ਕਾਮਾਵਚਰਕੁਸਲਂ
ਕਾਯਕਮ੍ਮਦ੍ਵਾਰਕਥਾਵਣ੍ਣਨਾ
ਕਮ੍ਮਦ੍ਵਾਰਾਨਨ੍ਤਿਆਦਿਨਾ ਪਕਾਸੇਤਬ੍ਬਸ੍ਸ ਸਰੂਪਂ ਪਕਾਸਨੁਪਾਯਞ੍ਚ ਦਸ੍ਸੇਤਿ. ਨਿਯਤਰੂਪਰੂਪਵਸੇਨਾਤਿ ਧਮ੍ਮਸਙ੍ਗਹੇ ਨਿਦ੍ਦਿਟ੍ਠਨਿਯਤਰੂਪਰੂਪਵਸੇਨ. ਅਞ੍ਞਥਾ ਕਮ੍ਮਸਮੁਟ੍ਠਾਨਿਕਕਾਯੇ ਹਦਯਵਤ੍ਥੁਪਿ ਗਹੇਤਬ੍ਬਂ ਸਿਯਾ. ਏਕਸਨ੍ਤਤਿਪਰਿਯਾਪਨ੍ਨੋ ਉਪਾਦਿਨ੍ਨਕਕਾਯੋ ਇਧ ਗਹਿਤੋਤਿ ਚਕ੍ਖਾਯਤਨਾਦੀਤਿ ਵੁਤ੍ਤੇਸੁ ਏਕੋ ਭਾਵੋ ਹਦਯਵਤ੍ਥੁ ਚ ਗਹਿਤਨ੍ਤਿ ਨ ਸਕ੍ਕਾ ਵਤ੍ਤੁਂ ‘‘ਚਕ੍ਖਾਯਤਨਾਦੀਨਿ ਜੀਵਿਤਪਰਿਯਨ੍ਤਾਨੀ’’ਤਿ ਸਨ੍ਨਿਵੇਸਸ੍ਸ ਵਿਭਾਵਿਤਤ੍ਤਾ.
ਵਿਪ੍ਫਨ੍ਦਮਾਨਵਣ੍ਣਗ੍ਗਹਣਾਨਨ੍ਤਰਂ ਵਿਞ੍ਞਤ੍ਤਿਗ੍ਗਹਣਸ੍ਸ ਇਚ੍ਛਿਤਤ੍ਤਾ ਚਲਨਾਕਾਰਾਵ ਵਾਯੋਧਾਤੁ ਵਿਞ੍ਞਤ੍ਤਿਵਿਕਾਰਸਹਿਤਾਤਿ ਕਦਾਚਿ ਆਸਙ੍ਕੇਯ੍ਯਾਤਿ ਤਨ੍ਨਿਵਤ੍ਤਨਤ੍ਥਂ ‘‘ਪਠਮਜਵਨਸਮੁਟ੍ਠਿਤਾ’’ਤਿ ਆਹ. ਦੇਸਨ੍ਤਰੁਪ੍ਪਤ੍ਤਿਹੇਤੁਭਾਵੇਨ ਚਾਲੇਤੁਨ੍ਤਿ ਏਤੇਨ ਦੇਸਨ੍ਤਰੁਪ੍ਪਤ੍ਤਿ ਚਲਨਂ, ਤਂਨਿਮਿਤ੍ਤੇ ਚ ਕਤ੍ਤੁਭਾਵੋ ਉਪਚਰਿਤੋਤਿ ਦਸ੍ਸੇਤਿ, ਅਞ੍ਞਥਾ ਖਣਿਕਤਾ ਅਬ੍ਯਾਪਾਰਤਾ ਚ ਧਮ੍ਮਾਨਂ ਨ ਸਮ੍ਭਵੇਯ੍ਯਾਤਿ. ਤਦਭਿਮੁਖਭਾਵਵਿਕਾਰਵਤੀਤਿ ਤਂਦਿਸਮਭਿਮੁਖੋ ਤਦਭਿਮੁਖੋ, ਤਸ੍ਸ ਭਾਵੋ ਤਦਭਿਮੁਖਭਾਵੋ, ਸੋ ਏਵ ਵਿਕਾਰੋ, ਤਂਸਮਙ੍ਗਿਨੀ ਵਾਯੋਧਾਤੁ ਤਦਭਿਮੁਖਭਾਵਵਿਕਾਰਵਤੀ. ਇਦਾਨਿ ਤਦਭਿਮੁਖਭਾਵਵਿਕਾ ਰਸ੍ਸ ਵਿਞ੍ਞਤ੍ਤਿਭਾਵਂ ਦਸ੍ਸੇਨ੍ਤੋ ਆਹ ‘‘ਅਧਿਪ੍ਪਾਯਸਹਭਾਵੀ’’ਤਿਆਦਿ. ਏਵਞ੍ਚ ਕਤ੍ਵਾਤਿਆਦਿਨਾ ਇਮਿਸ੍ਸਾ ਅਤ੍ਥਵਣ੍ਣਨਾਯ ਲਦ੍ਧਗੁਣਂ ਦਸ੍ਸੇਤਿ. ਤਤ੍ਥ ਆਵਜ੍ਜਨਸ੍ਸਾਤਿ ਮਨੋਦ੍ਵਾਰਾਵਜ੍ਜਨਸ੍ਸ. ਯਤੋ ਬਾਤ੍ਤਿਂਸਾਤਿਆਦਿਨਾ ਤਸ੍ਸ ਵਿਞ੍ਞਤ੍ਤਿਸਮੁਟ੍ਠਾਪਕਤਾ ਨ ਸਕ੍ਕਾ ਪਟਿਸੇਧੇਤੁਨ੍ਤਿ ਦਸ੍ਸੇਤਿ.
ਪਚ੍ਚਯੋ ਭਵਿਤੁਂ ਸਮਤ੍ਥੋਤਿ ਏਤੇਨ ਯਥਾਵੁਤ੍ਤਵਾਯੋਧਾਤੁਯਾ ਥਮ੍ਭਨਚਲਨਸਙ੍ਖਾਤਕਿਚ੍ਚਨਿਪ੍ਫਾਦਨੇ ਤਸ੍ਸ ਆਕਾਰਵਿਸੇਸਸ੍ਸ ਸਹਕਾਰੀਕਾਰਣਭਾਵਮਾਹ. ਅਨਿਦਸ੍ਸਨਸਪ੍ਪਟਿਘਤਾਦਯੋ ਵਿਯ ਮਹਾਭੂਤਾਨਂ ਅਵਤ੍ਥਾਵਿਸੇਸਮਤ੍ਤਂ ਸੋ ਆਕਾਰਵਿਸੇਸੋਤਿ ਪਰਮਤ੍ਥਤੋ ਨ ਕਿਞ੍ਚਿ ਹੋਤੀਤਿ ‘‘ਪਰਮਤ੍ਥਤੋ ਅਭਾਵਂ ਦਸ੍ਸੇਤੀ’’ਤਿ ਆਹ. ਪਰਮਤ੍ਥਤੋ ਚਿਤ੍ਤਸਮੁਟ੍ਠਾਨਭਾਵੋ ਪਟਿਸੇਧਿਤੋ. ਕਮ੍ਮਸਮੁਟ੍ਠਾਨਾਦਿਭਾਵਸ੍ਸ ਪਨ ਸਮ੍ਭਵੋਯੇਵ ਨਤ੍ਥੀਤਿ ਯਥਾਵੁਤ੍ਤਵਿਕਾਰਸ੍ਸ ਪਰਮਤ੍ਥਤੋ ਸਬ੍ਭਾਵੇ ਨਕੁਤੋਚਿਸਮੁਟ੍ਠਿਤਤ੍ਤਾ ਅਪ੍ਪਚ੍ਚਯਤ੍ਤਂ ਆਪਨ੍ਨਂ. ਨ ਹਿ ਰੂਪਂ ਅਪ੍ਪਚ੍ਚਯਂ ਅਤ੍ਥਿ, ਅਪ੍ਪਚ੍ਚਯਤ੍ਤੇ ਚ ਸਤਿ ਨਿਚ੍ਚਭਾਵੋ ਆਪਜ੍ਜਤਿ, ਨ ਚ ਨਿਬ੍ਬਾਨਵਜ੍ਜੋ ਅਤ੍ਥੋ ਸਭਾਵਧਮ੍ਮੋ ਨਿਚ੍ਚੋ ਅਤ੍ਥਿ. ਚਿਤ੍ਤਸਮੁਟ੍ਠਾਨਭਾਵੋ ਵਿਯਾਤਿ ਵਿਞ੍ਞਤ੍ਤਿਯਾ ਚਿਤ੍ਤਸਮੁਟ੍ਠਾਨਉਪਾਦਾਰੂਪਭਾਵੋ ਉਪਚਾਰਸਿਦ੍ਧੋਤਿ ਦਸ੍ਸੇਤਿ.
ਵਿਞ੍ਞਤ੍ਤਿਯਾ ਕਰਣਭੂਤਾਯ. ਯਂ ਕਰਣਨ੍ਤਿ ਯਂ ਚਿਤ੍ਤਕਿਰਿਯਂ ਚਿਤ੍ਤਬ੍ਯਾਪਾਰਂ. ਵਿਞ੍ਞਤ੍ਤਿਯਾ ਵਿਞ੍ਞਾਤਤ੍ਤਨ੍ਤਿ ਇਦਮੇਸ ਕਾਰੇਤੀਤਿ ਯਦੇਤਂ ਅਧਿਪ੍ਪਾਯਵਿਭਾਵਨਂ, ਏਤਂ ਵਿਞ੍ਞਤ੍ਤਿਵਿਕਾਰਰਹਿਤੇਸੁ ਰੁਕ੍ਖਚਲਨਾਦੀਸੁ ਨ ਦਿਟ੍ਠਂ, ਹਤ੍ਥਚਲਨਾਦੀਸੁ ਪਨ ਦਿਟ੍ਠਂ, ਤਸ੍ਮਾ ਵਿਪ੍ਫਨ੍ਦਮਾਨਵਣ੍ਣਵਿਨਿਮੁਤ੍ਤੋ ਕੋਚਿ ਵਿਕਾਰੋ ਅਤ੍ਥਿ ਕਾਯਿਕਕਰਣਸਙ੍ਖਾਤਸ੍ਸ ਅਧਿਪ੍ਪਾਯਸ੍ਸ ਞਾਪਕੋਤਿ ਵਿਞ੍ਞਾਯਤਿ. ਞਾਪਕੋ ਚ ਹੇਤੁ ਞਾਪੇਤਬ੍ਬਮਤ੍ਥਂ ਸਯਂ ਞਾਤੋਯੇਵ ਞਾਪੇਤਿ, ਨ ਸਬ੍ਭਾਵਮਤ੍ਤੇਨਾਤਿ ਵਣ੍ਣਗ੍ਗਹਣਾਨਨ੍ਤਰਂ ਵਿਕਾਰਗ੍ਗਹਣਮ੍ਪਿ ਵਿਞ੍ਞਾਯਤਿ. ਤਥਾ ਹਿ ਵਿਸਯਭਾਵਮਾਪਨ੍ਨੋ ਏਵ ਸਦ੍ਦੋ ਅਤ੍ਥਂ ਪਕਾਸੇਤਿ, ਨੇਤਰੋ. ਤੇਨੇਵਾਹ ‘‘ਨ ਹਿ ਵਿਞ੍ਞਤ੍ਤੀ’’ਤਿਆਦਿ. ਯਦਿ ਪਨ ਚਿਤ੍ਤਜਰੂਪਾਨਂ ਚਲਨਾਕਾਰੋ ਵਿਞ੍ਞਤ੍ਤਿ, ਚਕ੍ਖੁਵਿਞ੍ਞਾਣਸ੍ਸ ਵਿਪ੍ਫਨ੍ਦਮਾਨਵਣ੍ਣਾਰਮ੍ਮਣਤ੍ਤਾ ਤੇਨਪਿ ਸਾ ਗਹਿਤਾ ਸਿਯਾਤਿ ਆਸਙ੍ਕਾਯ ਨਿਵਤ੍ਤਨਤ੍ਥਂ ਆਹ ‘‘ਚਕ੍ਖੁਵਿਞ੍ਞਾਣਸ੍ਸਾ’’ਤਿਆਦਿ.
ਤਾਲਪਣ੍ਣਾਦਿਰੂਪਾਨੀਤਿਆਦਿਨਾਪਿ ਵਿਞ੍ਞਤ੍ਤਿਯਾ ਵਿਞ੍ਞਾਤਬ੍ਬਤਂ ਮਨੋਵਿਞ੍ਞਾਣੇਨੇਵ ਚ ਵਿਞ੍ਞਾਤਬ੍ਬਤਂ ਦਸ੍ਸੇਤਿ. ਸਞ੍ਜਾਨਾਤਿ ਏਤੇਨਾਤਿ ਸਞ੍ਞਾਣਂ, ਤਸ੍ਸ ਉਦਕਾਦਿਨੋ ਸਞ੍ਞਾਣਂ ਤਂਸਞ੍ਞਾਣਂ, ਤਸ੍ਸ ਆਕਾਰੋ ਤਂਸਞ੍ਞਾਣਾਕਾਰੋ, ਉਦਕਾਦਿਸਹਚਾਰਿਪ੍ਪਕਾਰੋ ਚ ਸੋ ਤਂਸਞ੍ਞਾਣਾਕਾਰੋ ਚਾਤਿ ਉਦਕਾ…ਪੇ… ਕਾਰੋ, ਤਂ ਗਹੇਤ੍ਵਾ ਜਾਨਿਤ੍ਵਾ. ਤਦਾਕਾਰਸ੍ਸਾਤਿ ਉਦਕਾਦਿਞਾਪਨਾਕਾਰਸ੍ਸ. ਯਦਿ ਯਥਾਵੁਤ੍ਤਵਿਕਾਰਗ੍ਗਹਣਂਯੇਵ ਕਾਰਣਂ ਅਧਿਪ੍ਪਾਯਗ੍ਗਹਣਸ੍ਸ, ਅਥ ਕਸ੍ਮਾ ਅਗ੍ਗਹਿਤਸਙ੍ਕੇਤਸ੍ਸ ਅਧਿਪ੍ਪਾਯਗ੍ਗਹਣਂ ਨ ਹੋਤੀਤਿ? ਨ ਕੇਵਲਂ ਵਿਕਾਰਗ੍ਗਹਣਮੇਵ ਅਧਿਪ੍ਪਾਯਗ੍ਗਹਣਸ੍ਸ ਕਾਰਣਂ, ਕਿਞ੍ਚਰਹੀਤਿ ਆਹ ‘‘ਏਤਸ੍ਸ ਪਨਾ’’ਤਿਆਦਿ.
