੧੧. ਪਞ੍ਚਸਤਿਕਕ੍ਖਨ੍ਧਕਵਣ੍ਣਨਾ

ਸਙ੍ਗੀਤਿਨਿਦਾਨਕਥਾਵਣ੍ਣਨਾ

੪੩੭. ਛਿਨ੍ਨਪਾਤਨ੍ਤਿ ਭਾਵਨਪੁਂਸਕਂ, ਤੇਨਾਕਾਰੇਨ ਪਤਨ੍ਤੀਤਿ ਅਤ੍ਥੋ. ਉਪਦ੍ਦੁਤਾ ਚ ਮਯਂ ਹੋਮਾਤਿ ਅਤੀਤਤ੍ਥੇ ਵਤ੍ਤਮਾਨਵਚਨਂ, ਅਹੁਮ੍ਹਾਤਿ ਅਤ੍ਥੋ. ਅਥ ਵਾ ਤਸ੍ਮਿਂ ਸਤਿ ਹੋਮ. ‘‘ਪਞ੍ਚ ਭਿਕ੍ਖੁਸਤਾਨੀ’’ਤਿ ਗਣਨਵਸੇਨ ਵਤ੍ਵਾ ‘‘ਵਸ੍ਸਂ ਵਸਨ੍ਤਾ’’ਤਿ ਪੁਗ੍ਗਲਨਿਦ੍ਦੇਸੋ ਕਤੋ.

ਖੁਦ੍ਦਾਨੁਖੁਦ੍ਦਕਕਥਾਵਣ੍ਣਨਾ

੪੪੩. ‘‘ਵਸ੍ਸਿਕਸਾਟਿਕਂ ਅਕ੍ਕਮਿਤ੍ਵਾ’’ਤਿ ਵਚਨਤੋ ਭਗਵਤੋ ਚਤੁਤ੍ਥਚੀਵਰਮ੍ਪਿ ਅਤ੍ਥੀਤਿ ਸਿਦ੍ਧਂ. ਤੇਨੇਵਾਹ ਚੀਵਰਕ੍ਖਨ੍ਧਕੇ ‘‘ਚਤੁਤ੍ਥਂ ਚੀਵਰਂ ਪਾਰੁਪੀ’’ਤਿ.

੪੪੪. ‘‘ਅਪਿਚ ਯਥੇਵ ਮਯਾ’’ਤਿਆਦਿ ਸਙ੍ਗੀਤਿਯਾ ਅਗ੍ਗਹਣਾਧਿਪ੍ਪਾਯਵਸੇਨ ਵੁਤ੍ਤਂ, ਕਿਨ੍ਤੁ ਸੁਸਙ੍ਗੀਤਾ ਆਵੁਸੋ ਥੇਰੇਹਿ ਧਮ੍ਮੋ ਚ ਵਿਨਯੋ ਚ. ਅਪਿਚਾਹਂ ਨਾਮ ਤਥੇਵਾਹਂ ਧਾਰੇਸ੍ਸਾਮੀਤਿ ਯਥੇਵ ਮਯਾ ਭਗਵਤੋ ਸਮ੍ਮੁਖਾ ਸੁਤਂ ਸਮ੍ਮੁਖਾ ਪਟਿਗ੍ਗਹਿਤਂ, ਤਥੇਵ ਥੇਰੇਹਿ ਭਗਵਤਾ ਸਯਮੇਵ ਏਤਦਗ੍ਗਂ ਆਰੋਪਿਤੇਹਿ, ਤਸ੍ਮਾ ਸੁਸਙ੍ਗਹਿਤਾ ਸਙ੍ਗੀਤੀਤਿ ਵੁਤ੍ਤਂ ਹੋਤਿ.

ਬ੍ਰਹ੍ਮਦਣ੍ਡਕਥਾਵਣ੍ਣਨਾ

੪੪੫. ‘‘ਤ੍ਵਂਯੇਵ ਆਣਾਪੇਹੀ’’ਤਿ ਏਤ੍ਤਕਮੇਵ ਵੁਤ੍ਤਂ, ਥੇਰਾ ਪਨ ਬ੍ਰਹ੍ਮਦਣ੍ਡਂ ਕਤ੍ਵਾ ਵੁਤ੍ਤਂਯੇਵ ‘‘ਛਨ੍ਨਸ੍ਸਾ’’ਤਿਆਦਿਮਾਹਂਸੂਤਿ ਵੇਦਿਤਬ੍ਬਂ. ਏਤ੍ਥ ਚ ਆਨਨ੍ਦਤ੍ਥੇਰੋ ਵਿਯ ਅਞ੍ਞੋਪਿ ਸਙ੍ਘੇਨ ਆਣਤ੍ਤੋ ਭਿਕ੍ਖੁ ਬ੍ਰਹ੍ਮਦਣ੍ਡਕਤੇਨ ਭਿਕ੍ਖੁਨਾ ਆਲਪਿਤੁਂ ਲਭਤਿ, ਨ ਅਞ੍ਞੋ. ਉਜ੍ਜਵਨਿਕਾਯਾਤਿ ਪਟਿਸੋਤਗਾਮਿਨਿਯਾ. ਆਗਮਾ ਨੁ ਖੋ ਇਧ ਆਗਮਾ ਨੁ ਖ੍ਵਿਧ. ਆਗਮਾ ਖੋ ਇਧ, ਤੇ ਓਰੋਧਾ ਇਧ ਆਗਮਾ ਖੋ. ‘‘ਭਿਸਿਚ੍ਛਵੀਤਿ ਭਿਸਿਤ੍ਥਵਿਕਾ’’ਤਿ ਲਿਖਿਤਂ. ਸਬ੍ਬੇਵਿਮੇਤਿ ਸਬ੍ਬਮੇਵ. ਕੁਲਵਂ ਗਮੇਨ੍ਤੀਤਿ ਨਿਰਤ੍ਥਕਵਿਨਾਸਂ ਗਮੇਨ੍ਤਿ. ਕੁਚ੍ਛਿਤੋ ਲਵੋ ਕੁਲਵੋ, ਅਨਯਵਿਨਾਸੋਤਿ ਵੁਤ੍ਤਂ ਹੋਤਿ. ਇਮਾਯ ਖੋ ਪਨ ‘‘ਧਮ੍ਮਵਿਨਯਸਙ੍ਗੀਤਿਯਾ’’ਤਿ ਵਤ੍ਤਬ੍ਬੇ ਵਿਸੇਸੇਨ ਵਿਨਯਸ੍ਸ ਸਾਸਨਮੂਲਭਾਵਦਸ੍ਸਨਤ੍ਥਂ, ਤਸ੍ਮਿਂ ਠਿਤੇ ਸਕਲਸਾਸਨਠਿਤਿਸਿਦ੍ਧਿਦੀਪਨਤ੍ਥਞ੍ਚ ‘‘ਇਦਂ ਵੋ ਕਪ੍ਪਤਿ, ਇਦਂ ਵੋ ਨ ਕਪ੍ਪਤੀ’’ਤਿ ਵਤ੍ਥੁਸ੍ਮਿਂ ਆਰਦ੍ਧਤ੍ਤਾ, ਇਮਿਸ੍ਸਾ ਚ ਪਰਿਯਤ੍ਤਿਯਾ ਵਿਨਯਪਿਟਕਤ੍ਤਾ ‘‘ਵਿਨਯਸਙ੍ਗੀਤਿਯਾ’’ਤਿ ਇਧ ਵੁਤ੍ਤਂ.

ਪਞ੍ਚਸਤਿਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.