ਤੇਨ ਸਮਾਨਗਤਿਕਤ੍ਤਾ ਏਕਂ ਕਤ੍ਵਾ ਵੁਤ੍ਤਂ ‘‘ਪਠਮਤੋ’’ਤਿ. ਤੇਨਾਹ ‘‘ਅਵਿਤਕ੍ਕਅਵਿਚਾਰਤੋ’’ਤਿਆਦਿ. ਚਿਤ੍ਤਸਙ੍ਖਾਰਸ੍ਸ ਆਦਿਦਸ੍ਸਨਤ੍ਥਨ੍ਤਿ ਸੁਦ੍ਧਾਵਾਸੇ ਚਿਤ੍ਤਸਙ੍ਖਾਰਸ੍ਸ ਆਦਿਦਸ੍ਸਨਤ੍ਥਂ. ਤਥਾ ‘‘ਵਚੀਸਙ੍ਖਾਰਸ੍ਸ ਆਦਿਦਸ੍ਸਨਤ੍ਥ’’ਨ੍ਤਿ ਏਤ੍ਥਾਪਿ.

ਪਵਤ੍ਤਿਵਾਰਵਣ੍ਣਨਾ ਨਿਟ੍ਠਿਤਾ.

ਸਙ੍ਖਾਰਯਮਕਵਣ੍ਣਨਾ ਨਿਟ੍ਠਿਤਾ.