ਅਥ ਪਨਾਤਿਆਦਿਨਾ ਵਿਞ੍ਞਤ੍ਤਿਯਾ ਅਨੁਮਾਨੇਨ ਗਹੇਤਬ੍ਬਤਂ ਦਸ੍ਸੇਤਿ. ਸਾਧਿਪ੍ਪਾਯ…ਪੇ… ਨਨ੍ਤਰਨ੍ਤਿ ਅਧਿਪ੍ਪਾਯਸਹਿਤਵਿਕਾਰੇਨ ਸਹਜਾਤਵਣ੍ਣਾਯਤਨਗ੍ਗਹਣਸਙ੍ਖਾਤਸ੍ਸ ਚਕ੍ਖੁਦ੍ਵਾਰਿਕਵਿਞ੍ਞਾਣਸਨ੍ਤਾਨਸ੍ਸ ਅਨਨ੍ਤਰਂ. ਅਧਿਪ੍ਪਾਯਗ੍ਗਹਣਸ੍ਸਾਤਿ ਅਧਿਪ੍ਪਾਯਵਵਤ੍ਥਾਪਕਸ੍ਸ ਤਤਿਯਵਾਰੇ ਜਵਨਸ੍ਸ. ਅਧਿਪ੍ਪਾਯਸਹਭੂ ਵਿਕਾਰਾਭਾਵੇ ਅਭਾਵਤੋਤਿ ਏਤੇਨ ਯਥਾਵੁਤ੍ਤਵਿਕਾਰਂ ਅਧਿਪ੍ਪਾਯਗ੍ਗਹਣੇਨ ਅਨੁਮਿਨੋਤਿ. ਏਵਂ ਸਤੀਤਿਆਦਿਨਾ ਯਥਾਨੁਮਿਤਮਤ੍ਥਂ ਨਿਗਮਨਵਸੇਨ ਦਸ੍ਸੇਤਿ. ਤਤ੍ਥ ਉਦਕਾਦਿਗ੍ਗਹਣੇਨੇਵਾਤਿ ਤਾਲਪਣ੍ਣਾਦੀਨਂ ਵਣ੍ਣਗ੍ਗਹਣਾਨਨ੍ਤਰੇਨ ਪੁਰਿਮਸਿਦ੍ਧਸਮ੍ਬਨ੍ਧਾਨੁਗ੍ਗਹਿਤੇਨ ਉਦਕਾਦੀਨਂ ਤਤ੍ਥ ਅਤ੍ਥਿਭਾਵਵਿਜਾਨਨੇਨੇਵ. ਯਥਾ ਤਾਲਪਣ੍ਣਾਦੀਨਂ ਉਦਕਾਦਿਸਹਚਾਰਿਪ੍ਪਕਾਰਤਂ ਸਞ੍ਞਾਣਾਕਾਰੋ ਵਿਞ੍ਞਾਤੋਯੇਵ ਹੋਤਿ ਨਾਨਨ੍ਤਰਿਯਕਤ੍ਤਾ, ਏਵਂ ਵਿਪ੍ਫਨ੍ਦਮਾਨਵਣ੍ਣਗ੍ਗਹਣਾਨਨ੍ਤਰੇਨ ਪੁਰਿਮਸਿਦ੍ਧਸਮ੍ਬਨ੍ਧਾਨੁਗ੍ਗਹਿਤੇਨ ਗਨ੍ਤੁਕਾਮਤਾਦਿਅਧਿਪ੍ਪਾਯਵਿਜਾਨਨੇਨੇਵ ਵਿਞ੍ਞਤ੍ਤਿ ਵਿਞ੍ਞਾਤਾ ਹੋਤਿ ਤਦਭਾਵੇ ਅਭਾਵਤੋਤਿ ਉਪਮਾਯੋਜਨਾ.
ਸਭਾਵਭੂਤਨ੍ਤਿ ਅਨ੍ਵਤ੍ਥਭੂਤਂ. ਦ੍ਵਿਧਾਤਿ ਵਿਞ੍ਞਾਪਨਤੋ ਵਿਞ੍ਞੇਯ੍ਯਤੋ ਚ. ਕਾਯਵਿਞ੍ਞਤ੍ਤਿਯਾ ਤਥਾਪਵਤ੍ਤਮਾਨਾਯ ਚੇਤਨਾਸਙ੍ਖਾਤਸ੍ਸ ਕਮ੍ਮਸ੍ਸ ਕਾਯਕਮ੍ਮਭਾਵੋ ਨਿਪ੍ਫਜ੍ਜਤਿ ਤਾਯ ਉਪਲਕ੍ਖਿਤਬ੍ਬਤ੍ਤਾ, ਨ ਪਨ ਚਤੁਵੀਸਤਿਯਾ ਪਚ੍ਚਯੇਸੁ ਕੇਨਚਿ ਪਚ੍ਚਯਭਾਵਤੋਤਿ ਦਸ੍ਸੇਨ੍ਤੋ ‘‘ਤਸ੍ਮਿਂ ਦ੍ਵਾਰੇ ਸਿਦ੍ਧਾ’’ਤਿਆਦਿਮਾਹ. ਤੇਨ ਵਚੀਦ੍ਵਾਰੁਪ੍ਪਨ੍ਨਾਪਿ ਪਾਣਾਤਿਪਾਤਾਦਯੋ ਸਙ੍ਗਹਿਤਾਤਿ ਤੇਸਂ ਸਙ੍ਗਹਿਤਭਾਵਂ ਦਸ੍ਸੇਤਿ. ਅਥ ਵਾ ਕਾਯਦ੍ਵਾਰੁਪ੍ਪਨ੍ਨਾਯ ਕਾਯਕਮ੍ਮਭੂਤਾਯ ਚੇਤਨਾਯ ਵਸੇਨ ‘‘ਤੇਨ ਦ੍ਵਾਰੇਨ ਵਿਞ੍ਞਾਤਬ੍ਬਭਾਵਤੋ’’ਤਿ ਵੁਤ੍ਤਂ, ਤਸ੍ਸਾਯੇਵ ਦ੍ਵਾਰਨ੍ਤਰੁਪ੍ਪਨ੍ਨਾਯ ਵਸੇਨ ‘‘ਤੇਨ ਦ੍ਵਾਰੇਨ ਨਾਮਲਾਭਤੋ’’ਤਿ. ਮਨੋਦ੍ਵਾਰਾਵਜ੍ਜਨਸ੍ਸਪਿ ਵਿਞ੍ਞਤ੍ਤਿਸਮੁਟ੍ਠਾਪਕਭਾਵੋ ਨਿਚ੍ਛਿਤੋਤਿ ‘‘ਏਕਾਦਸਨ੍ਨਂ ਕਿਰਿਯਚਿਤ੍ਤਾਨ’’ਨ੍ਤਿ ਆਹ.
ਦ੍ਵਾਰਨ੍ਤਰਚਾਰਿਨੋਤਿ ਦ੍ਵਾਰਨ੍ਤਰਭਾਵੇਨ ਪਵਤ੍ਤਨਕਾ. ਦ੍ਵਾਰਸਮ੍ਭੇਦਾਤਿ ਦ੍ਵਾਰਾਨਂ ਸਙ੍ਕਰਣਤੋ. ਦ੍ਵਾਰਾਨਞ੍ਹਿ ਦ੍ਵਾਰਨ੍ਤਰਭਾਵਪ੍ਪਤ੍ਤਿਯਾ ਸਤਿ ਕਾਯਦ੍ਵਾਰਸ੍ਸ ਵਚੀਦ੍ਵਾਰਾਦਿਭਾਵੋ, ਵਚੀਦ੍ਵਾਰਸ੍ਸ ਚ ਕਾਯਦ੍ਵਾਰਾਦਿਭਾਵੋ ਆਪਜ੍ਜਤੀਤਿ ਤਂਤਂਦ੍ਵਾਰੁਪ੍ਪਨ੍ਨਕਮ੍ਮਾਨਮ੍ਪਿ ਸਙ੍ਕਰੋ ਸਿਯਾ. ਤੇਨਾਹ ‘‘ਕਮ੍ਮਸਮ੍ਭੇਦੋਪੀ’’ਤਿ. ਏਵਂ ਸਤਿ ਕਾਯਕਮ੍ਮਂ…ਪੇ… ਵਵਤ੍ਥਾਨਂ ਨ ਸਿਯਾ. ਯਦਿ ਕਮ੍ਮਾਨਿ ਕਮ੍ਮਨ੍ਤਰਚਾਰੀਨਿ ਹੋਨ੍ਤਿ, ਕਾਯਕਮ੍ਮਾਦਿਕਸ੍ਸ ਵਚੀਕਮ੍ਮਾਦਿਕਭਾਵਾਪਤ੍ਤਿਤੋ ‘‘ਕਮ੍ਮਸਮ੍ਭੇਦਾ ਦ੍ਵਾਰਸਮ੍ਭੇਦੋਪੀ’’ਤਿ ਕਾਯਕਮ੍ਮਂ ਕਾਯਕਮ੍ਮਦ੍ਵਾਰਨ੍ਤਿ ਅਞ੍ਞਮਞ੍ਞਵਵਤ੍ਥਾਨਂ ਨ ਸਿਯਾਤਿ ਇਮਮਤ੍ਥਮਾਹ ‘‘ਕਮ੍ਮਾਨਮ੍ਪਿ ਕਮ੍ਮਨ੍ਤਰਚਰਣੇ ਏਸੇਵ ਨਯੋ’’ਤਿ. ਕਮ੍ਮਨ੍ਤਰਚਰਣਂ ਕਮ੍ਮਨ੍ਤਰੂਪਲਕ੍ਖਣਤਾ. ਤੇਨੇਵਾਹ ‘‘ਦ੍ਵਾਰਭਾਵੇਨਾ’’ਤਿ. ਦ੍ਵਾਰਨ੍ਤਰਚਰਣਂ ਦ੍ਵਾਰਨ੍ਤਰੁਪ੍ਪਤ੍ਤਿ. ਦ੍ਵਾਰੇਤਿ ਅਤ੍ਤਨੋ ਦ੍ਵਾਰੇ. ਅਞ੍ਞਸ੍ਮਿਨ੍ਤਿ ਦ੍ਵਾਰਨ੍ਤਰੇ. ਕਮ੍ਮਾਨੀਤਿ ਤਂਤਂਦ੍ਵਾਰਿਕਕਮ੍ਮਾਨਿ. ਅਞ੍ਞਾਨੀਤਿ ਅਞ੍ਞਦ੍ਵਾਰਿਕਕਮ੍ਮਾਨਿ. ਦ੍ਵਾਰੇ ਦ੍ਵਾਰਾਨਿ ਨ ਚਰਨ੍ਤੀਤਿ ਦ੍ਵਾਰਨ੍ਤਰਭਾਵੇਨ ਨਪ੍ਪਵਤ੍ਤਨ੍ਤਿ, ਦ੍ਵਾਰਨ੍ਤਰਂ ਵਾ ਨ ਸਙ੍ਕਮਨ੍ਤਿ. ਕਿਞ੍ਚਾਪਿ ਵਿਞ੍ਞਤ੍ਤਿਯਾ ਚਤੁਵੀਸਤਿਯਾ ਪਚ੍ਚਯੇਸੁ ਯੇਨ ਕੇਨਚਿ ਪਚ੍ਚਯੇਨ ਚੇਤਨਾਯ ਪਚ੍ਚਯਭਾਵੋ ਨਤ੍ਥਿ, ਤਥਾ ਪਨ ਵਿਞ੍ਞਤ੍ਤਿਯਾ ਪਵਤ੍ਤਮਾਨਾਯ ਏਵ ਪਾਣਾਤਿਪਾਤਾਦਿ ਹੋਤਿ, ਨਾਞ੍ਞਥਾਤਿ ਸਿਯਾ ਵਿਞ੍ਞਤ੍ਤਿਯਾ ਹੇਤੁਭਾਵੋ ਚੇਤਨਾਯਾਤਿ ਵੁਤ੍ਤਂ ‘‘ਦ੍ਵਾਰੇਹਿ ਕਾਰਣਭੂਤੇਹੀ’’ਤਿ. ਕਾਯਕਮ੍ਮਂ ਵਚੀਕਮ੍ਮਨ੍ਤਿ ਕਮ੍ਮਵਵਤ੍ਥਾਨਸ੍ਸੇਵ ਵਾ ਕਾਰਣਭਾਵਂ ਸਨ੍ਧਾਯ ‘‘ਦ੍ਵਾਰੇਹਿ ਕਾਰਣਭੂਤੇਹੀ’’ਤਿ ਵੁਤ੍ਤਂ. ਯਦਿਪਿ ‘‘ਦ੍ਵਾਰੇਹਿ ਕਮ੍ਮਾਨੀ’’ਤਿ ਵੁਤ੍ਤਂ, ‘‘ਅਞ੍ਞਮਞ੍ਞਂ ਵਵਤ੍ਥਿਤਾ’’ਤਿ ਪਨ ਵੁਤ੍ਤਤ੍ਤਾ ਕਮ੍ਮੇਹਿਪਿ ਦ੍ਵਾਰਾਨਿ ਵਵਤ੍ਥਿਤਾਨੀਤਿ ਅਯਮਤ੍ਥੋਪਿ ਸਿਦ੍ਧੋਯੇਵਾਤਿ ਦਸ੍ਸੇਤੁਂ ‘‘ਨ ਕੇਵਲ’’ਨ੍ਤਿਆਦਿ ਵੁਤ੍ਤਂ. ਅਦ੍ਵਾਰਚਾਰੀਹੀਤਿ ਦ੍ਵਾਰਾਨਂ ਸਯਂ ਵਵਤ੍ਥਿਤਭਾਵਮਾਹ, ਨ ਪਨ ਅਵਵਤ੍ਥਾਨਂ, ਵਵਤ੍ਥਾਨਮੇਵਾਤਿ ਅਧਿਪ੍ਪਾਯੋ. ਇਦਾਨਿ ਤਂ ਵਵਤ੍ਥਾਨਂ ਵਿਭਾਵੇਤਿ ਕਮ੍ਮਾਨਪੇਕ੍ਖਾਤਿਆਦਿਨਾ. ਤਤ੍ਥ ਸਮਯਨਿਯਮਿਤੇਨ ਚਿਤ੍ਤੇਨ ਸਮਯੋ ਵਿਯ ਦ੍ਵਾਰਨਿਯਮਿਤੇਹਿ ਕਮ੍ਮੇਹਿ ਦ੍ਵਾਰਾਨਿ ਨਿਯਮਿਤਾਨੀਤਿ ਅਯਂ ਸਙ੍ਖੇਪਤ੍ਥੋ.
ਏਵਂਸਭਾਵਤ੍ਤਾਤਿ ਦ੍ਵਾਰਭੂਤੇਹਿ ਕਾਯਾਦੀਹਿ ਉਪਲਕ੍ਖਣੀਯਸਭਾਵਤ੍ਤਾ. ਆਣਤ੍ਤਿ…ਪੇ… ਮਾਨਸ੍ਸਾਤਿ ਕਾਯਵਚੀਕਮ੍ਮਾਨਂ ਵਚੀਕਾਯਵਿਞ੍ਞਤ੍ਤੀਹਿ ਪਕਾਸੇਤਬ੍ਬਤਂ ਆਹ. ਕਾਯਾਦੀਹੀਤਿ ਕਾਯਵਚੀਵਿਞ੍ਞਤ੍ਤੀਹਿ. ਤਸ੍ਮਾਤਿ ਯਸ੍ਮਾ ਦ੍ਵਾਰਨ੍ਤਰੇ ਚਰਨ੍ਤਾਨਿਪਿ ਕਮ੍ਮਾਨਿ ਸਕੇਨ ਦ੍ਵਾਰੇਨ ਉਪਲਕ੍ਖਿਤਾਨੇਵ ਚਰਨ੍ਤਿ, ਤਸ੍ਮਾ. ਨਾਪਿ ਕਮ੍ਮਂ ਦ੍ਵਾਰਸ੍ਸਾਤਿ ਯਸ੍ਮਿਂ ਦ੍ਵਾਰਨ੍ਤਰੇ ਕਮ੍ਮਂ ਚਰਤਿ, ਤਸ੍ਸ ਦ੍ਵਾਰਸ੍ਸ ਅਨਤ੍ਤਨਿਯਸ੍ਸ. ਤਂਤਂਦ੍ਵਾਰਮੇਵਾਤਿ ਸਕਦ੍ਵਾਰਮੇਵ. ਕਮ੍ਮਸ੍ਸਾਤਿ ਸਕਸਕਕਮ੍ਮਸ੍ਸ. ਯਦਿ ਕਮ੍ਮੇਹਿ ਦ੍ਵਾਰਾਨਿ ਵਵਤ੍ਥਿਤਾਨਿ, ‘‘ਕਮ੍ਮਸ੍ਸ ਅਨਿਬਦ੍ਧਤ੍ਤਾ’’ਤਿ ਇਦਂ ਕਥਂ ਨੀਯਤੀਤਿ ਆਹ ‘‘ਪੁਬ੍ਬੇ ਪਨਾ’’ਤਿਆਦਿ.
ਸਾਤਿ ਵਿਞ੍ਞਤ੍ਤਿ. ਤਸ੍ਸਾਤਿ ਕਮ੍ਮਸ੍ਸ. ਕੇਨਚਿ ਪਕਾਰੇਨਾਤਿ ਚਤੁਵੀਸਤਿਯਾ ਪਚ੍ਚਯਪ੍ਪਕਾਰੇਸੁ ਕੇਨਚਿ ਪਕਾਰੇਨ. ਤਂਸਹਜਾਤਾਤਿ ਏਤੇਨ ਕਾਯਵਿਞ੍ਞਤ੍ਤਿਯਾ ਸਬ੍ਭਾਵੇਯੇਵ ਕਾਯਕਮ੍ਮਸ੍ਸ ਸਬ੍ਭਾਵੋ, ਨਾਞ੍ਞਥਾਤਿ ਪਰਿਯਾਯੇਨ ਵਿਞ੍ਞਤ੍ਤਿਯਾ ਕਮ੍ਮਸ੍ਸ ਕਾਰਣਭਾਵਂ ਵਿਭਾਵੇਤਿ. ਤੇਨੇਵਾਹ ‘‘ਉਪ੍ਪਤ੍ਤਿਟ੍ਠਾਨਭਾਵੇਨ ਵੁਤ੍ਤਾ’’ਤਿ. ਯਥਾਵੁਤ੍ਤਨਿਯਮੇਨਾਤਿਆਦਿਨਾ ਕਮ੍ਮਸ੍ਸ ਉਪ੍ਪਤ੍ਤਿਟ੍ਠਾਨਭਾਵੇ ਬ੍ਯਭਿਚਾਰਾਭਾਵਮਾਹ. ਤਤ੍ਥ ਯਥਾਵੁਤ੍ਤਨਿਯਮੇਨਾਤਿ ਅਟ੍ਠਕਥਾਯਂ ਵੁਤ੍ਤਪ੍ਪਕਾਰੇਨ ਵਵਤ੍ਥਾਨਯੁਤ੍ਤਿਸਙ੍ਖਾਤੇਨ ਨਿਯਮੇਨ. ਦ੍ਵਾਰਚਰਣੇਤਿ ਅਞ੍ਞਦ੍ਵਾਰਚਰਣੇ.
ਕਾਯਕਮ੍ਮਦ੍ਵਾਰਕਥਾਵਣ੍ਣਨਾ ਨਿਟ੍ਠਿਤਾ.
ਵਚੀਕਮ੍ਮਦ੍ਵਾਰਕਥਾਵਣ੍ਣਨਾ
ਚਤੂਹਿ ਅਙ੍ਗੇਹੀਤਿ ਏਤ੍ਥ ‘‘ਸੁਭਾਸਿਤਂਯੇਵ ਭਾਸਤਿ, ਨੋ ਦੁਬ੍ਭਾਸਿਤਂ. ਧਮ੍ਮਂਯੇਵ, ਪਿਯਂਯੇਵ, ਸਚ੍ਚਂਯੇਵ ਭਾਸਤਿ, ਨੋ ਅਲਿਕ’’ਨ੍ਤਿ (ਸਂ. ਨਿ. ੧.੨੧੩; ਸੁ. ਨਿ. ਸੁਭਾਸਿਤਸੁਤ੍ਤ) ਯਾਨਿ ਅਙ੍ਗਾਨਿ ਸੁਤ੍ਤੇ ਵੁਤ੍ਤਾਨਿ, ਤੇਸਂ ਚੇਤਨਾਸਭਾਵਂ ਦਸ੍ਸੇਤੁਂ ‘‘ਸੁਭਾਸਿਤਭਾਸਨਾ’’ਤਿਆਦਿ ਵੁਤ੍ਤਂ. ਤਥਾਪਵਤ੍ਤਾਤਿ ਸੁਭਾਸਿਤਭਾਸਨਾਦਿਭਾਵੇਨ ਪਵਤ੍ਤਾ. ਸਹ ਸਮ੍ਭੂਤਤ੍ਤਾਤਿ ਸਹੇਵ ਉਪ੍ਪਨ੍ਨਤ੍ਤਾ. ਨ ਹਿ ਵਚੀਵਿਞ੍ਞਤ੍ਤਿ ਸਦ੍ਦਰਹਿਤਾ ਅਤ੍ਥਿ. ਤਥਾ ਹਿ ‘‘ਯਾ ਤਾਯ ਵਾਚਾਯ ਵਿਞ੍ਞਤ੍ਤੀ’’ਤਿ ਵੁਤ੍ਤਂ. ‘‘ਵਾਚਾਗਿਰਾ ਬ੍ਯਪਥੋ’’ਤਿਆਦਿਨਾ (ਧ. ਸ. ੬੩੬) ਨਾਤਿਸੁਖੁਮਂਯੇਵ ਸਦ੍ਦਵਾਚਂ ਵਤ੍ਵਾ ‘‘ਯਾ ਤਾਯ ਵਾਚਾਯ ਵਿਞ੍ਞਤ੍ਤੀ’’ਤਿ, ਤਾਯ ਸਦ੍ਧਿਂ ਯੋਜੇਤ੍ਵਾ ਵਚੀਵਿਞ੍ਞਤ੍ਤਿਯਾ ਵੁਤ੍ਤਤ੍ਤਾ ਰੂਪਾਯਤਨਂ ਵਿਯ ਵਤ੍ਥੁਪਰਿਤ੍ਤਤਾਦਿਨਾ ਸਦ੍ਦਾਯਤਨਮ੍ਪਿ ਅਨਿਨ੍ਦ੍ਰਿਯਗੋਚਰੋ ਅਤ੍ਥੀਤਿ ਚ ਅਧਿਪ੍ਪਾਯੇਨ ‘‘ਯਾ ਤਾਯ…ਪੇ… ਵਿਞ੍ਞਾਯਤੀ’’ਤਿ ਆਹ.
ਇਦਾਨਿ ਅਵਿਸੇਸੇਨ ਚਿਤ੍ਤਸਮੁਟ੍ਠਾਨਸਦ੍ਦਸ੍ਸ ਸੋਤਵਿਞ੍ਞਾਣਾਰਮ੍ਮਣਤਾ ਪਾਲ਼ਿਯਂ ਵੁਤ੍ਤਾਤਿ ਵਿਤਕ੍ਕਵਿਪ੍ਫਾਰਸਦ੍ਦੋ ਨ ਸੋਤਵਿਞ੍ਞੇਯ੍ਯੋਤਿ ਮਹਾਅਟ੍ਠਕਥਾਵਾਦਸ੍ਸ ਪਾਲ਼ਿਯਾ ਵਿਰੋਧਂ ਦਸ੍ਸੇਤੁਂ ‘‘ਚਿਤ੍ਤਸਮੁਟ੍ਠਾਨ’’ਨ੍ਤਿਆਦਿ ਵੁਤ੍ਤਂ. ਏਵਂ ਸਙ੍ਗਹਕਾਰਸ੍ਸ ਅਧਿਪ੍ਪਾਯੇ ਠਤ੍ਵਾ ਮਹਾਅਟ੍ਠਕਥਾਵਾਦਸ੍ਸ ਪਟਿਸੇਧੇਤਬ੍ਬਤਂ ਦਸ੍ਸੇਤ੍ਵਾ ਇਦਾਨਿ ਅਤ੍ਤਨੋ ਅਧਿਪ੍ਪਾਯੇ ਠਤ੍ਵਾ ਤਂ ਪਰਿਹਰਿਤੁਂ ‘‘ਮਹਾਅਟ੍ਠਕਥਾਯਂ ਪਨਾ’’ਤਿਆਦਿਮਾਹ. ਸਙ੍ਘਟ੍ਟਨਾਕਾਰੇਨ ਪਵਤ੍ਤਾਨਂ ਭੂਤਾਨਂ ਸਦ੍ਦਸ੍ਸ ਨਿਸ੍ਸਯਭਾਵਤੋ ਸਙ੍ਘਟ੍ਟਨੇਨ ਸਹੇਵ ਸਦ੍ਦੋ ਉਪ੍ਪਜ੍ਜਤਿ. ਤਪ੍ਪਚ੍ਚਯਭਾਵੋਤਿ ਉਪਾਦਿਨ੍ਨਕਘਟ੍ਟਨਸ੍ਸ ਪਚ੍ਚਯਭਾਵੋ. ਚਿਤ੍ਤਜਪਥਵੀਧਾਤੁਯਾ ਉਪਾਦਿਨ੍ਨਕਘਟ੍ਟਨੇ ਪਚ੍ਚਯੋ ਭਵਿਤੁਂ ਸਮਤ੍ਥੋ ਚਿਤ੍ਤਸਮੁਟ੍ਠਾਨਮਹਾਭੂਤਾਨਂ ਏਕੋ ਆਕਾਰਵਿਸੇਸੋ ਅਤ੍ਥਿ. ਤਦਾਕਾਰਤ੍ਤਾ ਹਿ ਤੇਸਂ ਪਥਵੀਧਾਤੁ ਉਪਾਦਿਨ੍ਨਕਂ ਘਟ੍ਟੇਤੀਤਿ ਇਮਮਤ੍ਥਂ ਵੁਤ੍ਤਾਨੁਸਾਰੇਨ ਵੇਦਿਤਬ੍ਬਤ੍ਤਾ ‘‘ਵੁਤ੍ਤਨਯੇਨੇਵ ਵੇਦਿਤਬ੍ਬੋ’’ਤਿ ਵਤ੍ਵਾ ਤਮੇਵ ਵੁਤ੍ਤਨਯਂ ‘‘ਤਬ੍ਬਿਕਾਰਾਨ’’ਨ੍ਤਿਆਦਿਨਾ ਵਿਭਾਵੇਤਿ. ਤਤ੍ਥ ਅਞ੍ਞਮਞ੍ਞਸ੍ਸ ਪਚ੍ਚਯਭਾਵੋ ਤਪ੍ਪਚ੍ਚਯਭਾਵੋ ਵੁਤ੍ਤੋਤਿ ਅਤ੍ਥੋ. ਅਞ੍ਞਮ੍ਪਿ ਸਬ੍ਬਂ ਵਿਧਾਨਨ੍ਤਿ ‘‘ਨ ਚਿਤ੍ਤਸਮੁਟ੍ਠਾਨਾਤਿ ਏਤੇਨ ਪਰਮਤ੍ਥਤੋ ਅਭਾਵਂ ਦਸ੍ਸੇਤੀ’’ਤਿਆਦਿਨਾ ਅਤ੍ਤਨਾ ਵੁਤ੍ਤਵਿਧਾਨਂ. ਅਟ੍ਠਕਥਾਯਂ ਪਨ ਵੁਤ੍ਤਵਿਧਾਨਂ ‘‘ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬ’’ਨ੍ਤਿ ਅਟ੍ਠਕਥਾਯਂ ਵੁਤ੍ਤਮੇਵਾਤਿ.
ਅਤ੍ਤਨੋ ਅਤ੍ਤਨੋ ਪਚ੍ਚਯੁਪ੍ਪਨ੍ਨਸ੍ਸ ਦੇਸਨ੍ਤਰੇ ਪਾਰਮ੍ਪਰਿਯੇਨ ਉਪ੍ਪਾਦਨਂ ਦੇਸਨ੍ਤਰੁਪ੍ਪਾਦਨਪਰਮ੍ਪਰਤਾ. ਲਦ੍ਧਾਸੇਵਨੇਨਾਤਿ ਲਦ੍ਧਪੁਬ੍ਬਾਭਿਸਙ੍ਖਾਰੇਨ. ਚਿਤ੍ਤੇਨੇਵਾਤਿ ਪਠਮਚਿਤ੍ਤੇਨੇਵ. ‘‘ਸਤ੍ਤ ਜਵਨਾਨਿ ਸਤ੍ਤ ਅਕ੍ਖਰਾਨਿ ਨਿਬ੍ਬਤ੍ਤੇਨ੍ਤੀਤਿ ਵਾਦਂ ਪਟਿਕ੍ਖਿਪਿਤ੍ਵਾ ਏਕਜਵਨਵਾਰਪਰਿਯਾਪਨ੍ਨਾਨਿ ਚਿਤ੍ਤਾਨਿ ਏਕਮਕ੍ਖਰਂ ਨਿਬ੍ਬਤ੍ਤੇਨ੍ਤੀ’’ਤਿ ਵਦਨ੍ਤਿ. ਕਿਞ੍ਚਾਪਿ ਪਠਮਚਿਤ੍ਤੇਨਪਿ ਘਟ੍ਟਨਾ ਨਿਪ੍ਫਜ੍ਜਤਿ, ਏਕਸ੍ਸੇਵ ਪਨ ਬਹੁਸੋ ਪਵਤ੍ਤਨੇਨ ਅਤ੍ਥਿ ਕੋਚਿ ਵਿਸੇਸੋਤਿ ਪੁਰਿਮਜਵਨਸਮੁਟ੍ਠਿਤਾਹਿ ਘਟ੍ਟਨਾਹਿ ਪਟਿਲਦ੍ਧਾਸੇਵਨੇਨ ਸਤ੍ਤਮਜਵਨੇਨ ਸਮੁਟ੍ਠਿਤਾ ਘਟ੍ਟਨਾ ਪਰਿਬ੍ਯਤ੍ਤਮਕ੍ਖਰਂ ਨਿਬ੍ਬਤ੍ਤੇਤੀਤਿ ਉਪਤ੍ਥਮ੍ਭਨਂ ਨਤ੍ਥੀਤਿ ਨ ਸਕ੍ਕਾ ਵਤ੍ਤੁਂ. ਲਦ੍ਧਾਭਿਸਙ੍ਖਾਰੇਨ ਪਨ ਪਠਮਚਿਤ੍ਤੇਨਪਿ ਘਟ੍ਟਨਾ ਬਲਵਤੀ ਹੋਤੀਤਿ ਅਟ੍ਠਕਥਾਯਂ ‘‘ਉਪਤ੍ਥਮ੍ਭਨਕਿਚ੍ਚਂ ਨਤ੍ਥੀ’’ਤਿ ਵੁਤ੍ਤਂ ਸਿਯਾ, ਸਬ੍ਬਮੇਤਂ ਵੀਮਂਸਿਤ੍ਵਾ ਗਹੇਤਬ੍ਬਂ.
ਵਚੀਕਮ੍ਮਦ੍ਵਾਰਕਥਾਵਣ੍ਣਨਾ ਨਿਟ੍ਠਿਤਾ.
ਮਨੋਕਮ੍ਮਦ੍ਵਾਰਕਥਾਵਣ੍ਣਨਾ
‘‘ਸਬ੍ਬਾਯਪਿ ਕਾਯਵਚੀਵਿਞ੍ਞਤ੍ਤਿਯਾ ਕਾਯਵਚੀਦ੍ਵਾਰਭਾਵੋ ਵਿਯ ਸਬ੍ਬਸ੍ਸਪਿ ਚਿਤ੍ਤਸ੍ਸ ਮਨੋਦ੍ਵਾਰਭਾਵੋ ਸਮ੍ਭਵਤੀ’’ਤਿ ਦਸ੍ਸਨਤ੍ਥਂ ਅਟ੍ਠਕਥਾਯਂ ‘‘ਅਯਂ ਨਾਮ ਮਨੋ ਮਨੋਦ੍ਵਾਰਂ ਨ ਹੋਤੀਤਿ ਨ ਵਤ੍ਤਬ੍ਬੋ’’ਤਿ ਵਤ੍ਵਾ ਤਂਦ੍ਵਾਰਵਨ੍ਤਧਮ੍ਮਦਸ੍ਸਨਤ੍ਥਂ ‘‘ਅਯਂ ਨਾਮ ਚੇਤਨਾ’’ਤਿਆਦਿ ਵੁਤ੍ਤਨ੍ਤਿ ਆਹ ‘‘ਯਸ੍ਸ ਦ੍ਵਾਰਂ ਮਨੋ, ਤਂ ਦਸ੍ਸਨਤ੍ਥਂ ਵੁਤ੍ਤ’’ਨ੍ਤਿ. ਯਥਾ ਪਨ ਤਿਵਿਧਚਤੁਬ੍ਬਿਧਕਾਯਵਚੀਕਮ੍ਮਾਨਂ ਦ੍ਵਾਰਭਾਵਤੋ ਕਾਯਕਮ੍ਮਦ੍ਵਾਰਵਚੀਕਮ੍ਮਦ੍ਵਾਰਾਨਿ ਵੁਤ੍ਤਾਨਿ, ਏਵਂ ਮਨੋਕਮ੍ਮਨ੍ਤਿ ਵੁਤ੍ਤਅਭਿਜ੍ਝਾਦੀਨਂ ਦ੍ਵਾਰਭਾਵਤੋ ਵਟ੍ਟਹੇਤੁਭੂਤਲੋਕਿਯਕੁਸਲਾਕੁਸਲਸਮ੍ਪਯੁਤ੍ਤਮਨੋ ਏਵ ਮਨੋਕਮ੍ਮਦ੍ਵਾਰਨ੍ਤਿ ਸਨ੍ਨਿਟ੍ਠਾਨਂ ਕਤਨ੍ਤਿ ਦਟ੍ਠਬ੍ਬਂ. ਚੇਤਨਾਯ ਅਤ੍ਤਨੋ ਕਿਚ੍ਚਂ ਆਰਦ੍ਧਾਯ ਸਮ੍ਪਯੁਤ੍ਤਾਪਿ ਤਂ ਤਂ ਸਕਿਚ੍ਚਂ ਆਰਭਨ੍ਤੀਤਿ ਸਾ ਨੇ ਸਕਿਚ੍ਚੇ ਪਵਤ੍ਤੇਤਿ ਨਾਮ, ਤਥਾ ਪਵਤ੍ਤੇਨ੍ਤੀ ਚ ਸਮ੍ਪਯੁਤ੍ਤੇ ਏਕਸ੍ਮਿਂ ਆਰਮ੍ਮਣੇ ਅਵਿਪ੍ਪਕਿਣ੍ਣੇ ਕਰੋਤਿ ਬ੍ਯਾਪਾਰੇਤਿ ਚਾਤਿ ਵੁਚ੍ਚਤਿ, ਤਥਾ ਸਮ੍ਪਯੁਤ੍ਤਾਨਂ ਯਥਾਵੁਤ੍ਤਂ ਅਵਿਪ੍ਪਕਿਣ੍ਣਕਰਣਂ ਸਮ੍ਪਿਣ੍ਡਨਂ ਆਯੂਹਨਂ ਬ੍ਯਾਪਾਰਾਪਾਦਨਂ ਬ੍ਯਾਪਾਰਣਂ ਚੇਤਯਨਨ੍ਤਿ ਆਯੂਹਨਚੇਤਯਨਾਨਂ ਨਾਨਤ੍ਤਂ ਦਸ੍ਸੇਨ੍ਤੋ ‘‘ਫਸ੍ਸਾਦਿਧਮ੍ਮੇਹੀ’’ਤਿਆਦਿਮਾਹ. ਤਥਾਕਰਣਨ੍ਤਿ ਯਥਾ ਫਸ੍ਸਾਦਯੋ ਸਕਸਕਕਿਚ੍ਚੇ ਪਸੁਤਾ ਭਵਨ੍ਤਿ, ਤਥਾ ਕਰਣਂ. ਤੇਨੇਵ ਯਥਾਵੁਤ੍ਤੇਨ ਅਵਿਪ੍ਪਕਿਣ੍ਣਬ੍ਯਾਪਾਰਣਾਕਾਰੇਨ ਸਮ੍ਪਯੁਤ੍ਤਾਨਂ ਕਰਣਂ ਪਵਤ੍ਤਨਨ੍ਤਿ ਦਟ੍ਠਬ੍ਬਂ. ਕਮ੍ਮਕ੍ਖਯਕਰਤ੍ਤਾਤਿ ਕਮ੍ਮਕ੍ਖਯਕਰਮਨਸ੍ਸ ਕਮ੍ਮਦ੍ਵਾਰਭਾਵੋ ਨ ਯੁਜ੍ਜਤੀਤਿ ਅਧਿਪ੍ਪਾਯੋ. ਯਤੋ ‘‘ਕਮ੍ਮਪਥਕਥਾ ਲੋਕਿਯਾ ਏਵਾ’’ਤਿ ਵਦਨ੍ਤਿ.
ਮਨੋਕਮ੍ਮਦ੍ਵਾਰਕਥਾਵਣ੍ਣਨਾ ਨਿਟ੍ਠਿਤਾ.
ਕਮ੍ਮਕਥਾਵਣ੍ਣਨਾ
ਸਮਾਨਕਾਲਾਪਿ ਕਾਰਣਫਲਕਿਰਿਯਾ ਪੁਬ੍ਬਾਪਰਕਾਲਾ ਵਿਯ ਵਤ੍ਤੁਂ ਯੁਤ੍ਤਾਯੇਵ. ਸੇਯ੍ਯਥਾਪਿ ਪਟਿਚ੍ਚਸਮੁਪ੍ਪਾਦੇ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿਮਾਹ. ਚੋਪਨਕਿਰਿਯਨ੍ਤਿ ਵਿਞ੍ਞਤ੍ਤਿਦ੍ਵਯਂ ਆਹ. ਤਸ੍ਸਾ ਹਿ ਚਿਤ੍ਤਸਮੁਟ੍ਠਾਨਕਾਯਸਦ੍ਦਵਾਚਾਹਿ ਕਾਯਵਚੀਵਿਞ੍ਞਤ੍ਤੀਹਿ ਏਵ ਵਾ ਪੁਰਿਮਪੁਰਿਮਾਹਿ ਪਵਤ੍ਤੇਤਬ੍ਬਤ੍ਤਾ ‘‘ਕਾਯਵਾਚਾਹਿ ਚੋਪਨਕਿਰਿਯਂ ਕਰੋਤੀ’’ਤਿ ਵੁਤ੍ਤਂ ਤਬ੍ਬਿਕਾਰਾਨਂ ਭੂਤਾਨਂ ਤਥਾਪਵਤ੍ਤਨਤੋ. ਅਥ ਵਾ ਕਾਯਵਾਚਾਹੀਤਿ ਕਾਯਵਚੀਵਿਞ੍ਞਤ੍ਤੀਹਿ. ਚੋਪਨਕਿਰਿਯਨ੍ਤਿ ਰੂਪਕਾਯਸ੍ਸ ਥਮ੍ਭਨਚਲਨਕਿਰਿਯਂ ਉਪਾਦਿਨ੍ਨਕਘਟ੍ਟਨਕਿਰਿਯਞ੍ਚ. ਏਸਾ ਹਿ ਕਿਰਿਯਾ ‘‘ਰੂਪਕਾਯਂ ਥਮ੍ਭੇਤੁਂ ਚਾਲੇਤੁਂ ਪਚ੍ਚਯੋ ਭਵਿਤੁਂ ਸਮਤ੍ਥੋ’’ਤਿ, ‘‘ਉਪਾਦਿਨ੍ਨਕਘਟ੍ਟਨਸ੍ਸ ਪਚ੍ਚਯਭੂਤੋ’’ਤਿ ਚ ਵੁਤ੍ਤਤ੍ਤਾ ਕਾਯਵਚੀਵਿਞ੍ਞਤ੍ਤੀਹਿ ਨਿਪ੍ਫਜ੍ਜਤੀਤਿ. ਏਵਞ੍ਚ ਕਤ੍ਵਾ ‘‘ਚੋਪਨਕਿਰਿਯਾਨਿਸ੍ਸਯਭੂਤਾ ਕਾਯਵਾਚਾ’’ਤਿ, ‘‘ਕਾਯਾਦੀਹਿ ਕਰਣਭੂਤੇਹਿ ਚੋਪਨਾਭਿਜ੍ਝਾਦਿਕਿਰਿਯਂ ਕਰੋਨ੍ਤਿ ਵਾਸਿਆਦੀਹਿ ਵਿਯ ਛੇਦਨਾਦਿ’’ਨ੍ਤਿ ਚ ਇਦਮ੍ਪਿ ਵਚਨਂ ਸਮਤ੍ਥਿਤਂ ਭਵਤਿ. ਨ ਕੇਵਲਂ ਧਰਮਾਨਤਾਵ ਸਬ੍ਭਾਵੋ, ਅਥ ਖੋ ਮਗ੍ਗੇਨ ਅਸਮੁਚ੍ਛਿਨ੍ਨਤਾਪੀਤਿ ਦਸ੍ਸੇਨ੍ਤੋ ‘‘ਅਨਿਰੋਧਿਤੇਵਾ’’ਤਿ ਆਹ. ਅਸਮੁਚ੍ਛਿਨ੍ਨਤਾ ਚ ਕਾਯਾਦੀਨਂ ਤਦੁਪਨਿਸ੍ਸਯਕਿਲੇਸਾਸਮੁਚ੍ਛੇਦੇਨੇਵਾਤਿ ਦਟ੍ਠਬ੍ਬਂ. ‘‘ਕਾਯਾਦੀਹਿ ਕਰਣਭੂਤੇਹਿ ਚੋਪਨਾਭਿਜ੍ਝਾਦਿਕਿਰਿਯਂ ਕਰੋਨ੍ਤੀ’’ਤਿ ਏਤੇਨ ਚੋਪਨਾਭਿਜ੍ਝਾਦਿਕਿਰਿਯਾਨਿਬ੍ਬਤ੍ਤਿਦ੍ਵਾਰੇਨ ਚੇਤਨਾਨਿਬ੍ਬਤ੍ਤਿਯੇਵ ਵੁਤ੍ਤਾਤਿ ਇਮਿਨਾ ਅਧਿਪ੍ਪਾਯੇਨ ‘‘ਏਵਞ੍ਚ…ਪੇ… ਯੁਜ੍ਜਨ੍ਤੀ’’ਤਿ ਆਹ. ਏਵਞ੍ਚ ਕਤ੍ਵਾ ਕਾਯੇ ਸਤਿ ਵਾਚਾਯ ਸਤੀਤਿਆਦਿਵਚਨਂ ਅਨੁਲੋਮਿਤਂ ਹੋਤਿ. ਯਾਯ ਚੇਤਨਾਯਾਤਿ ਕਰਣਨਿਦ੍ਦੇਸੋ ਪਨ ਕਾਯਾਦੀਨਂ ਚੋਪਨਾਭਿਜ੍ਝਾਦਿਕਿਰਿਯਾਯ ਚ ਚੇਤਨਾਹੇਤੁਕਤ੍ਤਦਸ੍ਸਨਤ੍ਥਂ ਵੁਤ੍ਤੋਤਿ.
ਸਭਾਵਤੋ ਉਪਕਾਰਕਤੋ ਮਗ੍ਗੇ ਸਤਿ ਸਬ੍ਭਾਵਤੋ ਚ ਬੋਜ੍ਝਙ੍ਗਾ ਮਗ੍ਗੇ ਅਨ੍ਤੋਗਧਾਤਿ ਆਹ ‘‘ਨ ਚ ਨ ਸਕ੍ਕਾ’’ਤਿਆਦਿ.
ਕਮ੍ਮਪਥਂ ਅਪ੍ਪਤ੍ਤਾਨਮ੍ਪਿ ਤਂਤਂਦ੍ਵਾਰੇ ਸਂਸਨ੍ਦਨਨ੍ਤਿ ਯਥਾ ਕਮ੍ਮਪਥਂ ਪਤ੍ਤਾਨਂ, ਏਵਂ ਕਮ੍ਮਪਥਂ ਅਪ੍ਪਤ੍ਤਾਨਮ੍ਪਿ ਸਤਿਪਿ ਦ੍ਵਾਰਨ੍ਤਰੁਪ੍ਪਤ੍ਤਿਯਂ ਯਥਾਸਕਂ ਦ੍ਵਾਰੇਹੇਵ ਨਾਮਗ੍ਗਹਣਨ੍ਤਿ ਵਦਨ੍ਤਿ, ਏਵਂ ਸਤਿ ਅਟ੍ਠਕਥਾਯ ਵਿਰੋਧੋ. ਦੁਤਿਯਤ੍ਥਸ੍ਸ ਚ ਅਭਾਵੋ ਸਿਯਾ, ਤਸ੍ਮਾ ਤਂਤਂਦ੍ਵਾਰੇ ਸਂਸਨ੍ਦਨਨ੍ਤਿ ਯਸ੍ਮਿਂ ਯਸ੍ਮਿਂ ਦ੍ਵਾਰੇ ਕਮ੍ਮਪਥਂ ਅਪ੍ਪਤ੍ਤਾ ਅਕੁਸਲਚੇਤਨਾਦਯੋ ਪਵਤ੍ਤਾ, ਤਾਸਂ ਤੇਨ ਤੇਨੇਵ ਦ੍ਵਾਰੇਨ ਨਾਮਗ੍ਗਹਣਂ. ਤਂ ਪਨ ਤਂਤਂਦ੍ਵਾਰਪਕ੍ਖਿਕਭਾਵਕਰਣਤੋ ਤਤ੍ਥ ਅਵਰੋਧਨਨ੍ਤਿ ਵੁਤ੍ਤਂ. ਯਥਾ ਹਿ ਕਮ੍ਮਪਥਂ ਪਤ੍ਤਾ ਕਾਯਕਮ੍ਮਾਦਿਸਙ੍ਖਾਤਾ ਚੇਤਨਾ ਦ੍ਵਾਰਨ੍ਤਰੇ ਉਪ੍ਪਨ੍ਨਾਪਿ ਕਾਯਕਮ੍ਮਾਦਿਨਾਮਮੇਵ ਲਭਨ੍ਤਿ, ਨ ਏਵਂ ਕਮ੍ਮਪਥਂ ਅਪ੍ਪਤ੍ਤਾ. ਤਾ ਪਨ ਯਤ੍ਥ ਯਤ੍ਥ ਦ੍ਵਾਰੇ ਉਪ੍ਪਜ੍ਜਨ੍ਤਿ, ਤੇਨ ਤੇਨੇਵ ਦ੍ਵਾਰੇਨ ਕਾਯਦੁਚ੍ਚਰਿਤਂ ਵਚੀਦੁਚ੍ਚਰਿਤਨ੍ਤਿਆਦਿਨਾਮਂ ਲਭਨ੍ਤਿ. ਏਵਂ ਨਾਮਗ੍ਗਹਣਮੇਵ ਹਿ ਤੇਸਂ ਤਂਤਂਦ੍ਵਾਰਪਕ੍ਖਿਕਕਰਣਂ ਵੁਤ੍ਤਂ. ਤੇਨੇਵ ਹਿ ਅਟ੍ਠਕਥਾਯਂ ‘‘ਕਿਞ੍ਚਾਪਿ ਵਚੀਦ੍ਵਾਰੇ ਚੋਪਨਪ੍ਪਤ੍ਤਂ ਕਮ੍ਮਪਥਂ, ਅਪ੍ਪਤ੍ਤਤਾਯ ਪਨ ਕਾਯਕਮ੍ਮਂ ਨ ਹੋਤਿ, ਕੇਵਲਂ ਵਚੀਦੁਚ੍ਚਰਿਤਂ ਨਾਮ ਹੋਤੀ’’ਤਿ ਵੁਤ੍ਤਂ.
ਸਤਿਪਿ ਪਾਣਾਤਿਪਾਤਾਦਿਚੇਤਨਾਯ ਵਚੀਦ੍ਵਾਰਾਦੀਸੁ ਪਵਤ੍ਤਿਯਂ ਯਥਾਵੁਤ੍ਤਯੇਭੁਯ੍ਯਤਬ੍ਬਹੁਲਵੁਤ੍ਤਿਯਾ ਕਾਯਕਮ੍ਮਾਦਿਭਾਵਵਵਤ੍ਥਾਪਨਂ ਕਾਯਾਦਿਕਸ੍ਸ ਤਂਤਂਦ੍ਵਾਰਭਾਵਵਵਤ੍ਥਾਪਨਞ੍ਚ ਕਮ੍ਮਦ੍ਵਾਰਾਭੇਦਨਂ. ਤਞ੍ਹਿ ਕਮ੍ਮਦ੍ਵਾਰਾਨਂ ਅਸਂਕਿਣ੍ਣਭਾਵੇਨ ਪਤਿਟ੍ਠਾਪਨਂ. ਯਂ ਸਨ੍ਧਾਯ ‘‘ਆਣਤ੍ਤਿਸਮੁਟ੍ਠਿਤੇਸੂ’’ਤਿ ਅਟ੍ਠਕਥਾਯਂ ਵਕ੍ਖਤਿ. ਕੇਚਿ ਪਨ ‘‘ਏਕੇਕਸ੍ਮਿਂ ਦ੍ਵਾਰੇ ਅਨੇਕੇਸਂ ਕਮ੍ਮਾਨਂ ਪਵਤ੍ਤਿਦਸ੍ਸਨਮ੍ਪਿ ਦ੍ਵਾਰਸਂਸਨ੍ਦਨ’’ਨ੍ਤਿ ਵਦਨ੍ਤਿ. ਯਥਾ ਪਵਤ੍ਤੋ ਬ੍ਯਾਪਾਦੋ ਕਮ੍ਮਪਥੋ ਹੋਤਿ, ਤਂ ਦਸ੍ਸੇਤੁਂ ‘‘ਇਮੇ ਸਤ੍ਤਾ ਹਞ੍ਞਨ੍ਤੂ’’ਤਿ ਪਵਤ੍ਤਿ ਬ੍ਯਾਪਾਦਸ੍ਸ ਦਸ੍ਸਿਤਾ. ਕਾਯਦ੍ਵਾਰਿਕਚੇਤਨਾਯ ਸਹਕਾਰੀਕਾਰਣਭਾਵਤੋ ਕਾਯਕਮ੍ਮਵੋਹਾਰਲਾਭਾ, ਅਭਿਜ੍ਝਾਦੀਨਂ ਪਰਸਨ੍ਤਕਸ੍ਸ ਅਤ੍ਤਨੋ ਪਰਿਣਾਮਨਵਸੇਨ ‘‘ਇਮੇ ਸਤ੍ਤਾ ਹਞ੍ਞਨ੍ਤੂ’’ਤਿਆਦਿਨਾ ਚ ਅਪ੍ਪਵਤ੍ਤਤ੍ਤਾ ਮਨੋਕਮ੍ਮਵੋਹਾਰਵਿਰਹਾ, ਅਚੇਤਨਾਸਭਾਵਤੋ ਵਾ ਪਾਣਾਤਿਪਾਤਾਦਿਵਸੇਨ ਅਬ੍ਬੋਹਾਰਿਕਾ, ਪਾਣਾਤਿਪਾਤਾਦਿਭਾਵੇਨ ਨ ਵਤ੍ਤਬ੍ਬਾਤਿ ਅਤ੍ਥੋ. ਏਤ੍ਥਾਤਿ ਅਬ੍ਬੋਹਾਰਿਕਭਾਵੇ.
ਦਸਵਿਧਾ ਇਦ੍ਧਿ…ਪੇ… ਤਬ੍ਬਾ ਵਿਤ੍ਥਾਰੇਨਾਤਿ ਅਧਿਪ੍ਪਾਯੋ.
ਤੇਨਾਧਿਪ੍ਪੇਤਨ੍ਤਿ ‘‘ਅਕੁਸਲਂ ਵਚੀਕਮ੍ਮਂ ਮਨੋਦ੍ਵਾਰੇ ਸਮੁਟ੍ਠਾਤੀ’’ਤਿ ਵਦਨ੍ਤੇਨ ਅਧਿਪ੍ਪੇਤਂ. ‘‘ਨ ਉਪੋਸਥਕ੍ਖਨ੍ਧਕੇ ਵੁਤ੍ਤ’’ਨ੍ਤਿ ਕਸ੍ਮਾ ਵੁਤ੍ਤਂ, ਨਨੁ ਤੇਨ ਉਪੋਸਥਕ੍ਖਨ੍ਧਕਤੋ ਸੁਤ੍ਤਂ ਆਹਟਨ੍ਤਿ? ਕਿਞ੍ਚਾਪਿ ਆਹਟਂ, ਤਤ੍ਥ ਅਵੁਤ੍ਤੋਯੇਵ ਪਨ ਸੋ ਤੇਨ ਵੁਤ੍ਤੋਤਿ ਗਹਿਤੋਤਿ ਦਸ੍ਸੇਨ੍ਤੋ ‘‘ਤਤ੍ਥ ਅਵੁਤ੍ਤਮੇਵਾ’’ਤਿਆਦਿਮਾਹ.
‘‘ਸੁਗਤਿਦੁਗ੍ਗਤੀਸੁ ਉਪਪਜ੍ਜਨਂ ਸੁਕਤਦੁਕ੍ਕਟਕਮ੍ਮਤੋ ਨ ਹੋਤਿ, ਖਨ੍ਧਸਿਵਾਦੀਹਿ ਪਨ ਹੋਤੀਤਿ ਗਹੇਤ੍ਵਾ ‘ਨਤ੍ਥਿ ਦਿਨ੍ਨ’ਨ੍ਤਿਆਦਿਨਾ ਪਰਾਮਸਨ੍ਤਸ੍ਸ ਵਸੇਨ ‘ਮਿਚ੍ਛਾਦਿਟ੍ਠਿ…ਪੇ… ਪਰਿਭਣ੍ਡਾਦੀਨਿ ਕਰੋਤੀ’ਤਿ ਵੁਤ੍ਤ’’ਨ੍ਤਿ ਵਦਨ੍ਤਿ. ਅਭਿਜ੍ਝਾਦਿਪਧਾਨਤ੍ਤਾਤਿ ਏਤੇਨ ਵਿਜ੍ਜਮਾਨੇਸੁਪਿ ਬ੍ਯਾਪਾਦਾਦੀਸੁ ਯਦਾ ਕਾਯਵਚੀਦ੍ਵਾਰੇਸੁ ਚੇਤਨਾ ਬਲਵਤੀ ਹੋਤਿ, ਨ ਤਥਾ ਇਤਰੇ, ਤਦਾ ਪਧਾਨਭਾਵਤੋ ਚੇਤਨਾ ਕਾਯਕਮ੍ਮਂ ਵਚੀਕਮ੍ਮਨ੍ਤਿ ਚ ਵੋਹਾਰਂ ਲਭਤਿ. ਸੋ ਖੋ ਪਨਸ੍ਸਾ ਪਧਾਨਭਾਵੋ ਪਾਣਾਤਿਪਾਤਾਦਿਸਿਦ੍ਧਿਯਾ ਵਿਞ੍ਞਾਯਤਿ. ਯਦਾ ਪਨ ਤੇਸੁਯੇਵ ਦ੍ਵਾਰੇਸੁ ਅਭਿਜ੍ਝਾਦਯੋ ਬਲਵਨ੍ਤੋ ਹੋਨ੍ਤਿ, ਨ ਤਥਾ ਚੇਤਨਾ, ਤਦਾ ਤਤ੍ਥ ਵਿਜ੍ਜਮਾਨਾਪਿ ਚੇਤਨਾ ਅਪਧਾਨਭਾਵਤੋ ਕਾਯਕਮ੍ਮਂ ਵਚੀਕਮ੍ਮਨ੍ਤਿ ਚ ਵੋਹਾਰਂ ਨ ਲਭਤਿ. ਅਭਿਜ੍ਝਾਦਯੋ ਪਨ ਪਧਾਨਭਾਵਤੋ ਸਤਿਪਿ ਕਾਯਙ੍ਗਵਾਚਙ੍ਗਚੋਪਨੇ ਸਕੇਨ ਵਵਤ੍ਥਾਨੇਨ ਮਨੋਕਮ੍ਮਨ੍ਤ੍ਵੇਵ ਵੁਚ੍ਚਨ੍ਤੀਤਿ ਦਸ੍ਸੇਤਿ. ਯੇ ਪਨ ‘‘ਤੀਸੁਪਿ ਦ੍ਵਾਰੇਸੁ ਕਮ੍ਮਪਥਭਾਵੇਨ ਅਪ੍ਪਤ੍ਤਿਯਾ ਦ੍ਵਾਰਤ੍ਤਯੇਪਿ ਕਮ੍ਮਪਥਪ੍ਪਤ੍ਤਮਨੋਕਮ੍ਮੇਨ ਸਹ ਪਵਤ੍ਤਿਯਾ ਚ ਚੇਤਨਾ ਏਤ੍ਥ ਕਮ੍ਮਨ੍ਤਿ ਨ ਵੁਚ੍ਚਤੀ’’ਤਿ ਵਦਨ੍ਤਿ, ਤੇਹਿ ਅਭਿਜ੍ਝਾਦੀਨਂ ਪਧਾਨਸਭਾਵਂਯੇਵ ਸਨ੍ਧਾਯ ਵੁਤ੍ਤਂ ਸਿਯਾ. ਅਥ ਵਾ ਚੇਤਨਾਯ ਨਿਪ੍ਪਰਿਯਾਯਕਮ੍ਮਭਾਵਤੋ ਪਰਿਯਾਯਕਮ੍ਮੇ ਅਨਵਰੋਧੇਤਬ੍ਬਤ੍ਤਾ ‘‘ਅਬ੍ਬੋਹਾਰਿਕਾ’’ਤਿ ਵੁਤ੍ਤਂ. ਅਤ੍ਤਨੋ ਸਭਾਵੇਨੇਵ ਪਨ ਸਾ ਏਤ੍ਥਾਪਿ ਕਮ੍ਮਨ੍ਤਿ ਵੁਚ੍ਚਤਿ. ਯਥਾਹ ‘‘ਚੇਤਨਾਹਂ, ਭਿਕ੍ਖਵੇ, ਕਮ੍ਮਂ ਵਦਾਮੀ’’ਤਿਆਦਿ (ਕਥਾ. ੫੩੯). ਅਟ੍ਠਕਥਾਯਞ੍ਚ ‘‘ਤਸ੍ਮਿਂ ਦ੍ਵਾਰੇ ਸਿਦ੍ਧਾ ਚੇਤਨਾ’’ਤਿਆਦਿਨਾ ਚੇਤਨਾਯੇਵ ਪਧਾਨਂ ਕਤ੍ਵਾ ਵੁਤ੍ਤਂ. ਤੇਨੇਵਾਹ ‘‘ਸਭਾਵੇਨੇਵ ਸਾ ਮਨੋਕਮ੍ਮ’’ਨ੍ਤਿਆਦਿ. ਅਥ ਵਾ ਕਮ੍ਮਪਥਪ੍ਪਤ੍ਤਅਭਿਜ੍ਝਾਦੀਹਿ ਕਾਯਵਚੀਦ੍ਵਾਰੇ ਸਹਜਾਤਾ ਚੇਤਨਾ ਕਾਯਵਚੀਕਮ੍ਮਵਸੇਨ ਅਬ੍ਬੋਹਾਰਿਕਾ ਚੇਤਨਾਸਙ੍ਖਾਤਮਨੋਕਮ੍ਮਤ੍ਤਾਤਿ. ਯਦਿ ਅਭਿਜ੍ਝਾਦਯੋ ਪਧਾਨਾ, ਨ ਚੇਤਨਾ, ਏਵਂ ਸਤਿ ਅਭਿਜ੍ਝਾਦਯੋ ਚੇਤ੍ਥ ਕਮ੍ਮਂ, ਨ ਚੇਤਨਾ, ਅਭਿਜ੍ਝਾਦਿਪਕ੍ਖਿਕਾ ਵਾ ਸਾ ਸਿਯਾਤਿ ਅਨੁਯੋਗਂ ਮਨਸਿ ਕਤ੍ਵਾ ਆਹ ‘‘ਤਿਵਿਧਾ, ਭਿਕ੍ਖਵੇ’’ਤਿਆਦਿ. ‘‘ਚੇਤਨਾਪਿ…ਪੇ… ਮਨੋਦ੍ਵਾਰੇ ਏਵ ਸਮੁਟ੍ਠਹਨ੍ਤੀ’’ਤਿ ਇਦਂ ਮਨੋਦ੍ਵਾਰੇ ਚੇਤਨਾਯ ਅਭਿਜ੍ਝਾਦੀਹਿ ਮਨੋਕਮ੍ਮਭਾਵੇ ਨਿਬ੍ਬਿਸੇਸਭਾਵਦਸ੍ਸਨਨ੍ਤਿ ਕਤ੍ਵਾ ‘‘ਚੇਤਨਾ…ਪੇ… ਅਧਿਪ੍ਪਾਯੋ’’ਤਿ ਆਹ. ਚੇਤਨਾ ਚੇਤਨਾਕਮ੍ਮਂ, ਅਭਿਜ੍ਝਾਦਯੋ ਚੇਤਨਾਸਮ੍ਪਯੁਤ੍ਤਕਮ੍ਮਨ੍ਤਿ ਏਤ੍ਤਕਮੇਵ ਹਿ ਏਤ੍ਥ ਵਿਸੇਸੋਤਿ. ਏਤ੍ਥ ਚ ਚੇਤਨਾਯ ਕਾਯਵਚੀਕਮ੍ਮਭਾਵੋ ਸਿਯਾਤਿ ਆਸਙ੍ਕਾਯ ਅਭਾਵਤੋ ਮਨੋਦ੍ਵਾਰੇ ਅਕੁਸਲਕਾਯਵਚੀਕਮ੍ਮਾਨਂ ਅਨੁਪ੍ਪਤ੍ਤਿਤੋ ਚ ਅਬ੍ਬੋਹਾਰਿਕਾਤਿ ਨ ਵੁਤ੍ਤਨ੍ਤਿ ਦਟ੍ਠਬ੍ਬਂ.
ਵਿਰਤਿਵਿਸਿਟ੍ਠਾਤਿ ਵਿਰਤਿਤੋ ਚੇਤਨਾਯ ਪਧਾਨਭਾਵਮਾਹ. ਤਤ੍ਥ ‘‘ਤਿਵਿਧਾ, ਭਿਕ੍ਖਵੇ, ਕਾਯਸਞ੍ਚੇਤਨਾ’’ਤਿਆਦਿਨਾ (ਕਥਾ. ੫੩੯) ਆਗਮਮ੍ਹਿ ‘‘ਪਾਣਾਤਿਪਾਤਾਦਿਪਟਿਪਕ੍ਖਭੂਤਾ’’ਤਿ ਯੁਤ੍ਤਿਂ ਦਸ੍ਸੇਤਿ. ਯਸ੍ਮਾ ਚ ਪਟ੍ਠਾਨੇ ਚੇਤਨਾਵ ‘‘ਕਮ੍ਮਪਚ੍ਚਯੋ’’ਤਿ ਵੁਤ੍ਤਾ, ਨ ਵਿਰਤਿ, ਅਭਿਜ੍ਝਾਦਯੋ ਵਾ, ਤਸ੍ਮਾ ਨਿਪ੍ਪਰਿਯਾਯੇਨ ਕਮ੍ਮਂ ‘‘ਚੇਤਨਾ’’ਤਿ ਅਨਭਿਜ੍ਝਾਦਯੋ ‘‘ਚੇਤਨਾਪਕ੍ਖਿਕਾ ਵਾ’’ਤਿ ਵੁਤ੍ਤਾਤਿ ਵੇਦਿਤਬ੍ਬਂ. ਅਸਙ੍ਕਰਤੋ ਕਮ੍ਮਦ੍ਵਾਰਾਨਿ ਵਵਤ੍ਥਪੇਨ੍ਤੋ ‘‘ਰਕ੍ਖਤੀ’’ਤਿ, ਵਿਪਰਿਯਾਯੇਨ ‘‘ਭਿਨ੍ਦਤੀ’’ਤਿ ਵੁਤ੍ਤੋਤਿ ਰਕ੍ਖਣਭਿਨ੍ਦਨਾਨਿ ਅਨਾਸੇਤ੍ਵਾ ਨਾਸੇਤ੍ਵਾ ਚ ਕਥਨਨ੍ਤਿ ਵੁਤ੍ਤਾਨੀਤਿ.
ਕਮ੍ਮਕਥਾਵਣ੍ਣਨਾ ਨਿਟ੍ਠਿਤਾ.
ਤਤਿਯੋ ਵਿਕਪ੍ਪੋ ਪਠਮਚਤੁਤ੍ਥਵਿਞ੍ਞਾਣਦ੍ਵਾਰੇਸੁਯੇਵ ਲਬ੍ਭਤਿ, ਨ ਇਤਰਤ੍ਥ ‘‘ਸੋਤਂ ਘਾਨ’’ਨ੍ਤਿਆਦਿਨਾ ਅਵੁਤ੍ਤਤ੍ਤਾ, ਇਤਰਥਾਪਿ ਵਾ ਅਵਿਭਤ੍ਤਿਕੇ ਨਿਦ੍ਦੇਸੇ ਲਬ੍ਭਤਿ. ਯਤੋ ਸਂਵਰਵਸੇਨ ਪਾਤਿਮੋਕ੍ਖਸੀਲਂ ਪਵਤ੍ਤਤਿ, ਤਂ ਦੁਸ੍ਸੀਲ੍ਯਨ੍ਤਿ ਆਹ ‘‘ਦੁਸ੍ਸੀਲ੍ਯਂ ਪਾਣਾਤਿਪਾਤਾਦਿਚੇਤਨਾ’’ਤਿ. ਇਤਰਾ ਸਂਵਰਵਿਨਿਮੁਤ੍ਤਾ ਅਭਿਜ੍ਝਾਦੋਮਨਸ੍ਸਯੁਤ੍ਤਾ ਤਪ੍ਪਧਾਨਾ ਵਾ ਅਕੁਸਲਧਮ੍ਮਾ ਸਤਿਪਟਿਪਕ੍ਖਾ ਅਕੁਸਲਾ ਧਮ੍ਮਾ. ਆਰਮ੍ਮਣੇ ਚਿਤ੍ਤਵੋਸ੍ਸਗ੍ਗਵਸੇਨ ਪਵਤ੍ਤੋ ਅਕੁਸਲਚਿਤ੍ਤੁਪ੍ਪਾਦੋ ਪਮਾਦੋ. ਵੀਰਿਯਪਨੋਦਨਭਾਵਤੋ ਥਿਨਮਿਦ੍ਧਂ ‘‘ਕੋਸਜ੍ਜ’’ਨ੍ਤਿ ਵੁਤ੍ਤਂ, ਥਿਨਮਿਦ੍ਧਪ੍ਪਧਾਨੋ ਵਾ ਚਿਤ੍ਤੁਪ੍ਪਾਦੋ.
ਅਸੁਦ੍ਧਤਾਤਿ ਅਕੇਵਲਤਾ ਅਞ੍ਞੇਨ ਸਮ੍ਮਿਸ੍ਸਤਾ. ਦ੍ਵਾਰਞ੍ਹਿ ਦ੍ਵਾਰਨ੍ਤਰਿਕਕਮ੍ਮਸ੍ਸ ਦ੍ਵਾਰਂ ਹੋਨ੍ਤਂ ਤੇਨ ਮਿਸ੍ਸਿਤਂ ਵਿਯ ਹੋਤਿ. ਤੇਨੇਵਾਹ ‘‘ਮੁਸਾਵਾਦਾਦਿਨੋਪਿ ਕਾਯਦ੍ਵਾਰੇ ਪਵਤ੍ਤਿਸਬ੍ਭਾਵਾ’’ਤਿ. ਕੇਚਿ ਪਨ ‘‘ਅਵਿਞ੍ਞੇਯ੍ਯਮਾਨਨ੍ਤਰਾਨਂ ਦ੍ਵਾਰਨ੍ਤਰਚਿਤ੍ਤਾਨਂ ਅਨ੍ਤਰਨ੍ਤਰਾ ਅਪ੍ਪਵਤ੍ਤਿਤੋ ਸੁਦ੍ਧਨ੍ਤਿ ਵੁਤ੍ਤ’’ਨ੍ਤਿ ਵਦਨ੍ਤਿ, ਤਂ ਅਨੇਕਸ੍ਸਪਿ ਜਵਨਵਾਰਸ੍ਸ ਕਾਯਕਮ੍ਮਾਦਿਭਾਵੇਨ ਪਬਨ੍ਧਨਵਸੇਨ ਪਵਤ੍ਤਿ ਅਤ੍ਥੀਤਿ ਕਤ੍ਵਾ ਵੁਤ੍ਤਂ. ਅਵਿਰੁਦ੍ਧਂ ਹੋਤੀਤਿ ਅਕੁਸਲਕਾਯਕਮ੍ਮਾਦਿਭਾਵੇਨ ਅਵਧਾਰੇਤ੍ਵਾ ਅਸਂਵਰਂ ਵਤ੍ਵਾ ਪੁਨ ਤਸ੍ਸੇਵ ਵਾਚਾਅਸਂਵਰਦ੍ਵਾਰਾਦੀਸੁ ਉਪ੍ਪਤ੍ਤਿਵਚਨਂ ਕਾਯਦ੍ਵਾਰੂਪਲਕ੍ਖਿਤੋ ਅਸਂਵਰੋ ਦ੍ਵਾਰਨ੍ਤਰੇ ਪਵਤ੍ਤੋਪਿ ਕਾਯਦ੍ਵਾਰਿਕੋ ਏਵਾਤਿ ਏਵਂ ਸਂਵਣ੍ਣਨਾਯ ਸਤਿ ਨ ਵਿਰੁਜ੍ਝਤੀਤਿ ਅਤ੍ਥੋ. ਇਦਾਨਿ ਤਂ ਅਵਿਰੁਜ੍ਝਨਾਕਾਰਂ ‘‘ਅਸਂਵਰੋ ਹੀ’’ਤਿਆਦਿਨਾ ਵਿਭਾਵੇਤਿ. ਸਦ੍ਵਾਰੇਤਿ ਅਤ੍ਤਨੋ ਦ੍ਵਾਰੇ. ਅਸਂਵਰੋ ਦ੍ਵਾਰਨ੍ਤਰੇ ਉਪ੍ਪਜ੍ਜਮਾਨੋਪਿ ਸਦ੍ਵਾਰਵਸੇਨ ਉਪ੍ਪਨ੍ਨੋਤਿ ਵੁਚ੍ਚਤੀਤਿ ਏਤੇਨ ਵਾਚਾਅਸਂਵਰਦ੍ਵਾਰੇ ਉਪ੍ਪਨ੍ਨੋਪਿ ਕਾਯਿਕੋ ਅਸਂਵਰੋ ਚੋਪਨਕਾਯਅਸਂਵਰਦ੍ਵਾਰਵਸੇਨ ਉਪ੍ਪਨ੍ਨੋਤ੍ਵੇਵ ਵੁਤ੍ਤੋਤਿ ਦਟ੍ਠਬ੍ਬਂ. ਏਸ ਨਯੋ ਇਤਰਤ੍ਥਾਪਿ. ਕਮ੍ਮਂ ਅਞ੍ਞਦ੍ਵਾਰੇਤਿ ਕਮ੍ਮਸ੍ਸ ਦ੍ਵਾਰਨ੍ਤਰਚਰਣਂ ਪਾਕਟਨ੍ਤਿ ਕਤ੍ਵਾ ਵੁਤ੍ਤਂ.
ਏਵਂ ਸਤੀਤਿ ਚੋਪਨਸਙ੍ਖਾਤੇ ਕਾਯਅਸਂਵਰਦ੍ਵਾਰੇ ਅਸਂਵਰੋਤਿ ਏਤ੍ਤਕੇ ਏਵ ਗਹਿਤੇ. ਕਮ੍ਮਪਥਭਾਵਪ੍ਪਤ੍ਤਸ੍ਸੇਵ ਕਮ੍ਮਭਾਵੋ ਅਟ੍ਠਕਥਾਯਂ ਵੁਤ੍ਤੋਤਿ ਆਹ ‘‘ਕਮ੍ਮਪਥਭਾਵਪ੍ਪਤ੍ਤਤਾਯ ਵਚੀਮਨੋਕਮ੍ਮ’’ਨ੍ਤਿ. ਸੇਸਨ੍ਤਿ ਦ੍ਵਾਰਨ੍ਤਰਾਨੁਪਲਕ੍ਖਿਤਂ. ਤਥਾ ਨ ਵੁਚ੍ਚਤੀਤਿ ਕਾਯਕਮ੍ਮਨ੍ਤਿ ਨ ਵੁਚ੍ਚਤੀਤਿ ਅਤ੍ਥੋ. ਤਤ੍ਥੇਵ ਵਕ੍ਖਾਮਾਤਿ ਕਮ੍ਮਪਥਸਂਸਨ੍ਦਨੇ ਵਕ੍ਖਾਮ. ‘‘ਸੋ ਹਿ ਕਾਯਦ੍ਵਾਰੇ ਚੋਪਨਪ੍ਪਤ੍ਤੋ ਅਕੁਸਲਂ ਕਾਯਕਮ੍ਮਂ ਹੋਤੀ’’ਤਿਆਦਿਨਾ (ਧ. ਸ. ਅਟ੍ਠ. ਕਮ੍ਮਪਥਸਂਸਨ੍ਦਨਕਥਾ) ‘‘ਚੋਪਨਕਾਯਅਸਂਵਰਦ੍ਵਾਰਵਸੇਨ ਉਪ੍ਪਨ੍ਨੋ ਅਕੁਸਲਂ ਕਾਯਕਮ੍ਮਮੇਵ ਹੋਤੀ’’ਤਿਆਦਿਨਾ ਚ ਵਚੀਕਮ੍ਮਾਦੀਨਞ੍ਚ ਕਮ੍ਮਪਥਪ੍ਪਤ੍ਤਾਨਂ ਅਸਂਵਰਭੂਤਾਨਂ ਕਾਯਕਮ੍ਮਾਦਿਭਾਵੇ ਆਪਨ੍ਨੇ ‘‘ਚਤੁਬ੍ਬਿਧਂ ਵਚੀਦੁਚ੍ਚਰਿਤਂ ਅਕੁਸਲਂ ਵਚੀਕਮ੍ਮਮੇਵ ਹੋਤੀ’’ਤਿਆਦਿਨਾ ਅਪਵਾਦੇਨ ਨਿਵਤ੍ਤਿ ਦਟ੍ਠਬ੍ਬਾਤਿ ਏਵਂ ਵਕ੍ਖਮਾਨਤਂ ਸਨ੍ਧਾਯਾਹ. ਅਨ੍ਤੋਗਧਤਾ ਦਟ੍ਠਬ੍ਬਾ ਪਚ੍ਚਯਸਨ੍ਨਿਸ੍ਸਿਤਆਜੀਵਪਾਰਿਸੁਦ੍ਧਿਸੀਲਾਨਂ ਞਾਣਵੀਰਿਯੇਹਿ ਸਾਧੇਤਬ੍ਬਤ੍ਤਾਤਿ ਅਧਿਪ੍ਪਾਯੋ.
ਅਕੁਸਲਕਮ੍ਮਪਥਕਥਾਵਣ੍ਣਨਾ
ਸਰਸੇਨ ਅਤ੍ਤਨੋ ਸਭਾਵੇਨ. ਯਾਯ ਚੇਤਨਾਯ ਪਵਤ੍ਤਮਾਨਸ੍ਸ ਜੀਵਿਤਿਨ੍ਦ੍ਰਿਯਸ੍ਸ ਪਚ੍ਚਯਭੂਤੇਸੁ ਮਹਾਭੂਤੇਸੁ ਉਪਕ੍ਕਮਕਰਣਹੇਤੁ ਤਂਮਹਾਭੂਤਪਚ੍ਚਯਾ ਉਪ੍ਪਜ੍ਜਨਕਮਹਾਭੂਤਾ ਨੁਪ੍ਪਜ੍ਜਿਸ੍ਸਨ੍ਤਿ, ਸਾ ਤਾਦਿਸਪਯੋਗਸਮੁਟ੍ਠਾਪਿਕਾ ਚੇਤਨਾ ਪਾਣਾਤਿਪਾਤੋ ਨਾਮ. ਲਦ੍ਧੁਪਕ੍ਕਮਾਨਿ ਹਿ ਭੂਤਾਨਿ ਨ ਪੁਰਿਮਭੂਤਾਨਿ ਵਿਯ ਵਿਸਦਾਨੀਤਿ ਸਮਾਨਜਾਤਿਯਾਨਂ ਭੂਤਾਨਂ ਕਾਰਣਂ ਨ ਹੋਨ੍ਤੀਤਿ. ਏਕਸ੍ਸਪਿ ਪਯੋਗਸ੍ਸ ਸਹਸਾ ਨਿਪ੍ਫਾਦਨਵਸੇਨ ਕਿਚ੍ਚਸਾਧਿਕਾਯ ਬਹੁਕ੍ਖਤ੍ਤੁਂ ਪਵਤ੍ਤਜਵਨੇਹਿ ਲਦ੍ਧਾਸੇਵਨਾਯ ਚ ਸਨ੍ਨਿਟ੍ਠਾਪਕਚੇਤਨਾਯ ਵਸੇਨ ਪਯੋਗਸ੍ਸ ਮਹਨ੍ਤਭਾਵੋ. ਸਤਿਪਿ ਕਦਾਚਿ ਖੁਦ੍ਦਕੇ ਚੇਵ ਮਹਨ੍ਤੇ ਚ ਪਾਣੇ ਪਯੋਗਸ੍ਸ ਸਮਭਾਵੇ ਮਹਨ੍ਤਂ ਹਨਨ੍ਤਸ੍ਸ ਚੇਤਨਾ ਤਿਬ੍ਬਤਰਾ ਉਪ੍ਪਜ੍ਜਤੀਤਿ ਵਤ੍ਥੁਸ੍ਸ ਮਹਨ੍ਤਭਾਵੋਤਿ ਤਦੁਭਯਂ ਚੇਤਨਾਯ ਬਲਵਭਾਵੇਨੇਵ ਹੋਤੀਤਿ ਆਹ ‘‘ਪਯੋਗ…ਪੇ… ਭਾਵਤੋ’’ਤਿ. ਯਥਾਵੁਤ੍ਤਪਚ੍ਚਯਵਿਪਰਿਯਾਯੇਪੀਤਿ ਪਯੋਗਵਤ੍ਥੁਆਦਿਪਚ੍ਚਯਾਨਂ ਅਮਹਤ੍ਤੇਪਿ. ਤਂਤਂਪਚ੍ਚਯੇਹੀਤਿ ਗੁਣਵਨ੍ਤਤਾਦਿਪਚ੍ਚਯੇਹਿ. ਏਤ੍ਥ ਚ ਹਨ੍ਤਬ੍ਬਸ੍ਸ ਗੁਣਵਨ੍ਤਤਾਯ ਮਹਾਸਾਵਜ੍ਜਤਾ ਵਤ੍ਥੁਮਹਨ੍ਤਤਾਯ ਵਿਯ ਦਟ੍ਠਬ੍ਬਾ. ਕਿਲੇਸਾਨਂ ਉਪਕ੍ਕਮਾਨਂ ਦ੍ਵਿਨ੍ਨਞ੍ਚ ਮੁਦੁਤਾਯ ਤਿਬ੍ਬਤਾਯ ਚ ਅਪ੍ਪਸਾਵਜ੍ਜਤਾ ਮਹਾਸਾਵਜ੍ਜਤਾ ਚ ਯੋਜੇਤਬ੍ਬਾ. ਪਾਣੋ ਪਾਣਸਞ੍ਞਿਤਾ ਵਧਕਚਿਤ੍ਤਞ੍ਚ ਪੁਬ੍ਬਭਾਗਸਮ੍ਭਾਰਾ, ਉਪਕ੍ਕਮੋ ਵਧਕਚੇਤਨਾਸਮੁਟ੍ਠਾਪਿਤੋ, ਪਞ੍ਚਸਮ੍ਭਾਰਵਤੀ ਪਾਣਾਤਿਪਾਤਚੇਤਨਾਤਿ ਸਾ ਪਞ੍ਚਸਮ੍ਭਾਰਵਿਨਿਮੁਤ੍ਤਾ ਦਟ੍ਠਬ੍ਬਾ. ਏਸ ਨਯੋ ਅਦਿਨ੍ਨਾਦਾਨਾਦੀਸੁਪਿ.
ਮਨ੍ਤਪਰਿਜਪ੍ਪਨੇਨ ਪਰਸ੍ਸ ਸਨ੍ਤਕਹਰਣਂ ਵਿਜ੍ਜਾਮਯੋ, ਵਿਨਾ ਮਨ੍ਤੇਨ ਪਰਸਨ੍ਤਕਸ੍ਸ ਕਾਯਵਚੀਪਯੋਗੇਹਿ ਆਕਡ੍ਢਨਂ ਤਾਦਿਸਇਦ੍ਧਿਯੋਗੇਨ ਇਦ੍ਧਿਮਯੋ ਪਯੋਗੋਤਿ ਅਦਿਨ੍ਨਾਦਾਨਸ੍ਸਪਿ ਛ ਪਯੋਗਾ ਸਾਹਤ੍ਥਿਕਾਦਯੋ ਵੇਦਿਤਬ੍ਬਾ.
ਅਭਿਭਵਿਤ੍ਵਾ ਵੀਤਿਕ੍ਕਮਨੇ ਮਿਚ੍ਛਾਚਾਰੋ ਮਹਾਸਾਵਜ੍ਜੋ, ਨ ਤਥਾ ਉਭਿਨ੍ਨਂ ਸਮਾਨਚ੍ਛਨ੍ਦਭਾਵੇ. ‘‘ਚਤ੍ਤਾਰੋ ਸਮ੍ਭਾਰਾਤਿ ਵੁਤ੍ਤਤ੍ਤਾ ਅਭਿਭਵਿਤ੍ਵਾ ਵੀਤਿਕ੍ਕਮਨੇ ਸਤਿਪਿ ਮਗ੍ਗੇਨਮਗ੍ਗਪਟਿਪਤ੍ਤਿਅਧਿਵਾਸਨੇ ਪੁਰਿਮੁਪ੍ਪਨ੍ਨਸੇਵਨਾਭਿਸਨ੍ਧਿਪਯੋਗਾਭਾਵਤੋ ਮਿਚ੍ਛਾਚਾਰੋ ਨ ਹੋਤਿ ਅਭਿਭੁਯ੍ਯਮਾਨਸ੍ਸਾ’’ਤਿ ਵਦਨ੍ਤਿ. ਸੇਵਨਚਿਤ੍ਤੇ ਸਤਿ ਪਯੋਗਾਭਾਵੋ ਨ ਪਮਾਣਂ ਇਤ੍ਥਿਯਾ ਸੇਵਨਪ੍ਪਯੋਗਸ੍ਸ ਯੇਭੁਯ੍ਯੇਨ ਅਭਾਵਤੋ. ਪੁਰਿਸਸ੍ਸੇਵ ਹਿ ਯੇਭੁਯ੍ਯੇਨ ਸੇਵਨਪ੍ਪਯੋਗੋ ਹੋਤੀਤਿ ਇਤ੍ਥਿਯਾ ਪੁਰੇਤਰਂ ਸੇਵਨਚਿਤ੍ਤਂ ਉਪਟ੍ਠਾਪੇਤ੍ਵਾ ਨਿਪਨ੍ਨਾਯਪਿ ਮਿਚ੍ਛਾਚਾਰੋ ਨ ਸਿਯਾਤਿ ਆਪਜ੍ਜਤਿ, ਤਸ੍ਮਾ ਪੁਰਿਸਸ੍ਸ ਵਸੇਨ ਉਕ੍ਕਂਸਤੋ ਚਤ੍ਤਾਰੋ ਸਮ੍ਭਾਰਾ ਵੁਤ੍ਤਾਤਿ ਦਟ੍ਠਬ੍ਬਂ. ਅਞ੍ਞਥਾ ਇਤ੍ਥਿਯਾ ਪੁਰਿਸਕਿਚ੍ਚਕਰਣਕਾਲੇ ਪੁਰਿਸਸ੍ਸਪਿ ਸੇਵਨਪ੍ਪਯੋਗਾਭਾਵਤੋ ਮਿਚ੍ਛਾਚਾਰੋ ਨ ਸਿਯਾਤਿ. ਕੇਚਿ ਪਨ ‘‘ਅਤ੍ਤਨੋ ਰੁਚਿਯਾ ਪਵਤ੍ਤਿਤਸ੍ਸ ਤੀਣਿ ਅਙ੍ਗਾਨਿ, ਬਲਕ੍ਕਾਰੇਨ ਪਵਤ੍ਤਿਤਸ੍ਸ ਤੀਣੀਤਿ ਸਬ੍ਬਾਨਿ ਅਗ੍ਗਹਿਤਗ੍ਗਹਣੇਨ ਚਤ੍ਤਾਰੀ’’ਤਿ ਵਦਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ.
ਦੁਟ੍ਠਚਿਤ੍ਤਸ੍ਸ ਅਮਰਣਾਧਿਪ੍ਪਾਯਸ੍ਸ ਫਰੁਸਕਾਯਵਚੀਪਯੋਗਸਮੁਟ੍ਠਾਪਿਕਾ ਫਰੁਸਚੇਤਨਾ ਫਰੁਸਵਾਚਾ. ਮਰਣਾਧਿਪ੍ਪਾਯੇ ਪਨ ਸਤਿ ਅਤ੍ਥਸਿਦ੍ਧਿਤਦਭਾਵੇਸੁ ਪਾਣਾਤਿਪਾਤਾ ਬ੍ਯਾਪਾਦਾ ਚ ਹੋਨ੍ਤੀਤਿ. ਯਂ ਪਤਿ ਫਰੁਸਵਾਚਾ ਪਯੁਜ੍ਜਤਿ, ਤਸ੍ਸ ਸਮ੍ਮੁਖਾਵ ਸੀਸਂ ਏਤਿ. ‘‘ਪਰਮ੍ਮੁਖੇਪਿ ਫਰੁਸਵਾਚਾ ਹੋਤੀ’’ਤਿ ਵਦਨ੍ਤਿ.
ਯਦਿ ਚੇਤਨਾਯ ਸਬ੍ਬਦਾ ਕਮ੍ਮਪਥਭਾਵਾਭਾਵਤੋ ਅਨਿਯਤੋ ਕਮ੍ਮਪਥਭਾਵੋਤਿ ਕਮ੍ਮਪਥਰਾਸਿਮ੍ਹਿ ਅਵਚਨਂ, ਨਨੁ ਅਭਿਜ੍ਝਾਦੀਨਮ੍ਪਿ ਕਮ੍ਮਪਥਂ ਅਪ੍ਪਤ੍ਤਾਨਂ ਅਤ੍ਥਿਤਾਯ ਅਨਿਯਤੋ ਕਮ੍ਮਪਥਭਾਵੋਤਿ ਤੇਸਮ੍ਪਿ ਕਮ੍ਮਪਥਰਾਸਿਯਂ ਅਵਚਨਂ ਆਪਜ੍ਜਤੀਤਿ? ਨਾਪਜ੍ਜਤਿ, ਕਮ੍ਮਪਥਤਾਤਂਸਭਾਗਤਾਹਿ ਤੇਸਂ ਤਤ੍ਥ ਵੁਤ੍ਤਤ੍ਤਾ. ਯਦਿ ਏਵਂ ਚੇਤਨਾਪਿ ਤਤ੍ਥ ਵਤ੍ਤਬ੍ਬਾ ਸਿਯਾਤਿ? ਸਚ੍ਚਮੇਤਂ, ਸਾ ਪਨ ਪਾਣਾਤਿਪਾਤਾਦਿਕਾਤਿ ਪਾਕਟੋ ਤਸ੍ਸਾ ਕਮ੍ਮਪਥਭਾਵੋਤਿ ਨ ਵੁਤ੍ਤਂ ਸਿਯਾ. ਚੇਤਨਾਯ ਹਿ ‘‘ਚੇਤਨਾਹਂ, ਭਿਕ੍ਖਵੇ, ਕਮ੍ਮਂ ਵਦਾਮਿ,’’‘‘ਤਿਵਿਧਾ, ਭਿਕ੍ਖਵੇ, ਕਾਯਸਞ੍ਚੇਤਨਾ ਅਕੁਸਲਂ ਕਾਯਕਮ੍ਮ’’ਨ੍ਤਿਆਦਿਵਚਨੇਹਿ ਕਮ੍ਮਭਾਵੋ ਦੀਪਿਤੋ. ਕਮ੍ਮਂਯੇਵ ਚ ਸੁਗਤਿਦੁਗ੍ਗਤੀਨਂ ਤਦੁਪ੍ਪਜ੍ਜਨਸੁਖਦੁਕ੍ਖਾਨਞ੍ਚ ਪਥਭਾਵੇਨ ਪਵਤ੍ਤਂ ਕਮ੍ਮਪਥੋਤਿ ਵੁਚ੍ਚਤੀਤਿ ਪਾਕਟੋ ਤਸ੍ਸਾ ਕਮ੍ਮਪਥਭਾਵੋ. ਅਭਿਜ੍ਝਾਦੀਨਂ ਪਨ ਚੇਤਨਾਸਮੀਹਨਭਾਵੇਨ ਸੁਚਰਿਤਦੁਚ੍ਚਰਿਤਭਾਵੋ, ਚੇਤਨਾਜਨਿਤਤਂਬਨ੍ਧਤਿਭਾਵੇਨ ਸੁਗਤਿਦੁਗ੍ਗਤਿਤਦੁਪ੍ਪਜ੍ਜਨਸੁਖਦੁਕ੍ਖਾਨਂ ਪਥਭਾਵੋ ਚਾਤਿ ਨ ਤਥਾ ਪਾਕਟੋ ਕਮ੍ਮਪਥਭਾਵੋਤਿ ਤੇ ਏਵ ਕਮ੍ਮਪਥਰਾਸਿਭਾਵੇਨ ਵੁਤ੍ਤਾ. ਅਤਥਾਜਾਤਿਯਤ੍ਤਾ ਵਾ ਚੇਤਨਾ ਤੇਹਿ ਸਦ੍ਧਿਂ ਨ ਵੁਤ੍ਤਾ ਸਿਯਾ. ਵਿਚਾਰੇਤ੍ਵਾ ਗਹੇਤਬ੍ਬਂ.
ਪਾਣਾਤਿਪਾਤਾਦੀਨਂ ਆਰਮ੍ਮਣਾਨੇਵ ਤਬ੍ਬਿਰਤਿਆਰਮ੍ਮਣਾਨੀਤਿ ਪਞ੍ਚ ਸਿਕ੍ਖਾਪਦਾ ਪਰਿਤ੍ਤਾਰਮ੍ਮਣਾ ਏਵਾਤਿ ਵਚਨੇਨ ਅਦਿਨ੍ਨਾਦਾਨਾਦੀਨਂ ਸਤ੍ਤਾਰਮ੍ਮਣਤਾਵਚਨਸ੍ਸ ਵਿਰੋਧਂ ਚੋਦੇਤਿ. ਤਥਾ ਹਿ ਵਕ੍ਖਤਿ ‘‘ਵੀਤਿਕ੍ਕਮਿਤਬ੍ਬਤੋਯੇਵ ਹਿ ਵੇਰਮਣੀ ਨਾਮ ਹੋਤੀ’’ਤਿ. ਸਯਮੇਵ ਪਰਿਹਰਿਸ੍ਸਤੀਤਿ ਸਿਕ੍ਖਾਪਦਵਿਭਙ੍ਗੇ ਪਞ੍ਹਪੁਚ੍ਛਕਵਣ੍ਣਨਂ ਸਨ੍ਧਾਯ ਵਦਤਿ. ਤਤ੍ਥ ਹਿ ‘‘ਯਸ੍ਮਾ ਸਤ੍ਤੋਤਿ ਸਙ੍ਖ੍ਯਂ ਗਤੇ ਸਙ੍ਖਾਰੇਯੇਵ ਆਰਮ੍ਮਣਂ ਕਰੋਤਿ, ਤਸ੍ਮਾ ਪਰਿਤ੍ਤਾਰਮ੍ਮਣਾਤਿ ਵੁਚ੍ਚਨ੍ਤੀ’’ਤਿ ਵੁਤ੍ਤਂ.
ਦੁਗ੍ਗਤਤਾਦੀਨੀਤਿ ਆਦਿ-ਸਦ੍ਦੇਨ ‘‘ਅਲਦ੍ਧਾਲਾਭੋ ਲਦ੍ਧਵਿਨਾਸੋ ਇਚ੍ਛਿਤਾਨਂ ਭੋਗਾਨਂ ਕਿਚ੍ਛਪਟਿਲਾਭੋ ਰਾਜਾਦੀਹਿ ਸਾਧਾਰਣਭੋਗਤਾ ਦੁਕ੍ਖਵਿਹਾਰੋ ਸਾਸਙ੍ਕਵਿਹਾਰੋ’’ਤਿ ਏਵਮਾਦਯੋ ਸਙ੍ਗਹਿਤਾ. ਕੇਚਿ ਪਨ ‘‘ਦਿਟ੍ਠੇਵ ਧਮ੍ਮੇ ਭੋਗਜਾਨਿਆਦਯੋ ਨਿਸ੍ਸਨ੍ਦਫਲ’’ਨ੍ਤਿ ਵਦਨ੍ਤਿ.
ਕੁਸਲਕਮ੍ਮਪਥਕਥਾਵਣ੍ਣਨਾ
ਤਾਸਞ੍ਚ ਵਿਰਤੀਨਂ ਚੇਤਨਾਸਮ੍ਪਯੁਤ੍ਤਤ੍ਤਾ ਚੇਤਨਾਦ੍ਵਾਰੇਨ ਸੁਗਤਿਦੁਗ੍ਗਤਿਤਦੁਪ੍ਪਜ੍ਜਨਸੁਖਦੁਕ੍ਖਾਨਂ ਪਥਭਾਵੋ ਯੁਤ੍ਤੋਤਿ ਅਧਿਪ੍ਪਾਯੋ.
ਕਮ੍ਮਪਥਸਂਸਨ੍ਦਨਕਥਾਵਣ੍ਣਨਾ
ਤਥਾਤਿ ਕਮ੍ਮਪਥਪ੍ਪਤ੍ਤਾਨਂ. ਕੇਚੀਤਿ ਧਮ੍ਮਸਿਰਿਤ੍ਥੇਰਂ ਸਨ੍ਧਾਯਾਹ. ਸੋ ਹਿ ਕਮ੍ਮਪਥਪ੍ਪਤ੍ਤਾਨਮੇਵ ਦੁਸ੍ਸੀਲ੍ਯਾਦੀਨਂ ਸੁਸੀਲ੍ਯਾਦੀਨਞ੍ਚ ਕਮ੍ਮਪਥੇਹਿ ਅਤ੍ਥਤੋ ਨਾਨਤ੍ਤਾਭਾਵਦਸ੍ਸਨਂ, ਤੇਸਂ ਵਾ ਫਸ੍ਸਦ੍ਵਾਰਾਦੀਹਿ ਅਵਿਰੋਧਭਾਵੇਨ ਦੀਪਨਂ ਕਮ੍ਮਪਥਸਂਸਨ੍ਦਨਨ੍ਤਿ ਵਦਤਿ. ਕਮ੍ਮਪਥਤਾ ਨਤ੍ਥੀਤਿ ਏਤੇਨ ਯਥਾਵੁਤ੍ਤਾਨਂ ਅਸਂਵਰਸਂਵਰਾਨਂ ਤੇਸਂ ਵਾਦੇ ਕਮ੍ਮਪਥਸਂਸਨ੍ਦਨੇ ਅਸਙ੍ਗਹਿਤਤਂ ਦਸ੍ਸੇਤਿ. ਯੇ ਪਨ ਸਙ੍ਗਹਂ ਲਭਨ੍ਤਿ, ਤੇਸਂ ਗਹਣੇ ਪਯੋਜਨਾਭਾਵਂ ਦਸ੍ਸੇਤੁਂ ‘‘ਤਿਵਿਧ…ਪੇ… ਦਸ੍ਸਨੇਨਾ’’ਤਿ ਵੁਤ੍ਤਂ. ਏਵਂ ਪੁਰਿਮਪਕ੍ਖੇ ਸਙ੍ਖੇਪਤੋ ਦੋਸਂ ਵਤ੍ਵਾ ਦੁਤਿਯਪਕ੍ਖੇਪਿ ਵਤ੍ਤੁਂ ‘‘ਨ ਚ ਦੁਚ੍ਚਰਿਤਾਨ’’ਨ੍ਤਿਆਦਿਮਾਹ. ਤੇਨ ਯੇ ਦੁਚ੍ਚਰਿਤਸੁਚਰਿਤਅਸਂਵਰਸਂਵਰਾ ਅਨੁਚਰੀਯਨ੍ਤਿ, ਤੇਸਂ ਕਾਯਕਮ੍ਮਾਦਿਤਾ ਵਿਧੀਯਤੀਤਿ ਦਸ੍ਸੇਤਿ. ‘‘ਪਞ੍ਚਫਸ੍ਸਦ੍ਵਾਰਵਸੇਨ ਉਪ੍ਪਨ੍ਨੋ ਅਸਂਵਰੋ ਅਕੁਸਲਂ ਮਨੋਕਮ੍ਮਮੇਵ ਹੋਤੀ’’ਤਿਆਦਿਨਾ ਹਿ ਵੁਤ੍ਤਨ੍ਤਿ. ਯਦਿ ਚਾਤਿਆਦਿਨਾ ਅਨਵਸੇਸਪਰਿਯਾਦਾਨਾਭਾਵਮਾਹ. ਉਪ੍ਪਤ੍ਤਿ ਨ ਵਤ੍ਤਬ੍ਬਾਤਿ ਕਮ੍ਮਪਥ…ਪੇ… ਵਦਨ੍ਤੇਹਿ ‘‘ਮਨੋਕਮ੍ਮਂ ਛਫਸ੍ਸਦ੍ਵਾਰਵਸੇਨ ਉਪ੍ਪਜ੍ਜਤੀ’’ਤਿ ਨ ਵਤ੍ਤਬ੍ਬਨ੍ਤਿ ਅਤ੍ਥੋ. ਅਥ ਵਾ ਯਦਿ ਕਮ੍ਮਪਥਪ੍ਪਤ੍ਤਾਨੇਵ ਦੁਸ੍ਸੀਲ੍ਯਾਦੀਨਿ ਕਾਯਕਮ੍ਮਾਦਿਨਾਮੇਹਿ ਅਟ੍ਠਕਥਾਯਂ ਵੁਤ੍ਤਾਨੀਤਿ ਏਵਂ ਵਦਨ੍ਤੇਹਿ ਅਟ੍ਠਕਥਾਚਰਿਯੇਹਿ ਮਨੋਕਮ੍ਮਸ੍ਸ ਛਫਸ੍ਸਦ੍ਵਾਰਵਸੇਨ ਉਪ੍ਪਤ੍ਤਿ ਨ ਵਤ੍ਤਬ੍ਬਾਤਿ ਅਤ੍ਥੋ. ਤਂਤਂਕਮ੍ਮਭਾਵਸ੍ਸ ਵੁਤ੍ਤਤ੍ਤਾਤਿ ‘‘ਤਿਵਿਧਂ ਕਾਯਦੁਚ੍ਚਰਿਤਂ ਅਕੁਸਲਂ ਕਾਯਕਮ੍ਮਮੇਵ ਹੋਤੀ’’ਤਿਆਦਿਂ (ਵਿਭ. ੯੧੩) ਸਨ੍ਧਾਯਾਹ.
ਕਮ੍ਮਨ੍ਤਰਮ੍ਪਿ ਤਂਦ੍ਵਾਰਿਕਕਮ੍ਮਮੇਵ ਸਿਯਾਤਿ ਪਾਣਾਤਿਪਾਤਾਦਿਕਸ੍ਸ ਵਚੀਕਮ੍ਮਾਦਿਭਾਵਮਾਸਙ੍ਕਤਿ. ਤਸ੍ਮਾਤਿ ਯਸ੍ਮਾ ਕੇਸਞ੍ਚਿ ਅਸਂਵਰਾਨਂ ਸਂਵਰਾਨਞ੍ਚ ਕਮ੍ਮਪਥਤਾ ਨਤ੍ਥਿ, ਕਾਯਦੁਚ੍ਚਰਿਤਾਦੀਨਞ੍ਚ ਕਮ੍ਮਪਥੇਹਿ ਨਾਨਤ੍ਤਾਭਾਵਦਸ੍ਸਨੇਨ ਪਯੋਜਨਂ ਨਤ੍ਥਿ, ਨ ਚ ਦੁਚ੍ਚਰਿਤਾਦੀਨਂ ਫਸ੍ਸਦ੍ਵਾਰਾਨਂ ਵਸੇਨ ਉਪ੍ਪਤ੍ਤਿ ਦੀਪਿਤਾ, ਨ ਚਾਯਂ ਵਿਧਿ ਨਿਰਵਸੇਸਸਙ੍ਗਾਹਿਕਾ, ਕਮ੍ਮਾਨਞ੍ਚ ਸਙ੍ਕਰੋ ਆਪਜ੍ਜਤਿ, ਅਟ੍ਠਕਥਾਯਞ੍ਚ ਪੁਬ੍ਬਾਪਰਵਿਰੋਧੋ, ਤਸ੍ਮਾਤਿ ਅਤ੍ਥੋ. ਸਮਾਨਨਾਮਤਾ ਕਾਯਕਮ੍ਮਾਦਿਤਾ. ਸਾਮਞ੍ਞਨਾਮਾਵਿਜਹਨਂ ਕਾਯਕਮ੍ਮਾਦਿਭਾਵਾਵਿਜਹਨਂ. ਉਭਯੇਸਨ੍ਤਿ ਕਮ੍ਮਪਥਾਕਮ੍ਮਪਥਾਨਂ. ਉਪ੍ਪਤ੍ਤਿਪਰਿਯਾਯਵਚਨਾਭਾਵਤੋਤਿ ਏਤੇਨ ਫਸ੍ਸਦ੍ਵਾਰਅਸਂਵਰਦ੍ਵਾਰਾਦੀਨਂ ਤਂਦ੍ਵਾਰਿਕਕਮ੍ਮਾਨਞ੍ਚ ਅਤ੍ਥਤੋ ਨਾਨਤ੍ਤਾਭਾਵੇਪਿ ਤਥਾ ਤਥਾ ਪਵਤ੍ਤਦੇਸਨਾਵਸੇਨ ਤੇ ਵਿਚਾਰਿਤਾਤਿ ਦਸ੍ਸੇਤਿ. ‘‘ਅਕੁਸਲਂ ਕਾਯਕਮ੍ਮਂ ਪਞ੍ਚਫਸ੍ਸਦ੍ਵਾਰਵਸੇਨ ਨ ਉਪ੍ਪਜ੍ਜਤੀ’’ਤਿਆਦਿਕੋ ਦੁਤਿਯਵਿਨਿਚ੍ਛਯੋ.
ਕਾਯੇ ਵਾਚਾਯ ਚ…ਪੇ… ਸਿਦ੍ਧਿਤੋਤਿ ਏਤੇਨ ਚੋਪਨਪ੍ਪਤ੍ਤਂ ਅਕੁਸਲਂ ਮਨੋਕਮ੍ਮਂ ਚੋਪਨਂ ਅਪ੍ਪਤ੍ਤਤੋ ਵਿਸੇਸੇਤ੍ਵਾ ਦਸ੍ਸੇਤੁਂ ‘‘ਕਾਯਵਚੀਕਮ੍ਮ’’ਨ੍ਤਿ ਵੁਤ੍ਤਂ, ਨ ਪਨ ਕਾਯਵਚੀਕਮ੍ਮਭਾਵਤੋਤਿ ਦਸ੍ਸੇਤਿ. ਤੇਨ ਕਾਯਵਚੀਗਹਣਂ ਯਥਾਵੁਤ੍ਤਚੋਪਨਪ੍ਪਤ੍ਤਂ ਏਵ ਵਿਭਾਵੇਤੀਤਿ ਦਟ੍ਠਬ੍ਬਂ. ਤੇਨੇਵਾਹ – ‘‘ਚੋਪਨਪ੍ਪਤ੍ਤਂ ਅਕੁਸਲਂ ਕਾਯਦ੍ਵਾਰੇ ਵਚੀਦ੍ਵਾਰੇ ਚ ਮਨੋਕਮ੍ਮਂ ਹੋਤੀ’’ਤਿ. ਤਂ-ਸਦ੍ਦੇ ਵੁਤ੍ਤੇ ਯਂ-ਸਦ੍ਦੋ ਅਬ੍ਯਭਿਚਾਰਿਤਸਮ੍ਬਨ੍ਧਤਾਯ ਵੁਤ੍ਤੋਯੇਵ ਹੋਤੀਤਿ ਕਤ੍ਵਾ ‘‘ਯਂ ਉਪ੍ਪਜ੍ਜਤੀ’’ਤਿ ਵੁਤ੍ਤਂ. ਉਪ੍ਪਾਦਮਤ੍ਤਪਰਿਚ੍ਛਿਨ੍ਨੇਨਾਤਿ ਛਫਸ੍ਸਦ੍ਵਾਰਿਕਕਮ੍ਮੇਨਾਤਿ ਅਤ੍ਥੋ. ਮਤ੍ਤ-ਸਦ੍ਦੇਨ ਵਿਸੇਸਨਿਵਤ੍ਤਿਅਤ੍ਥੇਨ ਮਨੋਕਮ੍ਮਤਾਵਿਸੇਸਂ ਨਿਵਤ੍ਤੇਤਿ. ਨਿਯਮਸ੍ਸ ਏਵ-ਸਦ੍ਦਸ੍ਸ ਅਕਤਤ੍ਤਾ ‘‘ਕਾਯਵਚੀਕਮ੍ਮਮੇਵ ਹੋਤੀ’’ਤਿ ਅਵੁਤ੍ਤਤ੍ਤਾ. ਇਦਾਨਿ ਨਿਯਮਾਕਰਣੇਨ ਲਦ੍ਧਗੁਣਂ ਦਸ੍ਸੇਨ੍ਤੋ ‘‘ਨ ਪਨ ਸਬ੍ਬਮ੍ਪੀ’’ਤਿਆਦਿਮਾਹ.
‘‘ਨਿਯਮਸ੍ਸ ਅਕਤਤ੍ਤਾ’’ਤਿਆਦਿ ਪੁਰਿਮਨਯੋਤਿ ਅਧਿਪ੍ਪੇਤੋ. ਵਤ੍ਤੁਅਧਿਪ੍ਪਾਯਾਨੁਰੋਧਿਨੀ ਸਦ੍ਦਪ੍ਪਵਤ੍ਤੀਤਿ ਸਮਾਸਪਦੇ ਏਕਦੇਸੋਪਿ ਆਕਡ੍ਢੀਯਤਿ ਅਧਿਕਾਰਵਸੇਨਾਤਿ ਅਧਿਪ੍ਪਾਯੇਨ ‘‘ਕਮ੍ਮ-ਸਦ੍ਦਮਤ੍ਤੇਨ ਸਮ੍ਬਨ੍ਧਂ ਕਤ੍ਵਾ’’ਤਿ ਵੁਤ੍ਤਂ. ਯਂ ਪਨ ਵਦਨ੍ਤੀਤਿਆਦਿਨਾ ਏਤ੍ਥ ਪਦਕਾਰਮਤਸ੍ਸ ਅਯੁਤ੍ਤਤਂ ਦਸ੍ਸੇਤਿ. ਤਤ੍ਥ ਚੇਤਨਾਪਕ੍ਖਿਕਾਨਨ੍ਤਿ ਕਾਯਵਚੀਕਮ੍ਮਭੂਤਚੇਤਨਾਪਕ੍ਖਿਕਾਨਂ. ਸਤਨ੍ਤਿ ਸਮਾਨਾਨਂ. ਤਂਤਂਦ੍ਵਾਰਕਮ੍ਮਪਥਾਨਞ੍ਚਾਤਿ ਇਦਂ ਇਮਸ੍ਸ ਚਿਤ੍ਤਸ੍ਸ ਕਮ੍ਮਪਥਭਾਵੇਨ ਪਵਤ੍ਤਂ ਕਾਲਂ ਸਨ੍ਧਾਯ ਵੁਤ੍ਤਂ, ਨ ਸਬ੍ਬਦਾ, ਕਮ੍ਮਪਥਭਾਵੇਨੇਵ ਪਵਤ੍ਤਨਤੋ. ਚ-ਸਦ੍ਦੇਨ ਵਾ ਅਕਮ੍ਮਪਥਸਙ੍ਗਹੋ ਦਟ੍ਠਬ੍ਬੋ. ਅਥ ਵਾ ਤਂਤਂਦ੍ਵਾਰਾ ਚ ਤਂਤਂਦ੍ਵਾਰਕਮ੍ਮਪਥਾ ਚ ਤਂਤਂਦ੍ਵਾਰਕਮ੍ਮਪਥਾਤਿ ‘‘ਤਂਤਂਦ੍ਵਾਰਾ’’ਤਿ ਪਦੇਨ ਅਕਮ੍ਮਪਥਾਨਂ ਸਂਵਰਾਨਂ ਸਙ੍ਗਹੋ ਦਟ੍ਠਬ੍ਬੋ. ਤੇਨ ਸਭਾਵੇਨਾਤਿ ਮਨੋਕਮ੍ਮਸ੍ਸ ਦ੍ਵਾਰਭਾਵੇਨ, ਨ ਅਤ੍ਤਨੋਤਿ ਅਧਿਪ੍ਪਾਯੋ. ਏਵਮਿਧਾਪੀਤਿ ਚਿਤ੍ਤਜਨਿਤੋ ਚਿਤ੍ਤਸਮ੍ਪਯੁਤ੍ਤਸ੍ਸ ਕਮ੍ਮਸ੍ਸ ਦ੍ਵਾਰਭਾਵੋ ਚਿਤ੍ਤੇਪਿ ਉਪਚਰਿਤੋਤਿ ਅਤ੍ਥੋ. ਵਤ੍ਤਬ੍ਬਮੇਵ ਨਤ੍ਥਿ ਅਨਨ੍ਤਰਪਚ੍ਚਯਭੂਤਮਨੋਰਹਿਤਸ੍ਸ ਚਿਤ੍ਤਸ੍ਸ ਅਭਾਵਤੋਤਿ.
ਦ੍ਵਾਰਕਥਾਵਣ੍ਣਨਾ ਨਿਟ੍ਠਿਤਾ.
ਕਮਾਭਾਵਨਿਯਮਾਭਾਵੇ ਸਬ੍ਬਾਰਮ੍ਮਣਤਾਦੀਤਿ ਆਦਿ-ਸਦ੍ਦੇਨ ਸਙ੍ਗਣ੍ਹਾਤਿ. ਨ ਹਿ…ਪੇ… ਅਤ੍ਥੀਤਿ ਪਧਾਨੇ ਅਸਮ੍ਭਵਤੋ ਅਪ੍ਪਧਾਨਂ ਅਧਿਕਰੀਯਤੀਤਿ ਦਸ੍ਸੇਤਿ.